Tlakg tlan katlawaw kiʼoracioneskan

1. ¿Tuku kinkawaniyan Jehová pi katlawaw? (Na kaʼakxilhti dibujos).

¿TIKU tlan nakinkapulalinan chu tlan nakinkamamakgkatsiniyan? Akinin tlan natlawaniyaw oración Jehová xlakata naskiniyaw xtamakgtay. Xla kinkawaniyan pi katlawaniw oración. Chu katsiyaw pi lakaskin katlawaniw oración xlakata kinkawaniyan: «Ankgalhin katlawatit oración» (1 Tes. 5:17). Xla kinkakgaxmatniyan chu tlan naskiniyaw pi kakinkapulalin xliputum tuku natlawayaw kkilatamatkan (Prov. 3:5, 6). Chu xlakata Jehová tlan likatsi, kinkawaniyan pi katlawaniw oración chuna la xlimakglhuwa nalakaskinaw.

2. ¿Tuku nalichuwinanaw kʼuma artículo?

² Oración akgtum tamaskiwin nema lu xtapalh akxilhaw. Maski chuna, xlakata lu lhuwa tuku kilitlawatkan, ni kgalhiyaw kilhtamaku xlakata natachuwinanaw Jehová. Chu asta max lakpuwanaw pi ni lu tlan la tlawayaw kiʼoracioneskan. Pero Biblia nakinkamakgtayayan xlakata tlakg tlan natlawayaw. Kʼuma artículo nalichuwinanaw xliʼakxilhtit Jesús chu naʼakxilhaw la nalimaxtuyaw kilhtamaku xlakata natlawayaw oración. Na nalichuwinanaw pulakkitsis tuku tlan nawanaw kiʼoracioneskan nema nakinkamakgtayayan tlakg tlan natlawayaw.

JESÚS LIMAXTULH KILHTAMAKU NATLAWA ORACIÓN

3. ¿Tuku liwana xkatsi Jesús?

³ Jesús xkatsi pi Jehová lu xlakaskinka liʼakxilha natlawaniyaw oración. Akxni nina xmin kKatiyatni, Jesús akxilhli la xTlat xkakgalhti xʼoracioneskan xlakskujnin. Akgtum liʼakxilhtit, Jesús xtawi xTlat akxni kgalhtilh xʼoracioneskan Ana, David, Elías chu amakgapitsin (1 Sam. 1:10, 11, 20; 1 Rey. 19:4-6; Sal. 32:5). Xlakata xkatsi uma, Jesús kawanilh xtamakgalhtawakgen pi ankgalhin xtlawanikgolh oración Jehová chu xlipawankgolh pi xla xʼama kakgalhti (Mat. 7:7-11).

4. ¿Tuku tlan li’akxilhtit kinkawilinin Jesús?

⁴ Jesús kawilinilh akgtum lu tlan liʼakxilhtit xtamakgalhtawakgen. Akxni xlama unu kKatiyatni, makglhuwa tlawanilh oración xTlat. Xlakata lu lhuwa taskujut xkgalhi chu lhuwa latamanin xlakgminkgo, xtalakaskin xlimaxtulh kilhtamaku xlakata xtlawalh oración (Mar. 6:31, 45, 46). Lu tsisa xtaki xlakata xtachuwinalh xTlat (Mar. 1:35). Biblia lichuwinan pi makgtum, tantaskaka tlawalh oración xlakata lu xlakaskinka tuku xʼama laksaka (Luc. 6:12, 13). Chu xaʼawatiya katsisni akxni latamalh unu kKatiyatni, Jesús makglhuwa tlawanilh oración Jehová xlakata xkatsi pi xchanit kilhtamaku natitaxtu tuku tlakg tuwa kxlatamat (Mat. 26:39, 42, 44).

5. ¿La tlan nastalaniyaw xliʼakxilhtit Jesús?

