Yehova ‘Wa Swi Hatlisisa’
“Mina, Yehova, nḍi hatlisisa ŝilo leŝi e mikarini ya ŝona.”—ESAYA 60:22.
1. Xana xivumbeko xa vanhu va Yehova xi hambanisa ku yini na lexiya xa misava ya Sathana, naswona hikwalaho ka yini?
NAMUNTLHA, ku tsaka ni ku tsakisisa ku fanele ku kumeka hayi eka nhlengeletano ya Yehova ya le tilweni ntsena kambe ni le ka nhlengeletano hinkwayo ya Timbhoni ta Yehova laha misaveni. Ntsako wa hina wu hambana swinene-nene ni munyama lowu funengeteke misava ya Sathana. (Psalma 144:15) Hi ni swakudya ni swakunwa swo tala swa moya, leswaku hi ta “huwelela hi ku helela ka timbilu.” (Esaya 65:13-19) Ha xi vona xivangelo xa ku nonon’hwa loku nga kona ka misava. Ntshembo wa hina wo kutsuriwa ku sungula hi Mfumo wa Xikwembu wa tiyisiwa loko hi vona vuprofeta bya Bibele byi ri karhi byi hetiseka eku tshineleni loku nga kavanyetiwiki ka Armagedoni. Ha swi tiva leswaku ‘nyimpi leyi ya siku lerikulu ra Xikwembu xa Matimba hinkwawo’ yi ta fika hi laha ku kongomeke ‘enkarhini lowu vekiweke,’ hikuva xivono ‘xi ta hatlisa eku heteleleni, xi nga ka xi nga xisi.’—Nhlavutelo 16:14, 16; Habakuk 2:3.
2. I swiyimo swihi leswi nga kona enhlengeletanweni ya Yehova, swi yisa eka xivutiso xihi?
2 Tanihi le tilweni, ni laha misaveni ku hava makumu eka vuhosi bya nhlengeletano ya Yehova. Nakambe, leswi Yehova a nga Xihlovo xa ntamu lowukulu, u endla leswaku ‘matimba lama heleleke ya talela lava n’wi tshembaka.’ (Esaya 40:29-31) Nhlengeletano ya yena yi ni ntirho lowukulu naswona nkarhi na nkarhi yi ya emahlweni. (Ringanisa Ezekiel 1:15-21) Mabandlha ya Timbhoni ta Yehova ya 47 869 ematikweni ya 203 emisaveni hinkwayo ya hleriwe khwatsi leswaku ya ya emahlweni hi ku chivirika entirhweni wa Mfumo. (Matewu 24:14) Xana nhlengeletano leyi ya matimba ya misava hinkwayo yi vumbiwe hi ndlela yihi?
3. (a) Esaya 60:17 yi hetiseke hi ndlela yihi eminkarhini ya manguva lawa ke? (b) I malunghiselelo wahi lama fanaka lama tiseke ntsako eminkarhini ya Bibele xana?
3 “Nhlengeletano” a ku ri vito ra swihloko leswi dyondziwaka eka Xihondzo xo Rindza xa Xinghezi xa June 1 na 15, 1938. Swona swi hlamusele Esaya 60:17 hi vundzeni, laha Yehova a letelaka nhlengeletano ya yena ya le tilweni, a ku: “E maṭhaṅweni ya kopor, nḍi ta v̌itana nsuku, e maṭhaṅweni ya nhumbu, nḍi ta v̌itana silver, e maṭhaṅweni ya timhanḍi, e kopor, ni maṭhaṅweni ya maribye, e nhumbu; nḍi ta ku fumisa hi ku rula, kambe u ta risiwa hi ku lulama.” Hi ku tsundzuka xiyimo lexi xo antswa, nhlengeletano ya Yehova emisaveni yi pfuxetiwile. Hi laha nsuku wu nga wa nkoka ku tlula koporo (naswona swa ha fana ni swilo leswin’wana leswi boxiweke laha), swi tano ni lunghiselelo ra le henhla leri Sosayiti ya Watch Tower yi ri hlamuseleke mabandlha ya vanhu va Xikwembu le ndzhaku hi 1938—ni leri va ri amukeleke hi timbilu hinkwato—ri fanele ku tsakeriwa ngopfu ku tlula maendlelo yo rhanga ya Xidemokrati. Ri pfumelelana ni Matsalwa. Ri endla ku hleleka lokunene eku endleni ka ntirho wa Xikwembu, hi laha malunghiselelo lama fanaka ya tiseke ntsako enkarhini wa Muxe ni le masikwini yo sungula ya bandlha ra Vukriste.—Eksoda 18:25; Mintirho 6:3-7; Tito 1:5; 1 Petro 5:1-3.
