Ku Yo Pona 8 Wa Vanhu Ntsena

Nowa ni ndjangu wa yena ni swiharhi hinkwaswu va nghene ka ngalava, se Yehovha a pfala xipfalu. Ku game ku sungula ku na mpfula. Phela mpfula yi ne hintamu lakaku misava hinkwayu yi tala hi mati. Kambe ngalava a yi mbhonyiwanga hi mati. A yi tama yi tshama henhla ka mati. Se vanhu hinkwavu lava a va yendla swa ku biha lava a va li handle va file. Kambe Nowa ni ndjangu wa yena va ponile na va li ndzeni ka ngalava. Pimisa hi leswi va nga titwisa xiswona.

Mpfula yi nile 40 wa masiku, wusiku ni nhlikanhi, yi gama yi nyima. Hi ku famba ka nkama, mati ma sungule ku pumbeka misaveni naswona ngalava yi nyime henhla ka ntshava. Kambe misava a ya ha tale hi mati. Se, Nowa ni ndjangu wa yena a va fanele va tama va tshama ngalaveni.

Hi katsongokatsongo, mati ma game ma nyamalala hinkwawu. Ku hele lembe na Nowa ni ndjangu wa yena va li ka ngalava. Se Yehovha a byela Nowa ni ndjangu wa yena swaku va huma ka ngalava. Nkama va nga huma a va tivona ingi a va li ka ndhawu ya nyuwani, hikusa wubihi hinkwalu ni ku lwa a swi nga ha li kona. Nowa ni ndjangu wa yena va tsake hintamu hileswi Yehovha a nga va ponisa. Se va mu yendlele gandzelo Yehovha.

Leswo swi mu tsakise hintamu Yehovha. Yehovha a game a tshembisa Nowa ni ndjangu wa yena leswaku a a nga ha ta tlhela a helisa swilo hinkwaswu hi ndhambi. Yehovha a yendle leswaku ku humelela arco-íris atilweni swaku li khumbukisa Nowa ni ndjangu wa yena leswi Yehovha a a va tshembise swona. U tshama u vona arco-íris? Loko u vona arco-íris, khumbuka leswi Yehovha a nga swi tshembisa Nowa ni ndjangu wa yena.

Nkama Yehovha a nga va tshembisa leswo, a game a ku:

— Psalani vana mi tata misava.