Ko ha ʻAonga Lahi ē ke Toe Lau ʻa e Meʻa Kuo Fai ʻe Sihová!
1 Naʻe ekinakiʻi ʻa kinautolu ʻi ʻIsilelí ʻe he toko taha tohi fakamānavaʻi ʻo e Sāme 48 ke nau ‘foli ʻa Saione, lau hono ngaahi taua. Sio fakafoʻimeʻa ki hono ngaahi palasi e; koeʻuhi ke nau fakamatala fakaʻaufuli ia ki ha toʻutangata ʻe hoko ʻamui.’ ʻI he ueʻi kinautolu ʻe he ʻofa kia Sihová, naʻa nau mātuʻaki mahuʻingaʻia ai ʻi he fakaikiiki kotoa pē ʻo e senitā ki he pule fakateokalatí ʻi māmani. Ko ha meʻa maʻongoʻonga ē ʻa e ngaahi fakaikiiki ko ʻení koeʻuhi he ko e kolo ʻeni naʻe ʻai ai ʻe Sihova ʻa hono huafá tonu pē! Te nau talanoa ʻo fekauʻaki mo ia, pea tautautefito ke nau mātuʻaki fakapapauʻi ʻe fanongo ʻa honau hakó ʻo fekauʻaki mo e ngaahi meʻa hono kotoa naʻa nau tuku tauhi ʻi honau lotó tonu pē.—Sāme 48:12, 13.
2 ʻOku tau moʻui ʻi he taimi ʻa ia ʻoku ʻikai ke toe senitā ai ʻa e pule fakateokalati ʻa e Mīsaia ʻa Sihová ʻi he Saione fakamāmaní ka ʻoku ʻi Selūsalema fakahēvani ia. (Hep. 12:22) Ko e Puleʻanga ʻo Sihová ʻi he nima ʻo Sīsū Kalaisí kuó ne pule talu mei he 1914. (Fkh. 12:10) ʻOku fakatupu tokanga lahi ʻaupito kiate kitautolu ʻa ʻene ngāué. ʻOku tau toe mātuʻaki mahuʻingaʻia foki ʻi he founga ʻa ia kuo tataki ai ʻe Sihova ʻa ʻene kau sevāniti ʻi he māmaní ke nau fakahoko ʻa hono finangaló ʻi he tuʻunga ko e kau fakafofonga hā mai ʻo e Puleʻanga ko iá. Ko e ngaahi fakaikiiki mālie ʻo fekauʻaki mo e meʻa ko ʻení ʻoku fakamatalaʻi ia ʻi heʻetau tohi foʻou ko e Jehovah‘s Witnesses—Proclaimers of God‘s Kingdom. Ko ha fiefia ē ka ko kitautolu ʻi heʻetau maʻu ia ʻi heʻetau Fakataha Fakavahe ko e “Ngaahi Meʻa ʻOku Akoʻi mei he ʻOtuá”!
3 ʻI he aʻu mai ki Sēpitema 1, kuo ʻosi tuku ange mai ʻa e tohí ʻi he ngaahi lea kehekehe ʻe 20, pea ʻoku lolotonga fai ʻa e liliu lea mo e pulusi ke fakalato ʻa e ngaahi fie maʻu ʻa e faʻahinga ʻoku ngāueʻaki ʻa e ngaahi lea kehe ʻe 13. Kuo maʻu ʻe ho fāmilí ha tatau? ʻOkú ke lau ia? ʻOkú ke talanoa ʻo fekauʻaki mo e ngaahi meʻa ʻokú ke ako mei aí?
4 ʻI he hili ʻa e sio ki he ngaahi fakatātaá mo lau ʻa e ngaahi fakamatala ʻi lalo aí, ʻo hangē ko ia naʻe fokotuʻu mai ʻi he fakatahá, naʻe lau leva ʻe he ngaahi tokouá mo e tuofāfine tokolahi ʻa e kakano ʻo e fakamatalá. Ko e hā ʻa ʻenau ngaahi fakamatalá? Ko e niʻihi pē ʻeni.
5 Naʻe tohi ʻe ha tuofefine: “Ko e tohi pē ʻeni kuo u maʻu ʻoku ou vēkeveke ke lau ke ʻosi koeʻuhi kau toe lau ia. ʻOku ou ʻi he vahe 25 ʻi he taimí ni. Ko e lahi ange ʻo ʻeku lau iá, ko e lahi ange ai pē ia ʻo e loʻimata ʻoku toó pea ʻoku fonu ʻa hoku lotó ʻi he ʻofa kia Sihova. Ko e tohi ʻoku fuʻu fakalototoʻa mo fakatupu ke mālohi ange ai ʻa e tuí.”
