“Ringetani Hi Matimba”
“Ringetani hi matimba ku nghena hi nyangwa leyo khuma, hikuva ndza mi byela leswaku lavo tala va ta navela ku nghena, kambe va ta tsandzeka.”—LUKA 13:24.
1. Vanhu vo tala va navela yini?
VUTISA Robbie wa tsevu wa malembe hi vukhale leswaku hikwalaho ka yini a tsakela ku ya eHolweni ya Mfumo, kutani u ta hlamula a ku: “Ndzi dyondza hi ta Yehova ni Paradeyisi laha ndzi nga hanyaka kona nkarhi wo leha swinene, ni swihari leswinene.” Ntukulu wakwe Dustin, wa malembe manharhu hi vukhale, u yi twisisa khwatsi ndlela ya vatswari vakwe yo tiva nkarhi wa ku bindzula hi wona hi ku kongoma: “Ndzi lava ku ya eHolweni ya Mfumo!” Leswi Robbie a swi phofulaka, ni leswi Dustin a dyondzaka ku swi phofula, swi nga tsakisa vanhu vo tala—vutomi, vutomi lebyi nga heriki. Vanhu va lava ku “ponisiwa.” Kambe njhani? Hi ku va kona emintirhweni ya vukhongeri ntsena ke?
2. (a) Hikwalaho ka yini ku pona ku nga xaviwi? (b) Marito ya Yesu eka Luka 13:24 ya komba leswi lavekaka leswaku ku poniwa hi ndlela yihi?
2 Ku ponisiwa ku nga ka ku nga kumeki hi ku va kona eminhlanganweni kumbe hi ndlela yihi na yihi yin’wana. I ka mahala, i nyiko leyi humaka eka Xikwembu. Kambe ke, Yehova Xikwembu wa ya lava matshalatshala eka hina loko hi ta amukela nyiko yakwe ya vutomi lebyi nga heriki. (Varhoma 6:23) Hi wahi xana? Hi xikombiso, i ku ringeta hi matimba entirhweni wa yena! Swiendlo leswi swi fanele ku susumetiwa hi ku tlangela ka ntiyiso. Yesu Kriste, N’wana wa Xikwembu, u tshama a vutisiwa hi wanuna un’wana a ku: “Hosi, xana va ta va va nga talanga lava nga ta ponisiwa xana?” Nhlamulo ya Yesu a yi katsanga mukonanisi loyi ntsena kambe ni van’wana hinkwavo lava tsakelaka ku ponisiwa, ku katsa na hina. U hlamurile a ku: “Ringetani hi matimba ku nghena hi nyangwa leyo khuma, hikuva ndza mi byela leswaku lavo tala va ta navela ku nghena, kambe va ta tsandzeka.”—Luka 13:23, 24.
3. (a) Hikwalaho ka yini xivutiso xa wanuna loyi a xi nga tolovelekanga? (b) Yesu u hi katsa njhani enhlamulweni yakwe?
3 Xivutiso xa wanuna loyi a nga boxiwangiki a xi nga tolovelekanga. U vutisile a ku: “Xana va ta va va nga talanga lava nga ta ponisiwa xana?” hayi ku, “Xana mina ndzi ta va exikarhi ka lava va nga riki vangani lava nga ta ponisiwa?” kumbe, “Mina ndzi nga ponisiwa njhani?” Kumbexana filosofi ya Vayuda ya leswaku i nhlayo leyi pimiweke ntsena ya vanhu leyi nga ta ponisiwa yi tlhontlhe xivutiso xakwe xo anakanyela.a Ku nga khathariseki xihlovo xa ku lava ka yena ku tiva, hi ku hatlisa Yesu u hlamusele xivutiso xi va lexi twisisekaka—leswaku xi tirhisiwa hi munhu hi xiyexe. U susumetele mukonanisi loyi ku anakanya hi leswi a faneleke ku swi endla leswaku a ponisiwa. Kambe ku tlula sweswo, leswi marito ya Yesu lama nge, “Ringetani hi matimba,” ya nga eka xivumbeko xa vunyingi, ya fanele ku susumetela na hina ku anakanyisisa hi ku enta hi mukhuva wa hina wa vugandzeri.
