“Mou Kataki Pe”
1 ʻI heʻetau sio atu ki he ngataʻanga ʻo e fokotuʻutuʻu motuʻa ʻa Sētané ʻoku ofi ʻaupitó, ʻoku mātuʻaki mahuʻinga ke tau “kataki pe” lolotonga ʻetau tatali ki he ʻaho faifakahaofi ʻa Sihová. Tautefito ki he vahaʻa taimi ko ʻení, ʻoku fakapapauʻi ai ʻe he mālohi ʻo e fili anga-fulikivanú ke fakatafokiʻi ʻetau tokangá mei he fekīhiaki tuʻu-ki-muʻa ʻo e tuʻunga hau ʻo Sihová pea fakataueleʻi kitautolu ke hoko ʻo fakaleluʻi ʻe he lahi ʻaupito ʻo e ngaahi mahuʻingaʻia fakafoʻituituí. ʻI he founga ko ʻení, ʻe kākaaʻi kitautolu ʻe Sētane ke tau foʻi pe fakamāmālie ʻi he ngāue malangaʻi ʻo e Puleʻangá. (Sem. 5:7, 8; Mt. 24:13, 14) ʻI he ngaahi founga fē ʻe lava ke tau fakahāhā ai ʻa e fiemaʻu ʻo e kātaki peheé?
2 Hoko ʻo Anga-Fakamaʻumaʻu: ʻI heʻetau fetaulaki mo e loto-noa pe fakafepaki ʻi heʻetau ngāue fakafaifekaú, ko e anga-fakamaʻumaʻú te ne tokoniʻi kitautolu ke tau kītaki ʻi he malangá. ʻE ʻikai te tau hoko ʻo lotosiʻingofua pe loto-mamahi kapau ko e kakai ʻoku tau fetaulaki mo iá ʻoku anga-kovi pe taʻeʻofa. (1 Pita 2:23) Ko e mālohi ʻi loto ko ʻení ʻe lava ke ne maluʻi kitautolu mei he lea taʻepau ʻaki ha meʻa fekauʻaki mo e kakai ʻi hotau feituʻú ʻa ia ʻoku nau fakahā ʻa e taʻelototatau pe loto-ʻita ki heʻetau ngāué, ʻo ʻiloʻi ko e talanoa peheé ʻe fakalotosiʻi kiate kitautolu pea mo e faʻahinga ʻoku ngāue fakataha mo kitautolu ʻi he ngāue fakafaifekaú.
3 ʻAki ʻa e Kītaki Anga-Kātaki: ʻE lava ke mafasia ʻetau anga-kātakí ʻi he hili ha fetalanoaʻaki lelei ʻi he ngāue fakamalangá, pea ʻikai ke tau toe maʻu ʻa e tokotaha mahuʻingaʻiá ki hono ʻapí. ʻOku pehē pē ʻene hoko moʻoni ʻeni kapau ko e faʻahinga ʻoku tau ako mo iá ʻoku māmālie ʻi he fai ha laka ki muʻá pe tuʻu maʻá e moʻoní. Kae kehe, ko e kītaki anga-kātakí ʻoku faʻa fakapaleʻi ia ʻaki ʻa e ngaahi ola lelei. (Kal. 6:9) Ko ha tuofefine naʻá ne fai ha ngaahi toe ʻaʻahi lahi ki ha kiʻi fefine ki muʻa ke kamata ha ako Tohitapu. ʻI he ʻuluaki ʻaʻahi ʻe nimá, naʻe tokanga ʻa e fefiné ia ki ha ngaahi meʻa kehe. ʻI he feinga hono tuʻo onó, naʻe pīponu ʻa e tuofefiné ʻi ha ʻuha lahi, kae ʻosi angé ne ʻikai ha taha ia ʻi ʻapi. Ka neongo ia, ʻi he fakapapau ke tuku ki he fefiné ha toe faingamālie ʻe taha, naʻe toe ʻaʻahi atu ʻa e tuofefiné peá ne maʻu ʻa e fefiné ʻoku mateuteu ke ako. ʻI he hili iá, naʻe fai ʻe he tokotaha akó ha laka ki muʻa maʻu pē pea ʻi ha taimi nounou pē naʻá ne fakatapui ʻene moʻuí kia Sihova.
4 ʻOku tau ʻilo ko e ʻaho ʻo Sihová ʻe ʻikai ke tuai. Ko ia ʻoku tau tatali ki heʻene fakahoko ʻa e ngaahi meʻá, ʻo ʻiloʻi ko e anga-kātaki fakaʻotuá te ne fakatupu ha fua lelei. (Hap. 2:3; 2 Pita 3:9-15) Kuo pau ke tau kātaki ʻo hangē ko Sihová pea ʻoua ʻe tuku ʻa e ngāue fakafaifekaú. ʻI he “tui mo e kitaki,” hanga kia Sihova ke ne fakapaleʻi koe ʻi hoʻo ngāue mālohí.—Hep. 6:10-12.