“Tiko” Leri Phamelaka Timiliyoni Leti Sikaka
1, 2. (a) I xilaveko xihi xa xiviri lexi faneleke ku voniwa hi vaaki va misava? (b) I vanhu vahi lava hi nga langutaka eka vona emhakeni leyi?
TIBILIYONI ta vaaki va misava ti fanele ku navela ‘swakudya’ leswi nga ta ti xurhisela vutomi lebyi nga heriki laha misaveni, loko misava yi hundzuriwe paradeyisi ya misava hinkwayo. Kambe va ta hundzukela eka mani kumbe kwihi xana? Riphabliki ra Israyele a ri ringeti ku hetisisa vuprofeta bya Bibele lebyi nga eka Esaya 27:6 ehenhleni ko tata misava hi “mihandzu” leswaku swi pfuna vanhu hi laha ku nga heriki.
2 Tiko ra Israyele eka lembe xidzana ro sungula ra Nguva ya Hina leyi Tolovelekeke ri lahlile xileriso xa rona xo pfuna vanhu hinkwavo. Xisweswo a ku ri eka masalela mantsongo ntsena ya Vayuda va ntumbuluko laha Mesiya a kongomiseke marito yakwe lama nge: “Ndzi nyikiwile vuhosi hinkwabyo etilweni ni le misaveni; yanani ha kona, mi ya hundzula vamatiko hinkwavo leswaku va va vadyondzisiwa va mina, mi va khuvula hi vito ra Tatana, ni ra N’wana, ni ra Moya Lowo Kwetsima . . . Kutani vonani, ndzi na n’wina masiku hinkwawo ku ko ku hela misava.” (Matewu 28:18-20) Kambe ku vuriwa yini hi malembe xidzana ya 19 endzhakunyana? I vamani enkarhini wa hina lava tsundzukaka ku hetiseka ka Esaya 27:6? Naswona xana wena ni varhandziwa va wena mi katseka njhani?
3. I vamani eka lembe xidzana ra hina lava voneke “vukari” bya Xikwembu lebyi boxiweke eka Esaya 27:4 ke?
3 Hambi leswi hi hundzeke eka swiendlakalo leswi kongomeke hi makume ya malembe, hi endla khwatsi ku kambisisa hi ku komisa swiendlakalo swin’wana emalembeni ya Nyimpi yo Sungula ya Misava. Enkarhini wolowo Yehova Xikwembu a a ri ni xivangelo lexi tiyeke xo ‘karihela’ matiko ya Vujagana hikwalaho ka ku hlanganyela ka wona eka mpfilu-mpfilu wolowo wu dlayaka. (Ringanisa Esaya 27:4.) Ya endle tano ematshan’wini yo nyikela mimfumo ya tiko ra wona eka Xikwembu lexi Tlakukeke loko Mfumo wa xona wu tlhomiwa ematilweni hi 1914 emavokweni ya N’wana wa xona la kwetsimisiweke, Yesu Kriste. Va engetele ku pfurha ka vukarhi bya xona hi ku xanisa masalela ya Israyele wa moya, va sivela swichudeni leswi swa Bibele swa Vukriste leswi tinyiketeke ku twarisa Mfumo wa xona lowu tlhomiweke hi ku ntshunxeka ha vomu. Entiyisweni, kambe vo tala va masalela ya Israyele wa moya va titsongahatele mintshikilelo ya misava, xisweswo va hluleka ku rhwala vutihlamuleri bya vona tanihi vanhu lava hlawuriweke lava humesiweke eka mafamhiselo lawa ya swilo ya misava. A va yi vonanga mphika-makaneta ya vukalatlhelo lebyi heleleke ehenhleni ka mimpfilumpfilu ya misava leyi, hikwalaho va ve ehansi ka nandzu wo karhi wa ngati, naswona hi nkarhinyana va faneriwile na hi mpimo wa “v̌ukari” bya Xikwembu.
4. “V̌ukari” bya Xikwembu byi khumba malandza ya xona ya Vukriste hi ndlela yihi, naswona i dyondzo yihi leyi hi nga yi dyondzaka eka leswi?