4. (a) Xana Timbhoni ta Yehova ti tiyiseriwe miringo ya 1939-45 hi ndlela yihi? (b) I yini lexi kombeke leswaku nkateko wa Yehova a wu ri ehenhla ka lunghiselelo rero ra le henhla ke?
4 Xisweswo, hi 1938, lembe leri rhangeleke ku tlhekeka ka Nyimpi ya Vumbirhi ya Misava, ‘vakulu’ ni ‘varisi’ emabandlheni hinkwawo va ve “ku rula” ni “ku lulama.” Lunghiselelo leri tiyeke, leri hlanganisiweke ra nhlengeletano ri ye emahlweni na ku andza loku vekaka mihandzu. Yehova u katekisile timbhoni takwe leti hlanganeke. Tinhlayo ta tona ti lavile ku phindhiwa kambirhi, ku suka eka 71 509 ku ya eka 141 606 exikarhi ka 1939 na 1945, ku nga khathariseki mintshikilelo ni minxaniso ya malembe wolawo ya nyimpi.
‘A Ka Ha Ri Na Tihanyi’
5. Malunghana ni “ku rula,” vanhu va Yehova va hambanisa ku yini ni misava xana?
5 Hambi swi ri tano, ku vuriwa yini hi nkarhi lowu rhangeleke Nyimpi ya Vumbirhi ya Misava ke? A ku ri hava ku rhula exikarhi ka matiko ya misava. Entiyisweni, ku vikiwe leswaku vanhu lava tlulaka 30 000 000 va file eka tinyimpi “letintsongo” leti Iwiweke ku sukela hi 1945. “Tinyimpi letintsongo” leti nga vaka 40 a ti ri karhi ti Iwiwa emisaveni hinkwayo hi nkarhi wun’we. Hikwalaho ke, ha tsaka swonghasi ku tirha kun’we ni nhlengeletano leyi tshikeke vukarhi! (Esaya 2:4; Swivuriso 20:22) Ku tlula kwalaho, tanihi nhlengeietano ya misava hinkwayo, hi tiphina hi ku rhula exikarhi ka hina. Hi ku famba ni “Xikwembu xa ku rhula,” hi vone “ku rhula ka Xikwembu loku tlulaka ku twisisa hinkwako.”—Vafilipiya 4:7-9.
6, 7. (a) I yini lexi endlaka leswaku vanhu va Yehova va va lava hambaneke? (b) Esaya 60:18 yi hetiseke hi ndlela yihi ehenhla ka hina? (c) Hi yihi ndlela leyi hlawulekeke leyi hi hambanaka ni vakhongeri vo hemba ha yona?
6 Leswi “ku rula” ni “ku lulama” swi nga kona exikarhi ka vanhu va Yehova, hi tshama hi hambanile ni misava ya Sathana. Hi ku xiya leswi, van’wana va vaakelani va hina va te, ‘Ha mi rhandza vanhu ndzin’wina, kambe a hi byi tsakeli vukhongeri bya n’wina.’ Hambi swi ri tano, xana a hi byona vukhongeri bya hina lebyi hi endleke vanhu lava hi nga vona? A hi ya tsakeli maveriveri lama kanetaka ni rivengo leri avanyisaka matiko. Kambe ke, swilo swimbirhi leswi hi swi tsakelaka i (1) ku dyondzisa vanhu lava titsongahataka endleleni ya ku hlayiseka hi Mfumo wa Kriste na (2) ku dzunisa Yehova, hi hlayisa vito ra yena emahlweni ka vanhu hinkwavo leswaku byi va vumbhoni. A hi “va misava.”—Yohane 17:14, 16.
