Ku Hlayiwa La Lulameriwaka Hi “Vutomi”

“Na wona ntirho wun’we wo lulama wu endla leswaku . . . va ntshunxiwa, va kuma vutomi.”—VARHOMA 5:18.

1. I vamani va nga ni ndlala ni torha ra leswo lulama, naswona ku navela ka vona ku ta hetiseka njhani?

“KU KATEKILE lava nga ni ndlala ni torha ra leswo lulama, hikuva va ta xurha.” (Matewu 5:6) Torha ro tano ra leswo lulama a ri nga aneriseki hi xitalo eka lava ‘Mfumo wa matilo wu nga wa vona’ ntsena kambe ni le ka lava “nga ta fuma misava.” (Matewu 5:10; Psalma 37:29) Mintlawa hi mimbirhi ka yona yi hlanganyela eka ntshembo lowu vuriweke hi muapostola Petro loko a tsala a ku: “Kambe, hi ku ya hi ku tshembisa ka Hosi [Xikwembu], hi langutele matilo lamantshwa ni misava leyintshwa, laha ku lulama ku tshameke kona.” (2 Petro 3:13) Ina, Yehova Xikwembu u tshembisile hulumendhe lontshwa wo lulama wa le matilweni, “Mfumo wa Matilo,” ni “misava leyintshwa” yo lulama, kumbe vandla ra vanhu emisaveni ya Paradeyisi.

2. I vuxaka byihi lebyi nga kona exikarhi ka Yehova, ku lulama, ni ku langutela ka hina ka Mafambiselo Lamantshwa yo rhula?

² Kambe i yini lexi kahle-kahle xi faneleke ku twisisiwa hi matilo lamantshwa yo lulama ni misava leyintshwa yo lulama ke? Swi vula leswaku hulumendhe lontshwa wa le matilweni kun’we ni vanhu lava fumiwaka hi yona laha misaveni va fanele ku xiya mpimanyeto wa Xikwembu wa leswinene ni leswo biha. Yehova i “v̌uako byo lulama.” (Yeremia 50:7) Ku lulama hi wona masungulo ya mfumo wakwe kumbe xivandla xa xiluvelo xakwe emisaveni. (Yobo 37:23, 24; Psalma 89:14) Leswaku ku va ni ku rhula emisaveni, swivumbiwa swa Yehova swi fanele ku xiya lunghelo rakwe ro veka mimpimanyeto ya leswi lulameke ni leswo biha. Hi ku fanana, ntshembo wa hina wa Mafambiselo Lamantshwa yo lulama wu tiseketele hi ku va Yehova a hlayisa mimpimanyeto yakwe.—Psalma 145:17.

3. Hikwalaho ka vululami lebyi heleleke bya Yehova, i xivutiso xihi lexi tsundzukiwaka?

³ Xisweswo xivutiso xa tlakuka xa hi laha Yehova Xikwembu lowo kwetsima ni wo lulama a nga tirhisanaka ni vadyohi lava nga lulamangiki ha kona. (Ringanisa Esaya 59:2; Habakuk 1:13.) Xana loko a ri karhi a tshembeka eka mimpimanyeto yakwe leyi tlakukeke ya vululami, a nga swi kotisa ku yini ku hlawula lava faneleke ku hlanganyela eka “matilo lamantshwa” yo lulama ya hulumendhe exikarhi ka vadyohi ni ku amukela lava nga ta va xiphemu xa “misava leyintshwa” yo lulama tanihi vanakulobye ke? Ku hlamula leswi, hi fanele ku twisisa dyondzo ya Bibele ya ku lulamisa, kumbe ku hlayiwa la lulameke.

Lunghiselelo Ra Ntsetselelo Wa Tintswalo

4. Hikwalaho ka yini vanhu lava nga hetisekangiki va kolota Xikwembu swinene, naswona ha yini hi nga swi koti ku tintshunxa eka xikweleti lexi xana?