4. Hi fanele ku endla yini leswaku hi kuma vutomi lebyi nga heriki?
4 Hikwalaho ke, vutomi lebyi nga heriki a byi olovi ku byi kuma hi laha vanhu van’wana va nga ha anakanyaka ha kona. Yesu u kandziyisa ntirho wo tika, matshalatshala ya nkarhi na nkarhi, tanihi ndlela yo “nghena hi nyangwa leyo khuma.” Ku ringeta loku ku nga karhaliki ku nyikiwa matimba hi ripfumelo leri tiyeke, leri akiweke ehenhla ka ku tshembeka etidyondzweni ta Kriste. Hikwalaho leswaku hi ponisiwa, hi fanele ku endla leswi tlulaka ku ‘twa marito ya yena’; hi fanele ku phikelela ku ‘ma endla.’—Luka 6:46-49; Yakobo 1:22-25.
Mi Fanele Ku “Tikarhata” Sweswi
5. (a) Marito ya Yesu lama nge, “Ringetani hi matimba” ya vula yini? (b) Marito wolawo ya engetela nhlamuselo leyi engetelekeke elangutelweni ra wena ra ntirho wo hlawuleka hi ndlela yihi?
5 Xana xiga lexi nge “ringetani hi matimba” xi vula yini? Eka Xigriki xo sungula, xiga lexi i a·go·niʹze·sthe, lexi tekiweke eka rito leri nge (a·gonʹ) leri vulaka “xivandla xa mphikizano.” “Tikarhateni,” leyi i ndlela leyi Kingdom Interlinear Translation yi xi vekaka ha yona. Lexi tsakisaka, eka riendli leri ra Xigriki hi kuma rito ra Xinghezi leri nge “agonize.” Kutani vana ni xivono xa rivala ra mintlangu ra khale kutani u vona xitsutsumi lexi manuku xi kokaka ku tika, kumbe lexi ringetaka swinene hi matimba ya xona hinkwawo, leswaku xi kuma hakelo. Xisweswo, hambi leswi riendli ra Xigriki leri katsekaka laha ri nga ha vaka rito leri hlawulekeke ra ku phikizana emintlangwini ya Xigriki, ri kandziyisa xitsundzuxo xa Yesu xo teka goza hi mbilu hinkwayo. Matshalatshala lama nga nyawuliki ya nge swi koti.—Luka 10:27; ringanisa 1 Vakorinto 9:26, 27.
6. Hikwalaho ka yini hi fanele ku ringeta hi matimba sweswi?
6 Hi rini naswona i ku fikela kwihi laha hi faneleke ku “tikarhatela ku nghena hi nyangwa leyo khuma” ke? (Luka 13:24, The New English Bible) Langutisa marito ya Yesu swinene eka Luka 13:24 kutani u xiya ndlela leyi ya hambanisaka nkarhi wa sweswi, “ringetani hi matimba,” ni nkarhi lowu taka, “va ta navela.” Xisweswo, sweswi i nkarhi wo tikarhata. Entiyisweni, lava va siveriwaka ku nghena va lava ku nghena enkarhini lowu wu fanelaka vona ntsena. Kambe manuku kwalaho ku ta va ku nga ha ri na nkarhi; nyangwa ya nkarhi yi ta va yi pfariwile yi tlhela yi khiyiwa. Yesu u ya emahlweni eka Luka 13:25 a vula leswaku loko n’wini wa muti a pfarile nyangwa, vanhu va ta sungula ku gongondza kutani va rila va ku: “‘Hosi, hi pfulele!’ Kambe u ta [va] hlamula a ku: ‘A ndzi tivi leswaku mi huma kwihi.’” Vona vuyelo lebyi tsemaka nhlana lebyi rindzeleke lava va nga endliki vugandzeri bya Yehova xikongomelo-nkulu xa vona evuton’wini sweswi!—Matewu 6:33.
