Ngaahi Mātuʻa—Hoko ko ha Faʻifaʻitakiʻanga Lelei ki Hoʻomou Fānaú

“ʻE MALAVA ʻe he kau toketā ki he ʻatamaí ke taʻofi ʻenau fakatotolo ʻa ia ʻoku senituli hono fuoloá ki he kī ki hono tauhi hake ha kiʻi tama leleí—ʻo ʻikai koeʻuhi kuo nau maʻu ia ka koeʻuhi ʻoku ʻikai ke ʻi ai ia.” Ko e lau ia ʻa ha makasini Time ʻi hono toe vakaiʻi ha tohi ki he tauhi hake ʻo ha kiʻi tamá. ʻOku taukaveʻi ʻe he tohí ʻoku maʻunimā tefito ʻe he fānaú ʻa e ngaahi mahuʻingaʻia ʻa honau ngaahi toʻumeʻá, ʻo ʻikai ko e ngaahi mahuʻingaʻia ʻa ʻenau ngaahi mātuʻá.

ʻOku ʻikai ha fakaʻikaiʻi ia ʻo e pehē ko e tenge ʻa e toʻumeʻá ko ha ivi mālohi ia ke fekuki mo ia. (Palovepi 13:20; 1 Kolinito 15:33) Naʻe pehē ʻe ha Tokotaha-Faʻu-Kōlomu ko William Brown: “Kapau ʻoku ʻi ai ha foʻi ʻOtua fakamāmani mavahe ki he tokotaha taʻu hongofulu tupú ko e ʻOtua ʻo e fakaangatataú. . . . Ko e hoko ʻo kehe mei he kau taʻu hongofulu tupú ko ha tufakanga ia ʻoku kovi ange ʻi he maté.” ʻI he ʻikai malava ʻa e ngaahi mātuʻá ke ʻai ʻa e moʻui ʻi ʻapí ke fakalotomāfana mo fakafiemālié pe ʻikai ke fakamoleki ha taimi feʻunga mo ʻenau fānaú—ko e ongo tuʻunga ia ʻoku hoko lahi ʻi he māmani moʻumoʻua ʻo e ʻaho ní—ko hono moʻoní, ʻoku nau fakaava ai ʻa e matapā ki he tākiekina ʻa e toʻumeʻá ke ne fakahoko ha maumau ki heʻenau fānaú.

ʻIkai ngata aí, ʻi he lolotonga ʻo e “kuonga fakamui” ni, ʻoku ʻohofia ai ʻa e fokotuʻutuʻu fakaefāmilí koeʻuhi hangē ko ia naʻe tomuʻa tala ʻe he Tohi Tapú, ko e kakaí ʻoku fakafemoʻuekinaʻi ʻe he paʻangá, ngaahi mālié mo e siokitá. Ko ia ai, ʻoku totonu ke tau ʻohovale he sio ki he hoko ʻa e fānaú ʻo “talagataa ki he mātua, mo taefakafetai, mo taemaonioni, o taemaʻu ae ofa oku gali moe kaiga [pe ʻofa fakanatula]”?—2 Timote 3:​1-3, PM.

Ko e foʻi lea “ofa oku gali moe kaiga,” hangē ko ia ʻoku ngāueʻaki ʻi he Tohi Tapú, ʻokú ne fakamatalaʻi ʻa e ʻofa fakaefāmili. Ko e ʻofa ko ʻení ko ha haʻi fakanatula ʻokú ne ueʻi ʻa e ngaahi mātuʻá ke tokanga ki heʻenau fānaú pea mo e fānaú ke nau pīkitai ki heʻenau mātuʻá. Ka ʻi he taimi ʻoku hala ai ʻa e ngaahi mātuʻá ʻi he ʻofa fakanatulá, ʻe hanga leva ʻa e fānaú ki ha feituʻu kehe ki ha poupou fakaeongo—tautefito ki honau toʻumeʻá, ʻa ia ko ʻenau ngaahi mahuʻingaʻiá mo ʻenau ngaahi fakakaukaú te nau ohi nai. Neongo ia, ʻoku faʻa malava ke kalofi ʻa e palopalema ko ʻení kapau ʻoku fakaʻatā ʻe he ngaahi mātuʻá ʻa e ngaahi tefitoʻi moʻoni ʻa e Tohi Tapú ke ne puleʻi ʻenau moʻui fakafāmilí.—Palovepi 3:​5, 6.

