Ku Kuma Matimba, Hayi Ku Karhala

“O nyika l’a kareleke matimba ya yena, o pfuša l’a heleke mbilu.”—ESAYA 40:29.

1, 2. U nga hlamusela leswi Vakriste va nga na swona leswi fanaka ni swa switsutsumi swa marathoni hi ndlela yihi?

HI OCTOBER ni mixo hi 1984, vunyingi bya switsutsumi swa 16 000 byi khitikanele eswitarateni leswaku byi ya sungula Marathoni wa Doroba ra New York. Ntila wo hetelela a wu ri eka vukule bya 26,2 wa timayili (42,2 km). Siku rolero ra xixikana leri hisaka swinene ri te ni ku hisa loku tsemaka nhlana ni atimosifiya leyi tlakukeke leyi tswongeke ntamu wa switsutsumi kutani yi kambela ku tiyisela ka swona. Mphikizano wu ve lowu hetaka matimba ni le ka switsutsumi swo antswa. Switsutsumi swo tala swi karharile kutani swi tshika mphikizano; leswi nga vaka 2 000 a swi hetanga. Lava va heteke va hlule swiyimo swo nonon’hwa swinene.

² Vakriste, na vona, va le mphikizanweni. Hakelo hi yihi? Vutomi lebyi nga heriki. Naswona ku fana ni xitsutsumi xa marathoni, va fanele ku Iwa ku fika emakumu. Ku tiyisela ka laveka. Matimba ya fanele ku hlayisiwa kutani ku papalatiwa ku karhala. Mphikizano wa hina wa vutomi a wu fani ni ku tsutsuma nkarhi wo koma, kambe, ematshan’wini ya sweswo, wa fana ni ku tsutsuma mpfhuka wo leha. Pawulo u byele Vakriste-kulobye eKorinto a ku: “Xana a mi swi tivi leswaku hambi loko lava va phikizanaka hi ku tsutsuma erivaleni ra mintlangu va tsutsuma hinkwavo, la kumaka hakelo i un’we ntsena? Tsutsumani hi mukhuva lowu wu nga ta mi pfuna ku yi kuma.” (1 Vakorinto 9:24) Ndlela leyi Vakriste va tsutsumaka ha yona i ya ku ringeta hi matimba.—Luka 13:24.

3. Vakriste va nga hlayisa goza ra matimba ku fikela va heta mphikizano hi ndlela yihi?

³ Kambe u nga ha hlamala: I mani la nga hlayisaka goza rero leswaku a heta mphikizano ke?’ Ku hava ni un’we wa hina la nga swi kotaka hi matimba ya hina vini. Leswaku hi kuma hakelo, hi fanele ku pfula Xihlovo xa matimba lamakulu, Yehova Xikwembu.—Yobo 36:22; Psalma 108:13.

Yehova—Xihlo vo Xa Matimba Lamakulu

4. Hi ku ya hi muprofeta Esaya, hikwalaho ka yini hi nga tshembaka vuswikoti bya Yehova byo hlayisa?

⁴ Handle ko kanakana Yehova a nga ya seketela malandza yakwe. Hi nomu wa muprofeta wakwe Esaya, wa Matimba Hinkwawo u vulavule hi ku pfumala mpimo ka vuswikoti byakwe ni ku nga ringanisiwi ka mintirho yakwe ya matimba. U te: “Tlakusani mahlo ya ṅwina, mi languta! I mani l’a tumbulušeke ŝilo ŝeŝo? L’a fambiseke hi ku ri šašameta e v̌andla ra ŝona šana? Wa ŝi v̌itana hikwaŝo hi mav̌ito ya ŝona; hi ntamu lo’wukulu wa yena, ni matimba la’makulu ya yena, ku hav̌a šin’we le’ši pfumalekaka. . . . A ku ŝi tiv̌i šana? a ku ŝi twanga šana? I Šikwembu le’šsi nga heriki, yena Yehova l’a tumbulušeke makumu ya misav̌a; a nga karali, a nga heri matimba, a nga kona l’a kambeke v̌utlhari bya yena.”—Esaya 40:26-28.

