Ku Vona “Xikombiso” Hi Ku Twisisa

“Kute loko a tshamile eNtshaveni ya Mitlhwari, vadyondzisiwa va ta ka yena etlhelweni, va ku: ‘Hi byele, xana timhaka leti ti ta humelela rini xana? Ni xikombiso xa ku vuya ka wena ni xa ku hela ka minkarhi xi ta va xihi ke?’”—MATEWU 24:3.

1. Hikwalaho ka yini swiendlakalo leswi ninginisaka misava ku sukela hi 1914 swi nga humelelanga hi mpaxeko xana, naswona i yini lexi vadyondzisiwa va Yesu va n’wi vutiseke xona?

SWIENDLAKALO leswi ninginisaka misava ku sukela eka Nyimpi yo Sungula ya Misava ya 1914-18 a swi humelelanga tanihi mhangu. Swi vhumbiwe hi Yesu Kriste malembe xidzana ya 19 lama hundzeke. U byele vadyondzisiwa vakwe va 12 hi ta swilo swo tala leswi chavisaka leswi a swi ta ta, naswona hikwalaho va n’wi vutisile va ku: “Hi byele, xana timhaka leti ti ta humelela rini xana? Ni xikombiso xa ku vuya ka wena ni xa ku hela ka minkarhi xi ta ya xihi ke?”—Matewu 24:3.

2. Hikwalaho ka yini vaapostola va lave ku tiva leswi tlulaka leswi a swi ta humelela loko Yerusalema yi nga si lovisiwa hi 70 C.E?

² Vaapostola volavo va lave ku tiva ku tlula leswi a swi ta humelela exikarhi ka nkarhi wolowo ni ku lovisiwa ka Yerusalema. Yesu a nga vuyanga hi laha ku vonekaka kumbe hi laha ku nga vonekiki eka xiendlakalo xolexo xa khombo. Naswona mafambiselo ya swilo lama sunguleke ku sukela eka Ndhambi a ya helanga eku lovisiweni ka Yerusalema hi 70 C.E. Hi xiviri, ‘xikombiso xa vukona bya [Yesu lebyi nga vonekiki] ni ku hela ka mafambiselo ya swilo’ a xi ri kusuhi ni ku humelela endzhaku ka nkarhi wo leha wa ku hanya ka vaapostola va yena emisaveni.

3. (a) I yini lexi kombaka leswaku “Evhangeli leyi ya Mfumo” a yi chumayeriwanga hi vukhongeri bya Vujagana enkarhini lowu landzeleke ku xandzuka ka vaapostola? (b) Xana Mfumo wa Xikwembu wu ta hluleka loko Nhlangano wa Matiko wu hluleka ke?

³ Hi ku tirhisa swifaniso swa vuprofeta malunghana ni Mfumo wa Xikwembu, Yesu u byele vaapostola vakwe hi ta ku xandzuka ka vukhongeri loku a ku ta humelela endzhaku ka ku tlhelela ka yena etilweni ni ku fa ka vona. Hi nkarhi hinkwawo wa vugwinehi byebyo, xana a ku ta va ni ku chumayeriwa ka misava hinkwayo ka “Evhangeli leyi ya Mfumo”? (Matewu 24:14) Hayi hi vukhongeri bya Vujagana, leswi hi December 1918 Huvo ya Ntwanano wa Tikereke ta Kriste le Amerika yi bumabumeleke Ntwanano wa Matiko lowu a wu tlhomiwile enkarhini wolowo tanihi “xikombiso xa politiki xa Mfumo wa Xikwembu emisaveni.” Hambi swi ri tano, ku nga khathariseki xiamukelo xexo xa vukhongeri, Ntwanano wu hlulekile eku tlhekekeni ka Nyimpi ya Vumbirhi ya Misava hi 1939. Kambe eku hlulekeni koloko, xana Mfumo wa Xikwembu wa ntiyiso wu hlulekile ke? Doo! Naswona wu nga ka wu nga hluleki loko mulandzeri wa Ntwanano, Nhlangano wa Matiko, wu hluleka ku nga ri khale. Kambe ke, Mfumo wolowo wa le henhla wu ta herisa Nhlangano wa Matiko, ku nga khathariseki leswaku i tintsumi tingani ta le tilweni leti nga ha lavekaka ku endla leswi!