⁴ Ematsalweni, swidyoho swi fanisiwa ni swikweleti. (Vona Matewu 6:12, 14; 18:21-35; Luka 11:4.) Vanhu hinkwavo i vadyohi naswona, hikokwalaho, va kolota Xikwembu swinene-nene. ‘Hakelo ya xidyoho i rifu.’ (Varhoma 6:23) Leswi va ‘xaviseriweke xidyoho’ hi kokwa wa vona Adamu, vatukulu vakwe va nga ka va nga endli nchumu ku tintshunxa eka xikweleti lexi xi kulukumba. (Varhoma 7:14) Rifu ra la kolotaka ntsena hi rona ri nga xi susaka, “hikuva munhu la feke u ntshunxiwile ematimbeni ya ku dyoha.” (Varhoma 6:7) Ku hava ntirho lowunene lowu endliweke enkarhini wa ku hanya ka mudyohi lowu nga tlhelaka wu xava leswi Adamu a swi lahleke, hambi ku ri ku n’wi nyika xiyimo xo lulama emahlweni ka Xikwembu.—Psalma 49:7, 9; Varhoma 3:20

5. Xana Yehova u wu lunghiselele njhani ntshunxeko wa vanhu va xidyoho loko a ri karhi a xixima ku lulama kakwe loku hetisekeke?

⁵ Xana Yehova u wu tise njhani ntshunxeko eka vanhu lava nga hetisekangiki handle ko soholota mimpimanyeto yakwe ya vululami? Nhlamulo yi kombisa vutlhari ni tintswalo ta Yehova. Muapostola Pawulo u swi hlamusela kahle leswi epapileni rakwe ro ya eka Varhoma. U tsala a ku: “[Vadyohi] va hlayiwa lava lulameke hi tintswalo ta Xikwembu, hi ku nyikiwa, ha Kriste Yesu loyi a va kutsulaka; Xikwembu xi n’wi vekile leswaku hi ku fa ka yena, vanhu va rivaleriwa swidyoho, loko va pfumela eka yena; xi endlele ku komba hi laha xi endlaka vanhu va va lava lulameke ha kona, hikuva a xi hlayelanga vanhu ku dyoha ka vona ka khale, eminkarhini ya ku wisa ka xona; a swi ri leswaku xi komba ku lulama ka xona eminkarhini ya sweswi, xi va Xikwembu lexi lulameke, xikan’we ni ku va Xikwembu lexi endlaka munhu ku va la lulameke loko a pfumela eka Yesu.”—Varhoma 3:24-26.

6. (a) Xana mimpimanyeto ya Yehova ya vululami yi anerisiwe njhani hi gandzelo ra Kriste, naswona i yini lexi xisweswo Yehova a lavaka ku xi endla? (b) Xikwembu xi nga teka mahanyelo ya munhu la nga ni ripfumelo tanihi lamanene hi ndlela yihi?

⁶ Hi tintswalo takwe, Yehova u amukele gandzelo ra Yesu leri endleriweke vatukulu va Adamu. (1 Petro 2:24) A ri ri gandzelo leri yelanaka, kumbe leri fanaka, hi leswi tanihi munhu la hetisekeke, Yesu a tlheleke a xava leswi munhu la hetisekeke Adamu a swi lahleke. (Vona Eksoda 21:23; 1 Timotiya 2:6.) Hi ku va vululami byi anerisekile, Yehova hi rirhandzu wa swi lava ku “hlangula,” kumbe ‘ku susa,’ swidyoho leswi tsundzukiwaka emahanyelweni ya ‘munhu la pfumelaka eka Yesu.’ (Esaya 44:22; Mintirho 3:19) Loko munhu wo tano a tshama a tshembekile, Yehova a nge tshiki ‘ku n’wi hlayela swidyoho swakwe’ ntsena kambe kahle-kahle U nghenisa vululami emahanyelweni yakwe. (2 Vakorinto 5:19) Hi ku tirhisa lunghiselelo leri ra ntsetselelo wa tintswalo, ‘lavo tala va hundzuriwe lava lulameke.’ (Varhoma 5:19) Leyi i mhaka yin’wana yo lulamisa, xiendlo xa Xikwembu laha eka xona munhu a hlayiwaka la pfumalaka nandzu. (Mintirho 13:38, 39) Xana i vamani lava tsetseleriweke, kumbe ku hlayiwa lava lulameke, emafambiselweni lawa ya swilo?