5, 6. Nyika swikombiso swa vumbhoni bya ntamu lowu tlakukeke wa Yehova.

⁵ Ku sukela eku sunguleni ku fika hi laha ku nga heriki, ku kombisiwa ka matimba ya Yehova yo tumbuluxa ka chavisa! Hi xikombiso, xiya swiaki leswi nchumu wun’wana ni wun’wana wu endliweke hi swona, ku katsa na hina—tiathomo. I tintsongo swinene lerova thonsi ra mati ri va ni 100 wa tibiliyoni ta biliyoni ya tiathomo (mahlayele ya Amerika). Hambi swi ri tano, lexi hlamarisaka, eka nyutliyasi ya tiathomo ku na ntamu lowu ringaneke wo ntshenxeta, eka xiendlakalo xin’we, ku buluka ku na matimba lama kotaka ku cela khele leri enteke ku ringana 32 wa swithezi ku ya ehansi ni kotara ya mayili hi ku anama.

⁶ Emakun’wini ya tlhelo rin’wana ra mpimo wa vukulu, xiya dyambu. Ndzilo lowo chavisa wa nyutliya, lowu tikaka tibiliyoni ta tithani wu hisa fambiselo ra hina ra dyambu. Ri hisiwa hi ntamu lowu humaka eka tiathomo letintsongo. Hambi leswi vutomi hinkwabyo emisaveni—swimilana, swiharhi ni vanhu—swi titshegeke hi ntamu lowu nyikiwaka hi matimba lamakulu ya le henhla ya ntamu wa ximila, i ntsengo wa minete ntsena wa matimba ya dyambu lowu kahle-kahle wu fikelelaka misava. Kambe, wona wu ringene ku seketela vutomi. Ebukwini yakwe leyi nge Astronomy, Fred Hoyle mudyondzi wa tinyeleti wa tsala: “Xiphemu lexintsongo xa ntamu wa Dyambu lexi welaka eMisaveni—lexi ringanyetiweke hi swiphemu swo ringana ntlhanu eka dzana ra timiliyoni ta miliyoni—i minkarhi leyi nga vaka 100 000 ku tlula ntamu hinkwawo lowu tirhisiwaka eka vumaki bya misava.”

7. Hi fanele ku titwa njhani ha Yehova endzhaku ka ku languta matimba lama vonakaka eku tumbuluxeni kakwe?

⁷ Hambi swi ri tano, dyambu hi yin’wana ya tinyeleti ta tibiliyoni leti vumbaka Xirimele xa hina—naswona i nyeleti leyi nga ni mpimo-xikarhi eka xona. Tlhandlha-kambirhi, vadyondzi va tinyeleti va pimanyeta leswaku ku na swirimele leswi nga vaka 100 000 000 000 exibakabakeni lexi tivekaka. Leswi swa nyanyula ku swi hlalela, a swi tano xana? A swi hlamarisi leswi Yobo, endzhaku ka ku anakanya hi laha Yehova ‘a anekeke matilo hi yexe ha kona,’ a vuleke leswaku Xikwembu xi ‘endla swilo leswikulu leswi nga tiviwiki, swilo leswi hlamarisaka leswi nga hlayiwiki.’—Yobo 9:8-10.

Yehova A Nga Ku Nyika Ntamu

8. (a) I vamani lava va nga tirhisaka matimba ya Yehova hi xitalo, naswona hikwalaho ka yini? (b) Xitshembiso lexi nga eka Esaya 40:29-31 xi tiyisa ripfumelo hi ndlela yihi?

⁸ Vagandzeri va ntiyiso va Yehova va nga ha tirhisa Xihlovo lexi xa ntamu lowukulu lexi vumbeke ni ku seketela xibakabaka hi xitalo na hi ku ntshunxeka. Malandza ya Yehova ya nga ‘tiyisiwa hi ntamu wa moya wa yena lowo kwetsima,’ ya nga chavi ku kayivela matimba. (Vaefesa 3:16; Psalma 84:4, 5) Hakunene, ku hlula ka hina ka mphikizano wa vutomi ku titshege hi ku tshemba loku heleleke ka leswaku voko ra Xikwembu ra matimba ri nga hi kukula hi hundza ntila wo hetelela. Xi nga hi nyika ntamu. Hi laha muprofeta Esaya a vulaka ha kona hi Yehova u ri: “O nyika l’a karaleke matimba ya yena, o pfuša l’a heleke mbilu. Timbhuri ta karala, ta hela matimba, ni tinhenha ti lav̌a ku wa; kambe la’v̌a ṭhembaka Yehova v̌a engeta v̌a kuma matimba la’mantŝhwa. V̌a ta haha tani hi magama, v̌a ta ṭuṭuma v̌a nga karali; v̌a ta famba v̌a nga ṭani.” (Esaya 40:29-31) Hikwalaho, ku hlaya marito wolawo ntsena swi nga tiyisa moya wa hina!

9. Yehova a nga ku pfuna hi ndlela yihi eka swiphiqo swa wena ‘leswikulu’?

⁹ Loko u kongomane ni swiphiqo leswi vonekaka swi ri leswikulu leswi xungetaka ku sivela ku hisekela ka wena vugandzeri bya ntiyiso, u nga ha titwa u ri ntsongo naswona u nga pfuni nchumu. U nga heli matimba. Languta eka Tata wa wena wa le tilweni wa matimba hinkwawo. U tiyisa ‘hinkwavo lava n’wi tshembaka!’ Xana Muvumbi wa athomo a nga ka a nga tiyisi vanhu vakwe hi matimba lamakulu lama ringaneke ku susa ‘tintshava’ teto ke? Hakunene a nga swi kota.—Marka 11:23.

10. (a) I swilo swihi leswi nga karharisaka switsutsumi swa Vakriste? (b) Sathana u lava ku endla yini eka wena?

¹⁰ Hi tlhelo rin’wana, Vakriste van’wana va nga ha karhala eka nyimpi ya siku na siku yo Iwisana ni mintshikilelo ya misava leyi dzunisaka ku tsan’wa ka yona milawu ya Vukriste leyi va vonaka va fanele ku yi yisa ehansi kumbe hambi ku ri ku yimisa mphikizano wa vutomi. Mavabyi, ku susiwa ka swa timali, swiphiqo swa ndyangu, xivundza, kumbe swihinga swin’wana naswona swi nga vanga ku hela matimba. Kutani ku tsana ku nga tswonga matimba ya Mukriste hi ku hatlisa, tanihi leswi siku ro hisa hi ku olova ri nga hetaka ntamu wa xitsutsumi xa marathoni hi xihatla. Nala lonkulu, Sathana Diyavulosi, u tirhisa swilo swo tano ku ringeta ku tshova vutshembeki bya wena tanihi nandza wa Yehova. (1 Petro 5:8) U nga pfumeleli Sathana a endla tano! Languta eka Muvumbi wa swirimele sweswo swa magidi swa le tilweni swo siva ntamu wa wena wa moya. Yehova a nga ku seketela.—Psalma 37:17; 54:4.

11. Hi nga dyondza yini eka ndlela leyi Davhida a hlangavetaneke na swiphiqo ha yona?

¹¹ Loko a kongomane ni swiphiqo, minkarhi hinkwayo Davhida u kume Yehova a ri xihlovo xa matimba lamantshwa. Hi ku nyikiwa matimba hi moya lowo kwetsima, xisweswo Davhida a a swi kota ku ‘hlangavetana’ ni ku kanetiwa kwihi na kwihi. U te: “Loko nḍi ri na wena, nḍi nga tihoša v̌andleni ra v̌alala, kambe hi Šikwembu ša mina, nḍi nga tlula rihlampfu.” Nakambe Davhida u te: “Hi Šikwembu hi ta hlula, Hi šona le’ši nga ta phyandlasa v̌alala v̌a hina.” (Psalma 18:29; 60:12) Yehova a nga endla leswi fanaka eka wena.