Ko e Fāmilí​—Ko ha Fokotuʻutuʻu Fakaʻotua

ʻI he hili hono fakatahaʻi ʻo ʻĀtama mo ʻIvi ko e husepāniti mo e uaifí, naʻe ʻoange ʻe he ʻOtuá kiate kinaua ʻa e fatongia ko ʻení: “Mo fakatupu, mo fakatokolahi, mo fakafonu ʻa mamani.” ʻI he hili iá, naʻe hoko leva ʻa e fāmilí—ʻa e tamaí, faʻeé mo e fānaú—ʻo ʻi ai. (Senesi 1:28; 5:​3, 4; Efeso 3:​14, 15) Ke tokoniʻi ʻa e faʻahinga ʻo e tangatá ki hono tauhi hake ʻenau fānaú, naʻe faʻu ʻe Sihova ʻa e ngaahi tafaʻaki tefito pau ʻo e tauhi fakaemātuʻa fakaenatulá. Neongo ia, ʻi he ʻikai hangē ko e fanga manú, ʻoku fiemaʻu ki he faʻahinga ʻo e tangatá ia ha toe tokoni, ko ia naʻe tokonaki ai ʻe Sihova ha ngaahi tataki kuo tohi maʻanautolu. ʻOku fakakau ai ʻa e ngaahi fakahinohino ki he ngaahi meʻa fakaeʻulungāangá mo e fakalaumālié pea ki hono akonekina totonu ʻo e fānaú.—Palovepi 4:​1-4.

ʻI hono fakahanga tautefito ki he ngaahi tamaí, naʻe pehē ʻe he ʻOtuá: “Ko e ngaahi foʻi folofola ko ʻeni ʻoku ou kouna atu he ʻaho ni ʻe fuesia ʻe ho loto: pea te ke uhuʻi ki hoʻo fanau, pea te ke lea ki ai ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.” (Teutalonome 6:​6, 7; Palovepi 1:​8, 9) Fakatokangaʻi naʻe pau ki he ngaahi mātuʻá ke nau ʻuluaki ʻai ʻa e lao ʻa e ʻOtuá ki honau lotó. Ko e hā naʻe mahuʻinga ai ʻení? Koeʻuhi ko e faʻahinga ako ʻokú ne ueʻi moʻoni ʻa e niʻihi kehé ʻoku ʻikai mei he ngutú ka ʻoku mei he lotó. Ko e toki taimi pē ʻoku faiako ai ʻa e ngaahi mātuʻá mei honau lotó te nau aʻu ai ki he loto ʻo ʻenau fānaú. ʻE toe hoko ʻa e ngaahi mātuʻa peheé ko e ngaahi faʻifaʻitakiʻanga lelei ki heʻenau fānaú, ʻa ia ʻoku nau ʻiloʻi vave ʻa e mālualoí.—Loma 2:21.

ʻOku tala ki he ngaahi mātuʻá ke nau akoʻi ki heʻenau fānaú mei he kei valevalé “ʻa e ako mo e akonekina pea mo e akonaki mo e enginaki ʻa e ʻEikí.” (Efeso 6:​4, The Amplified Bible; 2 Timote 3:15) Mei he kei valevalé? ʻIo! “ʻI he taimi ʻe niʻihi ko kitautolu ngaahi mātuʻá ʻoku ʻikai ke tau ʻoange ki he fānaú ʻa e fakaongoongolelei ʻoku tuha mo kinautolú,” ko e tohi ia ʻa e faʻē ʻe taha. “ʻOku tau fakafuofuahalaʻi ʻenau ngaahi malavá. ʻOku ʻi ai ʻa e malavá ia. Ko kitautolu ngaahi mātuʻá kuo pau ke tau ngāueʻaki ia.” ʻIo, ʻoku manako ʻa e fānaú ke ako, pea ʻi he taimi ʻoku akoʻi ai ʻe he ngaahi mātuʻa anga-fakaʻotuá, te nau toe ako ai ke ʻofa. ʻE ongoʻi ʻe he fānau peheé ʻa e nonga mo e malu ʻi loto ʻi he ngaahi fakangatangata ʻoku fokotuʻu kiate kinautolú. Ko ia ai, ʻoku feinga ʻa e ngaahi mātuʻa lavameʻá ke hoko ko e ngaahi takanga ʻofa, kau fetuʻutaki lelei, pea hoko ko e kau faiako kātaki kae tuʻumaʻu, ʻi hono tokonaki ha ʻātakai lelei ʻa ia ʻoku lakalakaimonū ai ʻenau fānaú.a

