Lirhandzu La Yehovha A Li Heli

1-2. Hi xini xikarhatu lexi Vakreste va vanyingi va kumanaka na xona?

PIMISA hi boti leli nga xikarhi ka lwandle na ku ba xidzedze xaxikulu, magandlati ma li chovha li ya hala ni hala. Boti lolelo li nga pengwa loko ko kala ku nga txukumeteliwi nsoma ku nga nsimbi leyi tiyisaka boti. Phela nsimbi yoleyo i ya lisima hintamu hikusa yi yendla leswaku boti li nga pengwi hambiloko ko ba xidzedze xa ku tshamisa ku yini.

² Loko u kumana ni swikarhatu swaswikulu awuton’wini, u nga ha titwa ku fana ni boti lolelo. Mimpimiso ya wena yi nga ha pengwa yi ya hala ni hala: Siku lin’we u nga ha tiyiseka swaku Yehovha wa ku rhandza funtshi wa ku pfuna kambe hi siku leli landzelaka u tivutisa kumbe Yehovha wa swi vona leswi ku humelelaka. (Ps. 10:1; 13:1) Swi nga yendleka munghanu wa wena a ta a ta ku tiyisa naswona leswo swi ku yendla u yampsa. (Swiv. 17:17; 25:11) Kambe hi nkamanyana wawutsongo, ku kanakana ku tlhela ku vuya; se u tivutisa leswaku indjhe Yehovha a ku tsukulile. Loko leswo swi yendleka, u nga yendla yini swaku u txukumetela nsimbi, kumbe u nga kanakani funtshi u tama u tiyiseka swaku Yehovha wa ku rhandza funtshi a ta ku pfuna?

3. I lirhandzu la muxaka muni leli ku vulavuliwaka hi lona ka Tipisalema 31:7 ni 136:1, naswona hi mhaka muni Yehovha a li xikombiso xaxikulu xa lirhandzu lolelo? (Vona mufoto.)

³ Xin’wani hi nga xi yendlaka leswaku mimpimiso ya hina yi nga pengwi loko hi kumana ni swikarhatu, i ku khumbuka leswaku Yehovha wa hi rhandza naswona minkama hinkwayu wa tshembeka. (Lerha Tipisalema 31:7; 136:1.) Marito lama nge “lirhandzu lalikulu” ma kombetela ka lirhandzu ni ku tshembeka loku vanhu va tamaka va kombisana kona. Phela Yehovha i xikombiso xaxikulu xa lirhandzu lolelo. Bibele li vula leswaku Yehovha a “tale hi lirhandzu.” (Eks. 34:6, 7) Bibele li tlhela li vula leswi hi Yehovha: “U rhandza hinkwavu lava ku vitanaka.” (Ps. 86:5) Pimisa hi leswi marito lawa ma lavaka ku vula swona: Yehovha a nga ta tshuka a va tshikile vanhu va yena va ku tshembeka. Ku khumbuka leswaku Yehovha wa tshembeka naswona a va rhandza swinene vanhu yena, swi nga ku pfuna loko u kumana ni swikarhatu swaswikulu. — Ps. 23:4.

LIRHANDZU LA YEHOVHA I DJONDZO YA MASUNGULU

4. Nyikela swikombiso swa tidjondzo ta masungulu ta Bibele u tlhela u tlhamusela leswaku hi mhaka muni hi nga kanganyisiwi hi ku vevuka.

⁴ Xin’wani lexi nga ku pfunaka nkama lowu u kumanaka ni swikarhatu, i ku khumbuka leswaku ku va Yehovha a hi rhandza i yin’we ya tidjondzo ta masungulu ta Bibele. U pimisa hi yini loko ku vulavuliwa hi tidjondzo ta masungulu? Swi nga yendleka u pimisa hi mintiyiso leyi u nga yi djondza nkama a wu fambiseliwa djondzo ya Bibele. Hi xikombiso, u djondze leswaku vito la Xikwembu i Yehovha, Yesu i N’wana wa Xikwembu lweyi a nga psaliwa a li yexe, vafi a va tivi nchumu ni leswaku misava yi ta va paradesi lani vanhu va nga ta hanya hi masiku ni masiku. (Ps. 83:18; Ekl. 9:5; Yoh. 3:16; Nhl. 21:3, 4) Ku va u pfumele tidjondzo toleto, swi yendle leswaku u nga ha kanganyisiwi hi ku vevuka. Hi mhaka muni? Hikusa tidjondzo toleto ti sekeliwe ka ntiyiso. Se a hi voneni leswaku ku khumbuka swaku lirhandzu la Yehovha i djondzo ya masungulu ya Bibele swi nga hi pfunisa ku yini swaku hi nga kanakani leswaku a ni mhaka na hina funtshi wa swi tiva leswi hi kumanaka na swona.

5. Tlhamusela ndlela leyi munhu a nga pfaletaka tidjondzo ta mavunhwa hi ntiyiso lowu nga ka Bibele.

⁵ Nkama u nga sungula ku djondza Bibele, i yini xi nga ku pfuna ku tshika tidjondzo ta mavunhwa? Swi nga yendleka ku ve ku fananisa leswi a wu swi djondza kerekeni ni leswi se a wu swi djondza ka Bibele. Pimisa hi xikombiso lexi: A hi nge a wu kholwa swaku Yesu i Xikwembu xa Matimba Hinkwawu. Nkama u nga djondza Bibele, u sungule ku tivutisa swaku ‘indjhe leswo i ntiyiso?’ Se loko u ya u djondza u swi vonile swaku impela Yesu a hi Xikwembu. Se u pfalete djondzo yoleyo ya mavunhwa hi ntiyiso lowu u nga wu djondza ka Bibele, wa leswaku Yesu i “matevula ya hinkwaswu leswi nga tumbuluxiwa” ni leswaku i “N’wana wa Xikwembu lweyi a nga psaliwa a li yexe.” (Kol. 1:15; Yoh. 3:18) Swi nga yendleka swi ku karhatelile ku tsuvula tidjondzo ta mavunhwa leti a ti ‘dzime timintsu’ ka mbilu ya wena. (2 Ko. 10:4, 5) Kambe leswi se u nga djondza ntiyiso lowu nga ka Bibele a wu nge he tlheleli ka mavunhwa wolawo. — Filp. 3:13.

6. I yini xi nga ku tiyisekisaka swaku ‘lirhandzu lalikulu la Yehovha a li heli’?

⁶ U nga yendla swa ku fana loko swi ta ka djondzo ya leswaku Yehovha wa hi rhandza. Loko nkama lowu u kumanaka ni xikarhatu u sungula ku kanakana swaku Yehovha wa ku rhandza, tivutisi u ku: ‘Ku nga va leswaku mapimiselo ya mina ma twala?’ Se fananisa leswi u titwisaka xiswona ni marito ya Tipisalema 136:1, ku nga ndzimana leyi nga khoma nhlokomhaka leyi. Phela rito leli nge “lirhandzu” leli nga ka ndzimana leyi, li fambisana ni ku tshembeka. Se tivutisi leswi: ‘Hi mhaka muni Yehovha a kongomise mupisalema leswaku a tsala hi muxaka lowu wa lirhandzu? Hi mhaka muni marito lawa ma nge “lirhandzu la yena lalikulu a li heli” ma phindhiwe ka 26 ka Tipisalema 136?’ Hilani se hi nga swi vona hi kona, djondzo ya leswaku Yehovha wa hi rhandza i yin’we ya tidjondzo ta masungulu ta Bibele naswona i ya lisima ku fana ni tidjondzo letin’wani ta masungulu. Se mapimiselo ya leswaku ‘a hi va lisima ka Yehovha’ i mavunhwa funtshi hi fanele hi fambela kule na wona ku fana ni tidjondzo letin’wani ta mavunhwa.

7. Nyikela swikombiso swa tindzimana leti ti hi tiyisekisaka leswaku Yehovha wa hi rhandza.

⁷ Bibele li hi tiyisekisa hi tindlela ta tinyingi leswaku Yehovha wa hi rhandza swinene. Hi xikombiso, Yesu a byele vadjondzisiwa va yena a ku: “N’wina mi va lisima ku tlula swinyanyani swa swinyingi swaswitsongo.” (Mat. 10:31) Na yena Yehovha a byele vanhu va yena a ku: “Ni ta ku tiyisa, ina, ni ta ku pfuna. Ni ta ku khoma swi tiya hi voko la mina la xinene la ku lulama.” (Esa. 41:10) Phela marito lawa ma tiyisa swinene! Vona swaku Yesu a nga vulanga leswaku ‘swi nga yendleka mi li va lisima’ naswona Yehovha a nga vulanga swaku ‘swi nga yendleka ni ku pfuna.’ Handle ka leswo Yesu a te: “N’wina mi va lisima,” se Yehovha a ku: “Ni ta ku pfuna.” Loko nkama lowu u kumanaka ni swikarhatu u tshuka u kanakana leswaku Yehovha wa ku rhandza, ku pimisa hi marito ya tindzimana leti swi nga ta ku yendla u titwa kahle ntsena, kambe swi ta ku tiyisekisa leswaku Yehovha wa ku rhandza hikakunene. Loko hi khongela ka Yehovha hi ku kanakana ka hina hi tlhela hi pimisa hi marito ya tindzimana leti, hi ta pfumelelana na wona marito lama nga ka 1 Yohani 4:16 lama nge: “Se ha swi tiva naswona ha kholwa swaku Xikwembu xa hi rhandza.”a

8. U nga yendla yini loko minkama yin’wani u kanakana leswaku Yehovha wa ku rhandza?

⁸ U nga yendla yini loko u tama u kanakana swaku Yehovha wa ku rhandza? Fananisa leswi u titwisaka xiswona ni leswi u swi tivaka. Leswi u titwisaka xiswona minkama yin’wani swi nga ha txintxa kambe lirhandzu la Yehovha leli u nga djondza hi lona ka Bibele, a li txintxi. Se loko u nga pfumeli swaku Yehovha wa hi rhandza, u va na u nga li nyiki lisima wumunhu la lisima hintamu la Yehovha, ku nga lirhandzu la yena. — 1 Yo. 4:8.