⁵ Xliʼakxilhtit Jesús kinkamasiyaniyan pi maski lu lhuwa taskujut kgalhiyaw, kilimaxtutkan kilhtamaku natlawaniyaw oración Jehová. Chuna la Jesús, max natalakaskin nalakkaxwiliyaw tukuya hora natlawayaw kiʼoracioneskan, max tlan tlakg tsisa xtakiw o ni lu sokg xʼaw lhtatayaw xlakata xtlawaw oración. Komo chuna natlawayaw, nalimasiyaniyaw Jehová pi xtapalh liʼakxilhaw uma tamaskiwin. Chatum tala tiku wanikan Lynne lakapastaka pi lu tlan limakgkatsilh akxni katsilh pi tlan natachuwinan Jehová kʼoración. Xla wan: «Akxni kkatsilh pi Jehová putum kilhtamaku tlan kinkgaxmatni, la chatum kiʼamigo ktsukulh liʼakxilha chu klakkaxwililh nakliskuja tlakg tlan naktlawa kiʼoraciones». Max akinin na makgkatsiyaw chuna la Lynne. Kaʼakxilhwi pulakkitsis tuku tlan nawanaw kkiʼoracioneskan.

PULAKKITSIS TUKU TLAN NAWANAW KKIʼORACIONESKAN

6. Chuna la wan Apocalipsis 4:10, 11, ¿tuku lakgchan namakglhtinan Jehová?

⁶ Kamalankiw Jehová. Kʼakgtum talakawan nema maʼakxilhnika apóstol Juan, kaʼakxilhli puxamatati lakgkgolotsin tiku xkakninanimakgo Jehová kʼakgapun. Xlakan xmalankimakgo Dios chu xwankgo pi wa “lakgchan namakglhtinan kakni, namalankikan chu namakglhtinan litliwakga” (kalikgalhtawakga Apocalipsis 4:10, 11). Anan tipalhuwa tuku xlakata ángeles malankikgo chu maxkikgo kakni Jehová. Xlakan akxtum tawilakgocha Jehová kʼakgapun chu liwana lakgapaskgo. Akxilhkgo la likatsi xlakata tuku tlawa, chu uma kamakgpuwantini namalankikgo (Job 38:4-7).

7. ¿La malankiyaw Jehová kkiʼoracioneskan?

⁷ Akinin na lu kilimalankitkan Jehová akxni tachuwinanaw. Chuna tlawayaw akxni waniyaw tuku tayat kgalhi nema akinin lu lakgatiyaw chu tuku xlakata lakgatiyaw. Akxni nalikgalhtawakgayaw Biblia, kaliskujwi naʼakxilhaw tuku xtayat Jehová talichuwinan anta (Job 37:23; Rom. 11:33). Chu alistalh, kawaniw tuku makgkatsiyaw akxni lilakpuwanaw uma xtayat. Na tlan namalankiyaw Jehová akxni kinkamakgtayayan kinchatunukan o akxni kamakgtaya kinatalankan. Xla ankgalhin kinkakuentajtlawayan chu kinkamaxkiyan tuku maklakaskinaw (1 Sam. 1:27; 2:1, 2).

8. Kalichuwinanti makgapitsi tuku tlan nalipaxtikatsiniyaw Jehová (1 Tesalonicenses 5:18).

⁸ Kapaxtikatsiniw Jehová. Akxni natlawaniyaw oración, lhuwa tuku tlan nalipaxtikatsiniyaw Jehová (kalikgalhtawakga 1 Tesalonicenses 5:18). Tlan napaxtikatsiniyaw xlakata putum tuku kinkamaxkinitan. Katsiyaw pi putum tuku kgalhiyaw wa kinkamaxkinitan (Sant. 1:17). Akgtum liʼakxilhtit, tlan napaxtikatsiniyaw xlakata kinkamaxkinitan akgtum lu stlan pulataman, Katiyatni. Na tlan napaxtikatsiniyaw xlakata xtamalakatsukin, xlakata kinkamaxkinitan latamat, kifamiliajkan, kiʼamigoskan chu xlakata kinkamaxkinitan akgtum takgalhkgalhin. Na paxtikatsiniputunaw Jehová xlakata kinkamaxkinitan talakaskin tlan natalalinaw.