Maluʻi Hoʻo Fānaú

ʻI ha tohi ki he ngaahi mātuʻá, naʻe tohi ai ʻe ha pule ako loto-moʻua ʻi Siamane: “ʻOku mau fie fakalototoʻaʻi atu kimoutolu siʻi ngaahi mātuʻa ke mou mahuʻingaʻia lahi ange ʻi hono ʻohake hoʻomou fānaú pea ʻoua ʻe tuku atu ki he televīsoné pe ki he hala puleʻangá ʻa e meʻa ko ia ko ho kaunga tonu [ʻi he fatongia] ki heʻenau tupulaki fakaeangaʻitangatá.”

Ke tuku atu ʻete kiʻi tamá ki he televīsoné pe ki he hala puleʻangá, ko hono moʻoní, ko hono fakaʻatā ia ʻa e laumālie ʻo e māmaní ke ne tākiekina ʻa hono ʻohake ʻo e kiʻi tamá. (Efeso 2:​1, 2) ʻI he fakafepaki hangatonu ki he laumālie ʻo e ʻOtuá, ko e laumālie ko eni ʻo e māmaní, ʻi he hangē ha matangi mālohí, ʻokú ne ʻave ʻa e fanga kiʻi tenga ʻo e fakakaukau “fakamāmani, fakamanu, fakatēmeniō” ʻo fakahū tavale kinautolu ki he ʻatamai mo e loto ʻo e taʻetaukeí pe valé. (Semisi 3:​15, NW) ʻE faai atu pē ʻo hanga ʻe he ngaahi fakakaukau fakatupu ʻauha ko ʻeni hangē ha vaó ʻo fakameleʻi ʻa e lotó. Naʻe fakatātaaʻi ʻe Sīsū ʻa e ola ʻo e meʻa ʻoku tūtuuʻi ʻi he lotó, ʻo pehē: “Ko e tangata lelei ʻoku fisi kituʻa ai ʻa e lelei mei he koloa lelei kuo faʻo ki hono loto; pea ko e tangata kovi ʻoku fisi kituʻa ai ʻa e kovi mei he koloa kovi kuo faʻo ʻi hono loto: he ko e talanoa ʻa e ngutu ʻoku mei he meʻa ʻi he loto ʻoku hulu atu.” (Luke 6:45) Ko ia ai, ʻoku enginaki mai ʻa e Tohi Tapú kiate kitautolu: “ʻI he meʻa kotoa ʻoku ke tauhi, muʻomuʻa ʻa e lama ʻo ho loto, he ʻoku founga mei ai ʻa e ngaahi meʻa ʻoku ʻasi ʻi he moʻui.”—Palovepi 4:23.

ʻOku moʻoni, ko e fānaú ko e fānau, pea ko e niʻihi ʻoku nau hehema ke fusifusiloto, ʻo aʻu ʻo talangataʻa. (Senesi 8:21) Ko e hā ʻe lava ke fai ʻe he ngaahi mātuʻá? “ʻOku tāvani ʻa e vale ʻi he loto ʻo ha tamasiʻi: ko e ʻakau ako te ne vaea ke mavahe,” ko e lau ia ʻa e Tohi Tapú. (Palovepi 22:15) ʻOku vakai ʻa e niʻihi ki heni ko ha tōʻonga anga-fefeka ia kuo ʻosi atu hono taimí. Ko hono moʻoní, ʻoku fakafepakiʻi ʻe he Tohi Tapú ha faʻahinga founga pē ʻo e fakamālohí mo e ngaohikoviʻí. Neongo ʻoku ʻuhinga ʻa e “ʻakau” ʻi he taimi ʻe niʻihi ki he tauteaʻi moʻoni, ʻokú ne fakafofongaʻi ʻa e mafai fakaemātuʻa ʻoku fakahoko tuʻumaʻu kae anga-ʻofa mo feʻungamālie ʻi he tokanga ki ha lelei taʻengata ʻa e fānaú.—Hepelu 12:​7-11.