4 Loko a wu lo hanya enkarhini wolowo, xana u anakanya leswaku a u ta va u endlise ku yini eka mintshikilelo yoleyo ya nkarhi wa nyimpi? U fanele ku xiya swilo swo tano, hikuva hi ku endla tano u nga ha tiyisa ku tiyimisela ka wena malunghana ni leswi u nga swi endlaka ehansi ka mintshikilelo yihi na yihi ya nkarhi lowu taka. Le ndzhaku swi nga ha va swi vonake wu ri nkarhi wo tshika ku twarisa Mfumo ni ku tifihla. Vo tala va ye eka tlhelo rolero, va vona onge va fanele ku rindzela ku kwetsimisiwa ka vona ko sungula leswaku va va kun’we na Yesu Kriste la vekiweke exiluvelweni. (Luka 22:28-30) Hambi swi ri tano, ku weriwa hi ‘vukari’ byo karhi bya Yehova a ku ri ntokoto lowu dyondzisaka lowu a wu nga lahlekanga eka Vakriste va ntiyiso va nkarhi wolowo, naswona hikwalaho a ku nga ri hava mihandzu. Ku va tiyisele ntirho lowu a wa ha ta wo twarisa siku ra vukari bya Xikwembu xa hina wo lwisana ni loyi muprofeta Esaya a n’wi vitanaka “Leviatan” eka Esaya 27:1, laha hi hlayaka leswi:
5. Eminkarhini ya manguva lawa, Yehova u hundzuluxele miehleketo yakwe eka “Leviatan” la boxiweke eka Esaya 27:1 hi ndlela yihi?
5 “Hi siku rero, Yehova u ta ba hi ripanga ra yena ro tika, le’rikulu, ra matimba, e Leviatan, e nyoka ya matambo, Leviatan, nyoka ya makhinya-khinya; kutani o ta dlaya dragona le’yi nge lwandle.”
Le ndzhaku eminkarhini ya khale, Yehova u yise mianakanyo yakwe eka vahluri va vanhu vakwe. Hi laha hi voneke ha kona eku sunguleni, sweswo swi katsa mfumo wa Babilona, kun’we na Egipta na Asur. (Esaya 27:12, 13) Xana u nga vona ku tirha ka manguva lawa ka marito yo fanekisela lama nga eka Esaya 27:1 ke? Enkarhini wa Nyimpi yo Sungula ya Misava, vanhu va Xikwembu a va nga ri mahlonga ya tiko rin’we ro karhi kumbe mfumo. Kambe Yehova u vone swi fanela ku yisa mianakanyo eka Leviatan wo fanekisela, hi leswaku, Sathana Diyavulosi. U famba-famba hi ku tirhandzela elwandle ra vanhu naswona u tirhisa swilo emisaveni ku vanga khombo kumbe ku hlasela malandza ya Xikwembu.—Ringanisa Nhlavutelo 17:15.
6, 7. (a) I yini eminkarhini ya manguva lawa lexi faneke ni “ŝigatlu ni mitwa” ke? (b) I yini lexi hi nga xi langutelaka malunghana na vona enkarhini lowu taka?
6 Loko hi lembe ra 1919 masalela ya Israyele wa moya hi ku hiseka ya tlhele ya pfuxeta ku chumayela ka wona hi ta Mfumo, a ku ri nkarhi wa leswaku Yehova a ku:
“A nḍi na v̌ukari; kambe loko nḍi kuma ŝigatlu ni mitwa, nḍi ta lwa na ŝona, nḍi ŝi hisa hikwaŝo ŝiṅwe.”—Esaya 27:4.
7 Endzhaku ka ku hela ka Nyimpi yo Sungula ya Misava, Ntwanano wa Matiko wu tlhomiwile leswaku wu lwisana ni Mfumo wa Xikwembu ha Kriste. Leswi hi nga swi fanisa ni “ŝigatlu ni mitwa” leswi vekiweke endleleni ya Yehova Xikwembu, tanihi xihinga kumbe nxungeto. Sweswi nhlengeletano ya Nhlangano wa Matiko yi sive Ntwanano wolowo. Hi ku tirhisa Nhlangano wa Matiko, matiko yo hambana-hambana lama nga swirho ma kombisa ku tiyimisela ka wona ko lwisana ni Mfumo lowu twarisiweke wa Kriste ni xikongomelo xa wona xo hlayisa mfumo wa wona vini wa misava. ‘Enyimpini ya siku lerikulu ra Xikwembu xa Matimba hinkwawo’ eHar-magedon, hi ndlela yo fanekisela xi ta lwa ni ‘swigatlu ni mitwa hinkwayo,’ kavula, xi swi herisa ivi eku heteleleni xi swi hisa endzilweni, leswaku xi swi hunguta swi va minkuma ntsena. Xisweswo xi ta kombisa loyi hakunene a nga Mufumi wa Hinkwako-nkwako. Manuku ke, u nga swi vona leswaku hambi leswi a wu nga ri kona exikarhi ka Vakriste lava totiweke le ndzhaku eka Nyimpi yo Sungula ya Misava, u nga ha khumbiwa—hi leswinene kumbe hi leswo biha—eka vuyelo byo hetelela bya swiendlakalo leswi fambisanaka na Esaya 27:1.—Nhlavutelo 16:14-16; 17:1-18:4.
