Abrahamu A A Nga Chavi Nchumu

Pimisa hi Abrahamu nkama a a tilunghiselela swaku a suka Ura. (Genesa 12:1-5) Swi nga yendleka a txuvuke vanhu hinkwavu lava a a ta famba na vona na a tivutisa swaku indjhe a a ta swi kota ku va hlayisa ka ndhawu ya ku hambi hi yena a a nga yi tivi? Indjhe a swi nge te yampsa kuva a tama a tshama Ura, doropa leli a li ni swilo swa ku tala, misava ya ku nona ni mati ya ku basa? Se loko a wo tshuka a vabya kumbe a fa, i mani lweyi a a ta sala a hlayisa ndjangu wa yena? Swi nga yendleka nkama Abrahamu a nga pimisa hi swilo leswi a chavenyana kambe yena a a tinyimisele ku yendla leswi Yehovha a nga mu byela swona ku nga na mhaka swaku i mpsini leswi a swi ta mu yendlekela. Leswo swi kombise leswaku hikakunene Abrahamu a a nga chavi nchumu.

SWI VULA YINI KU VA MUNHU WA KU KALA A NGA CHAVI NCHUMU? Swi vula ku va u tiya nhlana, u nyima u ku dzi u nga tsekatsekisiwi hi nchumu. Kambe a ku va munhu wa ku kala a nga chavi nchumu a swi vuli swona swaku a ku na nchumu lexi nga ta ku chavisa kumbe xi yendla mbilu ya wena yi ba kumbe u rhurhumela. Hambileswo munhu lweyi a pfuniwaka hi Xikwembu leswaku a nga chavi nchumu a nge te pfumelela swaku nchumu xi mu sivela ku yendla leswi swi tsakisaka Xikwembu.

ABRAHAMU A SWI KOMBISE KU YINI SWAKU A A NGA CHAVI NCHUMU? Abrahamu a a nga chavi ku hambana ni vanhu van’wani. Yena a kule ka ndhawu leyi vanhu vanyingi a va gandzela swikwembu swa mavunhwa kambe yena a nga pfumelelanga leswaku leswi vanhu a va swi pimisa swi mu sivela ku yendla leswi yena a swi tiva leswaku i swinene. Hi mhaka leyo Abrahamu a yendle xiboho xa ku gandzela Yehovha ntsena hambileswi vanhu van’wani a va nga swi yendli leswo. — Genesa 14:21, 22.

Abrahamu a a rhangisa ku tirhela Xikwembu ku tlula swilo leswi a a li na swona. Abrahamu a siye hinkwaswu leswi a a li na swona Ura a suka a ya tshama kule ni doropa, kambe yena a a mu tshemba hi ku helela Yehovha a tlhela a tiyiseka swaku a ta tama a mu hlayisa. Swi nga yendleka hi ku famba ka nkama Abrahamu a swi khumbukile swilo hinkwaswu leswi a a li na swona Ura. Kambe yena a a tiyiseka swaku Yehovha a a ta tama a mu hlayisa, yena ni ndjangu wa yena. Phela leswi Yehovha a a li wa lisima ka wutomi la Abrahamu a tame a yendla leswi Yehovha a nga mu byela swona na a nga chavi nchumu.

HI DJONDZA YINI? Hi nga tekelela Abrahamu hi ku yingisa Yehovha na hi nga chavi nchumu hambiloko maxaka ni vanghanu va nga swi yendli leswo. Hi xikombiso, Bibele li vula swaku minkama yin’wani loko hi langa ku nyimelela lipfumelo la hina ka Yehovha hi nga ha hluphiwa kumbe hi kanetiwa hi maxaka ni vanghanu na va pimisa swaku vo hi pfuna. (Yohani 15:20) Kambe loko hi tiyiseka hi leswi Yehovha a hi djondzisaka swona hi ta tama hi nyimelela lipfumelo la hina, kambe hi ta yendla leswo hi xihlonipho. — 1 Pedru 3:​15.

Yehovha a tshembise swaku lava nga ni lipfumelo ka yena a ta va nyika hinkwaswu leswi va swi lavaka. Phela loko hi tiyiseka hi leswo a hi nga ta chava ku rhangisa ku yendla ku rhandza ka Xikwembu ka wutomi la hina hikusa ha swi tiva swaku Yehovha a ta hi hlayisa. (Matewu 6:​33) Se swoswi a hi voneni swaku ndjangu wun’wani wu swi yendlise ku yini leswo.

Hambileswi Doug na Becky a va ni vana vambirhi vavatsongo, a va navela ku yengetela a ntirho wa vona wa ku chumayela, se va pimise hi ku rhurha va ya ka tiko leli a ku ni vachumayeli vavatsongo. Vona va khongele hintamu hi mhaka leyi va tlhela va kambisisa, se hi wugamu va teka xiboho xa ku rhurha va ya ka tiko lin’wani. Loko Doug a vulavula hi xiboho lexi va nga xi yendla a li: “A swi hi vevukelanga ku teka swilo swa hina ni vana va hina hi rhurha hi ya ka tiko lin’wani na hi nga swi tivi swaku swilo swi ta famba ndjhani. Kambe na hi nge se rhurha hi pimise hi xikombiso xa Abrahamu na Sara, ndlela leyi va nga mu tshemba hi yona Yehovha ni leswaku Yehovha a nga va danisanga kambe minkama hinkwayu a tame a va pfuna. Phela ku yendla leswo hi swona swi nga hi pfuna.”

Loko Doug a tlhamusela leswi wutomi la vona li nga tshamisa xiswona loko se va rhurhile a li: “Hi vona swaku Yehovha a hi katekisa hi ndlela ya ku hlamalisa swinene; leswi hi kalaka hi nga na swilo swa swinyingi hi ni nkama wa wunyingi wa ku va xikan’we, hi chumayela xikan’we, hi bula hi tlhela hi tlanga ni vana va hina. Phela leswi hi titwisaka xiswona ni ku tlhamuseleka a swi tlhamuseleki.”

A hi hinkwerhu swiyimu swa hina swi nga hi pfumelelaka ku yendla leswi Doug na Becky va nga swi yendla. Kambe hinkwerhu hi nga swi kota ku tekelela Abrahamu na Sara hi ku rhangisa Yehovha ka wutomi la hina na hi tshemba leswaku a ta hi pfuna. Loko hi yendla leswo hi ta kombisa swaku a hi chavi ku vula hi ku: ’Yehovha i mupfuni wa hina; a hi nge chavi nchumu.’ — Vaheberu 13:​5, 6.

[Marito Ka Pajina]

Munhu wa ku kala a nga chavi nchumu hileswi a pfuniwaka hi Yehovha a yendla xan’wanchumu hambiloko a chava

[Kwadru Ka Pajina]

Sara A A Hlonipha Xikwembu Funtshi A A Li Wansati Wa Kahle

Sara a a chade na Abrahamu, wanuna wa lipfumelo hambileswo, Sara na yena a a mu hlonipha swinene Yehovha funtshi i xikombiso xaxinene lexi na hina hi nga xi tekelelaka. Ka Bibele ku ni tindzimana tinharhu leti vulavulaka hi Sara na ti kombisa swaku i xikombiso xaxinene lexi vavasati hinkwavu lava tirhelaka Yehovha va nga xi tekelelaka. (Esaya 51:1, 2; Vaheberu 11:11; 1 Pedru 3:3-6) Hambileswi Bibele li kalaka li nga hi byeli swilo swa swinyingi hi Sara, leswi li hi byelaka swona swi hi pfuna ku vona swaku vhela yena a a li xikombiso xaxinene.

Sara a titwise ku yini nkama Abrahamu a nga mu byela leswaku Yehovha a a lava leswaku va suka Ura? Ku nga va leswaku a tivutisile swaku a va ya kwini ni leswaku hi mhaka muni va suka a Ura? Indjhe a karhatekile hileswaku a va ta swi kuma kwini swilo leswi a va ta swi lava leswaku va tama va hanya? Kumbe a karhateka hileswi a swi ta lava a siya vanghanu ni ndjangu wa yena na a nga swi tivi swaku a ta tlhela a va vona? Ha tiyiseka swaku Sara a swi pimisile hinkwaswu leswo. Hambileswo Sara a sukile Ura na a tshemba swaku Yehovha a ta va katekisa hileswi a va mu yingisa. — Mintirho 7:2, 3.

Sara a a hlonipha Yehovha a tlhela a mu yingisa naswona a a li nsati wamunene ka Abrahamu. Phela Sara a a nga tshameli ku phikizana ni nuna wa yena hi ku lava ku rhangela ndjangu, kambe minkama hinkwayu a a mu hlonipha Abrahamu a tlhela a mu seketela nkama lowu nuna wa yena a rhangelaka ndjangu. Hi ku yendla leswo a a kombisa swaku yena a ngo yo saseka hi le handle ntsena kambe a a ni wumunhu la kahle. — 1 Pedru 3:1-6.

Indjhe wumunhu leli Sara a a li na lona li nga va pfuna vavasati namuntlha? Ina, li nga va pfuna. Jill lweyi a nga tsaka ka muchadu wa yena naswona a nga ni ku tlula 30 wa malembe na a chadile a vule leswi: “A xikombiso xa Sara xi ni pfune ku vona swaku ni nga nyikela mavonelo ya mina kambe na ni khumbuka leswaku leswi nuna wa mina a nga yena a rhangelaka ndjangu, hi yena a nga ni mfanelo ya ku teka xiboho xa wugamu. Se a xa mina loko se a tekile xiboho i ku ni yendla hinkwaswu leswi ni nga swi kotaka leswaku xiboho lexi a nga xi yendla xi famba kahle.”

Leswi Sara a nga swi yendla swi hi djondzisa mhaka ya lisima: Hambileswi a a sasekile swinene a a nga tibyeli hi mhaka ku saseka koloko. (Genesa 12:10-13) Kambe hi ku tiveka hansi a a tama a seketela nuna wa yena Abrahamu ka minkama ya ku tsakisa ni ka minkama ya ku kala yi nga tsakisi. Phela Abrahamu na Sara a va tshembeka, a va tiveka hansi va tlhela va rhandzana swinene, funtshi a va swi vona ku li nkateko kuva va chade xikan’we.