6 Ko ha tokoua kuo lahi hake ʻi he taʻu ʻe 40 ʻa ʻene tauhi kia Sihová naʻá ne pehē: “Naʻe ʻikai te u ʻamanekina ʻe fuʻu fakatupu tokanga ʻa e tohí ni. Naʻá ku ʻā ʻo fuoloa ʻi he poʻulí pea u toe ʻā hengihengi ʻo lau ʻa e tohí ʻo ʻosi ʻi he uike pē ʻe ua. Ko e moʻoni ko e taha ʻeni ʻi he ngaahi tohi fakaueʻiloto lahi taha kuo u lau. Ko e ngāue mataotao taha ia ʻi he fekumí ka ko e toe ngāue mataotao taha ia ʻi he fakalototoʻá.”
7 Ko ha Polokalama Lau Tohi Tuʻumaʻu: Ko e niʻihi kuo vave ʻa ʻenau lau ʻa e tohí ʻo ʻosí kuo nau pehē ke toe lau ʻa e tohí kae lau māmālie ange ia.
8 Kapau ʻoku lahi ange ʻi he toko tahá ʻa e memipa ʻi ho fāmilí ʻoku ʻi he moʻoní, te ke loto nai ke ngāueʻaki ha ngaahi konga ʻo e tohí ʻi hoʻomou ako fakafāmilí. Ko e ngaahi fāmili ia ʻe niʻihi naʻa nau kamata ke fai pehē ʻi he ngaahi ʻaho siʻi pē ʻi he hili ʻenau maʻu ʻa ʻenau tataú mei he fakatahá. ʻOku ʻikai ke ʻuhinga ʻeni ia ʻoku totonu ke tuku ʻa e ngaahi meʻa kehe, ʻo hangē ko e teuteu ki he Ako Taua Leʻó. Ka te ke ʻilo ʻoku fuʻu ʻaonga ʻaupito ke lau mo fai ha fetalanoaʻaki ʻi ha toe miniti ʻe 15 pe 20 ʻi he tohi ko e Proclaimers.
9 Ko e ngaahi fāmili kehé ʻoku nau lau ʻa e peesi ʻe ua pe tolu—mahalo pē ko ha kaveinga tokoni ʻe taha pe ua—ʻi he efiafi taki taha ʻi he ʻosi pē ʻenau kai efiafí. Kuo nau lau fakatāutaha nai ʻa e konga lahi ʻo e tohí, ka ʻoku nau maʻu ʻa e ʻaonga mei he lau māmālie ange fakataha mo e faingamālie ke fetalanoaʻaki ʻi he fakamatalá. Ko e niʻihi ʻoku nau fai ʻení kuo nau tauhi kia Sihova ʻi he ngaahi taʻu lahi. ʻI heʻenau lau ʻa e tohí, ʻoku toe langaʻi hake ai ʻa e ngaahi manatu ʻofa. ʻOku māfana ai ʻa honau ngaahi lotó ʻi heʻenau fetalanoaʻaki fakataha ki heʻenau kaunga taki taha ki he ngaahi meʻa naʻe hoko ʻa ia ʻoku nau lau ki aí.
10 Koeʻuhi ko e ngaahi tuʻunga ʻi ho ʻapí, ʻokú ke lau tohi toko taha pē nai. Naʻe pehē ʻe ha tuofefine ʻe taha ʻi heʻene tohi ki he Sosaieté: “Kuo u lau ha konga siʻi pē ʻo e tohi ko ʻení ʻi he pō taki taha ki muʻa pea u toki mohé. ʻOku langaʻi ʻe he tohí ni ʻa e houngaʻia mo e ʻofa loloto ange ki he moʻoní ʻiate au, pea ʻoku ou ongoʻi vāofi ange ai kia Sihova pea ʻoku ou mātuʻaki fakamālō ʻoku ou kau ki heʻene kautahá. ʻOku ou ifoʻia moʻoni ʻi heʻeku lau ʻa e peesi taki taha.”
11 Neongo ʻoku lahi ʻa e tohí, ka ʻoku siʻisiʻi pē ʻa e ngaahi kongá ia. Ko e konga ʻi he kamataʻangá ko e fakamatala fakanounou ka ʻoku fakatupu tokanga ʻo kau ki he ngaahi meʻa mei he ngaahi ʻaho ʻo ʻĒpelí ʻo faai mai ʻo aʻu ki he taʻu 1992—ʻi he ngaahi peesi pē ʻe 108. Ko e lahi ʻo e ngaahi konga kehé ʻoku ʻi he vahaʻa ʻo e ngaahi peesi ʻe 13 ʻo aʻu ki he ngaahi peesi ʻe 150. Ko e ngaahi konga taki taha ko ʻení kuo vahevahe ia ki he ngaahi vahe. ʻOua ʻe lau fakavave kinautolu, kae lau tahataha pē ha konga ʻe taha, ha vahe ʻe taha, pe ko ha kaveinga tokoni ʻe taha; lau ia mo maʻu ʻa e ʻaonga mei ai.
