‘Vukhongeri Bya Mina Byi Kahle Eka Mina!’

XANA u tshama u vula marito yo tano loko un’wana wa Timbhoni ta Yehova a fikile ekaya ka wena? Kumbexana u tlhele u ku: ‘A byi ri kahle eka vatswari va mina ni le ka vakokwa wa mina. Kutani hikwalaho ka yini ndzi fanele ku karhateka hi vukhongeri byin’wana?’

Kavula, ha pfuneka swinene eka vutlhari ni ntokoto wa vatswari va hina. Kambe xexo i xisekelo xa vutlhari xo landzelela vukhongeri ke? Kunene a hi tekeleli vatswari va hina ni vakokwa wa hina eka hinkwaswo leswi hi swi endlaka. Ha yini swi nga ri tano ke? Hikuva ku vile ni nhluvuko evutivini na le ku twisiseni.

Hi xikombiso: Malembe lama tlulaka 40 lama hundzeke loko vanhu va vabya, va nga ha va va file hi mhaka ya leswi vutshunguri lebyi a byi ri kona a byi nga ri lebyinene. Ku sukela hi 1943, swidlaya-switsongwatsongwana swi kumekile kutani swi ponisile vutomi byo tala. Xana ha ala ku amukela ku tirhisiwa ka swidlaya

switsongwatsongwana hikwalaho ka leswi vakokwa wa hina va nga swi tivangiki ke? E-e, ha swi amukela ivi hi xiyisisa mimpfuno ya mindzhundzuluko leyintshwa. Malangutelo wolawo i ya vutlhari malunghana ni vukhongeri.

Mhaka ya muapostola Pawulo yi tlhela yi kombisa leswaku vukhongeri bya vatswari va hina a hi xikolokolo nguvu ya pitori leswaku i vugandzeri bya ntiyiso lebyi tsakisaka Xikwembu. Emahlweni ka ku va Pawulo a hundzukela eVukristeni, leswi a a endlisa swona ‘eNdleleni’ ya Vukriste a swi homboloke ku tlurisa mpimo hikuva a a “xanisa ni ku herisa kereke ya Xikwembu.” Kambe hikwalaho ka yini? Hi leswi a a ‘hisekela ngopfu mikhuva ya vatata wa yena.’ Ku namarhela ka yena evukhongerini lebyo sungula swi n’wi siverile ku xiya ntiyiso hi ta Yesu Kriste—nakona sweswo swi ta va swi nga xi tsakisanga Xikwembu.—Mintirho 9:1, 2; Vagalatiya 1:13, 14.

I Vukhongeri Bya Wena—Hi Ku Hlawula Kumbe Hi Ku Tiendlekela?

Hakanyingi, vukhongeri bya munhu hakunene i mhaka yo tikuma u ri eka byona. Hi ndlela yihi? Hikwalaho ka leswi swi nga endlekaka u velekiwa u ri Mukhatoliki, Muprotestente, Muhindu, Mutao, kumbe Mubudha hi leswi byebyo a byi ri vukhongeri bya vatswari va wena. Kambe a hi nge u velekeriwe etikweni kumbe endyangwini wun’wana. Kumbexana sweswi u rhandza vukhongeri byin’wana swinene. Hikwalaho ke, i swinene ku swi teka onge vukhongeri lebyi u velekeriweke eka byona xikolokolo i bya ntiyiso xana?

Hambi u tswaleriwe evukhongerini bya wena kumbe e-e, u nga ha vona onge byi kahle eka wena. Kambe vukhongeri lebyinene i mhaka ya ku tianakanyela ka munhu kumbe ku rhandza ka yena ke? Xana byebyo i vukongomisi lebyi tshembekaka?

Kumbexana hi nga kombisa leswi hi swakudya. Vutisa n’wana swakudya leswi a swi rhandzaka—eka xilayi xa khekhe kumbe ndyelo ya xipinichi. Kahle-kahle u ta hlawula khekhe. Kambe leswi a swi hlawuleke hi swona leswi fuweke ngopfu? Hi ku fanana, mhaka ya leswaku vukhongeri byebyo bya ku tsakisa a swi vuli swona leswaku hi byona byi ku antswelaka emoyeni.—Ringanisa Varhoma 10:2, 3.

Vukhongeri a hi mhaka ya nsindziso wa mianakanyo. Byi katsa vugandzeri bya Xikwembu, hikwalaho byi fanele ku xi tsakisa. Kutani ke, a hi xivutiso xa nkoka ku, Xana vukhongeri bya mina byi kahle eka mina ke? Kambe i ku, Xana vukhongeri bya mina hakunene byi tsakisa Xikwembu ke?