Hikwalaho Ka Yini U Lava Ku Nyikela Nkulumo Ya Bibele?
YESU KRISTE hakanyingi u vulavule ni mintshungu leyikulu, naswona hakunene a a ri xivulavuri lexi humelelaka. Entiyisweni, endzhaku ka loko Yesu a hetile Dyondzo yakwe leyi tivekaka eNtshaveni, “mintshungu a yi hlamele hi ku dyondzisa ka yena.” (Matewu 7:28) Ku hava ku tipfinyinga leswaku N’wana wa Xikwembu a a ri ni minsusumeto leyi tlakukeke ni leswaku tinkulumo takwe ta le rivaleni ti tise ku dzuneka eka Tata wakwe wa le tilweni.—Ringanisa Yohane 12:46-50.
Nakambe ku vulavula erivaleni a ku ri ndlela yin’wana leyi mahungu lamanene ya hangalasiweke ha yona hi valandzeri va Yesu eka lembe xidzana ro sungula ra Nguva ya Hina Leyi Tolovelekeke. Hi xikombiso, eKorinto Muapostola Pawulo “masiku ya sabata, [Pawulo] a a hlamulana ni lava a va ri esinagogeni, a ringeta ku khorwisa Vayuda ni Vagriki.” (Mintirho 18:1, 4) Ku tlula kwalaho, Pawulo u khutaze Timotiya mutirhi-kulobye hi marito lawa: “Tinyikete ku hlayela vanhu eMatsalwa, u khongotela ni ku dyondzisa, ndzi ko ndzi fika.” (1 Timotiya 4:13) Hikwalaho ku hlayela vanhu Matsalwa ni ku vulavula, loku nga ni minsusumeto leyi hlawulekeke, hakunene a ku ri ni xivandla xa kona exikarhi ka malandza lama tshembekaka ya Yehova ya lembe xidzana ro sungula.
Hambi swi ri tano, xitsundzuxo xa laveka. Loko Heroda, la ambexiweke nguvu ya vuhosi, a sungule ku nyikela nkulumo ya le rivaleni, vanhu lava hlengeletaneke va sungule ku huwelela va ku: “Rito leri a hi ra munhu, i ra Tilo!” Eka xiendlakalo xexo ntsumi ya Yehova yi be Heroda. Ha yini? “Hikuva a a nga dzunisanga Xikwembu.”—Mintirho 12:21-23.
Xilaveko Xa Langutelo Lerinene Ra Mianakanyo
Namuntlha, ku nyikela nkulumo ya Bibele ya le rivaleni hakunene i lunghelo leri navelekaka swinene leri nyikiweke vavanuna lava vupfeke va Vukriste. Hambi swi ri tano, mutirheli un’wana ni un’wana u ta endla khwatsi ku kambela mbilu yakwe malunghana ni nsusumeto wa yena. (Genesa 8:21; Yeremia 17:9) Xana u susumetiwa hi ku navela ku dzunisa Xikwembu ni ku pfuna vapfumeri-kulobye ni van’wana ke? Kumbe, xana u navela ku nyikela tinkulumo to tano ta Bibele hikwalaho ka xikhundla lexi fambisanaka ni ku vulavula erivaleni ni ku navela ka yena n’wini ko voniwa ke?
Nsusumeto lowunene wu ta tikombisa hi tindlela to hambana-hambana. Hi xikombiso, wu ta hi vangela ku xiya leswaku i mpfuno wa moya wa Yehova ntsena lowu hi nga endlaka leswinene ha wona eka lunghelo ro vulavula ntiyiso wa Xikwembu eplatifomo ya le rivaleni. Hikwalaho ke, hi ta va ni langutelo leri fanaka ni leriya ra muapostola Petro, loyi a nge te: “Loko un’wana a nyikiwile ku vulavula, a a vulavule hi ku landza marito ya Xikwembu; loko un’wana a nyikiwile ku tirhela vanhu, a a swi endle tanihi loyi a swi tirhaka hi matimba lawa Xikwembu xi n’wi nyikaka wona, leswaku eswilweni hinkwaswo Xikwembu xi dzunisiwa ha Yesu Kriste.”—1 Petro 4:11.
Rirhandzu ri fanele ku va xivangelo lexikulu xo lava ku nyikela nkulumo ya Bibele. Xo sungula, hi fanele ku rhandza Yehova Xikwembu, hi navela ku n’wi dzunisa ni ku hlanganyela eku hlawulekiseni ka vito rakwe leri kwetsimaka. Xa vumbirhi, nsusumeto wa hina wu fanele ku katsa ku rhandza vayingiseri va hina, ku navela loku humaka embilwini ko va letela ni ku va nyanyulela “ku hanya vutomi lebyo hlawuleka, bya vukhongeri.”—2 Petro 3:11.
Ku navela loku humaka embilwini ko aka vapfumeri-kulorhi ni van’wana ku fanele ku tlhela ku va nsusumeto wa hina wo nyikela nkulumo ya le rivaleni. Leswi swi ta hi sivela ku ringeta ku ‘tsakisa’ vayingiseri va hina hi ku va byela leswi va lavaka ku swi twa ntsena. (2 Timotiya 4:3) Ku navela ku aka van’wana emoyeni nakona ku ta hi susumetela ku papalata ku bulusa mafenya kumbe ku vula swilo leswaku hi tsakisa vayingiseri va hina kumbe ku va endla leswaku va hleka. Naswona hi nga ka hi nga tirhisi ku vulavula loku sasekisiweke kumbe hi kombisa vutlhari bya misava hi matshalatshala yo tsakisa vayingiseri va hina. Kambe ke, loko hi ri ni nsusumeto lowunene wo vulavula erivaleni, hi ta landzela xikombiso xa muapostola Pawulo, loyi a nyikeke ‘xikombiso xa moya ni xa matimba leswaku ku pfumela ka vayingiseri vakwe ku nga tshembi vutlhari bya vanhu, kambe ku tshemba matimba ya Xikwembu.’—1 Vakorinto 2:3-5.