‘Ku Namarhela Khokholo Ra Yehova’
8. Matiko yo tala namuntlha ya tiseketele hi yini?
8 Swirho swa Nhlangano wa Matiko swi tiseketela hi matimba ya swona vini naswona swi tshemba khokholo ra swona leri endliweke hi vanhu. Kambe ke, ntshembo wa swona eka rona a wu tiyanga hi laha ku ringaneke leswaku wu nga swi sivela ku tshula matlhari lama dlayaka swinene, matlhari lama heleleke ya nyimpi, ku nga bomo ya nyutliya. Hi ku fanana, ku chava ku rihiseriwa hi ku tirhisa bomo ya nyutliya hi kona ku va sivelaka, hayi Nhlangano wa Matiko.
9, 10. Hikwalaho ka yini ku ri vutlhari eka hina ku tshemba ‘khokholo’ rin’wana ke?
9 Hambi swi ri tano, hi laha hi voneke ha kona, leswi entiyisweni swi xungetaka vukona lebyi yaka emahlweni bya matiko i “nyimpi ya siku lerikulu ra Xikwembu xa Matimba hinkwawo.” I yini lexi matiko ma nga tshembaka ku xi endla ku lwisana ni Xikwembu xa Matimba hinkwawo, Lexi xi nghenisaka matimba lama chavisaka exikarhi ka nyutliyasi ya athomo yin’wana ni yin’wana ke? U nga ha khorwiseka khwatsi leswaku Muvumbi u na matimba swinene ku tlula matiko ni matlhari ya wona hinkwawo hi laha ku nga ringanisiwiki. Lava va tlangelaka mhaka leyi—leswi Timbhoni ta Yehova ti swi endlaka—va ni mpfuno wun’we ntsena lowu nga kona. Wona wu andlariwe eka marito man’wana ya Yehova lama nge:
“Loko ŝi nga ri leŝaku v̌a kombela ku lonḍov̌otiwa hi mina, v̌a kombela ku rula, v̌a v̌a v̌a hlangana na mina.” (Esaya 27:5)
Ku hava xitirho xa munhu lexi xi nga khokholo ro tsutsumela eka rona leswaku ku kumiwa nsirhelelo kumbe xo sivela nyimpi emisaveni, naswona hakunene a hi khokholo leri mindyangu ya misava yi nga balekelaka eka rona leswaku yi tshama yi hlayisekile.
10 Mi swi tiva kahle leswaku vanhu vo tala namuntlha va katseka hi minsusumeto eka minkanetano ni mafambiselo lama khathalelaka matlhari ya nyutliya ni ku veka matlhari hansi. Khombo ra kona, sweswo swi va pfala mahlo eka ntiyiso wa leswaku nyimpi leyi nga ta endleka ya Xikwembu xa Matimba hinkwawo eAarmagedoni hi yona leyi xungetaka ku lovisiwa ka matiko hinkwawo. Loko u tlangela ntiyiso wolowo, manuku ndlela ya vutlhari eka wena yi katsa ku hundzulukela eka Yehova. “Khokholo” ra yena i nchumu lowu valavi va ku hlayiseka hinkwavo va faneleke ku wu namarhela, ku nga, rifuwo ra yena n’wini ra matimba lama nga heriki. Nhlengeletano hinkwayo ya Sathana Diyavulosi yi nga ka yi nga swi koti ku hlula Mukriste wihi ni wihi loyi a namarheleke ‘khokholo rero.’