“Vahlawuriwa” Va 144 000

7. Kriste u hlayiwe la lulameke hi ndlela yihi, kutani hikwalaho i yini lexi kotekeke?

⁷ Hi ntumbuluko, Kriste hi yexe a nga lavanga ku endliwa la lulameke, tanihi leswi kunene a a lulamile. (1 Petro 3:18) Hi ku va a tikombe a tshembeka ku ya fika eku feni tanihi munhu la hetisekeke (“Adamu lowo hetelela”) naswona hi leswi a nyikeleke lunghelo rakwe ra vutomi emisaveni, Yesu u pfuxiwile hi Yehova, Tata wa yena. Yesu u ‘hlayiwe la lulameke hi tlhelo ra moya,’ hi leswaku, u hlayiwe la lulameke yena n’wini hi laha ku heleleke ivi a pfuxiwa tanihi “moya lowu hanyisaka.” (1 Vakorinto 15:45; 1 Timotiya 3:16) Hi rifu rakwe ra gandzelo, u lunghiselele xisekelo lexi ha xona Yehova a tekaka vavanuna ni vavasati va ripfumelo tanihi lava lulameke.—Varhoma 10:4.

8, 9. (a) I vamani vo sungula ku pfuneka hi ku nyikiwa ka vululami, naswona ha yini? (b) I vamani lava vumbaka “matilo lamantshwa,” nakona va ta fuma yini?

⁸ Kahle-kahle, lava Yehova a va hlawulelaka ku vumba “matilo lamantshwa” yo lulama, kumbe hulumendhe ya Mfumo ehansi ka Hosi Yesu Kriste, hi vona vo sungula ku pfuneka hi xitalo hi lunghiselelo leri ra tintswalo emafambiselweni lawa ya swilo. Buku ya Daniyele yi hlamusela nkhuvo wa le matilweni lowu ha wona Kriste, N’wana-wa-Munhu, a amukelaka “ku fuma, ku kwetsima ni v̌uhosi,” leswaku “v̌a tinšaka hikwato, ni v̌a matiko hikwawo, ni v̌a tinḍimi hikwato [emisaveni] v̌a ta ṅwi tirela.” Manuku Daniyele u komba leswaku “v̌uhosi, ni ku fuma” swi tlhela swi nyikiwa “tiko ra v̌ahlawuriwa v̌a Muungameri-la-tlakukeke,” Yehova.—Daniel 7:13, 14, 18, 27; ringanisa Nhlavutelo 5:8-10.

⁹ Nhlayo ya “vahlawuriwa” vo tano lava hlawuleriweke ku fuma ni Xinyimpfana Yesu Kriste eNtshaveni ya Siyoni ya le tilweni yi boxiwe yi ri 144 000, “lava va kutsuriweke exikarhi ka vanhu.” (Nhlavutelo 14:1-5) Lava, kun’we na Kriste, va vumba “matilo lamantshwa” yo lulama ya mafambiselo lamantshwa ya swilo ya Yehova.

Va Hlayiwe Lava Lulameke—Njhani Naswona Ha Yini?

10. (a) I buku yihi ya Bibele leyi yi ku hlamuselaka kahle ku lulamisa, naswona a yi tsaleriwa vamani? (b) I vamani vo sungula ku katseka edyondzweni ya Bibele ya ku lulamisa xana?

¹⁰ Buku ya Bibele leyi handle ko tilumaluma yi pakanisaka kahle emhakeni ya ku va Xikwembu xi hlaya van’wana tanihi vanhu lava lulameke i papila ra Pawulo ro ya eka Varhoma. Hi laha ku tsakisaka, u tsale papila leri a ri tsalela lava “va vitaniweke ku va vahlawuriwa.” (Varhoma 1:1, 7) Leswi swi hlamusela xivangelo xo va dyondzo ya ‘ku lulamisa,’ kumbe ku hlayiwa la lulameke, hi laha yi andlariweke ha kona hi Pawulo, yi tirhisiwile mayelana ni “vahlawuriwa” va 144 000.

