Fehuʻi mei he Kau Lautohí
ʻOku tala kiate kitautolu ʻi he 1 Sione 4:18: “ʻOku ʻikai ha manavahe ʻia ʻOfa: kaekehe ko e ʻofa haohaoa ʻoku ne kapusi ʻa e manavahe.” Ka naʻe tohi ʻe Pita: “Mou ʻofa ki he haʻa lotu; mou manavahe ki he ʻOtua.” (1 Pita 2:17) ʻOku lava fēfē ke tau fakafetāiaki ʻa e ongo veesi ko ʻení?
Ko e ongo ʻaposetolo fakatouʻosi ʻa Pita mo Sione ʻa ia naʻá na ako fakahangatonu pē meia Sīsū Kalaisi. Ko ia ʻoku lava ke tau tui pau ko e meʻa naʻá na tohí ʻoku fetāiaki. Ko e meʻa ki he ongo veesi ʻoku hā ʻi ʻolungá, ko e kií ko e kehekehe ʻo e manavahē ʻoku lave ki ai ʻa e ongo ʻaposetoló.
Tau ʻuluaki lave ki he enginaki ʻa Pitá. Hangē ko ia ʻoku hā ʻi hono potutohí, naʻe ʻoatu ʻe Pita ki he kaungā-Kalisitiané ha fakahinohino fakamānavaʻi ki heʻenau fakakaukau kiate kinautolu ʻoku maʻu mafaí. Ko hono fakalea ʻe tahá, naʻá ne fakamatala ki he fakakaukau totonu ʻo e moʻulaloa ʻi he ngaahi meʻa ʻe niʻihi. Ko ia, naʻá ne faleʻi ʻa e kau Kalisitiané ke nau moʻulaloa ki he kau tangata ʻoku nau ʻi he ngaahi tuʻunga maʻu mafaí ʻi he ngaahi puleʻanga ʻo e tangatá, ʻo hangē ko e ngaahi tuʻí pe ngaahi kōvaná. (1 Pita 2:13, 14) Ko hono hoko atú, naʻe tohi ʻe Pita: “Ko ia mou fakaʻapaʻapa ki he tangata taki taha; mou ʻofa ki he haʻa lotu; mou manavahe ki he ʻOtua; mou fakaʻapaʻapa ai pe ki he tuʻi.”—1 Pita 2:17.
ʻI he sio ki hono potutohí, ʻoku mahino lelei ko e pehē ko ia ʻe Pita ʻoku totonu ki he kau Kalisitiané ke “manavahe ki he ʻOtua,” naʻá ne ʻuhingá ʻoku totonu ke tau maʻu ha anga-ʻapasia loloto ki he ʻOtuá, ko ha manavahē ke taʻefakahōifua ki he mafai māʻolunga tahá.—Fakafehoanaki mo Hepelū 11:7.
Kae fēfē ʻa e fakamatala ʻa e ʻaposetolo ko Sioné? ʻI he kamataʻanga ʻo e 1 Sione vahe 4, naʻe feangainga ai ʻa e ʻaposetoló mo e fiemaʻu ke sivisiviʻi ʻa e “ngaahi laumalie [“kupuʻi lea,” NW]” ʻo hangē ko ia ʻoku ʻomai ʻe he kau palōfita loí. Ko e ngaahi kupuʻi lea ko iá ʻoku ʻikai ke tupu ia meia Sihova ko e ʻOtuá; ʻoku hoko mai ia pe tapua mei he māmani fulikivanú.
Ko hono faikehekehé, ko e kau Kalisitiane paní ia ʻoku nau “mei he ʻOtua.” (1 Sione 4:1-6) ʻI heʻene peheé, naʻe naʻinaʻi ʻe Sione: “Siʻi ʻofaʻanga, ke tau feʻofaʻaki muʻa: he ko ʻofa ko e tupu mei he ʻOtua ia.” Naʻe ʻuluaki kamata ʻe he ʻOtuá ia ʻa e fakahāhā ʻo e ʻofá—naʻá ne “fekau atu hono ʻAlo moʻo fakatupuhōifuaʻanga koeʻuhi ko ʻetau ngaahi hia.” (1 Sione 4:7-10) ʻOku totonu ke anga-fēfē ʻetau tali iá?
ʻOku mahino lelei, ʻoku totonu ke tau nofo maʻu fakataha mo hotau ʻOtua anga-ʻofá. ʻOku ʻikai totonu ke tau manavahē lahi kiate ia pe tetetete ʻi he ʻamanaki ke ʻunuʻunu atu kiate ia ʻi hono fai ha lotu. Ki muʻa atú naʻe akonaki ʻe Sione: “Kapau ʻoku ʻikai ke fakahalaia kitautolu ʻe hotau loto, ʻoku tau loto lahi ʻi he feangai mo e ʻOtua. Kaeʻumaʻā, ʻilonga ha meʻa ʻoku tau kole ki ai, ʻoku tau maʻu meiate ia, koeʻuhi ʻoku tau tauhi ʻene ngaahi tuʻutuʻuni.” (1 Sione 3:21, 22) ʻIo, ʻoku ʻomai ʻe he konisēnisi leleí kiate kitautolu ʻa e tauʻatāina ke ʻunuʻunu atu ki he ʻOtuá ʻo ʻikai vaivai pe momou koeʻuhi ko e manavaheé. Tupu mei he ʻofá, ʻoku tau ongoʻi tauʻatāina ai ke lea, pe ʻunuʻunu kia Sihova ʻi hono fai ha lotu. ʻI he meʻá ni, “ʻoku ʻikai ha manavahe ʻia ʻOfa.”
Tau fakatahaʻi ange ʻa e ongo fakakaukaú. Ko ha Kalisitiane kuo pau maʻu ai pē ke ne maʻu ʻa e manavahē anga-ʻapasia kia Sihova, ko e tupu ia mei he ʻapasia loloto ki hono tuʻungá, mālohí, mo e fakamaau totonú. Ka ʻoku tau ʻofa foki ki he ʻOtua ko ʻetau Tamaí mo e ongoʻi vāofi mo ia mo e tauʻatāina ke ʻunuʻunu atu kiate ia. Kae ʻikai ke momou ʻi he manavahē kiate iá, ʻoku tau falala ʻoku lava ke tau ʻunuʻunu atu kiate ia, ʻo hangē ko e ongoʻi tauʻatāina ʻe ha tama ke ʻunuʻunu atu ki ha mātuʻa anga-ʻofá.—Sēmisi 4:8.