Ko e Hā Te Ke Leaʻaki ki ha Tokotaha Lotu-Hinitū?
1 Hangē ko ia ʻokú ke ʻiloʻí, ʻoku ʻi ai ʻa e kau Hinitū tokolahi ʻoku nofo ʻi he ngaahi fonua kehekehe, ʻo kau ai ʻa e fonuá ni. ʻOku ʻuhinga ʻení, ʻe faifai atu pē ʻo ke fetaulaki nai mo ha tokotaha Hinitū ʻi ho feituʻu ngāue fakafaifekaú. ʻI hoʻo fetaulaki mo iá, ʻe lava fēfē ke ke fakahoko ʻa e ʻaʻahi ko iá?
2 Manatuʻi ʻa e Ngaahi Poini ko ʻEní: ʻOku pehē ʻe he kau misinale ʻoku nau lavameʻa ʻi he faifakamoʻoni ki he kau lotu-Hinituú ʻoku ʻikai ke fiemaʻu ke fai ha ako loloto fekauʻaki mo e lotu-Hinituú kae toki fai ha fakamoʻoni ola lelei. Ko ha tuʻuaki faingofua mo fakapotopoto fekauʻaki mo e moʻoní ʻokú ne faʻa ʻomai ha tali pau. Kole ange ke ke ʻuluaki lea ki he ʻulu ʻo e fāmilí. Kapau ʻokú ne tali lelei, ʻe faingofua ange ai ke ke faifakamoʻoni ki he ngaahi mēmipa kehe ʻo e fāmilí. ʻI he kamataʻangá, fakaʻehiʻehi mei he fokotuʻu ange ʻokú ke ʻalu atu mo ha pōpoaki ʻoku māʻolunga ange ia ʻi he meʻa ʻoku tui ki ai ʻa e tokotaha-ʻapí pe ʻokú ke fiemaʻu ke fakamatalaʻi ʻa e ʻOtua moʻoni pē tahá pe ngaahi tohi māʻoniʻoni motuʻa tahá. Koeʻuhi ʻoku fakakaukau ʻa e kau lotu-Hinitū tokolahi ko e Tohitapú ko ha tohi ʻo e Hihifó, ʻe lava ke ke fakataʻeʻaongaʻi ʻa e tomuʻa hehema ke fehiʻa maí ʻaki hono fakamatalaʻi ʻo pehē ʻoku ʻikai te ne poupouʻi ʻa e fakavahavahaʻá pe ko e māʻolunga ange ʻa e matakali ko ē ʻi hē.
3 Ngāueʻaki ʻa e Meʻangāue Totonú: Kuo teuteu tefito ʻa e ongo polosiua ʻe ua ki he kau lotu-Hinituú. Ko e Why Should We Worship God in Love and Truth? ʻoku pulusi ia ʻi he lea faka-Kualatí mo e lea faka-Punisapí. Ko e Our Problems—Who Will Help Us Solve Them? ʻoku pulusi ia ʻi he ngaahi lea faka-ʻInitia kehe ʻe 11. ʻOku ala maʻu fakatouʻosi ia ʻi he lea faka-Pilitāniá. Ko e ongo polosiua ko e “Vakaí! ʻOku Ou Fakafoʻou ʻa e Meʻa Kotoa Pe” mo e Does God Really Care About Us? kuo toe fakamoʻoni ʻena ola lelei ʻi he faifakamoʻoni ki he faʻahinga ʻo e ʻātakai ʻo e lotu-Hinituú. ʻE lava ke ngāue lavameʻa ʻaki ʻa e polosiua Fiemaʻu pea mo e tohi ʻIlo ke fai ai ha ngaahi ako Tohitapu.
4 Fokotuʻu ha Makatuʻunga ki ha Felotoi: ʻOku ʻikai faingataʻa ke maʻu ha makatuʻunga ki ha felotoi mo e kau lotu-Hinituú. ʻOku nau tui ʻoku tau moʻui ʻi ha taimi ʻoku aʻu ai ʻa e fulikivanú ki hono tumutumú pea ʻe tafiʻi atu ai ʻe he ʻOtuá ʻa e ngaahi palopalema ʻo e māmaní ʻo fakafou ʻi ha fakatuʻutāmaki lahi ʻe hoko mai ʻi he kuonga ʻo e moʻoní. ʻOku lava ke ke sio ki he faingofua ange ʻa e ngaahi tui ko ʻení ke fakafehoanaki ki he ngaahi akonaki ʻa e Tohitapú fekauʻaki mo e ngaahi ʻaho fakaʻosí, ko e mamahi lahí, pea mo e māmani foʻou ka hoko maí. Koeʻuhi ko e vakai ʻa e kau lotu-Hinitū tokolahi tahá ko e moʻuí ko ha konga ia ʻo e ngaahi palopalema ʻoku ʻikai ke ʻi ai hano fakaleleiʻangá, te nau mahuʻingaʻia ʻi he ngaahi tuʻunga-lea fekauʻaki mo e moʻui fakafāmilí, faihiá mo e maluʻangá, pea mo e meʻa ʻoku hoko ʻi he maté. Ko ha ongo sīpinga tuʻuaki ʻeni te ke ʻahiʻahiʻi nai.
