Tuʻuaki ʻa e Ongo Makasini Lelei Taha ʻi he Māmaní
1 Ko e taumuʻa ʻo e Ko e Taua Leʻó ke “fakahīkihikiʻi ʻa Sihova ko e ʻOtuá ko e ʻEiki Hau Fakaleveleva ʻo e ʻunivesí.” Ko e Awake! ko ʻene taumuʻá “ke fakamaama fakakātoa ʻa e fāmili. . . . ʻOku langa hake ʻe he makasini ko ení ʻa e falala ki he talaʻofa ʻa e Toko Taha Fakatupú ki ha māmani foʻou melino mo malu.” ʻOku toʻo mai ʻa e ongo fakamatala ko ʻení mei he ongo makasiní tonu. Ko e tulitāupau ki he ngaahi taumuʻa ko iá ʻokú ne ʻai ʻa e ongo makasiní ko e maʻuʻanga ia ʻo e fiemālie ki he laui miliona ʻoku nau lau iá.
2 Ko e ongo makasini ia ʻe tuʻuaki atu ʻi heʻetau ngāue fakamalangá ʻi he lolotonga ʻo ʻEpeleli mo Mē. Ke ola lelei, ʻoku fie maʻú ke tau alāanga mo e ngaahi meʻa ʻoku hā ʻi loto ʻi he ongo makasiní. Lau ʻa e tatau taki taha, ʻo fakatokangaʻi ʻa e ngaahi meʻa mahuʻinga te ke malava ke ngāueʻaki ʻi hono tuʻuaki atu ʻo e ngaahi makasiní. Fakakaukau pe ko e hā ha meʻa ʻoku tokanga ki ai ʻa e kakaí. Ko e hā ʻa e ngaahi meʻa lalahi fekauʻaki mo e anga ʻo e nofo ʻa e kakaí, ngaahi meʻa fakafāmilí pe ko e meʻa ʻoku fakatupu ai ʻa e ngaahi ongoʻi mālohi ʻi he lotó ʻa ia ʻoku faʻa fakakaukau lahi ki ai ʻa e kakai ʻi ho feituʻu? Feinga ke fakakaukau ki ha faʻahinga meʻa te ke malava ʻo leaʻaki ke aʻu ki honau lotó pea langaʻi ʻa e holi ke maʻu ha ʻilo lahi ange.
3 Fakaeʻa ʻa e Taua Leʻo ʻo Maʻasi 1: Ko e tokolahi taha ʻo e kakaí ʻoku nau fakaʻamu ki ha moʻui fuoloa, ha moʻui ʻoku ʻikai ke ʻi ai ʻa e ngaahi palōpalema lahi ʻa ia ʻoku nau faʻa toʻo meiate kinautolu ʻi he taimí ni ʻenau fiefiá.
ʻI he ʻosi hono fai ʻa e lea fakafeʻiloakí, te tau lea pehē ni nai:
◼ “ʻOku ou fie fakahā kiate koe ʻa e fakamatala fakatupu tokanga ʻoku hā ʻi he kupu ko eni ‘Ko e Hā Hono Fuoloa Te Ke Lava ke Moʻui Ai?’ ʻOkú ne pehē: [Lau ʻa e ʻuluaki palakalafi ʻi he kupú ni] ʻOku langaʻi ʻe he meʻá ni ha fehuʻi fakatupu tokanga, ʻikai ko ia? Kae kehe, tuku ke u fakahā atu kiate koe ʻa e lau ʻa e tohi Sāme 37:11, 29 ʻo kau ki he kahaʻú.” ʻI he ʻosi hono lau iá, ʻeke ki he toko taha ʻapí pe ko e hā ʻene fakakaukau ʻo kau ki he talaʻofa ko ʻení. Kapau ʻoku lelei ʻa e anga ʻo ʻene talí, huke ki he kupu “ʻE Ikuʻi ʻa e “Fili Fakamui”!” ʻi he peesi 4, pea ke pehē: “ʻOku ʻi ai ʻa e ngaahi konga Tohi Tapu ʻoku hā kae ʻikai ke hiki fakaʻāuliliki mai. ʻOku ou tui pē te ke fiefia ke ke lau ʻa e ongo kupu ko ʻení pea ke sio ki hoʻo Tohi Tapú ki he ngaahi konga Tohi Tapu ʻoku fakahaá. Te u fiefia ke tuku ʻa e makasiní maʻau.” Kapau ʻoku ngali feʻunga, lave ʻo kau ki he tokoni loto-fiefoaki ʻoku poupouʻi ʻaki ʻetau ngāué pea te ke fiefia ke talitali lelei ha kiʻi tokoni siʻisiʻi.
4 Fakaeʻa ʻa e Taua Leʻo ʻo ʻEpeleli 1: Ko e kupu ʻi he peesi 4 ʻokú ne ʻeke: “Ngaahi Tuʻutāmaki Fakaenatulá—Ko e Fakahoko Mai ʻe he ʻOtuá?”
ʻI he ʻosi hoʻo lea fakafeʻiloakí, te ke lea pehē ni nai:
◼ “ʻI he ngaahi ʻahó ni he māmaní ʻoku lahi ai ʻa e ngaahi tuʻutāmaki, hangē ko ia [fakahā ha faʻahinga meʻa ʻoku lolotonga tokanga ki ai ʻa e koló pe ko ha ʻuluʻi ongoongo]. ʻOkú ne ʻai kitautolu ke tau fifili pe ʻoku ʻuhinga kotoa eni ki he hā. ʻOku fakahā mai ʻi he Mātiu 24:3-14 ha ngaahi fakakaukau ʻe niʻihi.” ʻI he ʻosi hono lau ʻa e ngaahi veesi ko ení, fakahā ʻa e founga ʻe tokoni ai ʻa e Ko e Taua Leʻó kiate kitautolu ke maʻu ʻa e mahino ki he ʻuhinga ʻoku hoko ai ʻa e ngaahi tuʻutāmakí ni.
5 Kapau ʻoku tau loto-māfana ʻo kau ki heʻetau ngaahi makasiní, ko e lelei taha ia ʻi he māmaní, te tau feinga ke tuku atu kinautolu ki he niʻihi kehé koeʻuhi ke nau malava ke maʻu foki ʻa e ʻamanaki fekauʻaki mo e Puleʻangá mo kau ʻi hono hakeakiʻi ʻa Sihova ko e ʻEiki Hau Fakaleveleva ʻo e ʻunivesí.—Sāme 83:18.