7 Xisweswo, hi hlanganyerile eku hetisekeni ka xitshembiso xa Yehova lexi nge: “Ku nga ka ku nga ha v̌uriwi ta tihanyi e tikweni ra wena, hambi ti ri ta ku onhaka ni ku lov̌a e minḍilakaneni ya wena; u ta tšhya rirhangu ra wena “e ku hlayiseka,” ni tinyangwa ta wena e ku tlangela.” (Esaya 60:18) Ku nkhensa hinkwako ku yisiwa eka Yehova Xikwembu xa hina! Varhangeri va vukhongeri bya Vujagana (ni vanghana va vona hinkwavo va vagwinehi) va nyamisa vito rero—hambi ku ri ku fikela laha va ringetaka ku ri sula eku hundzuluxeleni ka Bibele hi vukanganyisi. “Kambe hina, hi famba hi v̌ito ra Yehova, Šikwembu ša hina, hi mikari ni mikari.”—Mikea 4:5.
8. (a) I xikhutazo xihi lexi Yehova a xi nyikaka vanhu va yena eka Esaya 60:19-21 ke? (b) I ku ‘kula’ kwihi loku sasekisaka Yehova, naswona hi ndlela yihi?
8 Yehova u hi khutaza ku famba hi vito ra yena. Eka Esaya 60:19-21, u tiyisekisa nhlengeletano yakwe ya le tilweni leswaku u ta va “ku v̌onakala lo’ku nga heriki” eka yona, hambi ku ri ku hunguta ku vonakala ka dyambu ni ka n’weti. Hi tlhelo ra moya, u va ku saseka ka yona, a tlhela a hetisisa xitshembiso xa yena eka vanhu va yona: “Ku ta kumiwa la’v̌o lulama ntsena e tikweni ra wena, v̌a ta fuma tiko hi masiku; i hluke le’ri nḍi ri byaleke, i ntiro wa mav̌oko ya mina, leŝaku wu ta nḍi twarisa.” Kunene, Yehova u tiyise “tiko,” kumbe vulawuri bya ntirho wa timbhoni ta yena. Ri tshama ri ri karhi ri ‘kula’ leswi mintshungu ya vanhu lavantshwa yi hlengeletiwaka etlhelweni ra Mfumo kutani yi pfuniwa ku ambala munhu wa Vukriste. (Vakolosa 3:10, 12-14) Leswi swi ‘sasekisa’ Yehova, swi dzunisa vito rakwe lerikulu.
9. (a) Yehova u katekisa timbhoni ta yena le Mexico hi ndlela yihi, naswona hikwalaho ka yini? (b) Xana nyuziphepha yin’wana yi vule yini loko yi vona vutshembeki bya tona?
9 Xikombiso xa sweswinyana i Mexico. Eka malembe mambirhi lama hundzeke, nhlohlorhi ya vahuweleri etikweni rolero yi engeteleke ku sukela eka 113 823 ku ya eka 151 807—33 wa tiphesente leti bumabumeriwaka! (Nkhuvo wa vona wa Xitsundzuxo xa rifu ra Yesu wa 1984 wu ve ni vanhu va 695 369.) Vamakwerhu va le Mexico va gingiriteka swinene entirhweni wa vona wa nsimu. Nakambe, nyuziphepha ya Monterrey sweswinyana yi xiye vutshembeki bya vona emhakeni yo hlangavetana ni mphika-makaneta ya vukala-tlhelo, exikarhi ka swilo swin’wana yi ri: “Mawaku xichavo lexi enteke lexi ku tiya ni xivindzi xa ku hlula ka vona swi ku huhutelaka eka hina. Hambi leswi vana va vona va hlongoriwaka exikolweni va tsakela ku tshama va tshembekile eripfumelweni ra vona. Xana a swi ta ku yini loko hina Vakriste hinkwerhu a ho va hi ndlela yoleyo, ku ri hava ku hambana hi ntlawa kumbe vulawuri ke? Mexico a yi ta va hofisi ya rhavi ra le tilweni.”