Lwisana Ni Ku Karhala Ka Moya

12. (a) Hikwalaho ka yini ku karhala ka moya ku fanele ku susiwa hi xihatla? (b) Swikombiso swa ku karhala ka moya hi swihi? (c) I malunghiselelo wahi lawa Yehova a ma endleleke ku pfuxeta lava karhaleke emoyeni?

¹² Hi fanele ku hatlisela ku xiya swikombiso swa ku karhala ka moya kutani hi hatlisela ku Iwisana na swona. Hikwalaho ka yini? Hikuva hi lava va ‘ringetaka hi matimba ku nghena hi nyangwa leyo khuma ntsena,’ kumbe switsutsumi sweswo swi hundzaka ntila wo hetelela, leswi kumaka hakelo ya vutomi lebyi nga heriki. (Luka 13:24; Vafilipiya 3:12, 13) Kambisisa bokisi leri fambisanaka ni mhaka leyi nge “Tindlela To Lwisanaka Ni Ku Karhala Ka Moya.” Xana wa swi vona swin’wana swa swikombiso eka wena kumbe eka xirho xa ndyangu? Loko swi ri tano, teka magoza ya xihatla yo lulamisa. Pfuxeta vumoya bya wena hi ku kuma matimba eka malunghiselelo lama xaxametiweke ya Yehova.

13, 14. (a) I swikombiso swihi leswi swi nga pfunaka ku pfuxeta matimba ya hina ya moya? (b) Xitsundzuxo xa nandza wa khale wa Yehova xi nga hi pfuna ku tshama emphikizanweni hi ndlela yihi?

¹³ U nga alela mboyamelo wo karhala hi ku tekelela swikombiso swa malandza lama hluleke ya Xikwembu ya rhekhodo ya Bibele. A va tale, vavanuna ni vavasati, lavantsongo ni lavakulu, lava tiyiseleke ku fikela emakumu. Hlaya hi vona eka matsalwa yo tanihi Vaheveru 11:4-40. Hi ku fanana, manguva lawa hi na vamakwerhu vo tala lava rhandzekaka va xisati ni va xinuna lava yaka emahlweni no tirhela Yehova va nga karhali.

¹⁴ George, loyi a tshamaka exiphen’wini xa le dzongeni wa United States, i xikombiso xa xitsutsumi xa Mukriste loyi a nga kalangiki a karhala. Endzhaku ka malambe lama hundzaka 50 emphikizanweni wa vutomi lebyi nga heriki, wa ha tiyile. I xitsundzuxo xihi lexi a hi nyikaka xona?

“Hi ku tiyisa ndzi nga ku, khomelelani enhlengeletanwini. Tsundzukani leswaku Yesu Kriste, tanihi Loyi a Hlawuriweke hi Yehova, u fambisa nhlengeletano. Kutani mi nga hetiwi matimba loko un’wana loyi mi n’wi tivaka swinene a nga ha tshembeki. Loko ku ri na xin’wana lexi mi nga xi twisiseki ngopfu kumbe lexi xi mi tikelaka ku xi amukela, tshembani leswaku endzhaku ka nkarhinyana xi ta vekiwa erivaleni. Nhlengeletano ya Yehova yi hi fikise laha. Hi tshemba leswaku yi ta hi kongomisa hi ya nghena eMafambiselweni Lamantshwa.”—Yohane 6:66-68.

15. Loko swikombiso leswinene swi ta phyuphyisa moya wa hina, hi fanele ku endla yini?

¹⁵ Ku hava ku kanakana leswaku ku na van’wana va vanhu lava va nkoka lowukulu ebandlheni ra ka n’wina, kumbe u nga hlangana na vona etinhlengeletanweni ta xifundza. Vulavula na vona. Dyondza eka vona. Ku tlhandlekela kwalaho, swikombiso swa van’wana lava tshembekaka swa kumeka eka Yearbook, na Xihondzo xo Rindza, ni tibuku tin’wana ta Watch Tower. Hlaya timhaka leti. Vona hi laha u nga kumaka matimba eka mintokoto yoleyo ha kona.