7. Vafilipiya 3:12-14 yi hlamusela ku ringeta ka nkarhi na nkarhi hi ndlela yihi? Naswona ha yini ku ri ka nkoka?
7 Ku tikarhata ka hina i nchumu lowu hambetaka. Ku hava ni un’we wa hina loyi a ngheneke hi laha ku heleleke hi “nyangwa leyo khuma.” Pawulo u swi vonile leswi. Mphikizano wakwe wa vutomi a ku ri matshalatshala lama ndlandlamukaka siku na siku. U tsarile a ku: “A ndzi vuli swona leswaku ndzi swi kumile sweswo, kumbe leswaku ndzi hetisekile, e-e; kambe ndzi ringeta ku tsutsuma leswaku ndzi ya swi kuma swi va swa mina, hikuva Kriste Yesu u ndzi kumile a ndzi endla wa yena. Vamakwerhu, loko a ri mina, a ndzi anakanyi leswaku ndzi swi kumile, kambe ndzi endla xilo xin’we ntsena. Ndzi rivala swa le ndzhaku, ni ku ringeta hi matimba ku ya fika eka leswi nga emahlweni; kutani ndzi tsutsuma ndzi kongomile swa le mahlweni leswaku ndzi ta kuma hakelo, ku nga ku vitana ka Xikwembu ha Yesu Kriste, loku ha kona xi hi vitanelaka evutomini bya le henhla.” (Xi-italiki i xerhu.) —Vafilipiya 3:12-14.
8. (a) I yini lexi hinganyetaka vanhu “vo tala” eka vutomi lebyi nga heriki? (b) I xitsundzuxo xihi lexi leswi swi hi nyikaka xona?
8 I vamani “lavo tala,” naswona hikwalaho ka yini va tsandzeka ku nghena? “Lavo tala” va hlayiwa kun’we ni Vujagana, ngopfu-ngopfu ntlawa wa byona wa Vafundhisi. Va tiendla onge va tiva Yesu swinene, va va xiphemu xa ndyangu wa yena, hi ku vula leswaku va ‘dyile ni ku nwa na yena.’ Kambe leswi va lavaka ku pona hi marito ya vona vini, hayi ya Xikwembu, Yesu u va landzula erivaleni leswaku wa va tiva kutani a va languta tanihi “lava endlaka leswi nga lulamangiki.” (Luka 13:26, 27) Vanhu lava pfaleriweke ehandle leswaku va nga ngheni evuton’wini lebyi nga heriki va nga ha katsa ni lava va tsaneke entirhweni wa vona wo hlawuleka eka Yehova naswona sweswi va ni langutelo ro swi teka hi ku olova evugandzerini bya ntiyiso. Ku hisekela ka vona timhaka ta Mfumo ku sungule ku kufumela. (Nhlavutelo 3:15, 16) I ntiyiso, va nga ha va va ‘ha ri na xivumbeko xa vukhongeri’—va hlanganyela entirhweni wa nsimu ni ku va kona eminhlanganweni—kambe va kayivela vumbhoni bya muxaka wa ripfumelo leri ri nga nsusumeto wa xiviri evugandzerini lebyi tengeke. (Ringanisa 2 Timotiya 3:5.) Va tsandzeka ku vona leswaku ku lava ku nghena hi “nyangwa leyo khuma” ntsena a swi ringananga. Munhu u fanele ku tikarhatela ku nghena.
