ʻOku Tokoniʻi Kitautolu ʻe he Kau ʻĀngeló
1 “Ko eni, ʻoku ou ʻiate kimoutolu ʻe au ʻi he ngaahi ʻaho kotoa pe, ʻo aʻu ki he ngataʻanga ʻo mamani.” He fakalototoʻa ē ko e ngaahi lea ko iá ki he faʻahinga kotoa ʻoku nau tokanga ki he fekau ʻa Sīsuú: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako”! (Mt. 28:18-20) Ko e founga mahuʻinga ʻe taha ʻoku ʻi ai ai ʻa Sīsū ʻi he kau Kalisitiane moʻoní ʻoku fakafou ia ʻi heʻene kau ʻāngeló. (Mt. 13:36-43) He meʻa fakafiefia ē ke talaki ʻa e “Kosipeli taʻengata” fakataha mo e ngaahi meʻamoʻui laumālie faitōnunga ko ení!—Fkh. 14:6, 7.
2 ʻI Heʻetau Ngāue Fakafaifekaú: ʻOku fakahaaʻi ʻe he Tohi Tapú ʻoku fekauʻi mai ʻa e kau ʻāngeló “ke tauhiʻi akinautolu e maʻu ae fakamoui.” (Hep. 1:14, PM) ʻI he ʻuluaki senitulí, naʻe kau ai ʻa e kau ʻāngeló ʻi hono tataki ʻa e kau muimui ʻo Sīsuú ki he faʻahinga tāú. (Ng. 8:26) ʻI he ʻahó ni, ko e kau sevāniti ʻa e ʻOtuá ʻoku nau hokohoko atu ʻa e sio ki he fakamoʻoni ʻo e tataki fakaeʻāngeló. ʻI he ngaahi taimi lahi, kuo pehē ai ʻe he faʻahinga ʻi he ngaahi ʻapí naʻa nau lotu ki ha tokoni ʻi he taimi naʻe haʻu ai ha Fakamoʻoni ki honau matapaá. He fiefia ē ko kitautolu, fakataha mo e kau ʻāngeló, ʻi he taimi ʻoku tali ai ʻe he faʻahinga peheé ʻa e pōpoaki ʻo e Puleʻangá!—Luke 15:10.
3 Fehangahangai mo e Fakafepakí: Ko Taniela, ko hono ngaahi kaumeʻa ko e kau talavou Hepelū ʻe toko tolú, ko e ʻapositolo ko Pitá, mo e tokolahi kehe ʻa ia kuo nau fou ʻi he ngaahi ʻahiʻahi lahí kuo nau hokosia ʻa e maluʻi ʻa Sihova fakafou ʻi he kau ʻāngelo, ‘lahi ho nau malohí.’ (Sāme 103:20, PM; Tan. 3:28; 6:22, 23 [6:21, 22, PM]; Ng. 12:11) Neongo ʻi he taimi ʻe niʻihi ʻoku tau ongoʻi masiva tokoni nai ʻi he fehangahangai mo e fakafepakí, ʻe lava ke fakalototoʻaʻi kitautolu ʻe he meʻa naʻe hokosia ʻe he tokotaha tauhi ʻo ʻIlaisá ʻi heʻene ʻiloʻi ʻoku “toko lahi ʻa e kau mo kitaua ʻi he kau mo kinautolu.” (2 Tuʻi 6:15-17) Neongo kapau ʻoku fakamavaheʻi fakamālohi kitautolu mei hotau fanga tokoua Kalisitiané, ʻoku ʻikai fiemaʻu ke mole ʻetau ʻamanakí. ʻOku fakapapauʻi mai ʻe he Folofola ʻa e ʻOtuá kiate kitautolu: “Oku nofo ae agelo a Jihova o takatakai akinautolu oku manavahe kiate ia.”—Sāme 34:7, PM.
4 Kuo vavé ni ke heka mai ʻa e kau tau fakaeʻāngeló ke toʻo ʻa e fakafepaki kotoa ki he tuʻunga-tuʻi ʻo Kalaisí. (Fkh. 19:11, 14, 15) Lolotonga ʻoku tau fakatatali ki he ʻaho ko iá, ʻofa ke tau hokohoko atu loto-toʻa ʻi hono fakahīkihikiʻi ʻo Sihová, ʻo tuipau kakato fekauʻaki mo e poupou mālohi ʻa e kau tau fakahēvani ʻi he malumalu ʻo e tuʻutuʻuni ʻa Kalaisí.—1 Pita 3:22.