Mhaka Leyi Réunion Yi Nga Na Tiholo Ta Mfumo To Tala Swinene Ha Yona

KWALOMU ka 640 wa tikhilomitara evuxeni bya Madagascar, xihlala lexintsongo xa Réunion xi humelela xikan’we ku suka eLwandle lerikulu ra India. Hambi leswi xi nga kwalomu ka 60 wa tikhilomitara ntsena hi ku leha na 50 wa tikhilomitara hi ku anama, xihlala lexi xi xiyiwa hi tinhlohlorhi ta xona ta volcano ni minkombiso ya mindzilo ya nkarhi na nkarhi. Nhlohlorhi ya le henhla, leyi nga 3 069 wa timitara ehenhla ka vuandlalo bya lwandle, i volcano leyi nga ha pfurhiki ya Piton des Neiges (Nhlohlorhi ya Gamboko). Exiphen’wini xa dzonga-vuxa bya xihlala lexi ku na volcano ya matimba ya 2 625 wa timitara ku na leyi vuriwaka kahle leswaku i Piton de la Fournaise (Nhlohlorhi ya Khele ra Ndzilo). Oho xivono lexi chavisaka swonghasi loko yi pfurha ni vusiku! Mapatu yo tala ma jika-jika ehenhla ni le swiehlweni leswikulu ngopfu, ma nyikela swivono leswi hlamarisaka swa leswi a swi vuriwa vuxongi lebyi chavisaka bya Réunion.

Ha Yini Ku Ri Na Tiholo Ta Mfumo To Tala Swinene?

Hambi swi ri tano, vuxongi bya ntiyiso bya Réunion, byi hi tlhelo ra leswi vo tala va vaaki va xihlala lexi va amukeleke “Evhangeli . . . ya Mfumo” leyi yi huweleriwaka hi Timbhoni ta Yehova. (Matewu 24:14) Ntirho wa vona wo chumayela wu sungule hi 1960, loko malandza mambirhi ya nkarhi hinkwawo ma fikile ma huma eFrance. Sweswi, malembe ya 30 endzhakunyana, 1 665 wa Timbhoni ta karhi ti huwelela mahungu ya Mfumo exikarhi ka vaaka-tiko va 582 000—mpimanyiso wa Mbhoni yin’we eka vanhu van’wana ni van’wana va 350 exihlaleni.

Ku andza ko tano ku lave ku akiwa ka tindhawu leti fanelekaka to hlangana eka tona leswaku Timbhoni ti kota ku ya emahlweni ni vugandzeri bya tona ni dyondzo ya swa moya. (Vaheveru 10:24, 25) Mabandlha ya 13 eka 19 ya Réunion, ana se ma ake Tiholo ta Mfumo ta wona vini. Hikwalaho ka swidzedze leswi tshamelaka ku humelela endhawini leyi, leyi i miako leyi endliweke hi maribye lama tiyeke leyi lavaka nkarhi lowu xiyekaka—ni mali—ku yi aka. Kutani swi koteke hi ndlela yihi ku aka tiholo to tano, tanihi leswi Timbhoni to tala exihlaleni lexi ti holaka miholo leyi tolovelekeke na leswi ti nga ni midyangu leyikulu yo yi hlayisa? Emaritweni ya Bibele, nhlamulo i ku “v̌oko ra Yehova a ri khwanyelanga.”—Esaya 59:1.

Swiphiqo Swi Hluriwa

Hi xikombiso, xiya ndlela leyi Yehova a susumeteleke timbilu ta vanhu ku pfuna eku akeni ka Holo ya Mfumo exidorobaneni xa Saint-Louis, lexi akiweke exiphen’wini xa le dzonga-vupeladyambu bya Réunion. Loko tipulani eku sunguleni ti amukeriwa, Mbhoni leyintshwa yi byele mudyondzi wa yona wa tlilasi yo aka hi maribye leswaku Holo ya Mfumo a yi ta akiwa hi vatirhi vo tirhandzela. Mudyondzi a nga nyikelanga hi mintirho ya yena ya ku tirhandzela ntsena kambe u tlhele a tisa tlilasi ya yena hinkwayo endhawini yo aka ku ta pfuna ku cela masungulo. Endzhakunyana, u nyikele hi xitili lexi lavekaka xa masungulo.

Loko vatirhi vo tirhandzela vo tlula dzana va hlangane kun’we hi holideyi ku ta andlala khonkreti eka ndhawu ya kwalomu ka 190 wa swikwere mitara, va hlamarile ku kuma leswaku doroba a ri pfale mphamelo wa mati. A va ta yi lunghiselela njhani khonkreti va nga ri na mati? Un’wana wa vatirhi, loyi a a tiva mufambisi wa ndzawulo ya ndzilo u ehlekete leswaku u ta hlamusela xiphiqo lexi eka wanuna loyi wa musa. Ku nga ri khale ngopfu, lori ya ndzilo yi fike endhawini yo aka. Movha lowu a wu rhwele mati lama eneleke ya ntirho lowu, naswona ndzawulo ya ndzilo yi wu pfumelele ku tshama kwalaho siku hinkwaro! Hi laha ku twisisekaka, vatirhi hinkwavo va ku tirhandzela va susumeteriwe ku veka timbilu ta vona hinkwato entirhweni.