9. ¿Tuku xlakata tuwa makgkatsiyaw napaxtikatsininanaw?

⁹ Anan pulaklhuwa tuku nalipaxtikatsiniyaw Jehová. Pero min kilhtamaku tuwa makgkatsiyaw naʼakxilhaw uma xlakata lamaw kkakilhtamaku niku latamanin nialh paxtikatsininankgo. Latamanin kajwatiya lilakgaputsakgo tuku lakaskinkgo nixawa napaxtikatsininankgo xlakata tuku kgalhikgo. Komo nachuna xlikatsiw, kkiʼoracioneskan kajwatiya lhuwa tuku kskiw. Xlakata nichuna nakinkaʼakgspulayan, talakaskin nalismaniyaw napaxtikatsininanaw chu napaxtikatsiniyaw Jehová xlakata putum tuku kinkamaxkiyan (Luc. 6:45).

10. ¿La makgtayalh chatum tala xlakata paxtikatsininan? (Na kaʼakxilhti dibujo).

¹⁰ Akxni paxtikatsininanaw kinkamakgtayayan natayaniyaw tuku tuwa. Kalichuwinaw xliʼakxilhtit chatum tala puskat tiku wanikan Kyung-sook, nema xlichuwinankan krevista Makatsinina 15 xla enero kata 2015. Uma tala tekgsnika cáncer de pulmón. Xla wa: «Lu tuwa tuku ktitaxtulh. Kmakgkatsilh pi xakmakgatsankganit putum tuku xakkgalhi chu lu kpekualh». ¿Tuku makgtayalh natayani? Xla wan pi akgatunu tsisni, akxni nina xʼan lhtata, xtawaka kxʼakgstin xchik xlakata natachuwinan Jehová chu xlilakpuwan pulakkitsis tuku lu tlan xkitaxtuninit uma kilhtamaku chu xpaxtikatsini Jehová. Uma lu tlan xmamakgkatsini chu xtlawa pi nawani Jehová la xlilhuwa xpaxki. Uma tala makgkatsilh la Jehová kakuentajtlawa kskujnin akxni titaxtukgo tuku tuwa chu na akxilhli pi maski titaxtuyaw tuku tuwa, tlakg lhuwa tasikulunalin kgalhiyaw. Chuna la Kyung-sook, anan tipalhuwa tuku xlakata napaxtikatsiniyaw Jehová, asta maski titaxtumaw pulaktum tuku tuwa. Akxni paxtikatsiniyaw Jehová kinkamakgtayayan natayaniyaw chu tlan kinkamamakgkatsiniyan.

11. ¿Tuku xlakata xtamakgalhtawakgen Jesús xliskinitkan xwanit xtamakgtay Jehová?

¹¹ Kaskiniw Jehová pi kakinkamakgtayan akxni anaw lichuwinanaw xtachuwin. Akxni nina xtaspita kʼakgapun, Jesús kawanilh xtamakgalhtawakgen pi xlichuwinankgolh xpalakata «kJerusalén, kputum Judea chu kSamaria, chu kxlikalanka katiyatni» (Hech. 1:8; Luc. 24:46-48). Titaxtulh kilhtamaku, xpulalinanin takanajla kalinkgolh Pedro chu Juan kxlakatin Sanedrín, chu kalimapakgsikgolh pi nialh xlichuwinankgolh Dios (Hech. 4:18, 21). ¿Tuku tlawakgolh xlakan?