11. I vuxaka byihi byi nga kona exikarhi ka ripfumelo, mintirho, ni ku lulamisa?

¹¹ Leswi Pawulo a a swi kandziyisa eka Varhoma hi leswaku ku hava Muyuda kumbe wa Matiko la nga kuma xiyimo lexi lulameke emahlweni ka Xikwembu hikwalaho ka mintirho, hambi loko yi endleriwa ku pfumelelana ni Nawu wa Muxe kumbe hikwalaho ka xichavo xa nawu wa mahanyelo wa ntumbuluko. (Varhoma 2:14, 15; 3:9, 10, 19, 20) Muyuda ni wa Matiko hi ku fanana va nga hlayiwa lava lulameke ntsena exisekelweni xa ripfumelo egandzelweni ra nkutsulo ra Kriste. (Varhoma 3:22-24, 29, 30) Hambi swi ri tano, ndzayo leyi nga eka tindzima to hetelela ta Varhoma (12-15) yi komba leswaku ripfumelo ro tano ri fanele ku seketeriwa hi mintirho ya vukhongeri, hi laha Yakobo na yena a hlamuselaka ha kona. (Yakobo 2:14-17) Mintirho yo tano yi kombisa ntsena leswaku Mukriste la hlayiwaka la lulameke u na ripfumelo leri nga nchumu lowukulu ehenhleni ka ku hlayeriwa ku lulama hi Xikwembu.

12, 13. (a) Hikwalaho ka yini “vahlawuriwa” va 144 000 va lava ku hlayiwa lava lulameke? (b) Va endla yini hi malunghelo ya vutomi lebyi va byi amukelaka?

¹² Nakona, hikwalaho ka xivangelo xihi xa matimba Vakriste lava “vitaniweke ku va vahlawuriwa” va lava ku hlayiwa lava lulameke? Laha hi laha mhaka ya vumbirhi ya ku lulamisa yi humelelaka kona, ku nga, ku va Xikwembu xi hlayela munhu ku va la faneriwaka hi vutomi tanihi n’wana la hetisekeke wa xona. Hikwalaho ka ntirho lowu va vitaneriweke ku wu endla ‘ematilweni lamantshwa’ yo lulama, lava va 144 000 va fanele ku wu sukela ni ku wu tshikela makumu ntshembo wihi na wihi wa vutomi lebyi nga heriki emisaveni. (Psalma 37:29; 115:16) Hi ndlela leyi va fa rifu ra gandzelo. Va ‘titsongahatela rifu ro fana ni ra Kriste.’—Vafilipiya 3:8-11.

¹³ Sweswi, ku pfumelelana ni nsinya wa nawu lowu vekiweke eNawini wa Muxe, gandzelo rihi na rihi leri nyikeriwaka Yehova ri fanele ri pfumala xisolo. (Levitika 22:21; Deuteronoma 15:21) “Vahlawuriwa” va 144 000 va hlamuseriwa tanihi “vanhu lavo lulama lava nyikiweke ku hetiseka.”—Vaheveru 12:23.

Ku Amukeriwa Tanihi N’wana Wa Moya

14, 15. (a) I ku cinca muni mayelana ni xidyoho loku lava 144 000 va ku endlaka? (b) Va pfuxeriwa eka “mukhuva lowuntshwa” hi ndlela yihi?