Mhaka Leyi Ku Ngheniwaka Hi “Nyangwa Leyo Khuma” Ha Yona
9. Hikwalaho ka yini ku nghena hi nyangwa leyo khuma ku lava ku ringeta hi matimba?
9 Nyangwa leyo khuma leyi yaka eku ponisiweni ya ha pfulekele hinkwavo. Kambe “lavo tala” a va swi lavi ku tikarhatela ku nghena. Hi tihi timhaka tin’wana malunghana ni ku nghena hi nyangwa leyo khuma leti lavaka ku ringeta hi matimba? Munhu u fanele ku sungula hi ku kuma vutivi lebyinene bya ntiyiso wa Bibele, kutani a tiva Yehova Xikwembu na Kriste Yesu. (Yohane 17:3) Leswi swi vula ku bakanyela mikhuva ni swiendlo swa vukhongeri bya misava etlhelo, ku katsa ni leswiya swa Vujagana. Swi lava ku endla ku rhandza ka Xikwembu, hi laha Yesu a endleke ha kona loko a ha ri la misaveni. (1 Petro 2:21) Tanihi Mukriste la tinyiketeke, la khuvuriweke, munhu nakambe u fanele ku papalata rifuwo, vunghwavava, ni thyaka ra misava. (1 Yohane 2:15-17; Vaefesa 5:3-5) Leswi swi fanele ku hluvuriwa ivi swi siviwa hi timfanelo leti fanaka ni ta Kriste.—Vakolosa 3:9, 10, 12.
10. I vuxaka byihi lebyi ku tikhoma ku nga na byona eku kumeni ka hina vutomi lebyi nga heriki?
10 Lava va nga riki ‘vangani’ va tiva ntikelo wa ku hiseka evutirhelini, loku fambisanaka ni ku kombisa mihandzu ya moya, ku katsa ni ku tikhoma. (Vagalatiya 5:23) Hi mpfuno wa moya lowo kwetsima wa Yehova, va tikarhatela ku va ni matimba lama lawulaka emirini ya vona kutani va ya kongomisa eka pakani ya vutomi lebyi nga heriki.—1 Vakorinto 9:24-27.
Marito Ya Yesu Ma Vula Yini Eka Wena?
11. (a) Hi le swivandleni swihi swa vutomi laha van’wana va nga ha lavaka ku ringeta hi matimba eka swona, naswona hikwalaho ka yini? (b) Hi le ka ntirho wihi lowu hinkwavo va nga ringetaka hi matimba eka wona?
11 Hambi ha ha ku khuvuriwa kumbe a hi ri karhi hi gingiriteka ni nhlengeletano ya Yehova hi makume ya malembe, ku nga ka ku nga vi ni ku tsana ematshalatshaleni yerhu yo n’wi tsakisa. Hi laha marito ya Yesu ya kombisaka erivaleni ha kona, hi fanele ku va hi mbilu hinkwayo eku tinyikeleni ka hina eka Yehova, hi tsakela ku nghena hi nyangwa leyo khuma hi mpimo wihi na wihi. Hambi leswi Yesu a a nga vulavuli hi ku antswisa ni ku andzisa entirhweni werhu eka Xikwembu, eka van’wana va hina, ku ringeta hi matimba ka laveka leswaku hi antswisa mahanyelo ya hina kumbe ku ntshunxeka eka mahanyelo layo biha leswaku ‘hi ndlela yihi na yihi hi nga vi xikhunguvanyiso.’ (2 Vakorinto 6:1-4) Van’wana va hina va fanele ku khathalela nongonoko lowunene wa dyondzo ya munhu hi xiyexe nkarhi na nkarhi leswaku ‘rirhandzu ra hina ri tala hi vutivi lebyinene ni ku twisisa loku heleleke.’ (Vafilipiya 1:9-11) Hambi swi ri tano van’wana va ha fanele ku endla matshalatshala lama engetelekeke yo va kona ni ku hlanganyela nkarhi na nkarhi eminhlanganweni ya bandlha, ku katsa ni Dyondzo ya Buku ya Bandlha. (Vaheveru 10:23-25) Kambe hinkwerhu ka hina hi nga languta vutirheli bya hina vini bya nsimu bya munhu hi xiyexe leswaku hi vona loko hakunene hi ringeta hi matimba eku endleni ka “ntirho wa muvuri wa rito.”—2 Timotiya 4:5.