Vakulu—Vanani ‘Mimpfuno Leyi Tiyisaka’

16. (a) Vakulu va nga pfuna Vakriste-kulobye ku kuma matimba hi ndlela yihi? (b) I xitsundzuxo xihi lexi vakulu va faneleke ku xi anakanya loko va nyika xikhutazo ni ndzayo?

¹⁶ Ngopfu-ngopfu vakulu va bandlha va fanele ku tivonela leswaku va pfuna swirho leswi kombaka swikombiso leswi kanakanisaka. Esaya 35:3 yi nyika ndzayo leyinene loko yi ku: “Nyikani mavoko la’ma faneke e matimba, mi va mi tiyisa mafolo la’ma rekarekaka.” Kambe xana n’wina vakulu mi nga endla xiphemu xa n’wina hi ndlela yihi eka sweswo? Kahle-kahle, xiyisisani. Kumani xivangelo xa xiviri xa ku ehla loku vonakaka. Nyikani switsundzuxo leswi tirhaka swa Matsalwa, leswi endleriweke munhu yoloye. Kambe tivoneleni. Mi lava ku khutaza, hayi ku heta makwenu matimba.a Hikwalaho, mi nga tirhisi ripfalo ra n’wina eka un’wana, kumbe ku sindzisa munhu ku landzela ntlhantlho wa n’wina wa xiphiqo, kumbe mi n’wi teka tanihi Mukriste loyi a nga vupfangiki loko a nga rhandzi ku amukela mavonelo ya n’wina ya munhu hi xiyexe. Vakulu va fanele ku seketela ndzayo ni xikhutazo xa vona eBibeleni. A va nge swi lavi ku tsanisa switsutsumi-kulobye hi ku veka milawu leyi nga fanelangiki ya bandlha eka vona.—Ringanisa Matewu 11:28, 29 na Matewu 23:2-4.

17. Vakulu va nga ya xiya njhani mano ya Sathana lama endleriweke ku tsanisa Vakriste-kulobye?

¹⁷ Vakulu va veka swikombiso leswinene tanihi valandzeri va Kriste hi ku bumabumela swirho swa bandlha hi xihatla. Va va endla va titwa va laveka hi mbilu hinkwayo ni ku faneleka! Mafambiselo ya Sathana minkarhi hinkwayo ya tiyimisele ku endla leswaku Vakriste va titwa va nga faneleki. Eyinhleni leyi eka mphikizano wa vona wa vutomi, vamakwerhu lava rhandzekaka, a va lavi swisolo, kambe vanghana lava va nyikaka xivindzi xa ku hlula. Hi xikombiso, loko makwerhu wa xisati wa malembe ya le xikarhi a boheka ku tshika ku phayona, mbilu yakwe yi hisiwile hi ku navela ku tlhelela entirhweni wa nkarhi hinkwawo. Kambe a nga swi kotanga hikwalaho ka swiyimo swa timali. Hambi leswia a vula swona, nkulu u n’wi vutise hi ndlela yo sola: “Xana u ta tlhela u phayona rini ke?” Nhlamulo yakwe yo olova yi n’wi hlamarisile: “Loko nuna wa mina a nga hakela rhente.” Leswi nkulu a hlulekeke ku swi anakanya, kambe leswi a swi dyondzeke endzhaku, a ku ri leswaku vuphayona byakwe a byi seketeriwe ngopfu-ngopfu hi miholo ya nuna wakwe. Kambe loko muthori wakwe a n’wi nyike ntirho wo tala lowu a wu kanakanisa eka Vakriste, ripfalo ra nuna wakwe ri n’wi susumetele ku lava ntirho wun’wana. Emalembeni yakwe, mintirho a yi nga kumeki hi ku olova. Kutania a fanele ku sungula ntirho wa mali ya le hansi; kutani ke, a swi fanela eka nsati wakwe ku tirha nkarhi hinkwawo.