10. (a) I yini lexi kombaka Timbhoni ta Yehova ti ri leti vekaka mihandzu hambi ku ri ehansi ka nsivelo ke? (b) I xivutiso xihi lexi tlakusiweke laha xana?
10 Timbhoni ta Yehova ti hambeta ti humesa mihandzu leyi yo dzunisa, hambi ku ri ematikweni lawa ya nga ni nxaniso lowu nga heriki. I ntsako muni wonghasi lowu veke kona ku vona eka Xiviko xa Ntirho wa Lembe ra 1984 leswaku ematikweni ya 28 laha ku nga ni minsivelo ya hulumendhe kumbe minsivelo yin’wana nhlayo leyi heleleke ya vahuweleri yi engeteleke hi tiphesente ta 3.1, ku tlula kotara ya miliyoni, naswona maphayona ya engeteleke hi 23 wa tiphesente! Xana u nga anakanya hi vuphayona ehansi ka swiyimo swo tano ke? Avareji ya vamakwerhu va xinuna ni va xisati va 6 905 ematikweni lawa a va ri karhi va endla tano n’hweti na n’hweti! Loko u ri ni ntshunxeko lowu ringaneke laha u tshamaka kona, xana u nga fikelela vuphayona bya nkarhi hinkwawo, kumbexana vuphayona lebyi pfunaka bya nkarhi na nkarhi?—Ringanisa Luka 17:5, 6.
‘Ku Va Khume Ra Madzana’
11, 12. (a) Hi xihi xiphemu xo sungula xa xitshembiso lexi Yehova hi byakwe a xi endlaka sweswi? (b) Hi swihi swikombiso swin’wana swa ‘lontsongo la vaka khume ra madzana’ ke? (c) Hikwalaho ka yini ku ve ni ku andza ko tano ka xihatla?
11 Ehenhla ka vito ra yena n’wini lerikulu, sweswi Yehova u endla switshembiso swinharhu. (Esaya 60:22) Xo sungula wa hi byela a ku: “Lo’nṭongo o ta v̌a khume ra madzana.” Loko u ri karhi u hlaya Yearbook of Jehovah’s Witnesses yin’wana ni yin’wana, xana u yi xiyile ndlela leyi masungulo ya endliweke ha yona hi muhuweleri un’we wa Mfumo, kumbe va nga ri vangani, ematikweni man’wana laha sweswi ku nga ni magidigidi ke? Hi xikombiso, makwerhu wa xinuna wa phayona loyi a veke wo sungula ku veka vumbhoni eChile u xave kamara kutani a rhamba vanhu eka nhlangano wa Sonto. Eku heteleleni munhu un’we la tsakelaka u tile. Wanuna loyi u vutise xivutiso a ku, ‘Manuku van’wana-ke, va ta ta rini?’ Phayona ri n’wi tiyisekisile ri ku: “Va ta ta.” Naswona va tile. Endzhaku ka malembe lama nga vaka 50, munhu yoloye lontsongo u ve 23 985.
12 Le Italy, Timbhoni ta Yehova ti xanisiwe ku vava hi ntlawa wa masocha ya Mussolini. Elembeni leri landzeleke ku hela ka nyimpi ra 1946, a ku ri ni 120 wa vona ntsena lava a va vika ntirho. Kambe tsundzuka leswaku a ku ri ni lava va nga vaka 120 ntsena hi Pentekosta elembeni ra 33 C.E. Kutani anakanya leswi swi sunguriweke enkarhini wolowo! (Mintirho 1:15; 2:1-4, 41) Sweswi, emhakeni yin’wana, moya wa Yehova wu chululeriwe altaly. Hi malembe ya 38 vahuweleri va kulele eka nhlohlorhi ya 119 408, eka xiviko xo hetelela, ku nga ku andza ka magidi-gidi. Tanihi le matikweni yo tala ya vukhatoliki emisaveni hinkwayo, Timbhoni ta Yehova eltaly ti hlangavetana ni ku andza loku xiyekaka.—Ringanisa Psalma 69:9; Esaya 63:14.
