ДӘРЕС 47

Сез суга чумдырылырга әзерме?

Бастырылган версия

Изге Язмаларны өйрәнгән вакытта сез Йәһвә турында инде күп нәрсәләр белдегез. Өйрәнгәннәрегезне тормышта кулланыр өчен сез кайбер үзгәрешләр ясагансыздыр. Шулай да Йәһвәгә багышланудан һәм суга чумдырылудан сезне нәрсәдер тоткарлап торадыр. Бу дәрестә без суга чумдырылырга еш кына комачаулаган кайбер киртәләрне һәм аларны ничек җиңәргә икәнен карап чыгарбыз.

1. Суга чумдырылу үтәр өчен күпме белем кирәк?

Суга чумдырылыр өчен сезгә «хакыйкать турында төгәл белем алырга» кирәк (1 Тимутигә 2:4). Бу сез Изге Язмалар белән бәйле һәр сорауга җавапны белергә тиеш дигәнне аңлатмый. Хәтта күп еллар элек суга чумдырылган мәсихчеләр дә белем алуларын дәвам итә (Көләсәйлеләргә 1:9, 10). Ләкин сезгә Изге Язмалардагы төп тәгълиматларны аңларга кирәк. Җыелыш өлкәннәре сезгә суга чумдырылыр өчен белемегез җитәрлекме икәнен аңларга ярдәм итәчәк.

2. Чумдырылганчы, нинди адымнар ясарга кирәк?

Суга чумдырылганчы, сез «тәүбә итәргә һәм Аллаһыга таба борылырга» тиеш. (Рәсүлләр 3:19 укы.) Бу нәрсәне аңлата? Сез кылган гөнаһларыгызга үкенергә һәм Йәһвәдән кичерүен сорарга тиеш. Шулай ук начар тәртиптән баш тартырга һәм Аллаһы хуплаганча яшәргә тәвәккәл булырга кирәк. Өстәвенә, сез очрашуларга йөрергә һәм җыелыш белән вәгазьли башларга тиеш.

3. Ни өчен курку сезне тоткарларга тиеш түгел?

Кайберәүләр Йәһвәгә вәгъдә иткәнчә яши алмаслар дип курка. Әлбәттә, сез вакыт-вакыт хаталар эшләрсез. Хәтта Изге Язмаларда искә алынган тугры ир-атлар һәм хатын-кызлар да хаталар кылган. Ләкин Йәһвә үзенең хезмәтчеләреннән камиллекне көтми. (Зәбур 103:13, 14 укы.) Сез хәлегездән килгәнне эшләсәгез, ул канәгать булыр! Ул сезгә ярдәм итәчәк. Йәһвә безне «һичбер нәрсә... [үзенең] мәхәббәтеннән аера алмаячак» дип ышандыра. (Римлыларга 8:38, 39 укы.)

ТИРӘНРӘК КАЗЫГЫЗ

Йәһвәне яхшырак белеп һәм аның ярдәмен кабул итеп, суга чумдырылырга комачаулаган киртәләрне ничек җиңеп була икәнен белегез.

Коллаж: Бер кыз суга чумдырылырга комачаулаган киртәләрне җиңеп чыга.

4. Йәһвә белән яхшырак танышыгыз

Бу кыз бер Йәһвә Шаһите белән Изге Язмаларны өйрәнә.

Суга чумдырылганчы, Йәһвәне никадәр яхшы белергә кирәк? Алган белемнәрегез сездә аңа карата ярату һәм аны сөендерергә теләк тудырган икән, димәк, сез аны яхшы беләсез. Төрле илләрдә яшәгән Изге Язмаларны өйрәнүчеләрнең суга чумдырылуга ничек әзерләнгәнен белер өчен, ВИДЕОРОЛИК карагыз. Аннары сорауга җавап бирегез.

ВИДЕОРОЛИК: «Суга чумдырылуга алып баручы адымнар» (3:56)

Бу кешеләргә суга чумдырылуга әзерләнергә нәрсә ярдәм иткән?

Римлыларга 12:2 не укыгыз һәм җавап бирегез:

Изге Язмалардагы тәгълиматлар турында я Йәһвә Шаһитләренең хакыйкатькә өйрәтүенә шикләрегез бармы?
Булса, аларны юкка чыгарыр өчен, сез нәрсә эшли аласыз?

5. Суга чумдырылырга комачаулаган киртәләрне җиңегез

Бу кыз сумкасына Изге Язмаларны сала, а анасы аны ачулана.

Үзебезне Йәһвәгә багышларга һәм суга чумдырылырга карар иткәч, без барыбыз авырлыкларга очрыйбыз. Бер мисалга игътибар итик. ВИДЕОРОЛИК карагыз һәм сорауларга җавап бирегез.

ВИДЕОРОЛИК: «Йәһвәне ярату киртәләрне җиңә» (5:22)

Нарангерелга Йәһвәгә хезмәт итәр өчен нинди киртәләрне җиңәргә туры килгән?
Йәһвәне ярату аңа бу киртәләрне җиңәргә ничек ярдәм иткән?

Гыйбрәтле сүзләр 29:25 һәм 2 Тимутигә 1:7 не укыгыз һәм җавап бирегез:

Киртәләрне җиңәр өчен кыюлыкны кайдан алырга?

6. Йәһвәнең ярдәм итәчәгенә ышаныгыз

Бу кыз бер олы яшьтәге хатын-кызга вәгазьли, ә янында аның Изге Язмаларны өйрәтүчесе тора.

Йәһвә сезгә үзе хуплаганча яшәргә ярдәм итәчәк. ВИДЕОРОЛИК карагыз һәм сорауларга җавап бирегез.

ВИДЕОРОЛИК: «Сиңа Йәһвә Аллаһы ярдәм итәр» (2:50)

Бу өйрәнүчегә суга чумдырылырга нәрсә комачаулаган?
Аңа Йәһвәгә ышанычын ныгытырга нәрсә ярдәм иткән?

Ишагыя 41:10, 13 не укыгыз һәм җавап бирегез:

Ни өчен сез багышланганда биргән вәгъдәгезне үти алганыгызга ышана аласыз?

7. Йәһвәнең яратуы өчен рәхмәтле булуыгызны тирәнәйтегез

Йәһвәнең үзегезгә күрсәткән яратуы турында күбрәк уйланган саен, сезнең рәхмәт хисегез һәм аңа мәңге хезмәт итәргә теләгегез үсә барачак. Зәбур 40:5 не укыгыз һәм җавап бирегез:

Йәһвәнең нинди фатихалары өчен сез аеруча рәхмәтле?

Ирмия пәйгамбәр Йәһвәне һәм аның сүзен яраткан. Һәм ул Йәһвәнең исемен йөртү хөрмәтен бик кадерләгән. Ул болай дигән: «Синең сүзең минем өчен сөенү һәм күңел шатлыгы булып китте, чөнки мин синең исемеңне йөртәм, и Гаскәрләр Аллаһысы Йәһвә» (Ирмия 15:16). Мондый сорауларга җавап бирегез: