Нух көймәсе

Вакыт узу белән, җирдә күп кеше яши башлаган. Аларның күбесе явыз булган. Хәтта кайбер күктәге фәрештәләр дә явыз булып киткән. Шул фәрештәләр, күктәге өйләрен калдырып, җиргә төшкән. Беләсеңме ни өчен? Кеше тәнен алып, хатын-кызларга өйләнер өчен.

Бу фәрештәләр белән хатын-кызларның балалары туган. Алар бик көчле, явыз кешеләр булып үскән һәм башкаларны җәберләгән. Йәһвә моны бүтән түзә алмаган һәм шуңа күрә явыз кешеләрне зур су басуда юк итәргә булган. Бу вакыйга Туфан дип атала.

Әмма Нух исемле бер кеше башкалардан аерылып торган. Ул Йәһвәне яраткан. Аның хатыны һәм Шем, Хам, Йафе́т исемле өч улы булган. Улларының да хатыннары булган. Йәһвә Нухка зур бер көймә төзергә кушкан. Бу көймә суда йөзүче зур агач тартмага охшаш булган. Нух үз гаиләсе белән, шунда кереп, Туфан вакытында исән кала алган. Йәһвә аңа шулай ук үзе белән көймәгә төрле-төрле хайваннарны да алырга кушкан.

Нух шунда ук көймә төзи башлаган. Ул үз гаиләсе белән бергә шул көймәне якынча 50 ел төзегән. Төзегәндә, алар барысын нәкъ Йәһвә әйткәнчә эшләгән. Шул вакыт дәвамында Нух шулай ук кешеләрне Туфан булачак дип кисәткән. Әмма аны беркем дә тыңламаган.

Ахыр чиктә көймәгә керергә вакыт җиткән. Шунда нәрсә булган? Әйдә, белик.