Ntshembo Wa Wena—I Xikwembu Kumbe I Rifuwo?

“Hi malembe yo tala u tipfalele endlwini yakwe yo xonga leyi biyeriweke hi sefo ivi yi pfariwa hi tinyangwa timbirhi ta nsimbi leti lotleriwaka hi ku chava.”

XIVIKO xa mahungu xisweswo xi hlamusele noni leyi fumeke leyi feke emavokweni ya vakanganyisi lava yiveke swingwavila ni miliyoni yin’we ya tidolara ($1 million)a endlwini yakwe. Endzhaku ka loko miri wakwe wu kumiwile, phorisa ri tirhise xigolonyani xa grosa leswaku ri humesa timiliyoni tin’wana ta 5 ta tidolara endlwini yakwe. Nakambe phorisa ri kume magidi ya “tinyiko ta siku ro velekiwa” ti ri ni makhadi lama nge “Eka Yesu Kriste” ni le “Ka Xikwembu.”

Mudyandzhaka loyi wa xisati u vonake a ri hava vanghana, naswona u hanye eku chaveni ka nkarhi na nkarhi. Tivutise, Xana timiliyoni leti a a ti rhandza swinene a ti ri ta nkoka hakunene hi ndlela yini? Ku tlula kwalaho, A a fume ku fikela kwihi eka Xikwembu? Entiyisweni wa swi tiva leswaku Xikwembu xi nga ka xi nga kumiwi hi “tinyiko ta siku ra ku velekiwa,” naswona ku rhula ka Xikwembu a ku humi eka ku va ni rifuwo. Sweswo swi nga voniwa eka ndzayo ya Bibele ya leswaku hi ‘veka ntshembo wa hina, hayi eka rifuwo leri nga pfuniki nchumu, kambe eka Xikwembu, lexi hi nyikaka hi ntalo swilo hinkwaswo leswaku hi tikhorwisa ha swona.’—1 Timotiya 6:17.

Ha yini rifuwo ri nga pfuni nchumu? Kunene, kumbexana wa yi tiva ndlela leyi marito ya Yesu ya nga ntiyiso ha yona: “Mi nga tihlengeleteli xuma emisaveni, laha tinsumba ni ku kurha swi dyaka kona, ni laha makhamba ma tshovaka kona, ma yiva.” (Matewu 6:19) Hi laha u vonaka ha kona, minkarhi hinkwayo ku ni khombo ra leswaku ndzilo wu ta hisa kaya. Vanhu van’wana va veka rifuwo ra vona etibanki, kambe xana vakanganyisi a va yivanga eka tona ke? Hambi wu ri movha lowuntshwa wu ta kurha.

Ku vuriwa yini hi ikhonomi ya matiko? Ematikweni yo tala ku durha ka swilo ku fana ni khamba; ku hunguta mimpfuno ya munhu. “Endzhaku ka loko ndlala leyikulu yi hlasele Jarimani eku sunguleni ka va-1920, vaxavi va lave tibasikiti leti nga enkarhini . . . leswaku va xava tigrosa . . . Minxavo eJarimani yi engeteleke hi triliyoni leyi tlulaka 1 eka sente yin’wana ni yin’wana ku sukela hi August 1922 ku ya eka November 1923.” (The World Book Encyclopedia) Ku tshemba mali swi nga va leswi khomisaka tingana swonghasi!

Hi vutlhari Yesu u tsundzuxile a ku: “Tihlengeleteleni xuma etilweni, laha tinsumba ni ku kurha swi nga dyiki kona, ni laha makhamba ma nga tshoviki kona ma yiva.” (Matewu 6:20) “Xuma” lexi i yini xana? Xi vumba rhekhodo yerhu ya munhu hi xiyexe ya mintirho leyinene, ku va ka hina lava fumeke eka Xikwembu. U nga ha vutisa u ku, ‘sweswo swi lava yini eka mina?’ Hi ku komisa, Bibele yi hlamula leswaku swi vula “rifuwo ra mintirho leyinene, [ku] hanana, [ku] tiva ni ku pambulela van’wana.”—1 Timotiya 6:18.

