Fesoasoani Atu Ki A Koe Eiloa Mo Nisi Tino Mai Te Fakaaogaga O Te Muna A Te Atua

1. Kaia e ‵tau ei o tali‵tonu katoatoa tatou ki te Muna a te Atua?

KAFAI e mafau‵fau a toeaina me ko ‵tau o kau se tino akoga ki te Tusi Tapu ki te galuega talai, e fesili ifo latou ki a latou eiloa, ‘E mata, e fakaasi mai i pati a te tino me e talitonu a ia i te Tusi Tapu ko te Muna eiloa a te Atua?’a Kafai se tino e manako ke fai a ia mo fai se tino talai o te Malo​—a te tonuga loa, mō tavini katoa a te Atua​—e ‵tau eiloa o manino ‵lei a te tali, ao. Kaia? A ‵tou tali‵tonu katoatoa ki te Muna a te Atua mo te mafai ne tatou o fakaaoga faka‵lei i te galuega talai ka fesoasoani mai ke mafai ne tatou o fesoasoani atu ki nisi tino ke iloa ne latou a Ieova kae ke maua ne latou a te fakaolataga.

2. Kaia e ‵tau ei mo tatou o ‘tumau i mea ne tauloto ne tatou’?

² Ne faka‵mafa mai ne te apositolo ko Paulo a te tāua o te Muna a te Atua i tena tusi ki a Timoteo: “Ke tumau i mea kolā ne tauloto ne koe kae talitonu foki ki ei.” A “mea” kolā ne taku mai ne Paulo ko muna‵tonu mai te Tusi Tapu kolā ne fakamalosi atu ki a Timoteo ke fakatuanaki ki te tala ‵lei. E penā foki te aoga o muna‵tonu konei ki a tatou i aso nei, kae ka fesoasoani mai faeloa ki a tatou ke tumau i te “poto . . . e uiga ki te fakaolataga.” (2 Timo. 3:14, 15) E masani o fakaaoga ne tatou a nisi pati a Paulo ke fakaasi atu ki nisi tino me i te Tusi Tapu ne māfua mai i te Atua, kae kāti e maua ne tatou ne mea aoga mai i pati i te 2 Timoteo 3:16. (Faitau.) Ke mafau‵fau faka‵lei aka tatou ki te fuaiupu tenā. I te faiga penā ka fakamalosi aka ei a ‵tou loto tali‵tonu me i akoakoga a Ieova e “‵tonu.”​—Sala. 119:128.

“E AOGA KI TE AKOAKO ATU”

3-5. (a) Se a te mea ne tupu ki te vaitino mai tua o te lāuga a Petelu i te Penitekoso, kae kaia? (e) Kaia ne talia ei ne tino e tokouke i Tesalonia a te munatonu? (i) Se a te mea e uiga ki te ‵tou galuega talai e tavae ne tino i aso nei?

³ Ne fai atu a Iesu ki te fenua o Isalaelu: “Ka uga mai . . . ne au ki a koutou a pelofeta, tino ‵poto mo faiakoga o tino katoa.” (Mata. 23:34) Ne faipati eiloa a Iesu e uiga ki ana soko kolā ne akoako ne ia ke fakaaoga a Tusitusiga Tapu i te lotou galuega talai. I te Penitekoso 33 T.A., ne fai ne te “faiakoga o tino katoa” e tokotasi, ko te apositolo ko Petelu, se lāuga ki tino e tokouke i Ielusalema telā ne siki mai ei ne tou tagata ne nāi fuaiupu mai Tusitusiga Epelu. I te lagonaga ne latou a fakamatalaga a Petelu e uiga ki pati konei, e tokouke a tino fakalogo‵logo “ne mafatia olotou loto.” Ne sala‵mo latou ki olotou agasala mua ne fai. E nofo ki te tokotolu afe mai i a latou ne ‵sala atu ki te fakamagaloga a te Atua kae fai mo fai ne Kelisiano.​—Galu. 2:37-41.

