¿Nachuna natlawaya la Jehová chu Jesús akxni natalakapastaka akxni tinilh Cristo?

1. ¿Tuku lu xlakaskinka tlawakgo xtatayananin Jehová akxni talakapastaka akxni tinilh Cristo?

¹ Jehová lu makgantaxtiputun tuku malaknunit. Akxni lichuwinalh makgapitsi tasikulunalin nema nalimin xTamapakgsin Dios, Isaías 9:7 wan: «Xlakata Jehová tiku kapulalin lhuwa soldados chuna tlawaputun, uma nakgantaxtu». Wa xKgawasa Dios, Jesús, limasiyalh pi lu xlichuwinamputun xaxlikana takaknin (Juan 2:13-17; 4:34). Akgatunu kata akxni talakapastaka akxni tinilh Cristo, millones tiku klichuwinanaw Dios xlikalanka katiyatni tlakg kliskujaw xlakata nachuna naktlawayaw la Jehová chu Jesús. ¿Nachuna tlawaya uma kata?

2. ¿Tuku natsukuyaw tlawayaw 7 xla marzo chu tuku nakitaxtu komo xatapaxuwan natlawayaw?

² Akxni natamakgpitsi invitación akxni natalakapastaka akxni tinilh Cristo. Uma kata nakawanikan latamanin xlakata nakinkatatamakxtumikgoyan akxni natalakapastaka akxni tinilh Cristo, 7 xla marzo. Tlakg tlan nawan komo la uku natsukuya lakkaxwiliyaw xlakata lu namastayaw invitación. Congregaciones lhuwa naskujkgo, xlakata nalakgatsalakgo niku lichuwinankgo Dios. Kalakkaxwiliw xlakata namastayaw invitación o nakamasiyaniyaw kkisitiojkan jw.org/jw-tot, tiku kalimakgalhtawakgayaw Biblia, tiku kalitachuwinanaw Dios, tiku kataskujaw chu tiku kataʼanaw kʼescuela chu kifamiliajkan.

3. ¿Tuku natlawayaw xlakata tlakg nalichuwinanaw Dios marzo chu abril?

³ Precursorado auxiliar. Xlakata lu lichuwinamputunaw Dios uma natlawa pi tlakg nalimaxtuyaw kilhtamaku. Tlan naliskujaw la precursores auxiliares marzo chu abril na tlan nalaksakaw naliskujaw kaj 30 horas. Akxni nakakninaniyaw Dios kfamilia o akxni kiakstukan nakgalhtawakgayaw, tlan natlawayaw oración chu naʼakxilhaw la natlawayaw (Prov. 15:22). Xlakata lu nalichuwinamputunaw Dios akxni namakgpitsiyaw invitación tlan nakamakgpuwantini amakgapitsi xlakata na lu namastaputunkgo invitación. Komo nalakkaxwiliyaw kinkilhtamakujkan xlakata tlakg nalichuwinanaw Dios, nachuna tlawamaw la Jesús (Mar. 6:31-34).

4. ¿Tuku nakitaxtu komo natlawayaw la Jehová chu Jesús?

⁴ Komo natlawayaw la Jehová chu Jesús akxni natalakapastaka akxni tinilh Cristo lu tlan nakinkakitaxtuniyan. Pulana, nakamakatsinikan tlakg lhuwa latamanin tiku wilakgolh niku lichuwinanaw Dios. Nachuna, tlan namakgkatsiyaw xlakata skujnanimaw Jehová chu kamakgtayamaw amakgapitsin (Hech. 20:35). Tuku tlakg xlakaskinka, namakgapaxuwayaw Jehová chu xKgawasa.