5 ʻE fakamānako nai ʻeni ki ha tangata nofo fāmili:
◼ “ʻOku ou ʻaʻahi holo he kakai ʻoku nau hohaʻa fekauʻaki mo e tuʻunga ʻo e moʻui fakafāmilí ʻi he ngaahi fonua lahi he ʻahó ni. Ko e hā ʻokú ke pehē ʻe tokoni ki hono tauhi maʻu ke fakataha ʻa e fāmilí? [Tuku ke ne tali.] ʻOku ʻiloʻi ʻe he kakai ʻe niʻihi ʻa e meʻa ʻoku leaʻaki ʻe he ngaahi konga tohitapu faka-Hinituú fekauʻaki mo e fāmilí, ka ʻoku teʻeki ai ke nau maʻu ha faingamālie ke fakafehoanaki ʻeni mo e meʻa kuo leaʻaki ʻe he Tohitapú fekauʻaki mo e kaveingá. Te u saiʻia ke vahevahe mo koe ʻa e fakakaukau ko ʻení ʻi he Kolose 3:12-14.” ʻI he hili hono lau ʻa e konga Tohitapú, fakahā ange ki he tokotaha-ʻapí ʻa e vahe 15 ʻo e tohi ʻIlo peá ke pehē ange: “Te u saiʻia ke fakamoleki ha taimi nounou ke ta lau fakataha ʻa e vahe ko ʻení.”
6 ʻE tali nai ʻeni ʻe ha kiʻi talavou:
◼ “ʻOku ʻikai ha veiveiua ʻokú ke tui ki he ʻOtuá. Ko e hā hoʻo fakakaukau ki he taumuʻa ʻa e ʻOtuá kiate kitautolú?” Tuku ke ne tali. Pea lau ʻa e Senesi 1:28, peá ke pehē ange: “ʻOku fuʻu tokolahi pea fakahohaʻasi ʻaki ʻa e ngaahi palopalemá ʻa e ngaahi feituʻu lahi ʻi he māmaní. ʻOkú ke fakakaukau ʻe finangalo lelei ʻa e Tokotaha-Fakatupú ke tokoniʻi kitautolu ke solova ʻa hotau ngaahi palopalemá?” ʻI he hili ʻa e fanongo ki he talí, huke ki ha tohi feʻungamālie.
7 Fiefia ʻi ha Ngaahi Ola Pau: Naʻe fakaofiofi atu ha tangata lotu-Hinitū taʻu 22 ki ha tuofefine naʻá ne faifakamoʻoni ʻi ha māketi ʻo kole ange ki ha ako Tohitapu. Naʻá ne fakamatalaʻi ange kiate ia ʻo pehē ʻi he taʻu ʻe valu kuohilí naʻá ne fanongo atu ai ki ha fetalanoaʻaki faka-Tohitapu ʻi he vahaʻa ʻo ʻene fāʻeé mo ia. Neongo naʻe faʻa maongo kiate ia ʻa e ngaahi tali ʻaonga ʻa e Tohitapú ki he ngaahi palopalema ʻa e faʻahinga ʻo e tangatá, naʻe ʻikai ke mahuʻingaʻia ʻene faʻeé peá ne ongoʻi ai naʻá ne fuʻu kei siʻi ke tulimui ki he moʻoní ʻiate ia pē. ʻI he taimi ní, ʻi he tuʻunga ko e tokotaha lahí, naʻá ne fiemaʻu ke ne toe ako lahi ange. Naʻe ʻikai ke mole noa ai ʻa e taimi ʻo e kiʻi talavoú. ʻI he ʻaho pē ʻe 23, naʻe ʻosi ai ʻene ako ʻa e tohi ʻIlo, pea ʻi he māhina pē ʻe fā hili ʻene fetaulaki mo e tuofefiné ʻi he māketí, naʻá ne kole ai ke ne papitaiso!
8 Naʻe fai ʻe ha tokoua ha ako mo ha tangata lotu-Hinitū naʻá ne fetaulaki mo ia ʻi ha lēlue. Naʻe hokosia ʻe he tangatá ha ngaahi faingataʻa ʻi heʻene nofo malí. Naʻá ne maʻu foki mo e palopalema ʻi he inu ʻo fuʻu lahí. Naʻe loto-lelei ʻa e tangatá ke ʻaʻahi ange kiate ia ʻa e tokotaha Fakamoʻoní peá na vahevahe ʻi he akonaki ʻa e Tohitapú fekauʻaki mo e moʻui fakafāmilí. Naʻe fakamānako kiate ia ʻa e ngaahi akonaki ʻa e Tohitapú ki he ʻulungāngá, peá ne loto-lelei ki ha ako Tohitapu. Ko ia mo hono fāmilí naʻa nau kamata ke nau maʻu fakataha ʻa e ngaahi fakatahá. Ki mui mai aí, naʻa nau vahevahe atu ʻa e moʻoní ki he ngaahi kaumeʻá mo e ngaahi kāingá. Ko hono fakalūkufuá, ko e toko ono ʻi he faʻahingá ni kuo nau tali ʻa e moʻoní!
9 Ko e finangalo ia ʻo e ʻOtuá “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) ʻOku kau ai ʻa e kau tangata mo e kau fefine ʻoku taku ko ha lotu ʻikai ke Kalisitiané, hangē ko e kau lotu-Hinituú. Kapau ʻoku ʻi ai ha kau lotu-Hinitū ʻi ho vāhenga-ngāué, ko e hā ʻoku ʻikai ke ʻaʻahi ai kiate kinautolu he taimi ní pea ngāueʻaki ʻa e ngaahi fokotuʻu ʻe niʻihi ʻoku ʻoatu ʻi he kupu ko ʻení?