Kau ki ha Fakafiefia Fakataha mo Hoʻo Fānaú

Ko ha moʻoniʻi meʻa moʻoni ia ke tupu totonu ʻa e fānaú, ʻoku fiemaʻu ke nau vaʻinga mo fakafiefia. ʻOku ngāueʻaongaʻaki ʻe he ngaahi mātuʻa fakapotopotó ʻa e ngaahi faingamālié ke fakafefekaʻi ai ʻa e vahaʻangatae ʻo e mātuʻá mo e kiʻi tamá ʻaki ʻa e kau ki ha fakafiefia fakataha mo ʻenau fānaú ʻi ha taimi pē ʻoku malava ai. Ko ia ai, ʻoku ʻikai ngata pē ʻi he malava ʻe he ngaahi mātuʻá ke tataki ʻenau fānaú ʻi hono fili ʻa e faʻahinga totonu ʻo e fakafiefiá ka ʻoku nau toe lava ke fakahāhā ki he fānaú ʻa hono lahi ʻo ʻenau fakamahuʻingaʻi ʻenau feohí.

ʻOku pehē ʻe ha tamai Fakamoʻoni ʻe taha ʻokú ne faʻa vaʻinga ʻaki ʻa e foʻi pulú mo hono fohá ʻi heʻene foki mai ki ʻapi mei he ngāué. ʻOku manatuʻi ʻe ha faʻē ko e ngaahi vaʻinga ʻi he papa vaʻingá ʻa e manako ʻa ʻene fānaú. ʻOku manatuʻi ʻe ha ʻofefine taʻumotuʻa ʻa e fiefia hono fāmilí ʻi he ʻaka pasikala fakatahá. Ko e kotoa ʻo e fānaú ni ko e kakai lalahi he taimí ni, ka ko ʻenau ʻofa ki heʻenau ngaahi mātuʻá—pea kia Sihová—ʻoku kei mālohi pea ʻoku fakaʻaʻau ki he mālohi ange.

Ko e moʻoni, ko e ngaahi mātuʻa ko ia ʻoku nau fakahāhā ʻi he leá mo e ngāué ʻoku nau ʻofa ʻi heʻenau fānaú mo loto ke feohi mo kinautolú ʻoku maongo loloto ia ʻi he kiʻi tamá naʻa mo e aʻu ki heʻene fuʻu lahí. Ko e fakatātaá, ko e tokolahi ʻo e kau maʻu tohi fakamoʻoni ako ʻo e kalasi ʻe taha ʻo e Akoʻanga Tohi Tapu Taua Leʻo ko Kiliatí naʻa nau pehē ko ʻenau holi ke tuli ki he ngāue fakafaifekau taimi-kakató ʻoku malava ke pehē ko e tupu ia mei he faʻifaʻitakiʻanga mo e fakalototoʻa ʻa ʻenau ngaahi mātuʻá. Ko ha tofiʻa fakaofo ē ki he fānaú pea ko ha tāpuaki moʻoni ē ki he ngaahi mātuʻá! Ko e moʻoni, ko e fānau kotoa pē ʻoku ʻikai ke nau ʻi ha tuʻunga ke hū ki he ngāue fakafaifekau taimi-kakató ʻi heʻenau taʻumotuʻa angé, ka te nau maʻu kotoa ʻa e ʻaonga moʻoni mei he ngaahi mātuʻa manavahē-ʻOtua ʻa ia ʻoku nau hoko ko honau ngaahi kaumeʻa ofi tahá pea ko e ngaahi faʻifaʻitakiʻanga leleí.—Palovepi 22:6; Efeso 6:​2, 3.