12. Ku kambisisa mpimo wa ku ringeta ka hina ka moya, i swivutiso swihi leswi hi nga ha swi vutisaka?
12 Eka nhlayo leyi andzaka, nhluvuko eku ringeteni hi matimba ku tsakisa Yehova wu endle leswaku va fanelekela vuphayona bya nkarhinyana, vuphayona bya nkarhi hinkwawo, kumbe ntirho wa Bethele. Kambe ku vuriwa yini ha wena? Loko u ri muhuweleri wa Mfumo, xana u nga nghenela ntirho wa vuphayona bya nkarhinyana minkarhi yo hambana-hambana hi lembe kumbe u va phayona ra nkarhi hinkwawo ke? Loko ana se u ri phayona ra nkarhinyana, xana u fanelekela ntirho wa vuphayona bya nkarhi hinkwawo? Loko swi nga ri tano, ha yini u nga anakanyi ku endla tano? Hi ndlela leyi u nga katekisiwa eku hlakuleleni ka vuxaka lebyikulu na Yehova Xikwembu na Yesu Kriste.—Psalma 25:14
Xana U Nga Ringeta Hi Matimba Leswaku U Phayona?
13. (a) Loko u lava ku va phayona, i swilo swihi swimbirhi leswi swi nga swa nkoka? (b) Leswaku u phayona, hi le swivandleni swihi swa vutomi laha ku lulamisa ku faneleke ku endliwa kona?
13 Loko ku ri leswaku u nga swi kota ku va phayona ra nkarhi hinkwawo kambe u nga ri rona, xana u nga “tikarhatela” ku lulamisa evuton’wini bya wena leswaku u va phayona ke? Swilo swimbirhi i swa nkoka. Xo sungula, u fanele ku va ni ku navela. Xa vumbirhi, u fanele ku va ni swiyimo leswi faneleke. Loko u kayivela ku navela, ku khongelele. Vulavula ni maphayona. Andzisa ntirho wa wena wa sweswi tanihi muhuweleri wa bandlha. Hlanganyela entirhweni wa vuphayona lebyi pfunaka loko swi koteka. Loko swiyimo swa wena swi nga wu pfumeleli ntirho wo tano sweswi, vona loko ku ri leswaku ku lulamisa ku nga endliwa. Nsati loyi a tirhaka a nga ha tshika ku tirha. Munhu loyi ku nga khale a hundzile eka malembe ya mudhende a nga ha tshika ku hambeta a tirha. Mpimo lowu tlakukeke wa ku hanya, tiholideyi leti durhaka, mimovha ya sweswinyana, ni leswi fanaka ni sweswo, a hi swa nkoka evuton’wini.—Luka 12:15; 1 Yohane 2:15-17.
14. (a) Hikwalaho ka yini mpatswa wun’wana lowu tekaneke a wu nga aneriseki hi ku tshama wu ri vahuweleri va bandlha? (b) I pakani yihi leyi va yi vekeleke vana va vona?
14 Tatana unw’ana wa majaha manharhu, vambirhi lava nga emahlweni ka malembe ya kondlo-a-ndzi-dyi, u sungule ku phayona malembe ya tsevu lama hundzeke. Ha yini? “Ndzi lave ku endla leswi engetelekeke,” wa hlamusela. “Loko ku ri leswaku a ndzi ta swi kota ku va phayona ra nkarhi hinkwawo kutani ndzi nga vi rona, a ndzi ta va ndzi nga hanyeli ku tinyiketela ka mina.” Nsati wakwe na yena u sungule ku va phayona ra nkarhi hinkwawo. Hikwalaho ka yini? U te: “Ndzi ve phayona ra nkarhinyana nkarhi na nkarhi mune wa malembe kutani eku heteleleni ndzi swi vonile leswaku swi ve leswi olovaka. Ndzi lave ku hlanganyela hi xitalo entirhweni lowu wu nga ta ka wu nga ha phindhiwi ni ku veka xikombiso lexinene eka majaha ya hina.” Nuna ni nsati va dyondze ntiyiso endzhaku ka ku leteriwa ka le Yunivhesiti. “Vatswari va hina va lave leswaku hi ya ekholichini mune wa malembe,” ku vula tatana. Hikwalaho ke, i tipakani tihi leti va tivekeleke majaha ya vona? “Ndzi tivise vafana va mina leswaku hi tsakela leswaku va phayona ivi va heta malembe lama nga vaka mune eBethele.”
