sinceLF/E+ via Getty Images
HANGANAKI LEʻO!
Ko Hai Te Ne Fakahaofi ʻa e Kau Siviliané?—Ko e Hā ʻa e Lau ʻa e Tohi Tapú?
Hangē ko e līpooti ʻa e Ngaahi Puleʻanga Fakatahatahá:
Mei ʻOkatopa 7 ki ʻOkatopa 23, 2023, ko e tau ʻi he vahaʻa ʻo Gaza mo ʻIsilelí kuo iku atu ki hono tāmateʻi ʻa e kakai laka hake ʻi he toko 6,400 pea ko e toko 15,200 naʻa nau lavelavea, ko e tokolahi taha ʻo kinautolú ko e kau siviliane. Tānaki atu ki aí, ko e laui kilu kuo nau hiki mei honau ngaahi ʻapí.
ʻI Sepitema 24, 2023, ko e tau ʻi he vahaʻa ʻo Lūsia mo ʻIukalainé kuo iku ki hono tāmateʻi ʻa e kau siviliane ʻe toko 9,701 pea lavelavea ʻa e toko 17,748 ʻi ʻIukalaine.
Ko e hā ʻa e ʻamanaki ʻoku ʻomai ʻe he Tohi Tapú ki he faʻahinga ʻoku nau faingataʻaʻia koeʻuhi ko e taú?
ʻUhinga ki ha ʻamanaki
ʻOku tomuʻa tala ʻe he Tohi Tapú ko e ʻOtuá te ne “fakangata ʻa e ngaahi taú ʻi he māmaní kotoa.” (Saame 46:9) Te ne ngāueʻaki ha founga-pule fakahēvani pe puleʻanga, ke ne fetongi ʻa e ngaahi puleʻanga fakaetangata kotoa pē. (Taniela 2:44) Ko e Puleʻanga ʻo e ʻOtuá te ne ʻomai ʻa e fakafiemālie ki he faʻahinga ʻo e tangatá.
Fakatokangaʻi ʻa e meʻa ʻe fai ʻe Sīsū Kalaisi, ko e Tuʻi ʻo e Puleʻanga ʻo e ʻOtuá:
“Te ne fakahaofi ʻa e masiva ʻoku tangi ki ha tokoní, pehē foki ki he tokotaha māʻulaló mo ha taha pē ʻoku ʻikai hano tokoní. Te ne fakaʻofaʻia ʻi he māʻulaló mo e masivá, pea ko e moʻui ʻa e kau masivá te ne fakahaofi. Te ne fakahaofi kinautolu mei he fakafeʻātungiá pea mei he fakamālohí.”—Saame 72:12-14.
Fakafou ʻi hono Puleʻangá, ko e ʻOtuá te ne toʻo ʻosi atu ʻa e mamahi mo e faingataʻa ʻoku fakatupunga ʻe he taú mo e fakamālohí.
“Te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa. Kuo mole atu ʻa e ngaahi meʻa muʻá.”—Fakahā 21:4.
Ko e Puleʻanga ʻo e ʻOtuá ʻe vavé ni ke kau mai ki he ngaahi meʻa ʻo e māmaní. Naʻe tomuʻa tala ʻe he Tohi Tapú ʻa e “ngaahi tau pea mo e ongoongo ʻo e ngaahi tau” ʻoku tau sio ʻoku lolotonga fakahoko ʻi he ʻaho ní. (Mātiu 24:6) Ko e meʻá ni mo ha toe ngaahi meʻa kehe ʻokú ne fakahaaʻi mai ʻoku tau lolotonga moʻui “ʻi he ngaahi ʻaho fakaʻosí” ʻo e pule ʻa e faʻahinga ʻo e tangatá.—2 Tīmote 3:1.