4. Hikwalaho ka yini ntirho wo chumayela hi Mfumo a wu fanele ku va xiphemu xa “xikombiso” ke?

⁴ Hinkwaswo leswi nga laha henhla swi pfuna ku endla leswaku swi koteka ku yi twisisa swinene mhaka leyi ya nkoka: A a hlamula xikombelo xa “xikombiso” leswi Yesu a byeleke valandzeri va yena a ku: “Kutani Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14) Leswi swi komba leswaku ku chumayeriwa ko tano ka misava hinkwayo ka Mfumo a ku ta va xiphemu xa “xikombiso” hinkwaxo lexi a xi ta fungha ‘makumu ya mafambiselo ya swilo.’ Nakambe a xi ta va vumbhoni lebyi vonekaka bya “vukona” lebyi nga vonekiki bya Yesu Kriste. Ndlela leyi Yesu a xaxameteke nxaxamelo wa swiendlakalo eku sunguleni ka vuprofeta byakwe ehenhleni ka ntirho wa ku chumayela hi Mfumo ya xiyeka. Hi nkatsakanyo u te:

5. Hi tihi timhaka tin’wana ta “xikombiso” leti Yesu a ti vuleke loko a nga si vhumba ku chumayeriwa ka Mfumo emisaveni hinkwayo?

⁵ “Mi ta twa huwa ya tinyimpi ni mahungundlela ya tinyimpi; tivoneleni leswaku mi nga tshukisiwi, hikuva sweswo swi fanele ku humelela, kambe a hi wona makumu. Tiko rin’wana ri ta pfukela tiko rin’wana, mfumo wun’wana wu ta Iwa ni mfumo wun’wana; ku ta va ni tindlala ni ku tsekatseka ka misava ematlhelweni layo tala. . . . Kutani rirhandzu ra lavo tala ri ta sungula ku titimela, hikuva ku homboloka ku ta va ku andzile. Kambe loyi a tiyiselaka ku fika makumu, hi yena loyi a nga ta ponisiwa.”—Matewu 24:6-13.

6. Ha yini timhaka ta “xikombiso” ku nga ri ku ya emahlweni ka nxaxamelo wa swilo leswo sungula ke?

⁶ I ntiyiso, ku vile ni tinyimpi, tindlala, ku tsekatseka ka misava, ni mintungu eka malembe xidzana hinkwawo ya Nguva ya hina leyi Tolovelekeke ku fikela hi 1914. (Luka 21:11) Hambi swi ri tano, a ku vanga na nchumu lowu nga ringanisiwaka ni leswi humeleleke ku sukela loko Minkarhi ya Vamatiko yi herile elembeni rero ri xiyekaka. Dzolonga ra hinkwako-nkwako leri tlhontlhiweke hi laha ku hlamarisaka hi ximumu xa 1914 ri kule ri va nyimpi leyikulu laha matiko ya 28 eku heteleleni ya khomaneke. Ku fambisana ni ku andza koloko ka vanhu ku ve ni ku tsekatseka ka misava ka ntumbuluko. A ku ri ni ku kayivela ka swakudya, kumbe tindlala, naswona elembeni ro hetelela ra nyimpi yoleyo ya misava ku humelele ntungu lowu fanaka ni khamba lowu vuriwaka chachalaza lowu dlayeke vanhu lava tlulaka 20 000 000. Hinkwaswo leswi a ku nga ri ku ya emahlweni ka nxaxamelo wa swilo leswi humeleleke eku sunguleni. A ku ri ku sungula ka nxaxamelo wa swiendlakalo leswi vumbaka “xikombiso” xa leswaku mafambiselo lawa ya swilo ya le ‘nkarhini wa wona wa makumu’ lowu vhumbiweke. (Daniel 12:4) Buku yo hetelela ya Bibele—Apocalipsi, kumbe Nhlavutelo—yi tiyisa leswi.