11. Hi nga ya tirhisa njhani marito ya Yesu eka Luka 14:31-33 loko hi ri karhi hi namarhela ‘khokholo’ ra Xikwembu?
11 Kavula, Yehova ni mavuthu yakwe ehansi ka Ndhuna, Yesu Kriste, sweswi va le ku macheni. Loko va ha ri ekule, leswi mukhuva wa ku ehleketa lowu tolovelekeke, loko byi nga ri vutlhari bya xiviri, wu swi vulaka i ku va munhu hi ku fanekisela a rhumela mahungu ya ku rhula emahlweni, na ku phikelela ku rhula ehansi ka swirhalanganya leswikulu. Ndhuna leyi nga hluriwiki ya mavuthu ya Yehova yi sorile ndlela yo tano loko ya ha ri laha misaveni. (Luka 14:31-33) Naswona loko u kambisisa swinene leswi Yesu a swi vuleke kwalaho, u ta swi vona leswaku u fanise langutelo ra hina ni ‘leswi hi nga na swona.’ Hambi hi hanya etikweni leri hluvukeke ni leri nga ni ntsako kumbe hi hanya etikweni ra Misava ya Vunharhu laha swi lavaka ku boha bandi ri tiya leswaku hi kuma nsirhelelo wa swa timali, hi fanele ku xiyisisa xivumbeko xa hina. Tivutise: Xana hakunene ndzi veka ku tshemba ka mina eka matimba ya Yehova tanihi khokholo ra mina kumbe ndzi pfumelela ‘rifuwo’ ri teka xikhundla xo sungula ke? Emhakeni leyi, hlaya Luka 12:15-21.
12. I vumbhoni byihi lebyi nga kona bya leswaku vo tala namuntlha va namarhela matimba ya Yehova?
12 Emisaveni hinkwayo, magidi yo tala ya Timbhoni ta Yehova ana se ya hundzukele eka Yehova handle ko ba mariri, ya lava ku rhula na yena. Vo tala va lunghisa timhaka ta vona leswaku va ta nyikela makume ya maawara n’hweti na n’hweti entirhweni wo endla vadyondzisiwa. Un’wana ni un’wana loyi hakunene a tikarhatelaka ku tirhela Yehova u le xiyin’weni xo vona “ku rhula ka Xikwembu” loku tshembisiweke loku tlulaka ku anakanya hi ku twisisa hinkwako ka munhu. (Vafilipiya 4:7) Loko nkarhi wa ha ri kona, va hambeta va pfuna van’wana leswaku va nghena eka lunghiselelo leri ra ku rhula ra Yehova wa mavandla. I xivandla xihi lexi ntirho wo tano lowu ponisaka vutomi wu nga na xona evuton’wini bya wena ke?
Ku Tata “Misava” Hi “Mihandzu”
13. I yini lexi Esaya 27:6 yi kombaka leswaku xi nga languteriwa enkarhini wa hina?
13 A ku ta va wihi ntirho wa misava wa Israyele wa moya endzhaku ka ku tlheriseriwa ka yona eka tintswalo ta Xikwembu endzhaku ka Nyimpi yo Sungula ya Misava ke? Leswi hi kombisiwe swona eka marito lama fikelelaka mbilu ya Esaya 27:6:
“E mikarini le’yi taka, Yakob o ta tšyela timiṭu, Israel o ta baleka ŝiluv̌a ni mahluke, o ta tata misav̌a hi mihanḍu ya yena.”
Kambisisa ntiyiso wa marito wolawo namuntlha. Ku endla tano swi ta ku nyika xivangelo lexi engetelekeke xo va un’wana wa vanhu va Xikwembu kumbe, loko ana se u ri yena, leswaku u va la tiyimiseleke swinene ku tshama exikarhi ka vagandzeri va ntiyiso ku nga khathariseki miringo kumbe swirhalanganya leswi nga tlakukaka.
14. Esaya 27:6 yi kume ku hetiseka eka vanhu va Xikwembu hi ndlela yihi?
14 Xiyimo xo fana ni lexi xi profetiweke eka Esaya 27:6 xi kumeke hi xitalo exikarhi ka vagandzeri va Yehova ku sukela hi lembe ra 1919, loko nhlengeletano yo sungula ya mani na mani ya Timbhoni ta Yehova yi khomiwile eCedar Point, Ohio. Hi xikombiso, a ku nga ri khale ngopfu endzhaku ka sweswo laha Sosayiti ya Watch Tower yi sunguleke ku kandziyisa magazini wa yona lowuntshwa. The Golden Age, lowu sweswi wu vuriwaka Awake! A swi fana ni loko Yuda wa moya a dzima timitsu.