⁴ A te suā faiakoga o tino katoa telā ne talai ne ia a te tala ‵lei i koga ‵mao atu i Ielusalema, ko te apositolo ko Paulo. E pelā me se fakaakoakoga, i te fa‵kai o Maketonia ko Tesalonia, ne faipati atu tou tagata ki tino kolā e tapuaki i loto i se sunako. E tolu a Sapati “ne fakasako‵sako a ia [Paulo] mo latou ki mea mai Tusitusiga Tapu, o fakamatala kae fakatalitonu atu e auala i mea kolā ne tusi ki lalo me ne ‵tau eiloa o puapuaga a te Keliso kae toe fakatu aka mai te mate.” Kae ko te ikuga? “Ne tali‵tonu a nisi tino [Iutaia] i a latou,” e pelā foki “mo tino Eleni e tokouke.”​—Galu. 17:1-4.

⁵ E tavae ne tino e tokouke i aso nei a te auala e fakaaoga ei ne tavini a te Atua a te Tusi Tapu. I te otiga ne fakalogologo a te tino i te fale ki te faitauga ne ‵tou tuagane e tokotasi se tusi faitau, ne fesili atu tou tagata ki te tuagane: “Ko oi e sui mai ne koe?” Ne tali atu tou fafine: “A māua mo toku taugasoa ne Molimau a Ieova.” Muna a tou tagata: “Ne ‵tau o iloa ne au. I tafa o Molimau a Ieova, ko oi foki e vau ki toku fale o faitau mai te Tusi Tapu?”

6, 7. (a) E mafai pefea o fakaaoga faka‵lei ne latou kolā e akoako atu ki te fakapotopotoga a te Tusi Tapu? (e) Kaia e tāua ‵ki ei a te fakaaoga faka‵lei o Tusitusiga Tapu ki akoga faka-te-Tusi Tapu?

⁶ E mafai pefea o fakaaoga ne tatou a te Tusi Tapu i te ‵toe auala ‵lei i te faiga o ‵tou akoakoga? Kafai koe e akoako mai i luga i te tulaga ki te fakapotopotoga, ke fakaaoga ne tusi fai‵tau fakapitoa mai te Tusi Tapu. I lō te taku atu o mea i loto i tusi siki io me faitau mai i se mea ne ‵lomi mai te komipiuta, ‵suke ki te Tusi Tapu kae faitau mai i ei, kae fakamalosi atu ki tino fakalogo‵logo ke fai foki penā. Taumafai foki ke lava te taimi e fakamatala ei a fuaiupu i se auala telā e fesoasoani atu ki tino fakalogo‵logo ke fakapili‵pili atu ki a Ieova. I lō te fakaaoga o tala fakatusa faiga‵ta mo tala faifa‵kata, ke fakaaoga te taimi o fakamatala faka‵lei a te Muna a te Atua.

⁷ Se a te mea e ‵tau o masaua ne tatou i te taimi e fai ei akoga faka-te-Tusi Tapu? I te fakaaoga ne tatou a ‵tou lōmiga faka-Kelisiano, e se ‵tau o tiaki ne tatou a tusi siki mai te Tusi Tapu. E ‵tau o fakama‵losi aka ne tatou a tino a‵koga ke fai‵tau ki tusi siki kae fesoasoani atu ke malamalama i ei. E pefea la? E se ko te faiga o fakamatalaga ‵loa kolā e mafai o fai pelā me ne lāuga, kae mai te fakamalosi atu ki te tino akoga ke fakaasi mai ana manatu. I lō te fai atu o mea kolā e ‵tau o talitonu io me e ‵tau o fai ne ia, e mafai o ‵sili atu ne tatou a fesili kolā ka fesoasoani atu ke fai ne ia se fakaikuga ‵lei.b

“E AOGA . . . KI TE FAIGA O POLOPOLOKIGA”