¹⁴ Loko va ha ri vanhu va nyama, lava vo ‘lulama’ va fa rifu ro fanekisela. Muapostola Pawulo wa hlamusela: “Hina hi feke hi tlhelo ra ku dyoha, xana hi nga hanyela yini eku dyoheni xana? Xana a mi tivi leswaku hina hinkwerhu lava khuvuleriweke eka Yesu Kriste, hi ku khuvuleriwa ku fa ka yena, hi lahliwile na yena, leswaku kukotisa leswi Kriste a pfuxiweke exikarhi ka vafi, hi matimba yo kwetsima ya Tatana, na hina hi ta hanya hi mukhuva lowuntshwa . . . leswi hi swi tivaka hi leswaku munhu wa hina wa khale u vambiwile na Kriste . . . leswaku matimba ya miri wa ku dyoha ma herisiwa, ni leswaku hi ta ka hi nga vi mahlonga ya ku dyoha. Hikuva munhu loyi a feke u ntshunxiwile ematimbeni ya ku dyoha.”—Varhoma 6:2-7.

¹⁵ Hi nkarhi wa vutomi bya vona bya vumunhu, “vahlawuriwa” va 144 000, lava masalela ya vona mantsongo ntsena ma saleke emisaveni enkarhini lowu wa makumu, ‘va fa hi tlhelo ra ku dyoha.’ Endzhaku ka rifu ra vona ro fanekisela, lava “vitaneriweke ku va vahlawuriwa” va pfuxeriwa eka “mukhuva lowuntshwa.” Loko a va endle lava lulameke, Yehova wa swi kota ku va tswala hi moya wakwe leswaku va va “vana” vakwe va moya. Va ‘tswariwe ra vumbirhi’ ivi va amukeriwa tanihi hi “vana va Xikwembu.”a (Yohane 3:3; Varhoma 8:9-16) Va hundzuka Vaisrayele va moya kutani va nghenisiwa eka ntwanano lowuntshwa.—Yeremia 31:31-34; Luka 22:20; Varhoma 9:6.

Vadyandzhaka Va Vuprista Ni Vuhosi

16. Xana “vahlawuriwa” va 144 000 va va vadyandzhaka va yini?

¹⁶ Tanihi “vana” va Xikwembu lava amukeriweke va moya, “vahlawuriwa” va 144 000 va tlhela va va ‘vadyandzhaka.’ (Vagalatiya 4:5-7) Pawulo u tsalele Vakriste-kulobye lava tswariweke hi moya a ku: “Kutani leswi hi nga vana, hi vadyandzhaka na swona; vadyandzhaka va Xikwembu, ni vadyandzhaka swin’we na Kriste; leswi kunene hi xanisekaka na yena, swi vula leswaku hi ta kwetsimisiwa na yena.” (Varhoma 8:17) Xana i yini ndzhaka ya Kriste? Yehova u n’wi endle Muprista lonkulu “hi laha ku nga heriki, hi mukhuv̌a wa Melkisedek.” (Vaheveru 6:19, 20; 7:1, Bibele ya Xitsonga) Tanihi “vadyandzhaka” kun’we na Kriste, Vakriste lava tswariweke hi moya nakambe va totiwe hi Yehova tanihi vaprista va moya. (2 Vakorinto 1:21; 1 Petro 2:9) Nakambe, xin’wana xa swikongomelo-nkulu swa ku va va hlayiwa lava lulameke hi Yehova hi leswaku endzhakunyana “va ta fuma evutomini ha un’we, a nga Yesu Kriste.”—Varhoma 5:17.

17. (a) Hambi leswi va hlayiweke lava lulameke, Vakriste lava totiweke va fanele ku endla yini siku na siku? (b) Va yi amukela njhani hakelo ya vona xana?

¹⁷ Loko va ha ri emisaveni, Vakriste lava vo totiwa, hambi loko va hlayiwe lava lulameke, swa ha va fanela ku Iwisana ni mimboyamelo ya vona ya xidyoho. (Varhoma 7:15-20) Va lava ngati ya Kriste ku va hlantswa eka swidyoho swa vona swa siku na siku swa ku pfumala ku hetiseka. (1 Yohane 1:7; 2:1, 2) Loko va tshama va tshembekile ku ya fika emakumu ka vutomi bya vona bya la misaveni, va fa hi xiviri ivi va pfuxeriwa “ndzhaka leyi nga boriki, leyi nga nyamisiwangiki, leyi nga vuniki” tanihi xiphemu xa “matilo lamantshwa” yo lulama.—1 Petro 1:3, 4; 2 Petro 3:13.