12 Vaheʻi ha Taimi ke Fakakaukau Fekauʻaki mo e Meʻa ʻOkú Ke Laú: Ko e hā ʻa hoʻo taumuʻa ʻi hoʻo lau ʻa e tohí? ʻOku ʻikai totonu ko hoʻo taumuʻá ke lavaʻi pē ʻa e ngaahi peesí—ke ʻosi pē ʻa e tohí. ʻOku ʻi ai ʻi he tohi Proclaimers ʻa e ngaahi fakamatala fekauʻaki mo ho tofiʻa fakalaumālie. ʻOku totonu ke ke ʻiloʻi lelei ia. Vaheʻi ha taimi ke ke fakakaukau ai ʻo fekauʻaki mo e mahuʻinga ʻo e meʻa ʻokú ke laú. ʻI hoʻo toe vakai ki he ngāue ʻa e kau fakamoʻoni ʻa Sihova ʻo e kuonga muʻá, fakakaukau ki ha founga te ke faʻifaʻitaki ai ki heʻenau tuí. (Hep. 12:1, 2) ʻI hoʻo lau ʻo fekauʻaki mo e kamata ʻa e fuʻu tafoki mei he moʻoní, fakatokangaʻi makehe ʻa e ngaahi tōʻanga naʻá ne tauheleʻi ʻa kinautolu naʻa nau tafokí, ko e taumuʻá ke maluʻi ʻa ho tuʻunga fakalaumālie ʻoʻoú. Pea ʻi hoʻo toe lau ʻa hotau hisitōlia ʻi onopooní, fakatokangaʻi ʻa e ngaahi ʻulungāanga fakalaumālie ʻo kinautolu naʻe ngāueʻaki ʻe he ʻOtuá, ʻa e anga ʻenau fakahāhā ko hono fai ʻo e finangalo ʻo e ʻOtuá ko e meʻa mahuʻinga lahi taha ia ʻi heʻenau moʻuí, pea mo e anga ʻo ʻenau tali ki he ngaahi tuʻunga—ko e tuʻunga ʻe niʻihi naʻe fuʻu faingataʻa ʻaupito ia—ʻa ia naʻe fakangofua pē ʻe he ʻOtuá.—Hep. 13:7.
13 Te ke ʻilo ʻoku mālohi ange ʻa e tuí ʻi he fakatotolo ki he ngaahi fakaikiiki ʻoku hā ai ʻa e anga hono taki ʻe Sihova ʻa ʻene kakaí ke maʻu ʻa e mahino maʻalaʻala ʻo e moʻoni ʻo e Tohi Tapú ʻoku tau fiefia ai ʻi he taimí ni. ʻE tupulekina ʻa hoʻo houngaʻia ki he fokotuʻutuʻu hā mai ʻoku ngāueʻaki ʻe Sihová ʻi hoʻo toe maheni ange mo e tupu ʻa e kautahá. Ko e moʻoni te ke ongoʻi fakatoʻoaloto ʻi hoʻo lau ʻo kau ki he anga ʻo hono fakahoko ʻo e kikite, ko e aʻu ʻa e ongoongo leleí ki he feituʻu mamaʻo taha ʻo e māmaní. ʻE māfana ho lotó ʻi he ngaahi meʻa naʻe hokosia ʻe he faʻahinga anga-tonu ʻi he ngaahi feituʻu kotoa ʻi he māmaní ʻa ia naʻa nau ngāue faivelenga ke fanongonongo ʻa e Puleʻangá. ʻE fakamālohiange ai koe ke fekuki mo e ngaahi ʻahiʻahi fakafoʻituituí ʻi hoʻo lau ʻa e meʻa kuo ʻosi kātekina ʻe he ngaahi tokoua mo e ngaahi tuofāfine anga-tonú koeʻuhi pē ko ʻenau ʻofa kia Sihová.