7. Hikwalaho ka yini buku ya Nhlavutelo yi rhekhodiwile, naswona swilo swo tala leswi ‘nyikeriweke . . . hi swikombiso’ eka yona a swi ta vula?

⁷ Muapostola Yohane, loyi a amukeleke Nhlavutelo, u lerisiwe ku tsala hi xikongomelo lexi hlawulekeke. Xikongomelo xihi xana? Lexi: “Leswaku a ta komba malandza ya [Xikwembu] swilo leswi swi fanelaka ku humelela ku nga ri khale.” Naswona eku heteleleni ka Nhlavutelo, Hosi Yesu Kriste u ri: “Hakunene ndza ta sweswi-sweswi.” Emhakeni yoleyo, Yohane u ri: “Amen, tana Hosi Yesu!” Xisweswo swilo swo tala leswi ‘nyikeriweke . . . hi swikombiso,’ eku humeleleni ka swona evurungurwini, a swi ta komba leswaku hi hanya ‘enkarhini wa makumu’ ya mafambi-selo lawa ya swilo. (Nhlavutelo 1:1; 22:20) Ee, a swi ta hi pfuna ku vona “xikombiso” xa nhlengelo hi ku twisisa.

8. Mukhandziyi wa ‘hanci yo basa’ i mani, naswona Xikwembu xi n’wi lerise rini leswaku a ya Iwisana ni valala va yena?

⁸ Eka Nhlavutelo ndzima ya 6 ku humelela mhaka ya leswi swi vuriwaka ku khandziya ka “vakhandziyi va mune va tihanci ta Nhlavutelo.” Loyi a humelelaka ro sungula i mukhandziyi wa “hanci yo basa,” Yesu Kriste la kwetsimisiweke, a ya lwa ni valala vakwe. U lerisiwe hi Xikwembu leswaku a endla sweswo eku heleni ka Minkarhi ya Vamatiko, loko valala va Yesu ematilweni ni laha misaveni va fanele va titsongahatela vulawuri bya yena.—Psalma 2:1-12.

9. I yini lexi faniseriweke hi mukhandziyi eka (a) hanci yo “tshwuka”? (b) ‘hanci ya ntima’? (c) ‘hanci yo kwalala’?

⁹ Mukhandziyi wa hanci ya vumbirhi yo “tshwuka” u fanisele nyimpi ya hinkwakonkwako, hikuva a a nyikiwile tlhari ra nyimpi, “tlhari lerikulu.” Eka xiendlakalo xa vunharhu, “[hanci] ya ntima,” a ku ri mukhandziyi la faniselaka ndlala. Leswi hi swi tivisa ku yini? Hikuva a a rhwale swikalo swimbirhi swo pima ha swona masungulo ya mphakelo wa swakudya hi minxavo leyi tlakukeke. Mukhandziyi wa vumune, wa “[hanci] yo kwalala” leyi langutekaka yi vabya,a a fanisela ntungu, hikuva mhaka ya kona yi ri: “Mugadi wa yona a a vuriwa “rifu”, ni loyi va nge i “Tihele” [sirha] a n’wi landzelela hi le ndzhaku.” I ntiyiso, mukhandziyi loyi wa vumune a a nyikiwe matimba yo “dlaya hi fumu” ra nyimpi “ni dyandza . . . ni hi swiharhi swa nhova.” Hambi swi ri tano, hi laha ku xiyekaka, nakambe a a nyikiwe matimba yo nghenisa esirheni (Hades) hi ‘ntungu lowu dlayaka.’—Nhlavutelo 6:1-8.

10. I yini leswi a swi fanele ku humelela endzhaku ka loko xilemo xa vuntlhanu ni xa vutsevu swi lemuriwile, naswona i yini lexi vaaki va misava a va fanele ku xi pfumela?