ʻOku Lava ke Lavameʻa ʻa e Ngaahi Mātuʻa Taʻehoá

ʻI he ʻahó ni, ʻoku tupu hake ʻa e fānau tokolahi ʻi he ngaahi ʻapi mātuʻa-taʻehoa. Neongo ʻoku tānaki atu ʻeni ki he pole ʻo hono tauhi hake ʻo ha kiʻi tamá, ʻoku lava ke aʻusia ʻa e lavameʻa. ʻOku lava ke maʻu ʻe he ngaahi mātuʻa taʻehoá ʻa e fakalototoʻa mei he faʻifaʻitakiʻanga Fakatohitapu ʻa ʻIunisí, ko ha Kalisitiane Siu ʻo e ʻuluaki senitulí. ʻI he mali ki ha tokotaha taʻetuí, ʻoku ngalingali naʻe ʻikai maʻu ʻe ʻIunisi ha poupou fakalaumālie mei hono husepānití. Ka neongo ia, naʻá ne faʻifaʻitakiʻanga lelei ʻi hono akoʻi ʻo Tīmoté. Ko ʻene tākiekina lelei kia Tīmote mei heʻene kei valevalé, fakataha mo e tākiekina ʻa Loisí, ko e kui fefine ʻa Tīmoté, naʻe fakamoʻoniʻi ʻene mālohi ange ʻaʻana ʻi ha faʻahinga tākiekina kovi pē naʻe haʻu nai mei ha niʻihi ʻo e ngaahi toʻumeʻa ʻo Tīmoté.—Ngāue 16:​1, 2; 2 Timote 1:5; 3:15.

ʻOku tokolahi ʻa e fānau he ʻahó ni kuo nau tupu hake ʻi ha mātuʻa taʻetui pe ʻi ha ʻapi ʻo ha mātuʻa taʻehoa ʻoku nau fakahāhā ʻa e ngaahi ʻulungāanga lelei tatau mo ia naʻe maʻu ʻe Tīmote ʻi heʻene kei talavoú. Ko e fakatātaá, ko Ryan, ko hono taʻu 22 ʻeni pea ko ha faifekau taimi-kakato ia, naʻe tupu hake ʻi ha ʻapi mātuʻa taʻehoa fakataha mo hono taʻokete mo hono tuofefine. Ko ʻenau tamaí ko ha tokotaha ʻolokahōlika, pea naʻá ne liʻaki ʻa e fāmilí ʻi he taimi naʻe taʻu fā ai ʻa Ryan. “Naʻe fakapapauʻi ʻe he fineʻeikí ke hokohoko atu homau fāmilí ʻi he tauhi kia Sihová,” ko e manatu ia ʻa Ryan, “pea naʻá ne fakahoko ʻa e fakapapau ko iá ʻaki ʻa e kotoa ʻo hono lotó.”

“Ko e meʻa ʻe taha,” naʻe pehē ʻe Ryan, “naʻe fakapapauʻi ʻe he fineʻeikí ko kimautolu fānaú naʻa mau maʻu ʻa e tākiekina lelei mei he toʻumeʻá. Naʻe ʻikai ʻaupito te ne fakaʻatā kimautolu ke feohi mo e faʻahinga ko ia ʻoku fakamatalaʻi ʻe he Tohi Tapú ko e ngaahi feohi koví, tatau pē ʻi tuʻa pe ʻi loto ʻi he fakatahaʻangá. Naʻá ne toe fakahūhū kiate kimautolu ʻa e vakai totonu ki he ako fakamāmaní.” Neongo naʻe faʻa femoʻuekina mo helaʻia ʻa e faʻē ʻa Ryan mei he ngāué, naʻe ʻikai taʻofi ʻe he meʻá ni ia mei heʻene mahuʻingaʻia anga-ʻofa ʻi heʻene fānaú. “Naʻá ne loto maʻu pē ke ne feohi mo kimautolu pea talanoa mo kimautolu,” ko e lau ia ʻa Ryan. “Naʻá ne hoko ko ha faiako anga-kātaki kae tuʻumaʻu, ʻo fai ʻene lelei tahá ke fakapapauʻi naʻa mau fai ha ako Tohi Tapu fakafāmili tuʻumaʻu. ʻI he fekauʻaki mo e ngaahi tefitoʻi moʻoni ʻa e Tohi Tapú, naʻe ʻikai ke ne tali ʻe ia ʻa e ‘fakangalokú.’”

