Tokoniʻi ke Nau Toe Fanongo “ʻi ha Taimi Ange”
1 “ʻOua ke mau toe fanongo kiate koe ʻi he meʻa ko ia ʻi ha taimi ange.” (Ng. 17:32) Ko e tali ia ʻa e niʻihi ki he malanga ʻiloa ʻa Paula ʻi he Moʻunga Maʻasí. ʻOku meimei tatau pē mo e ʻahó ni, ʻoku loto-lelei ʻa e niʻihi ke toe fanongo ʻo lahi ange ʻo fekauʻaki mo e pōpoaki ʻo e Puleʻangá ʻa ia naʻa tau fetalanoaʻaki ki ai ʻi heʻetau ʻuluaki ʻaʻahí.
2 ʻOku tau fai ʻa e lahi taha ʻo ʻetau faiakó ʻi heʻetau toe foki ke fakatupulekina ʻa e mahuʻingaʻiá. Ko e teuteu leleí ʻe tokoni ia kiate kitautolu ke tau maʻu ha ngaahi ola pau. ʻOku pehē ʻi he peesi 51 ʻo e School Guidebook: “ʻUluaki ʻai ke mahino ʻi he ʻatamaí ʻa e ngaahi ʻuhinga ʻoku nau poupouʻi ʻa e fakamatalá. Feinga ke maʻu ʻa e mahino ki he ngaahi ʻuhinga ko iá. Sio pe ʻe lava ke ke leaʻaki ʻa e ngaahi fakakaukaú ʻi he ngaahi lea pē ʻaʻau. Maʻu ʻa e mahino lelei ki he ngaahi fakamoʻoni faka-Tohitapú. Mateuteu ke ngāueolalelei ʻaki ʻa e Tohi Tapú.”
3 Kapau naʻá ke tuku ʻa e polosiua “ʻI he Mate ha Taha ʻOkú Ke ʻOfa Ai,” te ke leaʻaki nai ha meʻa ʻo hangē ko ʻení:
◼ “ʻI heʻeta talanoa ki muʻa atú, naʻá ta fetalanoaʻaki ai ki he ʻamanaki papau ki he kau maté ʻa ia ʻoku fakahā ʻi he Tohi Tapú. ʻOku fakamatala ʻa e polosiua naʻá ku tuku kiate koé ki he ngaahi konga Tohi Tapu kehe ʻoku tau maʻu mei ai ha fiemālie. [Lau ha konga tohi ʻe taha pe ua ʻoku hā ʻi he puha ʻi he peesi 27 ʻi he polosiuá.] Ko e taumuʻa ʻo e polosiuá ni ko ha tokoni ki he ako fakaekita pe fakafāmili ʻo e Tohi Tapú. Te u fiefia ke fakaʻaliʻali kiate koe ʻa e anga ʻo hono ngāueʻakí.”
4 ʻI he ngaahi ʻaʻahi naʻá ke tuku ai ʻa e tuleki “Ko e ʻUhinga Ke Ke Falala Ai ki he Tohitapu,” ʻoku lava ke ke pehē:
◼ “ʻOku tau mahuʻingaʻia kotoa pē ʻi he meʻa ʻoku tuku tauhi mai ʻi he kahaʻú na. ʻI heʻetau vakai ki he ngaahi tuʻunga lolotonga ʻo e māmaní, ʻokú ke fakakaukau ko e hā ʻa e meʻa ʻe hokó? [Tuku ke ne tali.] Lolotonga ʻoku fakamahalo pē ʻa e tangatá ʻo fekauʻaki mo e meʻa ʻe hokó, ʻoku ʻafioʻi ʻe he ʻOtuá ia ʻa e meʻa totonu pē ʻe hokó. [Lau ʻAisea 46:10.] Te ke ʻohovale nai ʻi he ʻilo ʻoku kikiteʻi ʻe he Tohi Tapú ʻe vavé ni ʻa ʻetau fiefia ʻi he ngaahi tāpuaki ʻo e māmani foʻou palataisi. [Lau ʻa e palakalafi tolu ʻi he peesi 4.] Te u toe fakamatala lahi ange ki he talaʻofa fakaofo ko ʻení.”
5 Kapau ko hoʻo toe ʻaʻahi koeʻuhi ko ha “New World Translation” naʻá ke tuku, mahalo naʻa lelei ke ke ngāueʻaki ʻa e fokotuʻu ko ʻení:
◼ “Naʻá ku ʻoatu hoʻo Tohi Tapu ʻi heʻeku haʻu ko ē, pea naʻá ku palōmesi atu te u toe foki mai ke tokoniʻi koe ke ke maʻu ʻa e ʻaonga mei ai. ʻI he taimi ʻe niʻihi ʻoku tau fifili nai pē ʻe anga-fēfē haʻatau maʻu ha felāveʻi fakakaumeʻa mo e niʻihi kehé. ʻOku ʻomai ʻi he Tohi Tapú ha fakahinohino lelei, pea ʻoku fakafaingofuaʻi ʻe he New World Translation ke maʻu ʻa e meʻa ʻoku fiemaʻu kiate kitautolú. [Huke ki he peesi 1595 ʻo sio ki he kaveinga ko e “ʻOfá.” Fakahanga ʻa e tokangá ki he ngaahi konga tohi ʻo hangē ko e 1 Kolinitō 13:4; Kolose 3:14; mo e 1 Pita 4:8. Fakamatalaʻi fuonounou ʻa e anga ʻo hono ngāueʻaki ʻa e ngaahi tefitoʻi moʻoni ko ʻení pea ʻe lava ke maʻu ai ha ngaahi ola lelei.] Ko e fakatātā ʻeni ʻe taha ʻoku hā mei ai ʻa e anga hono ʻomai ʻi he Tohi Tapú ʻa e ngaahi fakaleleiʻanga ʻaonga ki heʻetau ngaahi palopalemá. ʻI heʻeku ʻaʻahi hono hoko maí, te u fie fakahā ai kiate koe ha founga ʻe taha ʻoku lava ke tokoni ai ʻa e Tohi Tapú kiate kitautolu ke maʻu ʻa e fiefia mo e ʻatamai fiemālie.”
6 ʻOku ʻikai ke toe ʻi ai ha koloa ʻe lahi ange ʻoku lava ke tau ʻoatu ki he niʻihi kehé ʻi he ʻilo kānokano ki he Folofola ʻa e ʻOtuá. ʻOku lava ke akoʻi ʻe he ʻilo peheé ʻa e manavahē kia Sihová mo fakalototoʻaʻi ʻa e kakaí ke ʻaʻeva ʻi hono halá, ʻa ia ʻoku maʻu ai ʻa e ngaahi tāpuaki taʻengatá.—Pal. 2:20, 21.