¹⁰ Endzhaku ka loko muapostola Yohane a vone swivono sweswo swa timhaka leswi a swi ta fungha ‘makumu ya mafambiselo ya swilo,’ u vone ku lemuriwa ka xilemo xa vuntlhanu ni xa vutsevu swa buku ya vuprofeta. Emhakeni yoleyo, u vone xivono xa xiendlakalo lexi vavisaka xa ntumbuluko, lexi sungulaka hi ‘ku tsekatseka lokukulu ka misava.’ Eku heteleleni, vaaki va misava va susumeteriwe ku pfumela va ku: “Siku lerikulu ra vukarhi bya [Yehova Xikwembu na Yesu Kriste] ri fikile.” Ku tshinela ka siku rero ro fanekisela ra vukarhi a ku ta komba leswaku makumu eku heteleleni ya fikile eka vaseketeri va misava leyi.—Nhlavutelo 6:9-17.

Ku Hlengeleta Lava Va Amukeriweke Leswaku Va Pona

11. Hi xihi xifaniso lexi Yesu a xi tirhiseke ku komba ntiyiso wa leswi a swi vhumbeke malunghana ni “vukona” byakwe ni ‘makumu ya mafambiselo ya swilo’?

¹¹ Loko a nyika “xikombiso” xa ‘vukona byakwe ni xa makumu ya mafambiselo ya swilo,’ Yesu u te: “Dyondzani leswi hi murhi wa nkuwa: Loko marhavi ya wona ma sungula ku olova, ni loko matluka ya wona ma hluka, mi tiva leswaku ximumu xi le kusuhi. Hi mukhuva wolowo, loko mi vona swilo sweswo hinkwaswo, tivani leswaku nkarhi wu le kusuhi, wu le nyangweni. Ndzi tiyisile ndzi ri ka n’wina, rixaka leri ri nga ka ri nga hundzi, ku nga si humelela swilo leswi hinkwaswo. Tilo ni misava swi ta hundza, kambe marito ya mina ma nga ka ma nga hundzi.”—Matewu 24:32-35.

12, 13. (a) I yini lexi nhlomulo wa tiko ra Yuda hi 70 C.E. wu nga xi kombisangiki? (b) Nhlomulo wolowo a ku ri xifaniso xa vuprofeta bya yini? (c) Hikwalaho Yesu u ye emahlweni a profeta yini malunghana ni ku vuya ka yena?

¹² Loko Varhoma va lovise Yerusalema ni tempele ya yona hi 70 C.E. hi laha Yesu a vhumbeke ha kona, nhlomulo lowu wo vavisa ehenhla ka Vayuda a wu kombanga swona leswaku u vuye ra vumbirhi ni leswaku vukona byakwe lebyi nga vonekiki byi sungurile. (Matewu 24:15-21) Leswi Bibele yi tirhisaka Yerusalema ya khale tanihi xifaniso, nhlomulo wolowo wo chavisa wa 70 C.E. hakunene a ku ri xifaniso xa vuprofeta. Xi fanise hi xitalo leswi a swi ta humelela emisaveni hinkwayo endzhaku ka loko Minkarhi ya Vamatiko yi herile hi 1914 naswona hikwalaho endzhaku kahle-kahle Yesu u sungurile vukona byakwe lebyi nga vonekiki. Hi yona mhaka leyi Yesu a tlheleke a ku:

¹³ “Kan’we-kan’we loko nhlomulo wa minkarhi yoleyo wu ta va wu herile, dyambu ri ta hundzuka ntima, ni n’weti a wu nga ha voningi; tinyeleti ti ta wa hi le tilweni, ni leswa matimba swa le henhla swi ta dzinginisiwa, hi kona xikombiso xa N’wana-wa-Munhu xi nga ta vonaka etilweni; vanhu va tinxaka hinkwato ta misava va ta ba nkosi, kutani va ta vona N’wana-wa-Munhu a ta emapapeni ya le tilweni, hi matimba ni ku kwetsima lokukulu. Hi mpfumawulo lowukulu wa mhalamhala, u ta rhuma tintsumi ta yena; ti ta hlengeleta vahlawuriwa va yena, va huma ematlhelweni ya mune ya misava, ku sungula emakun’wini man’wana ya tilo ku ya fika eka laman’wanyana.”—Matewu 24:29-31.

