ʻOkú Ke Kātaki?
1 “ʻOku ʻikai haʻaku toe fiefia ʻoku lahi ʻi he meʻa ni, ʻa ʻeku . . . fanau, ʻoku nau laka ʻi he moʻoni.” (3 Sione 4) Ko e kātaki ʻa e fānau fakalaumālie ʻa Sioné naʻe ʻomai ai ʻa e fiefia lahi kiate ia. Ko ha fiefia ē kuo pau ki heʻetau Tamai fakahēvaní ke sio ki he laui miliona ʻo ʻene fānau ʻoku ʻamanekiná ʻoku nau “laka ʻi he moʻoni”!—Pal. 23:15, 16; 27:11.
2 Lolotonga ko e kakai ʻa e ʻOtuá ʻi he tuʻunga fakalūkufuá ʻoku nau kīvoi ʻi he ngāue faivelenga faka-Kalisitiané, kuo holomui ʻo māmālie hifo ʻa e niʻihi. Neongo naʻe ivi mālohi nai ʻa e faʻahingá ni ʻi he taimi naʻa nau fuofua ako ai ʻa e moʻoní, ʻi he ʻosi atu ʻa e ngaahi taʻú, kuo nau nofo hifo ki ha sīpinga ʻo e kau siʻisiʻi pē pe tātātaha ʻi he ngāue ngaohi-ākongá.
3 ʻOku hā mahino kuo fakaholomui nai ʻa e niʻihi koeʻuhí ko e ngaahi fakangatangata fakaesinó pea mo e ngaahi nunuʻa ʻo e hoholo ke motuʻá. Kae kehe, ʻoku totonu ke fakaongoongoleleiʻi kinautolu ʻi heʻenau kātakí. ʻOku nau fai ʻa e meʻa ʻoku nau malavá. Ka ko e tokotaha taki taha kuo fakatapui ʻene moʻuí ki he ʻOtuá ʻoku totonu ke ne ʻeke hifo kiate ia: ‘Kuó u fakaʻatā ʻa au tonu ke u hangataha ʻo fuʻu lahi ki he ngaahi ngāue fakafoʻituituí kae maʻu ʻe he ngaahi meʻa ʻo e Puleʻangá ha konga siʻisiʻi pē ʻi heʻeku moʻuí? ʻOku ou hoko nai ʻo kiʻi “māmāfana,” pe ʻoku ou kei feinga “tōtōivi”?’ (Fkh. 3:15, 16; Luke 13:24) ʻOfa ke tau fakakaukauloto kotoa atu ʻi he faʻa lotu ki he meʻa ʻoku tau faí pea fai ha fakaleleiʻi ʻoku fiemaʻú, ʻo tauhi maʻu ʻi he fakakaukaú ʻoku talaʻofa ʻa Sihova ke tokonaki mai ʻa e “langilangiʻia mo e fakamalo mo e tuʻumalie mo ʻonautolu taki taha ʻoku ngaue lelei.”—Loma 2:10.
4 Founga ke Kātaki Aí: Ko e hā naʻá ne tokoniʻi ʻa Sīsū ke ne kātakí? Naʻe fakamatalaʻi ʻe Paula: “Ne ne kataki ae bekia i he akau, mo ne taetokaga ki he fakama, koe mea i he fiefia nae tuku i hono ao, bea kuo nofo eni i he nima toomatau oe afioaga oe Otua.” (Hep. 12:1-3, PM) Ko e fiefia naʻe fokotuʻu mei muʻa ʻia Sīsuú naʻe mahuʻinga lahi ange ia ʻi he ngaahi ʻahiʻahi fakataimi ko ia naʻe pau ke ne fehangahangai mo iá. Ko hono manatuʻi ʻa e fiefia ʻoku fokotuʻu mei muʻa ʻiate kitautolú ʻoku toe malava ke ne tokoniʻi kitautolu ke tau kātaki. (Fkh. 21:4, 7; 22:12) Kapau te tau hanga kia Sihova ke ne ʻomai kiate kitautolu ha mālohi fakafou ʻi heʻetau ako fakafoʻituituí, maʻu maʻu pē ʻa e fakatahá, pea kīvoi ʻi he lotú, te tau malava ai ke tau kītaki ʻi he ngāue kuó ne ʻomai kiate kitautolu ke tau faí.
5 ʻOku fiefia ʻa Sihova ʻi he kātaki ʻa ʻene faʻahinga mateakí. Ko ia, ʻai ke tau fakalahi ʻene fiefiá ʻaki ʻa e hokohoko atu ʻetau “laka ʻi he moʻoni.”