Emisaveni hinkwayo namuntlha, ku ni timiliyoni ta Timbhoni ta Yehova leti hi ku tshembeka ti nga tiyisaka leswaku ku avelana swilo swa moya ni swa nyama—ngopfu-ngopfu ku pfuna vanhu ku dyondza hi ta ntshembo wa Mfumo hi ku nghenela mintirho yo chumayela, yo dyondzisa ni yo endla vadyondzisiwa—i mintirho leyinene leyi amukeriwaka hi Yehova ni leyi yi tisaka ku aneriseka ka ntiyiso. Hambi ri ri rifu ri nga ka ri nga n’wi tekeli munhu tihakelo leti ku andlariwa ko tano ka rifuwo ematilweni ku ti tisaka. Ha yini sweswo swi ri tano? Yesu u tshembisile a ku: “Hi mina ku pfuka ni vutomi, la pfumelaka ka mina, hambi a nga fa, u ta hanya.”—Yohane 11:25.

Xuma Lexi Nga Hava Nxavo Lexi Hi Nga Tiphinaka Ha Xona Sweswi

Endzhaku ka ku vula leswaku hi fanele ku veka ntshembo wa hina “eka Xikwembu,” Pawulo u ya emahlweni a ku ‘Xikwembu hi xona xi hi nyikaka swilo hinkwaswo hi ntálo leswaku hi tikhorwisa ha swona.’ (1 Timotiya 6:17) Handle ka swilaveko swa siku na siku swa vutomi, La Tlakukeke hi rirhandzu u lunghiselela xuma lexi nga hava nxavo eka vanhu lava a va amukelaka. Xuma xo tano i yini?

Xiya leswi Swivuriso 3:13-18 yi swi vulaka: “Ku katekile munhu loyi a kumaka ku twisisa, ni loyi a kumaka v̌utlhari hikuv̌a binḍu ra byona ri tlula silver, ni ku anḍa ka byona ku tlula nsuku; byi tlula tiperla hi risima, hikwaŝo leŝi nav̌etaka a ŝi byi ringani. Ku leha ka masiku ku le v̌okweni ra šinene ra byona, ku fuma ni ku twala ŝi le vokweni ra šimatsi. . . . I muri wa v̌utomi e ka lav̌a byi fuweke, lav̌a byi hlayisaka v̌a katekile.” Kutani “v̌utlhari” i xuma lexi tlulaka ntikelo wa rifuwo hinkwaro ra misava.

Vutlhari i ku tirhisiwa ka vutivi hi ndlela leyinene. I vuswikoti byo tirhisa vutivi ni ku twisisa hi laha ku humelelaka ku tlhantlha swiphiqo, ku papalata, kumbe ku sivela, makhombo, ku fikelela tipakani to karhi kumbe ku pfuna van’wana ku endla tano. Xana a wu pfumeli leswaku namuntlha hi lava vutlhari byo tano leswaku hi ta kongomana ni miringo ya vutomi hi laha ku humelelaka ni ku hlayisa xiyimo lexinene ni Xikwembu ke?

Loko yi hlamusela vutlhari, Swivuriso 3:13-18 yi kandziyisa ntsako. Xana ntsako a hi rifuwo leri hi ri navelaka hinkwerhu ka hina ke? Vutlhari bya Xikwembu byi ta hi nyika ntsako lowu hikuva ntsako wa ntiyiso wu nga huma eXihlobyeni xa wona, Yehova Xikwembu. Ntokoto wu kombe leswaku ntsako wa ntiyiso wu nga ka wu nga kumeki handle ko yingisa La Tlakukeke ni ku namarhela ku tirha ka moya wa yena. Ntsako lowu tshembisiweke eBibeleni wu tiseketele hi vuxaka bya hina lebyi faneleke, kumbe xiyimo lexi amukelekaka, ni Tata wa hina wa le tilweni. (Matewu 5:3-10) Hikwalaho ke, hi ku tirhisa leswi hi swi dyondzaka eku dyondzeni ka Bibele, hi ta va hi kombisa ‘vutlhari lebyi humaka ehenhla’ lebyi nga ta hi nyika ntsako lowu rifuwo hinkwaro emisaveni ri nga ta ka ri nga wu xavi.

