‘Va Ta Fula Matlhari Ya Vona Ma Va Swikomu’—Rini?

XIFANISO lexi tivekaka xa Nhlangano wa Matiko lexi nga eDorobeni ra New York xi kombisa munhu a ri karhi a fula banga ri va xikomu. Xi sekeriwe eka vuprofeta bya Bibele bya Esaya ndzima 2, ndzimana ya 4 na Mikiya ndzima 4, ndzimana ya 3. Xana marito lawa ma ta hetisisiwa njhani naswona rini?

Xiviko xa sweswinyana xa The New York Times a xi ri ni nhloko-mhaka leyi nge “Ku Xavisiwa Ka Matlhari eMisaveni Hinkwayo Ku Tlakukele Eka $30 Wa Magidi Ya Timiliyoni [R227 wa Magidi ya Timiliyoni]”! Hi 1999, i vamani lava a va ri vaxavisi lavakulu va matlhari? United States hi yona a yi famba emahlweni hikuva yi kume $11,8 wa magidi ya timiliyoni [R89 wa magidi ya timiliyoni]. Exiyin’weni xa vumbirhi a ku ri Rhaxiya leyi a yi kume mali leyi nga ehansi ka hafu ya yoleyo. Kambe, Rhaxiya yi xavise matlhari lama laveke ku phindheka ka mbirhi eka lawa yi ma xaviseke n’wexemu wa kona. Kutani ku landzela Jarimani, Chayina, Furwa, Britain na Italiya. Xiviko lexi fanaka xi ye emahlweni xi ku: “Ku fana ni le nkarhini lowu hundzeke, hi xiringaniso, yo tala ya matlhari ya kona a ma xaviseriwa matiko lama hluvukaka.”

Endzhaku ka tinyimpi timbirhi ta misava ni tinyimpi tin’wana letikulu leti veke kona hi lembe-xidzana ra vu-20, leti dlayeke ni ku vavisa vanhu va madzana ya magidi, munhu wa tivutisa, “Xana matiko ma ta ku dyondza rini ku rhula ematshan’weni yo dyondza nyimpi?” Bibele yi kombisa leswaku swilo swi ta cinca “exiphen’wini xo hetelela xa masiku.” (Esaya 2:2) Entiyisweni, vuprofeta lebyi ana se bya hetiseka, tanihi leswi Timbhoni ta Yehovha leti lavaka ku endla tsevu wa timiliyoni ti pfumeleke leswaku ‘ti dyondzisiwa hi Yehovha.’ Hikwalaho ka sweswo, ti ni ‘ku rhula lokukulu.’—Esaya 54:13.

Ku nga ri khale Yehovha u ta herisa matlhari ni tinyimpi swin’we ni hinkwavo lava swi endlaka, hikuva u ta “lovisa lava onhaka misava.” Loko u lava ku tiva swo tala malunghana ni ku cinca loku ko hlamarisa, titwe u ntshunxekile ku tihlanganisa ni Timbhoni ta Yehovha endhawini ya ka n’wina kumbe u tsalela eka adirese leyi faneleke eka leti longoloxiweke eka tluka 5.—Nhlavutelo 11:18.