15. (a) I swivangelo swihi leswi ha swona van’wana va tinyiketeke leswaku va tirha tanihi maphayona ya nkarhi hinkwawo? (b) I xivangelo xihi lexi u nga navelaka ku va entirhweni wa nkarhi hinkwawo ha xona?
15 Leswi landzelaka i swivangelo leswi van’wana va kunguhateke ku va maphayona ya nkarhi hinkwawo ha swona:
“A ndzi nga endli nhluvuko emoyeni, leswi swi ndzi karhatile.” (Robert H.)
“A ndzi nga aneriseki hi ku va muhuweleri wa nkarhi na nkarhi.” (Rhea H.)
“Vuphayona byi nyika vutomi bya mina vukongomisi ni xikongomelo.” (Hans K.)
“Ndzi lave ku tirhela Yehova hi laha ku heleleke, naswona vuphayona a yi ri ndlela ya mina yo endla sweswo.” (Charanjit K.)
“A ndzi ta tisola loko a ndzi nga tirhisanga ntamu, matimba, ni vuntshwa bya mina ku hlanganyela entirhweni lowu wukulu.” (Gregory T.)
“Yehova u katekisa matshalatshala ntsena. A ndzi fanele ku n’wi nyika nchumu wo katekisa wona.” (Graceann T.)
“Vuphayona byi ndzi pfuna ku phofula ndlela leyi ndzi titwaka ha yona ha Yehova.” (Marco P.)
“Ku tirha ntirho wa vutomi nkarhi hinkwawo a ku ndzi tiselanga ntsako lowu ndzi wu voneke exikarhi ka maphayona.” (Nancy P.)
Hi swihi swivangelo leswi u nga swi engetelaka enxaxamelweni lowu?
Xana U Endla Hinkwaswo Leswi U Nga Swi Kotaka?
16. Xana maphayona hi wona ntsena lama ringetaka hi matimba? Hlamusela.
16 Timbhoni ta Yehova to tala ti kambisise xiyimo xa tona xa munhu hi xiyexe hi ku tshembeka na hi xikhongelo naswona ti kume leswaku ti endla hinkwaswo leswi ti nga swi kotaka ehansi ka swiyimo swa tona swa sweswi. Kumbexana u un’wana wa vona. Loko swi ri tano, vana ni xivindzi. Yehova ni N’wana wa yena va ku khathalela naswona hakunene va tlangela ntirho wa wena wa mbilu hinkwayo. (Ringanisa Luka 21:1-4.) Hi xikombiso, hikwalaho ka politiki leyi nga rhandzekiki kumbe swiyimo swa ikhonomi, ematikweni man’wana vamakwerhu va fanele ku tirha tiawara ta kaye hi siku, ntlhanu kumbe tsevu wa masiku hi vhiki, leswaku va kuma leswi lavekaka evuton’wini. Etikweni leri ntirho wa Timbhoni ta Yehova wu yirisiweke swinene hi hulumendhe, lava va phayonaka—naswona matiko lawa ya ni nhlayo leyi andzaka ya maphayona—hi ntolovelo hi lava va holaka mudhende, vantshwa lava nga ni mintirho ya navusiku, na vamanana (lava nga ni vana) lava ntshunxiweke entirhweni wo tihanyisa hi Mfumo.
17. Mhaka ya Epafrodito yi komba njhani leswaku Yehova a nga pimi mpimo wa hina wa ku tinyiketa hi ntsengo wa ntirho lowu hi wu endlaka entirhweni wa yena ntsena?
