ʻOku Taimi Totonu ʻa e Ongoongo ʻo e Puleʻanga ke Tufaki ʻi Māmani Lahi
1 ʻI he Sāpate ʻo ʻEpeleli 23, ʻe fai ai ha malanga fakahāhā makehe ʻi ha kaveinga fakatupu tokanga “ʻOku Ofi ʻa e Ngataʻanga ʻo e Lotu Loí.” ʻI he fakaʻosi ʻo e fakataha ʻi he ʻaho ko iá, ʻe tukuange mai ai ha tuleki peesi ʻe fā fakatupunga fakakaukau ko e Ongoongo ʻo e Puleʻanga. Ko e pōpoaki taimi totonu ʻoku ʻi aí ʻe fai hano tufaki ʻi māmani lahi ʻi he lolotonga ʻo e vahaʻa taimi ko e uike ʻe tolu mei ʻEpeleli 24 ki Mē 14.
2 ʻOku puputuʻu ʻa e kakaí ʻi he feituʻu kotoa pē ʻo e māmaní. Tatau ai pē pe ʻoku nau nofo ʻi fē, kuo fakahohaʻasi kinautolu ʻe he ngaahi palopalemá. ʻOku mahuʻinga moʻoni ʻa e Ongoongo ʻo e Puleʻanga ki he faʻahinga ʻoku nau tokanga moʻoni ʻo fekauʻaki mo e meʻa ʻoku hokó, koeʻuhí ʻe taki ai kinautolu ki he Folofola ʻa e ʻOtuá ko e matavai ia ʻo e fakahinohino ki he tangatá ʻa ia ʻoku ʻikai lava ke hala. (Sāme 119:105) ʻOku tau hanga atu kotoa ke maʻu ha tatau ʻo e Ongoongo ʻo e Puleʻanga ʻi hano tuku mai ʻi ʻEpeleli 23. ʻI he taimí ni, ʻoku lahi ʻa e meʻa ke fai ʻi he teuteu ki he feingatau lahi ʻaupito ko ʻeni ʻi he uike ʻe tolú.
3 Fakalototoʻaʻi Kātoa ke Kau Faivelenga: Ko hai nai ʻe kau ki he ngāué? Ko e moʻoni ko e tokotaha kotoa pē kuo ʻosi hoko ko ha tokotaha malanga ʻe vēkeveke ke fai pehē! Fēfē ʻa e kau ako Tohi Tapu ʻoku nau kau maʻu pē ki he ngaahi fakataha ʻa e fakatahaʻangá? Ko e niʻihi kuo fuoloa mai ʻa ʻenau feohi mo kitautolu pea ʻoku nau fakalakalaka ai pē. Kapau ʻoku nau moʻui ʻo fakatatau mo e ngaahi tefitoʻi moʻoni Fakatohitapú, ʻoku nau taau ke lau ko e kau fanongonongo ʻo e Puleʻanga? Ko e tokotaha malanga ʻokú ne fai ʻa e ako Tohi Tapú ʻe lava nai ke talanoa mo e tokotaha akó ʻo fekauʻaki mo e meʻa ko iá, pea kapau ʻoku loto ʻa e tokotaha ako ke kau ʻi he ngāue fakamalangá, ʻe toe fakamanatu ʻe ha toko ua ʻo e kau mātuʻá mo ia ʻa e fakamatala ʻi he peesi 98 mo e 99 ʻo e tohi Organized to Accomplish Our Ministry. ʻOku totonu ke fai ʻeni ʻi he faingamālie vave tahá koeʻuhi kae lava nai ke kau kakato ʻi he feingatau ʻa kinautolu te nau taau ke hoko ko e kau malanga taʻepapitaisó. Ko e kau ako Tohi Tapu ʻoku teʻeki ai ke taau ke lau ko e kau malanga taʻepapitaisó ʻe kei fakalototoʻaʻi nai ke nau ʻoatu ʻa e Ongoongo ʻo e Puleʻanga taimi totonú ni ki he ngaahi maheni pe ngaahi mēmipa ʻo e fāmilí.—Sio ki he Watchtower, Nōvema 15, 1988, peesi 17, palakalafi 8.
4 ʻOku ʻikai ke faingataʻa ʻa e ngāué ni; ʻoku lava ke kau ki ai ʻa e tokotaha kotoa pē. ʻE fakakau nai ʻe he ngaahi mātuʻá ha ngaahi taimi fakaangaanga mo e Ongoongo ʻo e Puleʻanga ko ha konga ia ʻo e ako Tohi Tapu fakauike ʻa e fāmilí koeʻuhi ke mateuteu lelei ʻa e ngaahi mēmipa ʻo e fāmilí ke tuʻuaki ia mei he fale ki he fale. ʻOku faʻa lelei taha ʻa e tuʻuaki faingofuá. ʻI he ʻosi ha lea-kamata nounou, tuʻuaki ʻa e Ongoongo ʻo e Puleʻanga ki he tokotaha ʻapí pea fakalototoʻaʻi ia ke ne lau. ʻI he hā mei he tokotaha ʻapí ʻa e mahuʻingaʻiá, ʻai ha lekootí koeʻuhi ke ke toe ʻaʻahi ʻo fakatupulekina ʻa e mahuʻingaʻia ko iá. (1 Kol. 3:6, 7) Ko e kī ki he lavameʻá ke ʻai ha tuʻuaki faingofua mo ʻosi teuteuʻi lelei.
5 ʻE “tupulekina maʻu ai pe” ʻa e meʻa ke fai ʻi he lolotonga ʻo ʻEpeleli mo Mē. ʻI he tatau ʻo e Ko ʻEtau Ngāue Fakafaifekau ʻo e Puleʻanga ʻi he māhina kahaʻú, ʻe ʻomai ai ha toe fakamatala ʻi he fakalahi kuo fakakaveinga ko e “Tupulekina Maʻu Ai Pe ʻi he Ngaue ʻa e ʻEiki.”—1 Kol. 15:58.