Ku “Langutela Ku Kombisiwa Ka Vana Va Xikwembu”

18, 19. (a) Xana “swivumbiwa” swi langutele yini? (b) “Vana va Xikwembu” va ta ‘kombisiwa’ hi ndlela yihi, nakona hikwalaho ka yini “swivumbiwa” swi tshama swi langutele leswi hi ku navela lokukulu?

¹⁸ Xana leswi hinkwaswo swi va khumbisa ku yini vona—lava tlulaka “vana va Xikwembu” va moya va 144 000—lava nga ni ndlala ni torha ra leswo lulama kambe lava ntshembo wa vona ku nga ku fuma misava? Ha vona, muapostola Pawulo wa tsala: “Hikuva swivumbiwa swi langutela, hi ku navela lokukulu, leswaku Xikwembu xi kombisa erivaleni vana va xona. Leswi vumbiweke swi nyiketiwile eka swa hava . . . kambe ku langutela ku kona ka leswaku swivumbiwa leswi swi ta ntshunxiwa na swona evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu.”—Varhoma 8:19-21.

¹⁹ “Swivumbiwa” swo tano swa vanhu leswi ku langutela ka swona ku nga ku hanya hi masiku emisaveni ya Paradeyisi swi hanya hi ‘ku langutela hi ku navela lokukulu’ ka nkarhi—lowu nga kusuhi sweswi—loko Hosi Yesu Kriste ni “vana va Xikwembu” lava pfuxiweke va nga ta ‘kombisiwa’ hi ku lovisa mafambiselo layo biha ya sweswi ya swilo ivi endzhaku va fuma tanihi tihosi ni vaprista “malembe ya 1 000.” (Nhlavutelo 20:4, 6) Hi nkarhi wa Mfumo wa Kriste wa Gidi ra malembe, “swivumbiwa leswi swi ta ntshunxiwa na swona evuhlongeni bya leswo bola.”

20. I yini leswi nga ta xiyiwa eka nhloko-mhaka leyi landzelaka?

²⁰ Leswaku vanhu lava hanyaka ‘emisaveni leyintshwa’ yo lulama eku heteleleni va ta ku amukela njhani “ku ntshunxeka loko kwetsima loku nga ka vana va Xikwembu,” ni leswaku dyondzo ya Bibele yo lulamisa yi ta va khumbisa ku yini hambi ku ri sweswi, swi ta xiyiwa eka nhloko-mhaka leyi landzelaka.

[Nhlamuselo ya le hansi]

Malunghana ni ku va Xikwembu xi teka vanhu tanihi lava lulameke—

◻ Xana Bibele yi vula yini loko yi ku matilo lamantshwa yo lulama ni misava leyintshwa yo lulama?

◻ Hikwalaho ka yini vanhu va faneriwa hi ku vekiwa exiyin’weni lexinene na Yehova?

◻ Xana mimpimanyeto ya Yehova ya vululami yi anerisiwe hi ndlela yihi?

◻ Hikwalaho ka yini lava 144 000 va ri vona vo sungula ku hlayiwa lava lulameke, naswona va endla yini hi malunghelo ya vutomi lebyi va byi amukeleke?

◻ Xana lava 144 000 va va vadyandzhaka va yini na Kriste?

[Bokisi eka tluka 11]

Ku na timhaka timbirhi ta ku lulamisa, kumbe ku vuriwa la lulameke:

(1) Ku va Xikwembu xi languta munhu yoloye a ri la nga hava nandzu

(2) Ku va Xikwembu xi teka munhu yoloye a ri la hetisekeke ni la faneriwaka hi vutomi lebyi nga heriki emisaveni

Vakriste lava totiweke va 144 000 va hlayiwe lava lulameke etimhakeni leti ha timbirhi ka tona. Va nyikela malunghelo ya vutomi bya vona bya vumunhu kutani va tswariwa tanihi “vana” va moya lava vitaneriweke ku va tihosi ni vaprista na Kriste ‘ematilweni lamantshwa’