17 Kambe u nga ha ku: ‘Loko a ndzo va ni matimba lama engetelekeke emirini. Loko a ndzo va lontshwa nakambe!’ Kambe u nga hetiwi matimba. Ku ringeta ka hina a ku pimiwi hi mpimo wa ntirho lowu hi wu endlaka entirhweni lowo hlawuleka wa Xikwembu ntsena. Xana wa n’wi tsundzuka Epafrodito? Loko a vabya, ntsengo wa ntirho wa matimba lowu a wu koteke eka yena “entirhweni wa Hosi” a wu nga ta ringanisiwa na wona lowu a wu endleke loko a ha hanye kahle. Hambi swi ri tano Pawulo u n’wi bumabumerile hikwalaho ka ku ringeta ka yena. Entiyisweni, hi laha Pawulo a kombeke ha kona, hi fanele ku ‘hambeta hi namarhela vavanuna ni vavasati va muxaka wo tano lowu rhandzekaka.’—Vafilipiya 2:25-30.
18. (a) Lava va nga ni swiyimo leswi hinganyetaka va nga kurisa ntirho wa nkarhi hinkwawo ebandlheni hi ndlela yihi? (b) U nga endla yini ku khutaza moya wa vuphayona ebandlheni ra ka n’wina?
18 Hambi swi ri tano, ku ni nchumu lowu u nga wu endlaka ku kurisa ntirho wa nkarhi hinkwawo ebandlheni. I yini xana? Ringeta hi matimba ku kombisa moya wa vuphayona. Hi xikombiso, loko sweswi u nga swi koti ku va phayona hikwalaho ka mindzwalo ya ndyangu, xana u nga ntshunxa van’wana endyangwini wa wena—nsati wa wena, vana, makwenu wa xinuna, kumbe makwenu wa xisati—leswaku va phayona? Lava va nga ha vaka va ri eka rihanyo leri nga nyawuriki kumbe va lamarile hi ndlela yo karhi va nga tsakela lava va swi kotaka ku phayona hi xiviri, va ya entirhweni wa nsimu na vona loko swiyimo swi pfumela. (Ringanisa 1 Vakorinto 12:19-26.) Hi ndlela leyi hinkwavo ebandlheni va nga tikarhata eku kandziyiseni ka ntirho wa nkarhi hinkwawo. Vuyelo byi nga va lebyi khutazaka swinene eka hinkwavo!
19. Ku tiyimisela ka hina ku fanele ku va kwihi?
19 Xana ku ringeta hi matimba swi vula yini eka wena? Xana swi vula ku endla nhluvuko lowu yisaka enkhuvulweni? Xana swi vula ku hlula hanyelo lero biha? Ku tiyisa vuxaka bya wena na Yehova hi ndlela yin’wana ke? Xana swi nga vula ku va phayona ra nkarhinyana? Ra nkarhi hinkwawo? Ntirho wa Bethele ke? Ku nga khathariseki leswi ku swi lavaka eka wena, leswaku u endla nhluvuko wa moya, swa pfuna ku endla matshalatshala hi matimba sweswi. Hikwalaho ke, hinkwerhu ka hina a hi hambeteni hi tikarhatela ku nghena hi nyangwa leyo khuma leyi yisaka evuton’wini lebyi nga heriki!
[Nhlamuselo ya le hansi]
a Nhlayo ya lava va ponisiwaka a yi ri xirhalanganya lexi kanetiwaka hi vafundhisi exikarhi ka varhabi. Nhlamuselo yin’wana ya Bibele yi ri: “Exikarhi ka mikhuva leyi nga tolovelekangiki ya ntlawa wa Vafundhisi, wun’wana a ku ri ku ringeta ku lulamisa nhlayo ya lava va ponisiwaka hi ntikelo wa tinhlayo ta mapapila ya leswi kumbe ndzimana yoleyo.”
Tinhla To Ti Anakanyisisa
◻ Yesu a a vula yini loko a tshinya a ku, “Ringetani hi matimba”?
◻ Marito ya Yesu ya tirha eka wena rini naswona njhani?
◻ Hikwalaho ka yini “lavo tala” va nga swi koti ku nghena hi nyangwa leyo khuma?
◻ Lava va nga ni swiyimo leswi hinganyetaka va nga ha tinyiketa hi ndlela yihi?
◻ Hi fanele ku tikarhatela ku nghena hi nyangwa leyo khuma ku fikela kwihi?