ʻI he sio atu ki he kuohilí, ʻoku ʻiloʻi ʻe Ryan ko e tākiekina fakaetangata mālohi taha ʻi heʻene moʻuí pea pehē ki he ongo tamaiki lalahi ʻiate iá naʻe haʻu ia mei ha taha ʻo e ongo mātuʻá naʻe ʻofa moʻoni ʻi he ʻOtuá pea ʻofa ʻi heʻene fānaú. Ko ia ai, ko kimoutolu ngaahi mātuʻa Kalisitiané—mali pe uitou, fakataha pe ʻikai fakataha mo ha hoa taʻetui—ʻoua ʻe loto-siʻi pe fakaholomui fakataimi ʻi hoʻo feinga ke akoʻi hoʻo fānaú. ʻI he taimi ʻe niʻihi, ko e fānau ʻe niʻihi, ʻi he hangē ko e foha maumau-koloá, te nau tafoki nai mei he moʻoní. Ka ʻi heʻenau sio ki he lahi ʻa e taʻemahuʻinga mo e taʻeongoʻi ʻoku ʻi ai moʻoni ʻa e māmaní, te nau tafoki mai nai. ʻIo, “oku eveeva ae tagata agatonu i he ene maonioni: oku monuia a ene fānau kimui iate ia.”—Palovepi 20:​7, PM; 23:​24, 25; Luke 15:​11-24.

[Fakamatala ʻi lalo]

[Puha/Fakatātā ʻi he peesi 11]

Ko e Ongo Mātuʻa ʻa Sīsuú Naʻe Fili ʻe he ʻOtuá

ʻI heʻene fekauʻi hifo hono ʻAló ke ʻaloʻi mai ko ha tangatá, naʻe fili fakalelei ʻe Sihova ʻa e ongo mātuʻa ʻa Sīsuú. Ko e meʻa fakatupu tokangá, naʻá ne fili ha ongo meʻa māʻulalo mo fakakaukau-fakalaumālie ʻa ia naʻe ʻikai te na fakapelepelekoviʻi ʻa Sīsū ka naʻá na akoʻi kiate ia ʻa e Folofola ʻa e ʻOtuá pea mo e mahuʻinga ʻo e ngāue mo e faifatongia mālohí. (Palovepi 29:21; Tangilaulau 3:27) Naʻe akoʻi ʻe Siosefa ʻa Sīsū ki he pōtoʻi ʻo e ngāue fakatufungá, pea ʻoku ʻikai ha veiveiua naʻe kole fakatouʻosi ʻa Siosefa mo Mele kia Sīsū, ko e ʻuluaki fohá, ke tokoni kiate kinaua ʻi hono tokangaʻi ʻo ʻena toe fānau kehé, ʻa ia naʻe ʻikai toe siʻi hifo ʻi he toko onó.—Maake 6:3.

ʻE lava ke ke sioloto atu ki he fāmili ʻo Siosefá ʻoku nau ngāue fakataha ʻi he taimi ʻo e Pāsová ke teuteu ki heʻenau fononga fakataʻu ki Selusalemá—ko ha fononga atu mo e foki ʻi he kilomita ʻe 200 taʻekau ai ha meʻalele fakaonopooni. Ko e moʻoni, ko ha fāmili ʻoku toko hiva pe lahi ange kuo pau ke mateuteu lelei ki ha fononga lōloa pehē. (Luke 2:​39, 41) Neongo ʻa e ngaahi faingataʻá, ʻoku ʻikai ha veiveiua naʻe fakamahuʻingaʻi ʻe Siosefa mo Mele ʻa e ngaahi fononga ko ʻení, ʻo ngāueʻaongaʻaki nai ia ke akoʻi ai ʻena fānaú ʻo fekauʻaki mo e ngaahi meʻa Fakatohitapu naʻe hoko ʻi he kuohilí.

ʻI he lolotonga ʻa e kei tupu hake ʻa Sīsuú, naʻá ne “ʻi ai ʻo anganofo” ki heʻene ongo mātuʻá, pea “naʻe lalaka atu ʻa Sīsū ʻi he poto, mo e lahi ʻo hono sino, pea mo hono ʻofeina ʻe he ʻOtua mo e tangata.” (Luke 2:​51, 52) ʻIo, naʻe fakamoʻoniʻi ʻe Siosefa mo Mele ʻa ʻena taau mo e falala ʻa Sihová. Ko ha faʻifaʻitakiʻanga lelei ē ko kinaua ki he ngaahi mātuʻa he ʻaho ní!—Sāme 127:3.