“Tiko Le’ra Matimba”
13, 14. (a) Xana xiphemu xa vumbirhi xa xitshembiso xa Yehova xi hetiseke hi ndlela yihi? (b) Emhakeni leyi, xana 1 Petro 2:9 na Esaya 59:21 ti tirha njhani xana? (c) I yini lexi nyikeke ku chumayela ka hina matimba lamakulu?
13 Xiphemu xa vumbirhi xa switshembiso swinharhu swa Yehova hi lexi: “Lo’nṭongo ngopfu, o ta v̌a tiko le’ra matimba.” Hakunene a a ri “lo’nṭongo ngopfu,” masalela lama hangalasiweke ya vatotiwa, lama tlheriseriweke ‘etikweni’ ra Yehova leri a ri tsakelaka hi 1919. Kambe u andzile, ku fikela loko Vaisrayele va moya hinkwavo va nghenile—nhlayo leyi heleleke ya vadyandzhaka va Mfumo va 144 000. (Varhoma 11:25, 26) Kunene, tanihi xiphemu xa “tiko leri hlawulekeke” ra Xikwembu, masalela lama totiweke emisaveni ya humesiwile emunyameni ya nghenisiwa eku vonakaleni ka yena loku hlamarisaka. Ya tsakele ku twarisa mintirho leyo saseka ya Yehova, Xikwembu xa wona. (1 Petro 2:9) Hambi leswi hi ndzinganyeto a va ri vatsongo hi nhlayo, va nyikiwe matimba hi moya wa Xikwembu. “Ntwanano wa mina na v̌ona hi lowo, ku v̌ula Yehova: Moya wa mina, lo’wu nga ka wena, ni marito ya mina, lawa nḍi ma v̌ekeke noṅwini wa wena, ma nga ka ma nga humi noṅwini wa wena, ne miloṅwini ya v̌ana v̌a wena, ne miloṅwini ya v̌ana v̌a v̌ana v̌a wena, ku v̌ula Yehova, ŝeŝi ni masiku!”—Esaya 59:21.
14 Hi nhlamuselo leyi Yehova u hi tiyisekisa leswaku ku huwelela ka hina ‘mahungu lamanene ya swilo leswinene’ ku fanele ku humelela handle ko hluleka, naswona hikwalaho ka leswi hi khongela hi timbilu hinkwato ‘esikwini leri ra Yehova.’ Ku chumayela ka hina ku kume matimba leswi “v̌ana” vo fanekisela va masalela lama totiweke, “ntshungu lowukulu,” naswona “v̌ana” va vona (vanhu lavantshwa lava va va kongomiseke enhlengeletanweni ya Xikwembu) va ngheniseke rungula leri ra ku hlayiseka emilon’wini ya vona, kwalaho va endla ku tinyikela ka le rivaleni. Hikwalaho, mabandlha hinkwawo ma hambeta ma kula emoyeni, kun’we na hi tinhlayo.—Varhoma 10:10, 15; Psalma 118:24, 25; 1 Vatesalonika 3:12.
15. “Tiko” ra Xikwembu ro fanekisela ri ve lerikulu hi ndlela yihi, naswona hikwalaho ka yini ri tsakile?