PIMISA HI LIRHANDZU LA YEHOVHA

9-10. Yesu a a vulavula hi yini nkama a nge te “Papayi wa mi rhandza”? (Yohani 16:26, 27) (Vona mufoto.)

⁹ Hi nga djondza swin’wani ka leswi Yesu a nga swi byela vadjondzisiwa va yena, a te: “Papayi wa mi rhandza.” (Lerha Yohani 16:26, 27.) Yesu a nga vulanga leswo leswaku a tsakisa vadjondzisiwa va yena. Hi vula leswo hikusa tindzimana tin’wani ta ndzima leyi, ti kombisa leswaku a a nga vulavuli hi ndlela leyi vadjondzisiwa va yena a va titwa hi yona, kambe a a vulavula hi xikhongelo.

¹⁰ Yesu a a ha ku byela vadjondzisiwa va yena swaku a va fanele va khongela hi vito la yena kambe va nga khongeli ka yena. (Yoh. 16:23, 24) Mhaka leyi a yi li ya lisima swinene! Phela loko Yesu se a tlhelele matilweni, swi nga yendleka vadjondzisiwa va yena a va ta pimisa swaku a va ta khongela ka yena hikusa se a va mu tiva kahle naswona a va li vanghanu va yena. A va ta pimisa leswaku loko vo khongela ka Yesu, a ta gama a byela Yehovha leswi va nga swi kombela. Hambileswo, Yesu a va byele swaku a va nga fanelanga va pimisa hi ndlela leyo. Hi mhaka muni? Hikusa a va byele a ku: “Papayi wa mi rhandza.” Mhaka leyi i ya lisima hintamu loko swi ta ka swikhongelo; kambe marito lawa ma lava ku vula yini ka wena? Nkama u nga sungula ku djondza Bibele, u tive Yesu u tlhela u mu rhandza. (Yoh. 14:21) Kambe ku fana ni Vakreste va ku sungula, u fanele u khongela ka Yehovha na u tshemba leswaku a ta ku twa naswona ‘wa ku rhandza.’ U kombisa swaku wa ma tshemba marito lawa loko u khongela ka Yehovha nkama ni nkama. — 1 Yo. 5:14.

TWISISA LESWI KU YENDLAKA U KANAKANA

11. Hi mhaka muni Sathana a a ta tsaka loko a hi vona hi kanakana swaku Yehovha wa hi rhandza?

¹¹ I mani lweyi a lavaka hi kanakana swaku Yehovha wa hi rhandza? Loko u pimisa swaku i Sathana, a wu phazamanga. Sathana a lava ku hi “hahlulela” naswona a a ta tsaka hintamu loko a ho kanakana swaku Yehovha wa hi rhandza. (1 Pe. 5:8) Yehovha wa hi rhandza swinene! Hi leswo swi nga mu yendla a za a rhumela N’wana wa yena Yesu Kreste leswaku a ta hi fela. Kambe Sathana a lava hi pimisa swaku leswo a swi hi faneli. (Heb. 2:9) Se, i mani lweyi a a ta tsaka loko a ho sungula ku kanakana swaku Yehovha wa hi rhandza? Naswona i mani lweyi a a ta tsaka swinene loko o hi vona hi godola hi za hi tshika ku tirhela Yehovha? I Sathana. Kambe khumbuka leswaku Sathana hi yena lweyi a kalaka a nga ha faneliwi hi lirhandzu la Yehovha. Kambe a tirhisa ‘ntlhamu’ lowu wawukulu swaku a zama ku hi yendla hi pimisa swaku Yehovha a nga ha hi tsakeli funtshi a nga hi yamukeli. (Efe. 6:11) Phela loko hi swi twisisa leswi Sathana a swi yendlaka leswaku a zama ku hi phasa, hi ta swi kota ku tama hi lwisana na yena ni mintlhamu leyi a yi tirhisaka. — Yak. 4:7.

12-13. Hi mhaka muni ku kala ku hetiseka ku nga hi yendlaka hi kanakana leswaku Yehovha wa hi rhandza?