Hambi swi ri tano, nakambe tsundzuka leswaku Swivuriso 3:16 yi ri: “Ku leha ka masiku ku le v̌okweni ra šinene ra byona.” Leswi swi twisisiwe swi ri leswi vulaka evokweni ra xinene ra nsirhelelo, voko leri tiyimiseleke ku pfuna ni ku hlayisa munhu eminkarhini yo nonon’hwa. Namuntlha vo tala va nghenela mahanyelo layo biha, rigangu-gangu, ku tirhisiwa loko biha ka swidzidzirisi ni swin’wana. Kumbexana u hlaye leswaku AIDS (Acquired Immune Deficiency Syndrome) yi fambisana ni mikhuva yo tano. Hi ku ya hi leswi u swi xiyeke, xana vanhu lava endlaka swilo leswi va tsakile hakunene ke? Kumbe, xana va tisela vona ni van’wana ku vaviseka ni ku xaniseka lokukulu, hambi ri ri rifu?

Hi laha ku hambaneke, ku tirha ka ndzayo ya vutlhari leyi humaka eRitweni ra Xikwembu minkarhi hinkwayo ku ta va ‘evokweni rero ra xinene’ leswaku ku hi sirheleta emakhombyeni yo tano. Hikwalaho, vutlhari byi nga lehisa vutomi bya hina, byi hi hlayisa endleleni leyi nga ta yisa eka rifu ra xihatla. Xisweswo, vutlhari bya Xikwembu byi ta endla leswaku vutomi bya hina bya sweswi byi va lebyi tsakisaka swinene.

Famba Hi Vutlhari Sweswi

Vumbhoni hinkwabyo lebyi hi rhendzeleke byi komba leswaku hi hanya “emasikwini ya makumu” ya mafambiselo lawa ya swilo. (2 Timotiya 3:1-5) Kutani ke, i swa nkoka leswaku hi tivonela ku hluriwa hi moya wa misava. Moya wo tano wu kandziyisa swilo leswi vonekaka hi ku tirhisa ku navela ka vutianakanyi. Ku lumbeta kun’wana loku tlhontlhiweke malunghana na Yobo, wanuna la tshembekaka wa rhekhodo ya Bibele, a ku ri leswaku wanuna loyi u tirhele Xikwembu hikwalaho ka minkhathalelo ya vutianakanyi, ya ku kuma rifuwo. (Yobo 1:9-11) Xana ku lumbeta ko tano ku nga tisiwa eka hina ku ri ntiyiso ke?

Loko hi hlamula hi ku doo, hi nga ha va hi Iwisana ni rifuwo ra namuntlha hi laha ku humelelaka. Kambe khombo leri, rifuwo, hi rin’wana ra marhengu lamakulu lawa hi kongomanaka na wona. Yesu Kriste u vule leswaku “ku vilela hi swa misava ni ku kanganyisiwa hi rifuwo swi kamanyeta Rito.” (Matewu 13:22) Entiyisweni, nkarhi na nkarhi hi fanele ku tivonela eka “ku kanganyisiwa hi rifuwo,” hikuva leswi a hi swa nkoka hakunene.

Hi fanele ku titsundzuxa hi mpfuno wa swilo leswi vonekaka. Rito ra Xikwembu ri ri: “Rifuwo ra mufuwi i khokholo ra yena, E ku anakanyeni ka yena, i rirhangu ra šitšhav̌elo.” (Swivuriso 18:11) Ina, nsirhelelo lowu rifuwo ri nga wu nyikaka i wa ku anakanyela ka vuhunguki, ko kanganyisa. A hi yona mhaka ya leswaku swilo leswi vonekaka hi swoxe swi bihile. Lexi biheke i ku veka vutomi bya hina eka swona ematshan’wini yo kuma ku amukeriwa hi Xikwembu. Yesu, loyi a xiyiweke tanihi un’wana wa vadyondzisi lava tlhariheke swinene evurungurwini hi ku kongoma, u te: “Hikuva vutomi bya munhu a byi humi eka swilo leswi a swi fuweke hambi loko swi n’wi talele ngopfu.”—Luka 12:15.

Kutani a hi phikeleleni ndlela leyi nga ta hi endla lava ‘fumeke eka Xikwembu evuton’wini.’ (Luka 12:21) Ku hava lexi nga xa nkoka ku tlula xiyimo lexi amukeriwaka ni Muvumbi. Matshalatshala hinkwawo yo xi hlayisa ya pfuneta ku ‘tihlengeletela ka hina xuma lexinene, lexi tiyeke, xa minkarhi leyi taka, leswaku hi ta amukela vutomi bya xiviri.’—1 Timotiya 6:19.

[Nhlamuselo ya le hansi]