Foaki kia Sihova ʻEtau Lelei Tahá
1 Ko e Lao ʻa Sihova ki ʻIsilelí naʻe fakapapauʻi ai ko e fanga monumanu naʻe foaki kiate ia ʻi he feilaulaú naʻe pau ke “taʻe hano mele.” Naʻe ʻikai tali ha monumanu naʻe mele. (Liv. 22:18-20; Mal. 1:6-9) ʻIkai ko ia pē, ʻi he taimi naʻe fai ai ha feilaulaú, ko e ngakó kotoa—ʻa e konga lelei tahá—naʻe ʻa Sihova ia. (Liv. 3:14-16) ʻI he tuʻunga ko e Tamai ʻa ʻIsilelí pea mo hono ʻEikí, naʻe tuha ʻa Sihova mo e lelei tahá.
2 Hangē ko ia ʻi he kuonga muʻá, ʻoku mahuʻingaʻia vēkeveke ʻa e ʻOtuá ʻi he tuʻunga lelei ʻo ʻetau ngaahi foaki he ʻaho ní. Ko ʻetau ngāué ʻoku totonu ke tapua atu mei ai ʻa e ʻapasia totonu kia Sihova. Ko e moʻoni, ʻoku kehekehe ʻa e ngaahi tuʻungá ʻi he tokotaha ki he tokotaha. Neongo ia, ʻoku tau maʻu ʻa e ʻuhinga lelei ke sivisiviʻi ai kitautolu ke fakapapauʻi ʻoku tau ʻave kiate ia ʻa ʻetau lelei tahá.—Ef. 5:10.
3 Ngāue ʻAufuatō: Koeʻuhi ke fakalāngilangiʻi ʻa Sihova ʻe heʻetau ngāue fakafaifekaú pea aʻu ki he loto ʻo ʻetau kau fanongó, ʻe ʻikai lava ke fai fakafatongia pē ia. Ko ʻetau fakamatala fekauʻaki mo hotau ʻOtuá mo ʻene ngaahi taumuʻa maʻongoʻongá ʻoku totonu ke ʻalu hake ia mei hotau loto ʻoku fonu ʻi he houngaʻiá. (Sāme 145:7) ʻOku fakamamafaʻi ʻe he meʻá ni ʻa e mahuʻinga ʻo hono tauhi maʻu ha polokalama lelei ʻo e lau Tohi Tapú mo e ako fakafoʻituituí.—Pal. 15:28.
4 Ko hono ʻave kia Sihova ʻa ʻetau lelei tahá ʻoku toe kau ki ai ʻa e faʻifaʻitaki ki heʻene ʻofa ki he kakaí. (Ef. 4:32e [5:1, 2, PM]) Ko e ʻofa ki he kakaí te ne ueʻi kitautolu ke feinga ke aʻu ki he tokolahi taha ʻe malavá mo e pōpoaki foaki-moʻui ʻo e moʻoní. (Mk. 6:34) ʻOkú ne ueʻi kitautolu ke fakahaaʻi ʻa e mahuʻingaʻia fakafoʻituitui ʻi he faʻahinga ko ia ʻoku tau lea ki aí. ʻOkú ne ʻai kitautolu ke tau fakakaukau fekauʻaki mo kinautolu hili ʻa e ʻuluaki ʻaʻahí pea fakaʻaiʻai kitautolu ke toe foki ki ai. ʻOkú ne ueʻi kitautolu ke fai ʻa e meʻa kotoa te tau malavá ke tokoniʻi kinautolu ke nau fakalakalaka fakalaumālie.—Ng. 20:24; 26:28, 29.
5 Ko “ha Feilaulau Fakafetaʻi”: Ko e toe founga ʻe taha ʻoku tau ʻave ai kia Sihova ʻetau lelei tahá ko ʻetau tōtōivi ʻi he ngāue fakafaifekaú. ʻI he taimi ʻoku tau fokotuʻutuʻu lelei ai pea tokangataha ki he ngāué, ʻe lava ke tau lavaʻi ai ʻa e meʻa lelei tahá ʻi he taimi ʻoku tau ala maʻú. (1 Tim. 4:10) Ko e teuteu leleí ʻoku ʻai ai ke tau malava ʻo lea mahino pea fakatupu tuipau, ʻo fakalahi ai ʻa e ngalingali ke ʻi ai ha tali leleí. (Pal. 16:21) ʻI heʻetau vahevahe atu ʻa e ongoongo leleí ki he niʻihi kehé, ko ʻetau fakamatala loto-moʻoní ʻe lava moʻoni ke ui ia ko “ha feilaulau fakafetaʻi.”—Hep. 13:15.