18. I ndlela yihi leyi vakulu va nga vaka “mpfuno lowu tiyisaka” ha yona?

¹⁸ Eka ntokoto lowu nga laha henhla, xana hi fanele ku twisisa leswaku vakulu va fanele ku kanakana ku tshinya Vakriste-kulobye? E-e. Kambe ke, loko ndzayo kumbe xikhutazo xi laveka, vakulu va fanele ku xiyisisa swiyimo swa xiviri swa vamakwavo futhi hayi ku languta swivumbeko swa le handle ntsena. (Yakobo 2:15, 16) Hi ndlela leyi, vakulu va nga va “mpfuno lowu tiyisaka” ebandlheni ra ka vona.—Vakolosa 4:11.

19. U nga endla yini ku pfuna maphayona leswaku ya nga karhali?

¹⁹ Nhlayo leyi kulaka ya vahuweleri va Mfumo yi engetele goza ra yona kutani sweswi i maphayona ya nkarhi hinkwawo. Ku huwelela ka ntshungu ku nga khutaza switsutsumi swa marathoni ku kuma matimba. Kutani xana u endla yini ku tiyisa ku hlula ka maphayona ebandlheni ra ka n’wina? Doug na Joanne va endle ntirho wa nkarhi hinkwawo wu va ntirho wa vona wa vutomi. Swi nga va heta matimba loko van’wana vo va vutisa va ku, “Mi ta kuma vana rini?” kumbe, “Xana mi ta tshamiseka rini?” Hambi swi ri tano, ku humelela yini loko Timbhoni-kulobye ti va nyika nseketelo lowunene hi ku “Yisani ntirho lowunene emahlweni. Hi tsaka ku va na n’wina tanihi maphayona ebandlheni ra ka hina.” Kunene a va papalati ku karhala ka moya ntsena, kambe va pfuniwa va haha ku fana ni magama entirhweni wa vona wa vuphayona!—Ringanisa Esaya 40:31.

Ndlela Leyi Maphayona Ya Nga Kumaka Matimba Ha Yona

20, 21. Van’wana lava nge ntirhweni wa nkarhi hinkwawo va kume matimba hi ndlela yihi?

²⁰ Yingisa mpatswa lowu tekaneke, Frederick na Marian. Va tiva ndlela leyi va nga kumaka matimba ha yona. Hinkwavo i varhumiwa lava tirhaka etikweni ra Amerika-Xikarhi, naswona hinkwavo va le ka malembe ya vona ya va-70. Frederick u sungule ntirho wakwe wa vurhumiwa hi 1946, nsati wa kona hi 1950. I yini lexi endlaka leswaku va ya emahlweni entirhweni wa Yehova? Frederick wa hlamula: “Hi engetela eka rirhandzu ra Yehova ni ku navela ku pfuna vanhu van’wana, i ku tsundzuka pakani ya vutomi lebyi nga heriki.” Nsati wakwe u te ‘switshembiso swa Xikwembu swi endle leswaku hi ya emahlweni.’ Xana va tihlayise njhani eku karhaleni? “Ku nga khathariseki leswi xiavelo xa wena xi nga xiswona,” wa tsundzuka, “gingirikela eka xona.” U bumabumela “vutshembeki entirhweni wa le henhla” ivi a engetela: “Loko u karhi u dyuhala, u nga ka u nga endli hinkwaswo leswi u lavaka ku swi endla. Sweswo swi nga ndzi tlhava, kambe ndzi vulavula na Yehova hi swona hi xikhongelo.” Frederick u hetelela hi xiphemu lexi xinene xa xitsundzuxo: “Hi xikhongelo vusiku byin’wana ni byin’wana kutani hi kombela Yehova ku hi pfuna.”—1 Petro 4:7.