12. Chuna la wan Hechos 4:29, 31, ¿tuku tlawakgolh xtamakgalhtawakgen Jesús?

¹² Wa uma tuku kgalhtinankgolh Pedro chu Juan akxni kawanika pi nialh xlichuwinankgolh Dios: «Komo Dios tlan akxilha pi wata wixin nakkakgalhakgaxmatniyan chu ni wa Dios, wixin kalakputsananitit. Pero akinin, nila nialh naklichuwinanaw tuku kakxilhnitaw chu kkgaxmatnitaw» (Hech. 4:19, 20). Akxni xpulalinanin takanajla kamakgxtakgkgolh, umakgolh chatiy apóstoles katatamakxtumikgolh amakgapitsin xtamakgalhtawakgen Jesús. Akxtum tlawanikgolh oración Jehová xlakata xkamakgtayalh chuntiya natlawakgo xtalakaskin. Wankgolh: «Kamasta talakaskin pi milakskujnin chuntiya ni xatapekua nalichuwinankgo mintachuwin». Chu Jehová kakgalhtilh xʼoracionkan (kalikgalhtawakga Hechos 4:29, 31).

13. ¿Tuku kinkamasiyaniyan xliʼakxilhtit Jin-hyuk?

¹³ Tlan nastalaniyaw xliʼakxilhtitkan umakgolh apóstoles akxni chuntiya nalichuwinanaw xtachuwin Dios maski mapakgsinanin nakinkawanikgoyan pi nialh katlawaw uma taskujut. Wa uma tuku tlawalh Jin-hyuk, chatum tala chixku tiku xtamaknukanit kpulachin xlakata xtakanajla. Anta, lakgayawaka nakakuentajtlawa amakgapitsin tachin. Kajwatiya tlan xkatachuwinan xlakata nakakgalhskin tuku xmaklakaskinkgo. Chu ni xmaxkikan talakaskin nakalitachuwinan Biblia. Pero skinilh Jehová pi xmakgtayalh ni napekuan chu nalakputsa la nakalitachuwinan Biblia umakgolh tachin (Hech. 5:29). Xla wan: «Jehová kgalhtilh kiʼoraciones, kimakgtayalh ni nakpekuan chu kimaxkilh liskgalala nema xakmaklakaskin. Ktsukulh kalimakgalhtawakge Biblia lhuwa tachin maski kaj akgkitsis minuto. Katsisni xakkatsokgwilini cartas chu lichali xakkamaxki». Xtachuna la Jin-hyuk, tlan nalipawanaw pi Jehová nakinkamakgtayayan namakgantaxtiyaw kintaskujutkan chu tlan naskiniyaw pi kakinkamakgtayan ni napekuanaw chu kakinkamaxkin liskgalala.

14. ¿Tuku namakgtayayan natayaniya tuku tuwa? (Salmo 37:3, 5).

¹⁴ Kaskiniw Jehová pi kakinkamakgtayan natayaniyaw tuku tuwa. Max lhuwa akinin lu patinamaw xlakata max nilh tiku lu xpaxkiyaw, max kinkaputsastalanimakan, tatatlayaw, lipuwanaw o tuwa tuku titaxtuma kifamiliajkan. Chu pandemias chu guerras tlawanit pi tlakg tuwa namakgkatsiyaw putum umakgolh. Wa xlakata, kalitachuwinanti Jehová putum tuku makgkatsiya, chuna la xwani chatum tlan amigo. Tlan nalipawana pi Jehová namakgtayayan (kalikgalhtawakga Salmo 37:3, 5).

15. ¿La kinkamakgtayayan oración natayaniyaw akxni titaxtumaw tuku tuwa? Kawili akgtum liʼakxilhtit.

¹⁵ Akxni tlawayaw oración kinkamakgtayayan natayaniyaw ta’akglhuwit (Rom. 12:12). Jehová katsi putum tuku titaxtukgo kskujnin chu «kgaxmata akxni tasaskinikgo tamakgtay» (Sal. 145:18, 19). Chatum precursora tiku kgalhi 29 kata chu wanikan Kristie akxilhli pi uma xlikana. Kaj xalan tsukulh tatatla, chu uma tlawalh pi na xchipalh tajatat xla talipuwan. Alistalh wanika pi xtse xkgalhi akgtum tajatat nema nialh xkgalhi xalikuchun. Kristie wan: «Xakskini Jehová pi xkimaxkilh litliwakga xlakata tlan xaktayanilh. Kliskujli tuku xla kintakanajla: ni xakmakgxtakga tamakxtumit chu kiʼakstu xakkgalhtawakga». Kristie wampara: «Oración lu kimakgtayalh akxni xaktitaxtuma tuku lu tuwa. Lu tlan kimamakgkatsinilh xlakata xakkatsi pi Jehová akxtum xkintawi. Maski ni lakapala lakkaxlalh tuku xaktitaxtuma, Jehová kgalhtilh kiʼoraciones chu kimaxkilh takaksni». Nikxni kapatsankgaw pi «Jehová katsini kalakgmaxtu latamanin tiku ni makgxtakgkgo akxni titaxtumakgo tuku tuwa» (2 Ped. 2:9).