14. I ntwanano ni gandzelo rihi leswi vuriweke eka Psalma 50:5 ke?

¹⁴ Ku hlengeletiwa loku vhumbiweke ka “vahlawuriwa” volavo eku heleni ka mafambiselo lawa ya swilo i ku hetiseka ka xileriso xa Xikwembu lexi nge: “Nḍi hlengeleteleni la’v̌a nḍi ranḍaka, la’v̌a endleke ntwanano na mina hi magaḍelo.” (Psalma 50:5) Leswi Yehova a wu vulaka ‘ntwanano wa mina,’ ku nga ka ku nga vi ku tinyiketa loku munhu a ku endlaka eka Xikwembu loko a va Mukriste ni leswaku a a ta ku endla ku va loku bohaka hi ku tinyikela ka yena. E-e, ntwanano lowu heleleke exikarhi ka Yehova na ‘lava tshembekaka’ i “ntwanano lowuntshwa” lowu tshembisiweke wa Xikwembu ni yindlu ya Israyele wa moya. Gandzelo leri ntwanano wolowo lowuntshwa wu seketeriweke eka rona i gandzelo ra nkutsulo ra “N’wana-wa Munhu,” Yesu Kriste.—Yeremia 31:31-34; Matewu 24:30.

15. ‘Lava tshembekaka’ i vamani xana, naswona sweswi va tirha tanihi yini emisaveni?

¹⁵ ‘Vatshembeki’ lava nghenisiweke eka ntwanano lowuntshwa va endliwe Vaisrayele va moya. (Luka 22:19, 20) Xikwembu xi endla leswaku ku hlengeleta ku endliwa leswaku xi ta kambela lava hlengeletiweke, xi amukela lava tshembekaka ni ku tshika lava va nga hanyiki hi leswi va swi vulaka ehenhleni ka ku va eka ntwanano wa xona, ku nga ntwanano lowuntshwa. (Psalma 50:16) Ku sukela eka Nyimpi yo Sungula ya Misava, vumbhoni hi leswaku Vujagana, lebyi vulaka leswaku byi le ka ntwanano lowuntshwa, a byi tikombanga byi amukeleka eka Yehova Xikwembu. Hi ku hambana lokukulu ku ni masalela mantsongo ya vadyondzisiwa lava tinyiketeke hakunene, lava khuvuriweke va Muhlanganisi wa ntwanano lowuntshwa, Yesu Kriste. Va tikombe va ri Vaisrayele va moya. Vanamarheli lava vo tshembeka va ntwanano lowuntshwa i “vahlawuriwa” lava N’wana-wa-munhu a va hlengeletaka eka yena hi ku tirhisa tintsumi ta yena. Va hetisisa mindzhwalo ya ntwanano lowuntshwa, “ntwanano wa mina,” hi laha Xikwembu xi wu vitanaka ha kona. Hikwalaho ka ntirho wa vona wo seketela Mfumo wa Xikwembu ha Yesu Kriste, va vile ‘xikombiso’ emisaveni hinkwayo.—Esaya 8:18; Vaheveru 2:13, 14.

16. (a) Hi rini laha ku veke ni ku phaphamisiwa ka moya eka masalela ya ‘lava tshembekaka’ ke? (b) Eka xifaniso xa vanhwanyana va khume, Muteki i mani, naswona i vamani lava vumbaka mutekiwa wa yena wo fanekisela?