14 ʻI he ʻosi ʻa hoʻo lau ha konga ʻo e fakamatalá, vaheʻi ha taimi ke fetalanoaʻaki fakataha ai ki hono mahuʻingá pea ke toe vakai ki he ngaahi fakaikiikí. Kapau ʻoku ʻi ai haʻo fānau iiki, ʻai ke nau kau ʻi hono fakamatalaʻi ʻa e ngaahi fakatātaá mo tala kiate koe ʻa e meʻa ʻoku nau ʻilo ʻo fekauʻaki mo e kakai ʻoku ʻasi aí. Neongo ʻokú ke lau tohi toko taha pē, feinga ke ke fakahā atu ki he niʻihi kehé ʻa e meʻa ʻokú ke akó. Kapau ʻoku feʻunga mālie, ngāueʻaki ʻa e fakamatalá ʻi he ngaahi toe ʻaʻahí pea mo hono fai ʻa e ngaahi ako Tohi Tapu ʻi ʻapí. Ko hoʻo toe leaʻaki iá ʻe toe maongo ia ki ho ʻatamaí mo ho lotó tonu, pea ʻe toe ʻaonga ia ki he niʻihi kehé foki.
15 Tokanga ki he Ngaahi Fakaikiikí: Ko e ngaahi vahaʻa taimi ʻokú ke vaheʻi ke lau ai ʻa e tohi Proclaimers ʻoku totonu ke fakatou fakafiefia mo ʻaonga.
16 Te ke saiʻia ke ʻaʻahi ho fāmilí ki he ʻuluʻi ʻōfisi ʻo e Kau Fakamoʻoni ʻa Sihová ʻi he māmaní? ʻI he peesi 208-9 ʻoku fakahā ai ʻa e ngaahi nāunau naʻe ngāueʻaki ʻe he Sosaieté ʻi he senituli kuo ʻosí ʻi he feituʻu ko Pittsburgh. ʻI he peesi 216-17 te ke sio ai ki he ngaahi fale naʻe ngāueʻaki ki mui ʻi Brooklyn. Ko e ngaahi fakatātā ʻi he peesi 352-6 ʻe lava ke tokoni ia kiate koe ke ke sio loto ki he ʻuluʻi ʻōfisi ʻi māmani ʻi he ʻaho ní. Ko e vahe 26 mo e 27 ʻoku fakamatala fakaikiiki ai ʻo fekauʻaki mo e ngāue ʻoku fai ʻi Pētelí, pea ko e peesi 295-8 ʻokú ne toe fakamatala lahi ange ki he anga ʻo e moʻui ʻi he ʻapi Pētelí.
17 Ko e tokolahi taha ʻiate kitautolu ʻoku ʻikai malava ke tau ʻaʻahi ki he ngaahi ʻōfisi vaʻa ʻo e Sosaieté. ʻOku ʻai ʻe he peesi 375-401 ʻo e tohi ko e Proclaimers ke ke ʻaʻahi ki he ngaahi feituʻu ʻi māmani. ʻOku ʻikai fie maʻu ke lau fakavave ia. Vaheʻi ha taimi ʻi he ngaahi fonua taki taha ʻo maʻu ʻa e fiefia mei ai. Ngāueʻaki ʻa e mape ʻo e māmaní ʻi he peesi 415-17 ke ʻiloʻi pe ʻoku tuʻu ʻi fē ʻa e feituʻu taki taha. Lau ʻa e ngaahi fakamatala ʻoku hā fakataha ai mo e fakatātā ʻo e ʻōfisi vaʻa taki taha. ʻI he hokohoko ʻo e ngaahi meʻa ʻoku tuʻu aí ʻe lava foki ke ke maʻu ai ʻa e ngaahi fakamatala kehe fakatupu tokanga ʻo fekauʻaki mo e fonua taki taha. Ngāueʻaki ʻa e faingamālie ko ʻení ke ke ʻilo ai ki he ngaahi memipa ʻo ho fāmili fakalaumālie ʻi he ngaahi fonua kehé.