15. I langutelo rihi leri nyanyulaka leri nyikeriweke vagandzeri va ntiyiso ku sukela hi 1918?
15 Xisweswo emalembeni yo sungula ya ku ntshunxiwa ni ku tlheriseriwa eka tintswalo ta Yehova, Vakriste va ntiyiso va sungule ku baleka swiluva tanihi ‘lava va nga byariwa hi Yehova.’ (Esaya 61:3) Hi 1918, ku nga lembe ro hetelela ra Nyimpi yo Sungula ya Misava, nkulumo leyi hlamarisaka leyi nge “Timiliyoni Leti Hanyaka Sweswi Ti Nga Ka Ti Nga Fi” yi nyikeriwe erivaleni hi J. F. Rutherford. Hi masalela mantsongo ntsena ya vadyondzisiwa lava tswariweke hi moya va Yesu Kriste, Hosi leyi fumaka, lama siyiweke emisaveni leswaku ya tirha ntirho lowu ya wu nyikiweke hi Xikwembu lowu manuku a wu vekiwe ehenhla ka wona, xana sweswo a ku ri ku hundzeleta timhaka ke?
16. (a) Masalela ya endlise ku yini ehenhleni ka malangutelo lama vekiweke emahlweni ka wona? (b) I “mihandzu” yihi leyi ma yi tsakeleke, naswona hi vuyelo byihi?
16 Xana Yehova a a ta tirhisa Vakriste vo tano ku tata “misava hi mihandzu” hi ndlela yihi? Masalela ya Israyele wa moya ya vile yo sungula, kambe ku vuriwa yini hi “mihandzu” leyi misava a yi fanele ku tatiwa hi yona? Masalela ya kume “mihandzu,” leyi katseke mahungu Iamanene ya Mfumo lowu tlhomiweke wa Yehova emavokweni ya Kriste, lama tsakisaka ni lawa ya anerisaka lerova va lava ku ma avelana ni vanhu-kulobye. Yehova a a vhumbe leswaku lontsongo a a ta va khume ra madzana naswona lontsongo ngopfu a va tiko lera matimba, naswona leswi swi tikombe swi ri hava ku hlayelela hi ku hoxisa etlhelweni ra Xikwembu. (Esaya 60:22) Hi ku hatlisa masalela ya Israyele wa moya ya tihlanganise ni “ntshungu lowukulu” wa “tinyimpfu tin’wana” ta Yesu Kriste, Murisi Lonene.—Nhlavutelo 7:9-17; Yohane 10:16.
17, 18. I yini leswi u nga swi tiyisaka malunghana ni ‘ku tata misava hi mihandzu’ xana?
17 U nga ha khathalela xiyimo xa Vukriste bya ntiyiso namuntlha. Sosayiti ya Watch Tower sweswi yi na marhavi ya 94 emisaveni hinkwayo. Mabandlha lama kondleteriweke lama gingiritekaka ya Timbhoni ta Yehova sweswi ya endla 48 000, naswona wona ma kumeka ematikweni ya 203. Ku dzuneka hinkwako ku ya eka Xikwembu xa ntiyiso hikwalaho ka leswi, nakona swiendlakalo leswi swo xiyeka swi lwela Rito ra xona leri nga hembiki, kasi “makumu,” hi laha ya vhumbiweke ha kona eka Matewu 24:14, a ma si fika.
18 Ina, ku ni timiliyoni leti lavaka ku va tinharhu ta Vakriste lava tirhaka kun’we ni Sosayiti ya Watch Tower emisaveni hinkwayo. Vo tala va timiliyoni leti hi lavaya va “tinyimpfu tin’wana” ta Kriste, lava ku nga khale va ri karhi va rhwala ndzhwalo wa ntirho wo veka vumbhoni wa misava hinkwayo, naswona ‘ntsako wa Yehova wu vile matimba, kumbe khokholo ra vona.’ (Nehemia 8:10) Kutani ke, un’wana ni un’wana wa hina namuntlha u ni nkarhi wo tatiwa khwatsi emoyeni ni wo hlanganyela ‘eku tateni ka misava hi mihandzu.’