15 Eminkarhini ya sweswinyana, mihandzu ya Mfumo yi andze hi laha ku hlamarisaka swonghasi! Hi ku engeteriwa ka tinhlayo letikulu ta “ntshungu lowukulu,” tiko ra Xikwembu ro fanekisela sweswi ri endla nhlohlorhi ya timbhoni leti gingiritekaka ta 2 842 531. “Tiko” leri ri na vanhu vo tala ku tlula matiko lama nga vaka 92 ni mintlawa ya misava ya politiki ya ntivo swa rivala (geopolitics). Hi ntsako hi phindha marito ya muyimbeleri lonene lama nge: “Makungu ya Yehova ma tiyile hi laha ku nga heriki; mianakanyo ya mbilu ya yena yi yima tinšakeni hikwato. Ku katekile tiko leri Yehova a nga Šikwembu ša rona! Ni v̌anhu lav̌a a tihlawuleleke ku va nḍaka ya v̌ona!”—Psalma 33:11, 12.
‘Ku Swi Hatlisisa’
16, 17. (a) I yini lexi kombaka leswaku xiphemu xa vunharhu xa xitshembiso xa Yehova xa hetiseka sweswi ke? (b) Xana rirhandzu ra Xikwembu na Kriste ri kombisiwe hi ndlela yihi? (c) I ntirho ni moya wihi lowu tsakeke lowu pfuneteke ku ‘hatlisisa swilo leswi’? (d) Matewu 9:35-38 yi tirha njhani namuntlha?
16 Yehova u tlhandlekela xiphemu xa vunharhu xa xitshembiso xakwe a ku: “Mina, Yehova, nḍi hatlisisa ŝilo leŝi e mikarini ya ŝona.” Loko hi ri karhi hi yima eku heleni ka “nhlomulo lowukulu,” nkarhi wa swona hi WOLOWU! (Marka 13:10, 18, 19) Ku andza lokukulu ka ntirho wa Mfumo eka malembe mambirhi lama hundzeke ku komba leswi. Ku ‘hatlisa’ loku ku fanele ku xiyiwa emisaveni hinkwayo, hambi ku ri ematikweni lawa Timbhoni ta Yehova ti faneleke ku kombisa rirhandzu ra tona ra Yehova Xikwembu na Yesu Kriste hi ku chumayela ehansi ka minxaniso kumbe swiyimo swin’wana leswi vekaka vutomi bya vona ekhombyeni. Hi swivandla swa vahuweleri va nkarhi hinkwawo leswi tshamaka swi ri karhi swi engeteleka, maphayona ya le mahlweni. Naswona mawaku ntsako lowu ya wu kumaka entirhweni wa Yehova!—Swivuriso 10:22.
17 Moya lowu wa ntsako wa vuphayona wu khutaze mabandlha kwihi na kwihi ku ‘hatlisisa’ ku hlanganyela ka wona eku hlengeleteni ko hetelela. Hambi ku ri ni ku andza lokunene, hi nga swi kota ku vula leswaku “ku tshovela i kukulu, kambe vatirhi a va talanga.” Emisaveni leyi yi pfumalaka ntshembo ya namuntiha, hi nga twela vanhu vusiwana, hi laha Yesu a endleke ha kona loko a ri emisaveni, hikuva hakunene va “tshamile ehansi, va fana ni tinyimpfu leti nga riki na murisi.” Hikwalaho hi ‘khongela N’wini wa ku tshovela, leswaku a rhuma vatirhi eku tshoveleni ka yena,’ naswona ha tsaka ku vona swikhongelo swa hina swi hlamuriwa hi laha ku hlamarisaka.—Matewu 9:35-38.
18, 19. Hi swihi swiviko swin’wana leswi kombaka leswaku nsimu ya misava yi ‘lulamele ku tshovela’?
18 Ku teka xin’we ntsena xa swikombiso swo tala leswi pfuxetaka: Hi April ya 1984, Ecuador ri vike maphayona lama pfunaka ya 1 048 ensin’wini, ku nga 106 wa tiphesente ku tlula April leyi hundzeke. Hi June tiko leri a ri vika tidyondzo ta le makaya ta Bibele ta 12 238, ku nga ku engeteleka ka 24 wa tiphesente elembeni, ni vahuweleri va 8 044, ku nga ku andza ka 17 wa tiphesente. Lava veke kona eXitsundzuxweni va engetelekile va va 40 728, ku nga nhlayo-xikarhi ya lava va tlulaka 5 va muhuweleri un’wana ni un’wana. Emisaveni ya hina hinkwayo ku ta swiviko leswi fanaka, naswona 7 416 974 wa lava va veke kona emisaveni hinkwayo eka nkhuvo wa Xitsundzuxo xa April 15, 1984, va komba leswaku masimu ya ‘lulamele ku tshovela’ lava hlengeleteriweke “vutomi lebyi nga heriki.”—Yohane 4:35, 36.
