Ko Hono Maʻu ʻa e ʻAonga mei he Akoʻanga Fakafaifekau Fakateokalati ki he 1996—Konga 3
1 Naʻe fiemaʻu ʻe he ʻaposetolo ko Paulá hono ngaahi tokouá ke nau lotu maʻana koeʻuhi ke ne maʻu nai ha pōtoʻi ke leaʻaki ʻa e ongoongo leleí ʻaki ʻa e loto-toʻa. (ʻEf. 6:18-20) ʻOku tau holi ke fakatupulekina ha pōtoʻi tatau. Ke maʻu ʻa e pōtoʻi ko iá, ʻoku tau houngaʻia ʻi he tokoni ʻoku tokonaki mai ʻe he Akoʻanga Fakafaifekau Fakateokalatí, ʻa ia ʻe fakalototoʻaʻi ai ʻa e kau maʻu fakataha kuo taaú ke nau kau ki ai.
2 ʻI he tuʻunga ko e kau akó, ʻoku tau maʻu fakafoʻituitui ai ha akonaki ke tokoniʻi kitautolu ke fakalakalaka ʻetau pōtoʻi leá pea mo ʻetau founga faiakó. (Pal. 9:9) ʻE lava ke tau maʻu foki ʻa e ʻaonga mei he fanongo ki he akonaki ʻoku maʻu ʻe he kau ako kehé, ʻo ngāueʻaki ʻa e meʻa ʻoku tau akó maʻatautolu. ʻI he taimi ʻoku teuteu ai ha konga, ʻoku totonu ke tau ako fakalelei ʻa e maʻuʻanga fakamatalá ke fakapapauʻi ko ʻetau fakamatalaʻi iá ʻoku tonu. Ko e ngaahi poini tefitó pea mo e ngaahi konga Tohitapu ʻoku tau ngāueʻakí ʻoku totonu ke feʻungamālie mo e fakamatala ʻo e kaveingá fakakātoa. Kapau ʻoku toe kau ha taha kehe ki he kongá, ʻoku totonu ke ʻahiʻahiʻi lelei ia ki muʻa pea toki fai ʻi he akoʻangá. ʻI heʻetau fakalakalaká, ʻoku totonu ke fai ha feinga ke lea ʻi he ākenoa hake, ʻo ngāueʻaki ʻa e noutí kae ʻikai ko ha menuisikilipi.
3 Ko e faʻahinga kotoa kuo vaheʻi ki ai ha konga ʻi he akoʻangá ʻoku totonu ke nau haʻu tōmuʻa, ʻo ʻoange ki he ʻovasia ʻo e akoʻangá ʻenau lauʻi pepa Akonakiʻi He Leá, pea tangutu ofi ʻi muʻa he holó. ʻOku totonu ki he ngaahi tuofāfiné ke nau ʻai ke ʻilo ʻe he ʻovasia ʻo e akoʻangá ki muʻa pe ko e hā ʻenau fokotuʻutuʻú, pe te nau tuʻu pe tangutu ʻi he taimi ʻoku fai ai ʻenau kongá. Ko e ngāue fakataha ʻi he ngaahi foungá ni ʻoku tokoni ia ki he lelei ʻo e polokalamá pea mo tokoniʻi ai ʻa e faʻahinga ʻoku nau tokangaʻi ʻa e peletifoomú ke teuteu ʻa e meʻa kotoa pē ke maau ki muʻa.
4 Teuteu ʻa e Konga Fika 2: Ko e taumuʻa ʻe taha ʻo e lau Tohitapú ke tokoniʻi ʻa e tokotaha akó ke fakalakalaka ʻene pōtoʻi lautohí. ʻE lava fēfē ke maʻu lelei ʻa e meʻá ni? Ko hono toutou lau leʻo lahi ʻa e fakamatalá ko e founga lelei taha ia ke lavaʻi ai iá. Ke ako ʻa e ʻuhingá pea mo hono puʻaki totonu ʻo ha ngaahi lea kehe, ko e tokotaha akó ʻoku totonu ke ne kumi ia ʻi he tikisinalé.
5 ʻE lava ʻe he ngaahi mātuʻá ke tokoniʻi ʻenau fānau iikí ke teuteu ʻa e konga ki he lautohí. ʻOku fakakau heni ʻa e fanongo ʻi he taimi ʻoku fai ai ʻe he tamá ʻa hono ʻahiʻahiʻí pea ʻoatu foki kiate ia ha ngaahi fokotuʻu ʻaonga ke fakalakalaka ai. ʻOku fakangofua ʻe he taimi kuo vaheʻí ha talateu nounou pea mo ha fakaʻosinga feʻunga ʻa ia ke ngāueʻaki ai ʻa e ngaahi poini tefitó. Ko ia ʻoku tupulekina leva ʻa ʻene pōtoʻi ke lea ākenoá.
6 Naʻe kole ʻe he tokotaha-tohi-sāme faʻa lotú: “Atonai ʻe ko hoku loungutu ke ke toʻo, kae aʻau ʻe hoku ngutu ho fakamālō.” (Sāme 51:15) ʻOfa ke hoko ʻetau kau ʻi he Akoʻanga Fakafaifekau Fakateokalatí ʻo tokoniʻi kitautolu ke fakafiemālieʻi ʻa e holi tatau ko ʻení.