Mpfuno wa Yehova a wu vonaka hi ndlela leyi swiphiqo swin’wana swi hluriweke ha yona. Hi xikombiso, eka xiyimo xin’wana xa ku aka, silingi a yi lunghiseleriwe timboni ta 22 leti a ti odiwile ka ha ri mahlweni hi tin’hweti ta nhungu. Kambe khampani yi byele vamakwerhu leswaku muxaka lowu a va wu lava a wu nga ha endliwi. A ku ta endliwa yini? Xana makungu hinkwawo ni silingi a swi ta fanela ku cinciwa? E-e, hikuva hi nkarhi lowu faneleke, vamakwerhu va twe hi ta muaki wa le kusuhi loyi a a ri ni timboni leti fanaka ta ntirho lowu a wu nga si sungula.

U vutisiwile, “U na tingani?”

U hlamurile, “Kwalomu ka 25.”

Handle ko hlwela, timboni ti xaviwile kutani tinghenisiwa.

Loko ntirho wu ya emahlweni, munhu loyi a a ha ku sungula ku dyondza Bibele ni Timbhoni ta Yehova u tsakisiwe ngopfu hi muako lowunene.

“Ndzi byele,” u vutisile, “ku na xin’wana lexi mi xi lavaka?”

“Ina,” ku hlamula makwerhu un’wana. “Hi lava swingolongondzwani swa mpfumawulo.”

Endzhaku ka sweswo, munhu loyi lontshwa la tsakelaka kan’we-kan’we u humese buku ya yena ya cheke kutani a nyikela ku lava ku va swi anela endlelo lerintshwa ra mpfumawulo leri hetisekeke. Minyikelo yo tano, kun’we ni mali yo lombisa ya ku hanana leyi humaka eyindlu-nkulu ya Sosayiti ya Watch Tower eUnited States, yi pfune bandlha ku heta Holo leyi ya Mfumo yo saseka.

Ehenhla ka leswi hinkwaswo, Bandlha ra Saint-Louis a ri tsakile ku va na Makwerhu Carey W. Barber, xirho xa Huvo leyi Fumaka ya Timbhoni ta Yehova, a ta nyiketela Holo ya Mfumo hi December 1988. Makwerhu Barber a a averiwe ku ta hi le yindlu-nkulu ya Sosayiti eBrooklyn, New York, ku ta nyiketela miako ya rhavi leyintshwa eka xihlala xa le kusuhi xa Mauritius. Loko vamakwerhu eSaint-Louis vatwe hi leswi, hi mavhiki manharhu ntsena va hlengelete mali leyi aneleke ku hlanganisa mali ya xihaha-mpfhuka yo hakela yena ni xirho xa Komiti ya Rhavi ra Mauritius leswaku va kota ku famba ku suka eMauritius ku ya eRéunion. Hikwalaho ka ku engeteleka ku sukela nkarhi wolowo, Bandlha ra Saint-Louis a ri fanele ku avana. Sweswi, mabandlha mambirhi ma hlanganyela eka Holo ya Mfumo leyintshwa.

Ku Dzuneka Ku Ya Eka Yehova

Ku vuriwa yini hi mabandlha man’wana eRéunion? Hikwalaho ka ku amukela lokunene entirhweni wa Mfumo wo chumayela, nhlayo ya lava vaka kona eminhlanganweni eTiholweni ta Mfumo a yi ri ku sukela eka 150 ku ya ka 200 wa tiphesente ta nhlayo ya Timbhoni ta Yehova exihlaleni lexi. Kutani swi le rivaleni leswaku ha yini Tiholo to tala ta Mfumo ti laveka eRéunion. Entiyisweni, tinharhu leti engetelekeke ti akiwile ku sukela ka leyi yi nga le Saint-Louis, kutani leswi swi tise nhlayo leyi heleleke ya 13 eka 19 wa mabandlha exihlaleni lexi.

Eka hinkwaswo leswi, ku dzuneka ku ya eka Yehova, loyi a vhumbeke: “Lonṭongo o ta v̌a khume ra madzana, lo’nṭongo ngopfu, o ta v̌a tiko le’ra matimba. Mina, Yehova, nḍi hatlisisa ŝilo leŝi e mikarini ya ŝona.” (Esaya 60:22) Tanihi hi le swiphen’wini swin’wana swa misava, vuprofeta lebyi byi ve ntiyiso exihlaleni lexi xo saseka.