²¹ Lavonia u na malembe ya 67 hi vukhale naswonaa a ri phayona ra nkarhi hinkwawo eka malembe ya 20 lama hundzeke. Exikarhi ka lembe leri nga hundza, u hete masiku ya 15 exibedlhele naswona u amukela vutshunguri bya nkarhi na nkarhi bya mbilu yakwe. Ku fa ka swirho swa ndyangu swi nga ri swingani, ku katsa ni nuna wakwe ni tata wa yena, swi n’wi tlhontlhe mintlhaveko. Hambi swi ri tano wa ha tikarhata. U kume matimba hi ndlela yihi? “Ku kota ku hlanganyela hi xitalo entirhweni wo chumayela hákunene ku vile mpfuno,” ku vula yena, “hikuva loko ndzi kota ku vulavula ni van’wana hi Yehova, swi susa miehleketo ya mina eka swiphiqo swa mina ivi swi ndzi nyika ku rhula ka mianakanyo ni ntsako lowu endlaka vutomi byi va lebyi pfunaka.” A nga kunguhati ku tshika ku phayona kambe u ri: “Ku vona van’wana va dyondza hi ta Yehova ni swikongomelo swakwe leswinene swi ndzi nyika ntsako wo tano lowukulu lerova ndzi nga ehleketi hi ku tshika ntirho wa vuphayona.”—Mintirho 20:35.

22. Ku hlula eka mphikizano wa vutomi lebyi nga heriki, hi fanele ku hambeta hi endla yini?

²² Hambi ha swi kota ku tikarhata tanihi maphayona ku fika sweswi evuton’wini kumbe e-e, hinkwerhu ka hina hi nga tshama kusuhi ni Xihlovo xa ntamu lowukulu, Yehova, ni nhlengeletano yakwe. A hi yeni emahlweni hi kuma matimba hi ku tirhela Xikwembu xa hina hi ku tshembeka. Kutani, ku fana na Habakuk, hi nga ku: “Yehova, yena Hosi, i matimba ya mina; o ta hundulusa milenge ya mina, yi kotisa ya sihari.” (Habakuk 3:19) Xisweswo hi nga ka hi nga karhali kumbe ku hela matimba. Tsundzuka leswaku mphikizano wu kusuhi ni ku hela. Hi le kusuhi ni pakani!

[Nhlamuselo ya le hansi]

Swivutiso Swa Mpfuxeto

◻ I vamani ntsena lava nga tirhisaka ntamu lowukulu wa Yehova?

◻ Hi swihi swikombiso swin’wana swa ku karhala ka moya?

◻ I malunghiselelo wahi ya Yehova lama nga hi pfunaka ku kuma matimba?

◻ Vakulu ni van’wana ebandlheni va nga pfuna maphayona ku tshama “emphikizanweni” hi ndlela yihi?

[Bokisi eka tluka 19]

Tindlela Tin’wana To Lwisana Ni Ku Karhala Ka Moya

Swikombiso Swa Ku Karhala

◻ Ku pfumala ku tikhoma eku dyeni, eku nweni, ni le ku hlongoriseni ka ntsako

◻ Ku lahlekeriwa hi ku hisekela ntiyiso, moya wa ku tianerisa

◻ Minkanakano leyikulu ni leyi nga sukiki

◻ Ku honisa ku hlanganyela eminhlanganweni ya bandlha

◻ Ku pfumala ku hiseka ni ntsako evutirhelini bya nsimu

◻ Ku sungula ku sola-sola vakulu ni nhlengeletano

Mimpfuno Yo Tiyisela

◻ Ku khongelela mpfuno wa moya lowo kwetsima—Luka 11:13; Vagalatiya 5:22, 23; 1 Petro 4:7

◻ Dyondzo ya munhu hi xiyexe—Psalma 1:1, 2

◻ Ku anakanyisisa hi timhaka ta Matsalwa—Psalma 77:12

◻ Ku va kona etidyondzweni ni le tinhlengeletanweni minkarhi hinkwayo,—Nehemia 8:1-3, 8, 10; Vaheveru 10:23-25

◻ Ku hlanganyela minkarhi hinkwayo entirhweni wa nsimu—Mintirho 20:18-21

◻ Mpfuno wa moya lowu humaka eka vakulu va bandlha, valanguteri lava famba-fambaka—Varhoma 1:11, 12; Vaheveru 13:17

[Xifaniso eka tluka 17]

Yehova, Muvumbi wa xibakabaka, u pfuna timbhoni takwe ku kuma matimba

[Xifaniso lexi nga eka tluka]

NASA photo