18 ʻI he fakataha fakafiefia ʻa e kakaí, ʻoku nau fai ha ngaahi vaʻinga ʻi he taimi ʻe niʻihi ʻo kau ki he ʻilo ki he ngaahi moʻoniʻi meʻa fakamāmani. ʻIkai ʻoku ʻaonga lahi ange ke ʻilo ki he ngaahi ʻaho ʻoku taau ke tokangaʻi mo e ngaahi meʻa naʻe hoko ʻi he hisitōlia onopooni ʻo e kakai ʻa Sihová? Te ke maʻu ʻa e ngaahi moʻoniʻi meʻa pehē kuo fakahokohoko ʻi he peesi 718-23 ʻi he tohi Proclaimers. ʻOku tokonaki mai ʻe he fakahokohoko ko iá ʻa e makatuʻunga tefito; ʻe lava ke toe tānaki atu ki ai mei he ngaahi fakaikiiki ʻoku hā ʻi he toenga ʻo e tohí. Ngāueʻaki ʻa e ngaahi meʻa ko ʻení ki he toe fakamanatú. ʻE manatuʻi vave ange kinautolu ʻe he fānau ʻi he fāmilí. Ko e niʻihi ʻo kitautolu kau taʻumotuʻa angé ʻe kiʻi tuai ange nai. Ka ko e ngaahi fakaikiiki ia ʻo e hisitōlia fakateokalatí ʻe ʻaonga kiate kitautolu hono kotoa ʻi heʻetau ʻilo ki aí. ʻI he ʻosi hoʻo ʻilo ʻa e ngaahi ʻaho mo e ngaahi moʻoniʻi meʻa tefitó, toe tānaki atu ki he makatuʻunga ko iá. Sio ange pē ko e hā ʻa e lahi ʻo e ngaahi fakaikiiki ʻe lava ke ke manatuʻi ʻo fekauʻaki mo e meʻa taki taha naʻe hoko. Pea talanoa ʻo fekauʻaki mo e kaunga ʻo e meʻa taki taha ki hono fakahoko ʻa e finangalo ʻo e ʻOtuá. Ko hono hokó, fetalanoaʻaki ki he anga ʻo ʻene ueʻi ʻa hoʻo moʻuí tonu pea mo e anga ʻo hoʻo kaunga ki he meʻa ʻoku fai ʻe Sihová.
19 Sio ki he Ngaahi Faingamālie ʻOku ʻAtā Kiate Koé: ʻI hoʻo lau mo fetalanoaʻaki ʻi he Jehovah‘s Witnesses—Proclaimers of God‘s Kingdom, te ke ʻilo ai ʻa hono tatala kiate koe ʻa e fakahoko ʻo e ʻAisea 60:22. ʻOku pehē ʻe he tohí ʻi he peesi 519: “Ko e fakahoko ʻo e talaʻofa ko ia ko e “kiʻi siʻi ʻe hoko ko e toko afe” kuo fakahoko moʻoni ʻo fuʻu hulu ia! Taki taha ʻi he ngaahi fonua lahi ange ʻi he 50 ʻa ia naʻa mo e “kiʻi siʻi” naʻe ʻikai ke ʻi ai—ʻa ia naʻe ʻikai pē ke ʻi ai ha Kau Fakamoʻoni ʻa Sihova ia ai ʻi he 1919, pea naʻe ʻikai pē ke fai ai ha ngāue fakamalanga—ʻi he ʻahó ni ʻoku ʻi ai ʻa e kau fakahīkihiki ʻo Sihova ʻo lahi ange ʻi he taha afé. ʻI he niʻihi ʻo e ngaahi fonua ko ʻení, ʻoku ʻi ai ʻi he taimí ni ʻa e toko laui mano, ʻio, naʻa mo e lahi ange he taha kilú ʻa e Kau Fakamoʻoni ʻa Sihova ʻoku nau fanongonongo faivelenga ai ʻa e Puleʻanga ʻo e ʻOtuá! Kuo hoko ʻi māmani lahi ʻa e Kau Fakamoʻoni ʻa Sihová ko ha “puleʻanga mālohi”—ʻoku nau tokolahi ange ʻi honau tuʻunga ko e fakatahaʻanga fāʻūtaha ʻi māmani lahí ʻi he tokolahi ʻo e kakai ʻo ha fonua pē ʻi he ngaahi fonua taki taha ʻe 80 ʻa ia ʻoku nau puleʻi pē kinautolú.”
20 ʻOku ʻikai pē ke ngata ʻa e ngāue ko e tupulekina fekauʻaki mo e Puleʻangá. Ko hono kehe ʻaupitó, kuo fakavaveʻi ia ʻe Sihova ki ha tuʻunga ʻoku teʻeki ke ʻi ai hano tatau. Ko e hā ʻa hono lahi ʻo haʻo kau ki ai? ʻOkú ke ʻiloʻi moʻoni ʻa e ngaahi faingamālie kotoa pē ʻoku ʻatā mai kiate koé? ʻI hoʻo ako ʻo ʻilo ki he meʻa ʻoku fai ʻe he niʻihi kehé, ʻofa ke ueʻi koe ʻe ho lotó ke ke fakafaingamālieʻi koe ke kau kakato ki he ngāue maʻongoʻonga ʻa ia ʻoku tataki ʻe hotau ʻOtua anga-ʻofá ʻo fakafou mai ʻia Sīsū Kalaisi ʻi hotau ʻahó ni.