16. ¿Tuku xlakata maklakaskinaw xtamakgtay Jehová xlakata ni natlawayaw tuku nitlan?

¹⁶ Kaskiniw Jehová pi kakinkamakgtayan ni natlawayaw tuku nitlan. Xlakata makglakgalhinanin akinin, talakaskin lu naliskujaw xlakata ni natlawayaw tuku nitlan. Chu Satanás lu liskuja xlakata tlakg tuwa namakgkatsiyaw uma. Akgtum liʼakxilhtit, maklakaskin nixatlan lilakgastan xlakata nalaktlawa kintalakapastaknikan. Umakgolh lilakgastan tlawa pi kiʼakgxakgakan nalitatsama nixatlan talakapastakni nema lixkajni kxlakatin Jehová chu nema tlawa pi xataxkajwani nawanaw kxlakatin, chu uma max na nakinkamatlawiyan akgtum talakgalhin (Mar. 7:21-23; Sant. 1:14, 15).

17. ¿Tuku atanu kilitlawatkan xlakata ni natlawayaw tuku nitlan? (Na kaʼakxilhti dibujos).

¹⁷ Nila kiʼakstukan makgatlajayaw tuku nitlan tlawaputunaw; maklakaskinaw xtamakgtay Jehová. Atanu tuku Jesús masiyalh pi naskinaw kkiʼoracioneskan, wa uma: «Ni kamasta talakaskin naktlawayaw tuku nitlan, wata kakinkakuentajtlawa xlakata Satanás nitu nakinkatlawaniyan» (Mat. 6:13). Jehová kinkamakgtayaputunan, pero talakaskin naskiniyaw xtamakgtay. Ni kajwatiya talakaskin natlawayaw oración. Lu xlakaskinka pi nalakgmakganaw nixatlan talakapastakni nema anan kxkakilhtamaku Satanás nema lu nitlan tuku nakinkatlawaniyan (Sal. 97:10). Xlakata nakuentajtlawayaw kintalakapastaknikan chu nalimatsamayaw tuku tlan, talakaskin nalikgalhtawakgayaw Biblia, naʼanaw ktamakxtumit chu nalichuwinanaw Dios. Chu Jehová malaknu pi ni katimastalh talakaskin pi nala tuku nialhla natayaniyaw (1 Cor. 10:12, 13).

18. ¿Tuku kilitlawatkan kimputumkan?

¹⁸ Xlakata ni namakgxtakgaw Dios kʼuma xatuwa kilhtamaku, talakaskin lu natlawaniyaw oración. Jehová lakaskin pi kawaniw “putum tuku lilakgaputsa kinakujkan” (Sal. 62:8). Wa xlakata, kalimaxtu kilhtamaku xlakata xliputum minaku natlawaniya oración Jehová chali chali. Kamalanki chu kapaxtikatsini putum tuku tlawa mimpalakata. Kaskini pi kamakgtayan ni napekuana akxni lichuwinana xtachuwin chu kamakgtayan natayaniya tuku tuwa titaxtuya, chu kaskini kamakgtayan ni natlawaya tuku nitlan. Nitu katlawalh pi nialh natlawaniya oración Jehová. Pero ¿la kgalhti Jehová kiʼoracioneskan? Kʼatanu artículo nalichuwinanaw uma.