Ko ha Monū ʻOku ʻAtā ke Maʻu ʻe he Kau Talavoú
1 Ko e tokolahi kuo nau hoko he taimí ni ko e ngaahi mātuʻá ʻoku nau manatu ʻofa ki ha monū naʻa nau fiefia ai ʻi he tuʻunga ko e fānau naʻe tupu hake ʻi he moʻoní—ko e ngāue ʻAho Makasiní. Ko e ngāue ko iá naʻe fokotuʻutuʻu ia ʻi he ngaahi fakatahaʻanga kotoa pē ʻi he 1949. ʻI he ʻaho ʻe taha ʻi he uike, ko e tokotaha kotoa pē naʻe pau ke tokangataha ki hono tufa ʻo e Taua Leʻo mo e Awake! ʻi he ngaahi halá, mei he fale ki he fale, mei he falekoloa ki he falekoloa, pea ʻi he ngaahi founga kehe. Ko e kau malanga kei siʻi angé naʻa nau fakatuʻotuʻa atu tautefito ke kau ʻi he ngāue ko ʻení koeʻuhí he naʻe ʻoange ai kiate kinautolu ha faingamālie ke kau ʻi he ngāue tatau ʻo hangē ko e kakai lalahi ʻi he fakatahaʻangá. Naʻe hoko moʻoni ʻeni kiate koe ʻi hoʻo kei tamasiʻí?
2 Fakakau Hoʻo Fānaú: Ko e fānau kei iiki ʻaupito ʻa ia ʻoku teʻeki ke nau mateuteu ke kamata ha fetalanoaʻaki Fakatohitapu ʻi he matapaá ʻoku kei malava pē ke nau tuʻuaki ʻa e ngaahi makasiní. ʻOku fiemaʻu ke ako pē ha tuʻuaki faingofua ʻo e ngaahi sētesi nounou ʻe niʻihi. Ko ha fakamatala nounou, mahalo ʻi ha fakatātā ʻo e takafí, ʻe feʻunga nai pē ia. Ko e ngaahi ʻapi tokolahi ʻoku nau mateuteu ke tali ʻa e ongo makasiní mei heʻetau fānau īkí, ʻo nau faʻa fai ʻa e fakaongoongolelei fekauʻaki mo e loto-totonu pea mo e ʻulungaanga lelei ʻo e toʻutupu ko ʻení. ʻI ha tokoni siʻisiʻi, ko e ngāue ko ʻení ko ha meʻa ia ʻoku lava ke fai lelei ʻaupito ʻe he fānaú, ʻo fai ai ha tokoni mahuʻinga ki hono fakamafola atu ʻa e pōpoaki ʻo e Puleʻangá. Ko e moʻoni, ʻi he tupu hake ʻa e fānaú ʻo motuʻa angé, ko ʻenau ngaahi mātuʻá te nau saiʻia ke tokoniʻi kinautolu ke nau hokohoko atu ʻa e laka ki muʻa ʻi hono fakatupulekina ʻenau ngaahi pōtoʻi fakaefakamoʻoní.
3 Ko Manuel naʻá ne kamata malanga mei he matapā-ki-he-matapā ʻi he taimi naʻá ne taʻu tolu aí. Naʻe akoʻi ia ʻe heʻene ongo mātuʻá ke ne ako maʻuloto ha tuʻuaki nounou. Naʻá ne malanga faivelenga fakataha mo kinaua, ʻo tufa ʻa e ngaahi makasini, ngaahi polosiua, mo e ngaahi tuleki lahi. Naʻá ne toe faifakamoʻoni ʻi he founga ʻikai anga-mahení. ʻI he taimi ʻe taha ʻi hono ʻave ia ʻe heʻene ongo mātuʻá ki ha paʻake ʻo fakaʻeveʻevaʻi, naʻá ne ngāueʻaki ʻa e faingamālié ke tufa ai ha ngaahi tuleki ki he kakai kehe naʻa nau ʻi aí. Neongo ʻokú ne fuʻu kei siʻi, ko e loto-māfana ʻa Manuel ki he ngāue fakafaifekaú ko ha matavai ia ʻo e fakalototoʻa moʻoni ki heʻene ongo mātuʻá pea ki he fakatahaʻangá fakalūkufua.—Pal. 22:6.
4 Ko e Tokonaki kotoa pē kuo vaheʻi ia ko ha “ʻAho Makasini” ʻi he 2000 Calendar of Jehovah’s Witnesses. Ngaahi mātuʻa, ʻoku mau fokotuʻu atu ke mou toe fakafoʻou hoʻomou mahuʻingaʻia ʻi he ngāue ko ʻení, ʻo tokoniʻi hoʻomou fānaú ke nau kau maʻu pē ʻo ka malava ki he monū ʻo e ngāue ko ʻení.