¹⁶ Eka masalela wolawo ya ‘lava tshembekaka,’ a ku fanele ku va ni ku hiteka ka moya eku sunguleni ka xiphemu xa ‘makumu ya mafambiselo ya swilo.’ Leyi a yi ri mhaka yo hlawuleka ya “xikombiso” lexi Yesu a xi vhumbeke eka vuprofeta byakwe lebyikulu. Eka masalela, nkarhi wa ku hiteka koloko a ku ri wun’wana wa ntsako lowukulu, ntsako lowu fanaka ni lowuya wa vanhwanyana va ntlhanu lavo tlhariha lava phaphamisiweke hi ku huwelela ka xikarhi ka vusiku, loku nge: “Muteki hi loyi, humani, mi ya n’wi hlanganisa.” (Matewu 25:1-6) Ku phaphamisiwa koloko ko tsakisa ku humelele hi ximun’wana xa 1919, loko masalela lama totiweke ya sungule ku pfuxetiwa eka timhangu ta nxaniso wa misava hinkwayo ni ku kavanyetiwa loku ya hlangavetaneke na kona enkarhini wa munyama wa Nyimpi yo Sungula ya Misava. Kavula, Muteki wa xifaniso xa vanhwanyana va khume i Yesu Kriste, naswona mutekiwa wakwe wo fanekisela i swirho swa bandlha rakwe leri tshembekaka ra lava 144 000 lava nga ta va na yena eMfun’weni wa le tilweni. (Nhlavutelo 14:1-4) Mahlayelele ya Bibele ni ku yelana ka manguva lawa swi komba leswaku Muteki la nga Hosi u fike etempeleni ya moya hi ximun’wana xa 1918. Hi nkarhi wolowo u sungule ku pfuxa swirho leswi tshembekaka swa mutekiwa wa moya eku feni kutani a swi hlanganisa na yena eMfun’weni wa le tilweni. Tanihi xikombiso xa masalela ya mutekiwa, lama faniseriweke hi vanhwanyana vo tlhariha, Nhlavutelo 19:7 yi ri: “A hi tsakeni hi tsakisisa, hi xi dzunisa, hikuva nkhuvo wa vukati bya Xinyimpfana wu fikile, ni mutekiwa wa xona u tilulamisile.”

17. (a) Hikwalaho ka yini ntlawa wa ‘vanhwanyana lavo tlhariha’ wu tsaka? (b) Vanhwanyana vo tlhariha va te na yini, naswona hikwalaho a va ta swi kota ku endla yini?

¹⁷ Ina, nkarhi wa ku phaphamisiwa ka moya ka ntlawa wa ‘vanhwanyana lavo tlhariha’ ni ku twisisa ka vona ka nhlamuselo ya “xikombiso” lexi sunguleke ku humelela hi 1914 a ku ri xiendlakalo xa ntsako lowukulu. Manuku marito lawa a ya tirha eka vona hi lawa: “Ku katekile lava rhambiweke ku ta lalela enkhubyeni wa vukati bya Xinyimpfana.” (Nhlavutelo 19:9) Exifanisweni xa Yesu, vanhwanyana lavo tlhariha va ntlhanu va te ni mafurha man’wana yo lumeka hi wona leswaku va ta swi kota ku tlhela va lumeka timboni ta vona kutani xisweswo va hlanganyela eka nxaxamelo wa vukati lebyi tsakisaka va ri na timboni leti vonaka. Loko muteki a fikile, “[vanhwanyana] lava a va tilunghisile, va nghena na yena enkhubyeni, kutani nyangwa yi pfariwa.”—Matewu 25:1-10.

18. (a) Endzhaku ka Nyimpi yo Sungula ya Misava, masalela lama totiweke a ya ha ri ni ku vonakala loku ringaneke ka Rito ra Xikwembu ni moya wa xona lowo kwetsima exikarhi ka wona leswaku ya endla yini? (b) I yini lexi tivisiweke eka ntsombano wa vona wo sungula lowu landzeleke ku hela ka nyimpi?