Swilo Swinharhu Swa Masungulo
Ku nyikela nkulumo ya Bibele ya le rivaleni i mhaka ya mianakanyo ni mbilu. Hikwalaho ke, swivulavuri swa Vukriste a swi fanelanga ku va ni langutelo lerinene ntsena kambe swi fanele ku tlhela swi va ni nchumu wa nkoka wo wu vula. Sweswo swi lava ku anakanyisisa hi swilo swinharhu swa masungulo. Swona i Matsalwa, timhaka, ni ku twala.
Xo sungula, swi fanele ku tsundzukiwa leswaku mmiri wa nkulumo ya Bibele ya le rivaleni handle ko tilumaluma yi fanele ku vumbiwa hi matsalwa lama tirhisiweke hi xivulavuri. Loko u ri ni lunghelo ro nyikela nkulumo yo tano, u fanele ku va ni vutivi lebyinene hi nhloko-mhaka ya wena naswona u fanele ku swi kota ku tshaha matsalwa, u ya hlaya kahle, ni ku ya tirhisa khwatsi. Hi siku ra Pentekosta, 33 C.E., muapostola Petro hi ku phindha-phindha u tshahe Matsalwa leswaku a seketela tinhla takwe. (Mintirho 2:14-41) Vaberiya a va anerisekile leswi Pawulo a seketeleke tinhla takwe hi laha ku tiyeke eMatsalweni. (Mintirho 17:10, 11) Naswona Apolosi u ‘kombise hi Matsalwa leswaku Yesu a a ri yena Kriste,’ Mesiya loyi a languteriweke ka ha ri khale.—Mintirho 18:28.
Kavula, xisekelo xa Matsalwa xa nkulumo ya le rivaleni xi kombisiwe eka nxaxameto (outline) lowu humaka eka Sosayiti ya Watch Tower. Hambi swi ri tano, xivulavuri xi nga ha tirhisa matsalwa lama tlhandlekelaka kumbe lama yelanaka, ntsendze loko ya pfumelelana kahle ni loko ya nga tatiwi ngopfu. Emhakeni leyi, mutirheli wa Vukriste u fanele ku tivonela leswaku a fambisana ni ku vonakala loku andzaka ka moya. Hi xikombiso, xivulavuri xi nga ha tirhisa 1 Vakorinto 2:9 hi ku hoxisa eka Paradeyisi ya nkarhi lowu taka ya laha misaveni, kasi mongo (tindzimana 7 na 10) wu komba leswaku yi tirha eka swilo leswi enteke swa vutlhari bya Xikwembu.
Xa vumbirhi, ku ni mhaka ya tinhla leti tirhisiweke ku seketela timhaka leti endliweke hi xivulavuri xa le rivaleni. Ku fanele ku kombisiwa vukheta leswaku tinhla leti nyikeriweke a ti tlhontlhi xivutiso lexi nga nawini kumbe mphika-makaneta. Ngopfu-ngopfu vukheta i bya nkoka loko yinhla yi vonaka yi nyanyula. I vutlhari—naswona i swa nkoka—ku tiyiseka leswaku leswi swi vuriweke hakunene i ntiyiso. Hikwalaho ke, minkarhi hinkwayo swa antswa ku kota ku tshaha swihlovo leswi tshembekaka swa rungula loko timhaka tin’wana ti kanetiwa. Hi siku ra Pentekosta, Petro u vulavule hi timhaka leti tivekaka khwatsi. Muapostola Pawulo na yena u endle tano eAriyopago, kumbe eMars’ Hill, le Athena.—Mintirho 2:22; 17:22, 23, 28.
Xa vunharhu, ku ni xilaveko lexi heleleke xa masungulo. Xivulavuri xa le rivaleni xa Vukriste xi fanele ku anakanyisisa ni vayingiseri va xona. Xisweswo hi hlaya leswaku Pawulo “a hlamulana ni Vayuda ni lava chavaka Xikwembu; kutani a endlisa sweswo ni le hubyeni ya muti masiku hinkwawo, a hlamulana ni lava va nga tshuka va va kona.” (Mintirho 17:17) Eka nkulumo ya le rivaleni, ku anakanyisisa ku fanele ku va ni masungulo, ku va loku olovaka, loku nga erivaleni, loku twisisekaka kahle. Mpfuno lowukulu emhakeni leyi i ku tirhisa ku hlangana loku kombaka vuxaka exikarhi ka leswi vuriwaka ni leswi landzelaka.
Loko u ri ni lunghelo ro va xivulavuri xa le rivaleni, kona tiyiseka leswaku u ni langutelo lerinene ra mianakanyo ehenhleni ko nyikela nkulumo ya Bibele. Vana ni rirhandzu embiIwini ya wena ro rhandza Muvumbi wa wena ni munhu-kuloni. Hlanganisa kutani u nyikela matsalwa ni timhaka hi mukhuva lowu tolovelekeke. Manuku xivuriso lexi xi ta tirha eka wena: “Kambe nomu wa lo’wo tihariha wa hanyisa.” (Swivuriso 12:18) Ku tlula kwalaho, ku nyikela tinkulumo letinene ta Bibele leti dzunisaka Xikwembu i ndlela yin’wana yo “tiponisa ni ku ponisa vayingisi va wena.”—1 Timotiya 4:16.