Xana Bibele Ya Ri Pfumelela Tshengwe?

EKA magazini wa Rhoma Khatoliki lowu humaka eNetherlands wa Bijeen (Swin’we), mutsari Sjef Donders u vulavule hi mpfilumpfilu lowu nga kona eka matiko yan’wana ya Vantima exikarhi ka nawu wa Bibele wa ku teka nsati un’we ni mukhuva lowu amukeriweke wa tshengwe. Hi ku vula ka yena, mpfilumpfilu wolowo wu tisiwile hi “ku honisiwa ka dyondzo-nkulu ya kereke [ehenhleni ka ku teka nsati un’we].”

Loko a kombisa mavonelo lama tsekatsekaka ya kereke, Donders u tshahe Eugene Hillman, muprista wa mu-Amerika, xirho xa Holy Ghost Fathers, ntlawa wa Rhoma Khatoliki lowu rhangeleke ntirho wa vurhumiwa eAfrika. Eka buku leyi vulavulaka hi tshengwe, Hillman u tsarile a ku: “Kungaku loko hikwalaho ka khombo ro karhi ra ntumbuluko kumbe khombo leri vangiwaka hi vanhu, xikan’we-kan’we ku pfumaleka vavanuna, kambe ku va ni vavasati ntsena, manuku a ku ta kumeka swivangelo eBibeleni swo pfumelela vavanuna lava ku va ni vuxaka ni vavasati vo hambana-hambana.”

A swi ta va kona xana? Ku nga khathariseki malangutelo lawa ya vutifumi ya muprista, ku teka tshengwe a ku fanelanga ku seketeriwa eka Mukriste wihi na wihi ku nga khathariseki rixaka kumbe matshamelo. Ku teka nsati un’we a ku ri lunghiselelo ra Xikwembu ra vanhu aEdeni, naswona Yesu Kriste u kombe leswaku ku fanele ku tlheleriwa emhakeni leyi ebandlheni ra Vukriste. (Matewu 19:4-6) Ehansi ka ku huhuteriwa muapostola Pawulo u tsarile: “Mufambisi u fanele ku va munhu la nga riki na xisandzu, a teka nsati un’we ntsena.” (1 Timotiya 3:2) Naswona malunghana ni Vakriste hinkwavo, u tsundzuxile a ku: “Hikwalaho ka leswi vuoswi byi nga tala, wanuna un’wana ni un’wana a a ve ni nsati loyi a nga wa yena, ni wansati un’wana ni un’wana a a ve ni nuna loyi a nga wa yena.” (1 Vakorinto 7:2) Leswi a swi ri pfumeleli tshengwe exikarhi ka Vakriste va ntiyiso.