¹⁸ Ku pfumelelana ni xifaniso xa vanhwanyana lavo tlhariha va ntlhanu, masalela lama totiweke ya amukele Muteki wa le tilweni hi ku vangama na hi ntsako, enkarhini lowu vukati bya yena eka bandlha rakwe ra mutekiwa a wu fikile. Endzhaku ka mintokoto ya vona leyi xumbadzaka ya moya eka Nyimpi yo Sungula ya Misava, a va ha ri ni ku vonakala loku ringaneke ka Rito ra Xikwembu ni moya wa xona lowo kwetsima exikarhi ka vona tanihi “timbita ta vumba” leswaku va tlhela va pfuxeta ntirho wa vona wo voningela vanhu mayelana ni Mfumo wa Xikwembu hi Hosi ya xona leyi nga Muteki. (2 Vakorinto 4:7) Entiyisweni, hi September 1-8, 1919, ntlawa wa ‘vanhwanyana lavo tlhariha’ wu khome nhlengeletano ya wona yo sungula ya matiko hinkwawo le Cedar Point, Ohio. Kwalaho ku humesiwa loku endliweke ka magazini lowuntshwa ku tlhandlekela eka Xihondzo xo Rindza ku tivisiwile. Magazini lowu wuntshwa a wu ta vuriwa The Golden Age, vito leri hlamuselaka muxaka wa nguva leyi vanhu lava pfuxetiweke va nga ta yi tsakela eMfun’weni wa Gidi ra Malembe wa Hosi leyi nga Muteki Yesu Kriste. Magazini wolowo wa ha kandziyisiwa, sweswi ehansi ka vito leri nge Awake!

19. (a) Xana ntlawa wa ‘vanhwanyana lavo tlhariha’ wu ve mhaka yo hlawuleka ya “xikombiso” xa “vukona” bya Yesu hi ndlela yihi ke? (b) I vamani lava sweswi va tsakeke emisaveni?

¹⁹ Hi ku hatlisa endzhaku ka ntsombano wolowo, nkandziyiso wo sungula wa The Golden Age—lowuya wa October 1, 1919—wu humesiwile. Hi magazini wolowo ni tibuku tin’wana ta Watch Tower Bible and Tract Society, ‘ntlawa wa vanhwanyana’ lavo tshembeka wu ye emahlweni na ntirho wa wona wo voningela misava. Endzhaku ka ku hela ka nyimpi wu sungule ntirho wo ‘chumayela mahungu lamanene ya mfumo leswaku byi va vumbhoni eka matiko hinkwawo’ makumu ya mafambiselo lawa ya swilo ma nga si fika. (Matewu 24:14) Hi ndlela leyi masalela lama totiweke, ntlawa wa ‘vanhwanyana lavo tlhariha,’ ya ve mhaka leyi tsakisaka ya “xikombiso” xa nhlengelo lexi funghaka “vukona” bya Yesu lebyi nga vonekiki tanihi Hosi leyi nyikiweke matimba ni xa ‘ku hela ka mafambiselo ya swilo.’ Ntirho wolowo wo voninga nakambe i xikombiso lexikulu xa leswaku “nkarhi wa makumu” wu sungule eku heleni ka Minkarhi ya Vamatiko hi 1914. Ku katekile hinkwavo lava vonaka mhaka leyi vhumbiweke ya “xikombiso” ni nkoka wa xona hinkwawo hi ku twisisa!

A Wu Ta Hlamurisa Ku Yini Xana?

◻ Ntirho wa ku chumayela hi Mfumo i mhaka ya yini?

◻ I mani kumbe i yini lexi faniseriweke hi mukhandziyi wa hanci yo basa; hanci yo tshwuka; hanci ya ntima ni yo kwalala ke?

◻ Nhlomulo wa tiko ra Yuda hi 70 C.E. a ku ri xifaniso xa vuprofeta bya yini?

◻ I vamani lava vumbaka ntlawa wa ‘vanhwanyana lavo tlhariha,’ naswona hikwalaho ka yini va fanele kutsaka?

[Xifaniso xa tluka 9]

‘Hi byele, xana xikombiso xa vukona bya wena xi ta va xihi?’