I Yini XA Nkoka Lowukulu eVuton’wini Bya Wena?

A TIVEKA a ri wanuna wa xigwili emisaveni. Vukosi bya yena byi tale ku fika eka tibiliyoni ta tidolara. A hlamariwa hi vo tala va ku u fike emaninginingini ya minkateko. Kambe malembe mambirhi a nga si fa, J. Paul Getty u te: “A hi xikolokolo leswaku mali yi tisa ntsako. Maxangu wona kumbexana.”

Hi ku hlongorisa leswi vanyingi va swi tekaka swi ri swa nkoka evuton’wini, mukuceteri la dumeke wa oyili kunene u tlhotlhovele ku ya fika eka mpimo lowu hlawulekeke. Kambe xana u vonake tanihi munhu loyi a kumeke ntsako eka leswi a swi tirheleke hi matimba? Kumbe u vonaka tanihi munhu loyi a nga swi xiyisisa eku heteleleni leswaku leswi a swi tirheleke hi matimba kahle-kahle a swi nga ri swa nkoka ke?

Lexi Hetisekeke Ni Xa Xiviri

Xana i yini lexi u xi tekaka xi ri xa nkoka lowukulu evuton’wini bya wena? Vanhu van’wana va nga ha vula leswaku ntshunxeko hi lexi va xi tsakelaka swinene. Van’wana va nga ha vula leswaku nkateko i nchumu lowukulu evuton’wini bya vona. Van’wana va tama va rhangisa ku hetisisa swa munhu hi yexe emahlweni ka swilo hinkwaswo.

Hambi leswi va nga laviki ku swi amukela, mahanyelo ya vanhu vo tala ni swiendlo swa vona swi komba leswaku mali na ntsako hakunene i swilo swa nkoka lowukulu evuton’wini bya vona. Va tiyimisele ku va lava fumeke kumbe va tiyimisele ‘ku tiphina,’ lerova loko va karhi va endla tano va nga ri na mhaka hambi loko va honisa mindyangu ya vona, rihanyo ra vona, ni vuhlayiseki bya vona bya moya. Naswona hi laha ku tsakisaka, Bibele yi vurile leswaku “emasikwini ya makumu” vanhu va ta va lava “tirhandzaka, va ta va lava rhandzaka mali ngopfu” ni “lava rhandzaka ku tiphina ku tlula ku rhandza Xikwembu.”—2 Timotiya 3:1, 2, 4.

Nchumu Wa Nkoka Lowukulu

Yesu Kriste, musunguri wa Vukriste u vutise xivutiso lexi tlhontlhaka miehleketo. U Vutisile a ku: “Munhu swi nga n’wi pfuna yini loko a fuwa misava hinkwayo, kambe a lahlekeriwa hi vutomi bya yena ke?” (Marka 8:36) Ehleketa hi swona. I yini lexi munhu a nga xi endlaka loko a ri hava vutomi? Ku hava!—Eklesiasta 9:5, 10.

U nga va wa ha ri ntsongo ivi u ehleketa leswaku u na nkarhi wo tala wo endla hinkwaswo leswi u lavaka ku swi endla. Kambe hakunene swi tano? Tinyimpi, vugevenga, mavabyi ni timhangu swi wisile vavanuna ni vavasati va ntsandza-vahlayi—hi xihatla na hi xijumani. Ku humelele yini hi makungu ni tipakana ta vona hinkwato xana?

Swi nga endleka u ri na ndyangu kumbe u dyuharile. Kutani u nga ha ehleketa leswaku u fanele ku tirhisa nkarhi wa wena hinkwawo ni matimba hinkwawo eku akeni ka vumundzuku lebyi tsakisaka bya wena kun’we ni lava u va rhandzaka u nga si ehleketa hi swilo swin’wana. Kambe i yini lexi u nga vulaka leswaku xi hlayisekile xana? Hi laha u tivaka ha kona, ku tlakuka ka minxavo, ku tshika mintirho, ni ku pfumala mintirho swi hete rifuwo ra vo tala, swi va siya va ri swisiwana ni ku pfumala makaya. Handle ka sweswo, hikwalaho ka leswi swiyimo emisaveni swi hlekahlekaka, i ku tiyiseka kwihi loku nga kona ka leswaku swilo leswi u swi tirhelaka hi ku nonon’hwa swi nga ka swi nga herisiwi hi swiendlo swin’wana swo ka swi nga languteriwanga ke?

Hikwalaho ke, handle ko kanakana wa wu vona nkoka wo kambela tipakani ta wena n’wini. Kutani, i yini hakunene lexi u xi vonaka xi ri xa nkoka lowukulu evuton’wini bya wena?