19. I mintsako yihi leyi u nga tiphinaka ha yona mayelana ni ‘misava,’ naswona u titwa njhani hi sweswo?
19 Hi nga tiyiseka leswaku Yehova a nga ka a nga yi pfumeleli “mihandzu” ya “misava,” nsimu ya ntirho wa Timbhoni ta Yehova, leswaku yi lovisiwa. Ntirho wa Timbhoni takwe leti chumayelaka wu nga ka wu nga endleriwi swa hava! Mihandzu ya moya, kumbe “mihandzu,” hi laha yi byariweke ha kona hi Vakriste va ntiyiso i ya ku wundla hinkwavo lava yi lavaka. Hi nkarhi lowu faneleke, leswi swi ta katsa tibiliyoni ta vanhu lava feke lava va nga ta pfuxiwa ehansi ka ku Fuma ka Yesu Kriste ka Gidi ra Malembe. Anakanya leswi sweswo swi nga ha vulaka swona eka wena enkarhini lowu taka! Hi nkarhi lowu faneleke, Vaisrayele vo tala va ntumbuluko va nkarhi lowu hundzeke va ta pfuxiwa. Van’wana va vona va nga ha va va katsekile eku hetisekeni ko sungula ka vuprofeta lebyi nga eka Esaya ndzima ya 27. Xana swi nga ka swi nga vi leswi tsakisaka eka wena ku va la hanyaka enkarhini wolowo, swi endla leswaku u kota ku hlamusela ndlela leyi u hlanganyeleke ha yona eku ‘tateni ka misava ya manguva lawa hi mihandzu’ hi xitalo ke?—Ringanisa Nhlavutelo 22:2, 3.
Ndlela Ya “Leviatan” Yi Herisiwile
20. Xana i yini lexi yimeleke “Leviatan,” nakona ku va ni vuyelo byihi eka mfumo wa Xikwembu?
20 Enkarhini wolowo Egipta yo fanekisela, mafambiselo layo biha ya sweswi lawa Sathana Diyavulosi a ma fumeke tanihi xikwembu xa wona, a ya nga ha vi kona. Yehova u ta va a hundzuluxele mianakanyo yakwe eka Leviatan wo fanekisela, hi leswaku nyoka leyi rhetemukaka, leyo biha leyi nga exikarhi ka Iwandle ra vanhu. Yena ni matiko yakwe, hambi yi ri minhlangano ya matiko, a va nga ha vi kona. A nga ka a nga ha vi kona a ri muthyakisi la ntshunxekeke, la gingiritekaka wa vanhu lava Yesu Kriste a va feleke. (Esaya 27:1) Ina, Sathana Diyavulosi u ta nghenisiwa ekheleni eka ku Fuma ka Yesu Kriste ka Gidi ra Malembe, N’wana Davhida ni Mudyandzhaka la faneleke wa Mfumo. Vaisrayele va moya va 144 000 va ta va vadyandzhaka-kulobye na yena, Nghala yo fanekisela ya rixaka ra Yuda ematilweni. (Varhoma 8:16, 17; Nhlavutelo 5:5, 9, 10; 7:1-4) Yehova Xikwembu Lexi Tlakukeke u ta va a tlakusiwile hi laha ku nga heriki tanihi Hosi Leyikulu ya misava hinkwayo. Nhlengeletano ya Yehova ya misava hinkwayo ematilweni ni laha misaveni hi ntsako yi ta vona ku rhula loku nga heriki ni ntwanano. Hi nkarhi lowu nga heriki, hambi ku ri hi laha ku nga riki na makumu, Yehova u ta tsakela nhlengeletano yakwe leyi hlanganeke ya misava hinkwayo.
Wa Tsundzuka Xana?
◻ Hikwalaho ka yini Vakriste va ntiyiso va vone “vukari” bya Yehova eku sunguleni ka lembe xidzana leri, naswona hi nga dyondza yini eka ntokoto lowu ke?
◻ Ku hambana ni matiko, hi nga swi kotisa ku yini ku ‘namarhela Yehova tanihi khokholo ra hina’? (Esaya 27:5)
◻ Xana “misava” yi tatisiwe ku yini hi “mihandzu” enkarhini wa hina? (Esaya 27:6)
◻ I ku hetiseka kwihi ka nkarhi lowu taka ka Esaya 27:1 loku hi nga ku rindzelaka hi ku tiyiseka?
[Xifaniso eka tluka 26]
Van’wana va tshemba leswaku vanhu va ta herisa nxungeto wa nyutliya, kambe lavo tlhariha va matiko hinkwawo va ‘namarhela khokholo ra Yehova’
[Xifaniso eka tluka 27]
Ku andza ka Vakriste lava phameriwaka kahle emoyeni swi kombisiwa hi ku kurisiwa ka marhavi ya Sosayiti ya Watch Tower
Spain
Brazil
Canada