KILATAMATKAN LA KSTALANINANIN CRISTO
Tlakg kakatsini la nalichuwinana Dios: kalichuwinanti Dios kteléfono
TUKU XLAKATA XLAKASKINKA. Lichuwinankan Dios kteléfono wa pulaktum la tlan nalichuwinanaw «xalaktlan tamakatsinin» (Hch 20:24).a Kinkamaxkiyan talakaskin tlan nalichuwinanaw Dios akxni nila anaw kʼakgatunu chiki.
LA NATLAWAYAW
Kalakkaxwili tuku nawana. Kalaksakti tuku nalichuwinana. Alistalh kalhkawili tuku tlan nawana. Nachuna, kalakkaxwili tuku nawana komo ni nakgalhtikana pero natagrabarli akgtum mensaje niku nawana tuku xlakata tachuwinampat lataman kteléfono. Tlan nawiliya kmimesa niku lhkawilinita tuku nawana chu tuku namaklakaskina, chuna la micelular niku malakkinita nawan JW Library® o jw.org®.
Ni kapekuanti. Kachuwinanti chuna la chuwinana. Kalakalitsinti chu kalakpuwanti pi tiku tachuwinampat ya kmilakatin. Ni katachokgo komo ni talakaskin. Lu tlan nakitaxtu komo nakataskuja amakgapitsin. Komo lataman natlawaniyan akgtum takgalhskinin, pixlanka kawampara uma takgalhskinin xlakata tala tiku na wi anta tlan namakgtayayan natekgsa xatakgalhtin.
Kalakkaxwili tuku nawana xlakata tlan natachuwinamparaya. Komo lataman tlakg katsiniputun, kamakgxtakgti akgtum takgalhskinin nema nakgalhtiya akxni natachuwinamparaya. Tlan namalaknuniya maktum likgalhtawakga chu nawaniya pi tlan namalakgachaniya kʼakgtum correo, kʼInternet o tlan napina maxkiya. Nachuna tlan namalakgachaniya akgtum video o akgtum artículo, kʼakgtum mensaje o kcorreo electrónico. Komo tlan akxilha, tlan nawaniya pi katanulh kkisitiojkan xla Internet.
a Komo anta niku lapat tlan lichuwinankan Dios kteléfono, kuentajkatlawa nakgalhakgaxpata limapakgsin xlakata ni namalakgatumiyaw xtukuwani o xnúmero latamanin.