¹² Ku ni nchumu xin’wani lexi nga hi yendlaka hi kanakana leswaku Yehovha wa hi rhandza. I xidjoho lexi hi nga tluletiwa hi vapsali va hina va ku sungula. (Ps. 51:5; Rom. 5:12) Xidjoho xi hi yendla hi va kule na Yehovha; xi tlhela xi yendla leswaku muzimbha, mimpimiso ni mbilu ya hina swi nga tirhi kahle.

¹³ Xidjoho xi khumba ndlela leyi hi titwaka hi yona xi tlhela xi yendla mimpimiso ya hina yi nga tirhi kahle. Hi xikombiso, hi titwa nandzu, hi karhateka, hi titwa na hi nga vhikelekanga ni ku va ni tingana. Leswo swi nga yendleka loko hi tshuka hi djoha, kambe swi nga tlhela swi yendleka hikusa minkama hinkwayu ha khumbuka leswaku a hi hetisekanga. Phela leswo a hi swona leswi Yehovha a a swi lava nkama a nga tumbuluxa vanhu. (Rom. 8:20, 21) Ku fana ni leswi penewu la movha leli kalaka li nga na moya li nga yendlaka swaku movha wu nga tirhi kahle, na hina vanhu leswi hi kalaka hi nga hetisekanga, a hi swi koti ku yendla swilo hi ndlela leyi Yehovha a a swi lava hi yona nkama a nga hi tumbuluxa. Se a swi hi hlamalisi loko minkama yin’wani swi lava hi lwa ni mimpimiso ya leswaku Xikwembu a xi hi rhandzi. Loko leswo swi tshuka swi hi yendlekela, hi fanele hi khumbuka leswaku Yehovha i “Xikwembu lexikulu ni xa ku hlonipheka, . . . xi rhandzaka lava xi rhandzaka va tlhela va yingisa minawu ya xona”. — Neh. 1:5.

14. Ku pimisa hi nkutsulu swi nga hi pfunisa ku yini ku tiyiseka swaku Yehovha wa hi rhandza? (Varoma 5:8) (Vona kwadru leli nge “Tivhikeli Ka ‘Matimba Lama Kanganyisaka Ya Xidjoho.’”)

¹⁴ Minkama yin’wani hi nga ha pimisa swaku lirhandzu la Yehovha a li hi faneli. Ku vula ntiyiso a swo hi fanela ku rhandziwa hi Yehovha; hi leswo swi yendlaka leswaku lirhandzu lalikulu leli Yehovha a hi kombaka lona li va la ku hlawuleka ka hina. Leswi Yehovha a hi rhandzaka, a rhumele N’wana wa yena Yesu leswaku a ta hi fela kuva hi rivaleliwa swidjoho swa hina. (1 Yo. 4:10) Khumbuka leswaku Yesu a nga telanga ku ta ponisa vanhu va ku hetiseka, kambe a tele ku ta ponisa vadjohi. (Lerha Varoma 5:8.) Hinkwerhu a hi hetisekanga naswona Yehovha a nga nyimeli swaku hi yendla swilo hi ndlela ya ku hetiseka. Loko hi twisisa swaku xidjoho xi nga hi yendla hi kanakana swaku Yehovha wa hi rhandza, hi ta tama hi tinyimisela ku lwisana ni mimpimiso leyo ya ku kala yi nga li yinene. — Rom. 7:24, 25.

TAMA U TSHEMBEKA

15-16. Loko hi tama hi tshembeka ka Yehovha hi nga tiyiseka hi yini naswona hi mhaka muni? (2 Samuwele 22:26)

¹⁵ Yehovha a lava leswaku hi yendla swaswinene hi ku “khoma swi tiya ka yena.” (Det. 30:19, 20) Loko hi yendla leswo, hi nga tiyiseka leswaku a ta tama a tshembeka ka hina. (Lerha 2 Samuwele 22:26.) Loko hi tama hi tshembeka ka Yehovha, a ta tama a hi pfuna ka xikarhatu xin’wani ni xin’wani lexi hi nga ha kumanaka na xona.

¹⁶ Hilani hi nga swi vona hi kona ka djondzo leyi, hi ni swivangelo swa swinyingi swa ku tama hi tiya loko hi kumana ni swikarhatu, ku fana ni boti leli nga tiyisiwa hi nsoma alwandle. Phela ha swi tiva leswaku Yehovha wa hi rhandza funtshi a ta hi pfuna; hi leswo Bibele li swi djondzisaka. Se, loko siku lin’wani hi kanakana leswaku Yehovha wa hi rhandza, hi fanele hi khumbuka leswi hi swi tivaka hi lirhandzu la Yehovha, ku nga li ku tshemba leswi hi titwisaka xiswona hi nkama wolowo. Hi lava ku tama hi tiyiseka leswaku djondzo ya masungulu ya leswaku lirhandzu lalikulu la Yehovha a li heli i ntiyiso.