8. Se a te taua ne fakafesagai atu a Paulo ki ei?

⁸ E masani o ‵kilo atu tatou ki te faiga o “polopolokiga” e pelā me se galuega e ‵tau o fai ne toeaina i te fakapotopotoga. Kae tonu, me ko te tiute o ovasia ke ‘polopoloki a latou kolā e fai agasala.’ (1 Timo. 5:20; Tito 1:13) Kae e tāua foki ke polopoloki ne tatou a tatou eiloa. A Paulo se Kelisiano malosi telā e ‵ma a tena loto lagona. (2 Timo. 1:3) Ne tusi mai tou tagata: “E lagona foki ne au i toku foitino se isi tulafono telā e taua atu ki te tulafono i toku mafaufau kae e takitaki ne ia au ke pologa ki te tulafono o te agasala.” Mai te sukesuke ki te uiga tonu o pati konā, ka malamalama faka‵lei tatou i te taua telā ne taua i ei a Paulo ke pule atu ki tena tulaga agasala.​—Faitau te Loma 7:21-25.

9, 10. (a) Ne a vāivāiga ne taua atu a Paulo ki ei? (e) Ne tumau pefea a Paulo i te taua atu ki te agasala?

⁹ Ne a vāivāiga ne taumafai a Paulo o fakatakavale? E ui eiloa ne seki taku takitasi mai ne ia, ne tusi atu tou tagata ki a Timoteo i a ia se tino “fia sili.” (1 Timo. 1:13) A koi tuai o ‵fuli tou tagata, ne kaitaua ‵ki eiloa a Paulo ki Kelisiano. Ne taku tonu mai ne tou tagata ana lagonaga e uiga ki soko o Keliso: ‘Ne lasi ‵ki eiloa toku kaitaua ki a latou.’ (Galu. 26:11) Ne tauloto a Paulo ke iloa ne ia o taofiofi a tena kaitaua, e ui eiloa ne taumafai tou tagata i nisi taimi o pule atu ki ana lagonaga mo ana pati. (Galu. 15:36-39) Se a te mea ne fesoasoani atu ke manumalo ei a ia?

¹⁰ I tena tusi ki te kau Kolinito, ne fakamatala atu ne Paulo a te auala ne fakaaoga ne ia ke polopoloki ei a ia ne ia eiloa. (Faitau te 1 Kolinito 9:26, 27.) Ne taua malosi atu tou tagata ki ana vāivāiga. E seai se fakalotolotolua me ne salasala tou tagata ki manatu fakatonutonu i loto i Tusitusiga Tapu, fakamolemole atu ki a Ieova mō se fesoasoani ke fakagalue aka a manatu konā, kae galue malosi o tautali i ei.c E maua ne tatou a mea aoga mai tena fakaakoakoga me e taua atu foki tatou i se taua tai ‵pau penā ki ‵tou lagonaga sē ‵lei katoatoa.

11. E mafai pefea ne tatou o “tumau . . . i te tofotofo” o tatou eiloa ko te mea ke iloa aka me e sa‵sale eiloa tatou i te auala o te munatonu?

¹¹ E se ‵tau o manatu māmā tatou i te faiga o ‵tou tapuakiga. E ‵tau mo tatou o “tumau . . . i te tofotofo” o tatou eiloa ke mautinoa me e sa‵sale tonu tatou i te auala o te munatonu. (2 Koli. 13:5) Kafai tatou e fai‵tau ki tusi fai‵tau pelā mo te Kolose 3:5-10, e mafai ne tatou o fesili ifo ki a tatou eiloa: ‘E mata, e galue malosi au o fakaseai oku vāivāiga io me ko gasolo aka o ma‵sei aku amioga? Kafai e fakaaoga a te itaneti kae sae aka se Web site i amioga sē ‵tau, e mata, ka tiakina fakavave ne au io me e salasala eiloa au ki Web site ma‵sei?’ A te fakagaluegaga o pati fakatonutonu mai te Muna a te Atua ka fesoasoani mai “ke ala faeloa tatou kae tausi ‵tou mafaufau ke ‵lei.”​—1 Tesa. 5:6-8.

