Khayini A Kwatile Hintamu, A Dlaya Makwavu

Nkama Adamu na Evha va nga hlongoliwa ajardim ka Edeni, va game va va ni vana va vanyingi. Wa ku sungula a ku li Khayini, wa wumbirhi a ku li Abele. Khayini a a tirha maxamba, a a byala minchumu ya ku fana ni matsavu ni swin’wani. Se Abele a a fuya tinyempfu.

Siku lin’wani Abele na Khayini va nyike Yehovha maprezenti. Wa swi tiva swaku vanhu va khale a va ma vitanisa ku yini maprezenti wolawo? A va ku i magandzelo. Yehovha a li tsakelile prezenti la Abele. Kambe a nga li tsakelanga prezenti la Khayini. Se Khayini a kwate hintamu. Nkama Yehovha a nga vona leswo, a byele Khayini a ku:

— Loko u nga tshiki ku kwata, u ta yendla minchumu ya ku biha.

Kambe Khayini a nga swi yingisanga leswi Yehovha a nga mu byela swona. A byele Abele a ku:

— A hi fambi hi tlanga.

Nkama na va li voxe Khayini a dlaye Abele. Yehovha a mu kwatele hintamu Khayini. Se a mu hlongola, a ya tshama kule ni ndjangu wa yena. Funtshi Khayini a nga ha tlhelanga a ma vona maxaka ya yena.

Hi djondza yini? A hi minkama hinkwayu ku yendlekaka leswi hi swi lavaka. Se leswo swi nga hi yendla hi kwata. Kambe loko hi tsumbula swaku hi kwatile kumbe munhu mun’wanyani a hi byela, hi fanele hi yendla hinkwaswu leswi hi nga swi kotaka swaku hi tshika ku kwata. Loko hi nga yendli leswo, hi nga ha kwata hintamu hi gama hi yendla minchumu ya ku biha.

Ku nga va leswaku Yehovha a mu khohlwile Abele? Nada. Leswi Abele a a li munhu wamunene, Yehovha wa mu khumbuka. Naswona loko a ta yendla leswaku misava leyi yi va paradesi, a ta mu pfuxa leswaku a tlhela a hanya.