19 Hakanyingi Yehova u ‘swi hatlisisa’ hi tindlela leti hlamarisaka. Mulanguteri la famba-fambaka u tsala leswi a ri swihlahleni swa n’walungu wa Papua New Guinea a ku: “Munhu loyi a burisaneke ni phayona leri hlawulekeke u tlhelele ekaya ra yena leri nga etlhelweni emutini lowu nga ni tintshava. Endzhakunyana ka malembe yo talanyana, u tlhele a humelela enhlengeletanweni ya xifundza—a ri ni xikombelo. Loyi tanihi wanuna loyi a a nga si khuvuriwa a a veke vumbhoni emutini wa rikwavo ni le ‘tindhawini’ leti nga kusuhi hi laha ku humelelaka lerova vakulukumba va muti wa kona sweswi va lave Timbhoni ta Yehova leswaku ti ta kutani ti khathalela timhaka ta moya etikweni hinkwaro.” Loko mbewu yi byariwile, i Xikwembu lexi ‘kurisaka.’—1 Vakorinto 3:6.
20. Marhavi ya Watch Tower ya kurisiwe hi ndlela yihi leswaku ya hlangavetana ni ku andza ke?
20 Hi tindlela to tala, Yehova a a ri karhi a lunghiselela vanhu va yena ku andza lokunene loku humelelaka sweswi. Ha tsaka leswi emalembeni ya sweswinyana, Yehova a khathaleleke ku kurisiwa ka miako ya marhavi ya Watch Tower hi ndlela leyi hlamarisaka. Namuntlha, marhavi lawa ya hlomisiwile leswaku ya pfuna mintlhambi leyikulu ya “matuv̌a.”
21. Xana hi nga hambetisa ku yini hi hlanganyela eku ‘hatlisiseni ka swilo leswi’?
21 Hikwalaho ke, hinkwerhu ka hina a hi avelaneni ku vonakala loku voningaka ka mahungu lamanene ya Mfumo ni timiliyoni leti engetelekeke! A hi kombeni “matuva” hinkwawo lama kongomeke ekaya ndlela ya ku “hlayiseka” ekusuhi ni marhangu ya nsirhelelo wa nhlengeletano ya Yehova kutani hi engetela ku n’wi ‘dzunisa’ etinyangweni ta yona. A ku ve xikhongelo xa hina leswaku Yehova Hosi Leyikulu ni nhloko ya bandlha ra Vukriste, Hosi yerhu leyi rhandzekaka Yesu Kriste, va ta hambeta va “hatlisisa ŝilo leŝi” loko ku huweleriwa ka Mfumo ku ri karhi ku ya emakun’wini ya kona!
Ku Pfuxeta Dyondzo Leyi:
◻ Xana i ku hetiseka kwihi loku xiyekaka ka Esaya 60:17 loku humeleleke hi 1938?
◻ Ku pfumelelana na Esaya 60:18, i timhaka tihi leti hi nga na tona ke?
◻ Swiviko leswi humaka ensin’wini swi ‘sasekisa’ Yehova hi ndlela yihi?
◻ Xana switshembiso swinharhu swa Esaya 60:22 swi ya emakun’wini ya swona hi ndlela yihi?
[Xifaniso eka tluka 14]
Swifunengeto swa Xihondzo xo Rindza xa Xinghezi xa va-1930 xi vhumbe xivono xa Ezekiyele xa nhlengeletano ya matimba ya Yehova
[Xifaniso eka tluka 17]
Moya lowunene wa vuphayona wu pfunetile ku ‘hatlisisa’ ntirho wa ku tshovela