“E AOGA . . . KI TE FAKATONUTONUGA O MEA ‵SE”

12, 13. (a) Se a te mea e ‵tau o fakamoe‵moe tatou ki ei i “te fakatonutonuga o mea ‵se,” kae e mafai pefea o tau‵tali atu tatou i te fakaakoakoga a Iesu i te faiga penā? (e) Ne a vaegā pati e se ‵tau o fakaaoga i te “fakatonutonuga o mea ‵se” mo nisi tino?

¹² A te tugāpati Eleni telā ne ‵fuli “ki te fakatonutonuga o mea ‵se” e fakauiga ki te “fai ke ‵lei, ke fakatonu, ke toe fakafoki ki se tulaga ‵tau kae tonu.” I nisi taimi, e ‵tau o faka‵tonu aka ne tatou a mea māfai a nisi tino e se malama‵lama i ‵tou mea e fai. Pelā me se fakaakoakoga, ne fa‵meo a takitaki lotu Iutaia i a Iesu ne fai faka‵lei ki “tino ao lafoga mo tino agasala.” Ne tali atu a Iesu: “A tino kolā e malosi ‵lei e se ma‵nako ki se tokita, kae na ko tino ma‵saki fua. Olo kae fai ke iloa ne koutou te uiga o te mea tenei: ‘E tāua atu ki a au te loto fakamagalo, kae e se ko taulaga.’” (Mata. 9:11-13) Ne fakamatala atu ne ia mo te kufaki a pati a te Atua ki tino katoa. Mai te taimi tenā, ne iloa ne tino loto mau‵lalo i a Ieova se “Atua telā e ‵fonu i te alofa mo te kaimalie, e tuai o ita kae lasi tena alofa mo tena fakamaoni.” (Eso. 34:6) Kae mai i taumafaiga a te Tama a te Atua ke ‘faka‵tonu aka a mea ‵se,’ ne fakatuanaki ei a tino e tokouke ki te tala ‵lei.

¹³ E akoako mai ki a tatou a te fakaakoakoga a Iesu ki te auala e ‵tau ei o fesoasoani atu tatou ki nisi tino. Kāti ka faipati ita mai se tino telā e kaitaua, ‘Au e manako ke faka‵tonu aka se mea ki a koe.’ Kae ko te vaegā auala tenā e se ko te manakoga o te mea telā ne fai mai i te 2 Timoteo 3:16. E se talia ne “Tusitusiga Tapu katoa” ke pati ‵toko ne tatou a nisi tino. E pelā mo te “pelu,” e masani o māfua mai i ei a fakamaseiga mo logo‵maega e uke kae seāseā ko maua mai i ei ne mea aoga.​—Faata. 12:18.

14-16. (a) E mafai pefea ne toeaina o ‘faka‵tonu aka a mea ‵se’ i se auala telā e fesoasoani atu ki nisi tino ke faka‵lei aka olotou fakalavelave? (e) Kaia e tāua ‵ki ei a te “fakatonutonuga o mea ‵se” i auala o Tusitusiga Tapu ki te putiakaga o tamaliki?

¹⁴ E mafai pefea o fakaaoga ne tatou a te kufaki mo te mataalofa i te “fakatonutonuga o mea ‵se”? Mafaufau me ne fakamolemole atu se tauavaga ki se toeaina i te fakapotopotoga mō se fesoasoani ke fakagata aka a lā kinauga. Se a te mea ka fai ne te toeaina? I lō te kau ki se feitu, kāti e mafai ne tou tagata o fakaaoga a fakatakitakiga fakavae mai te Tusi Tapu, kolā e maua i te mataupu e 3 o te tusi ko Te Auala e Maua ei ne se Kāiga te Fiafia Tonu. I te taimi e fai ei ne te toeaina a te sau‵talaga, e onoono a te tauavaga me ne a manatu fakatonutonu e ‵tau o ga‵lue malosi lāua taki tokotasi ki ei. I se taimi fakamuli, ka manako te toeaina ke iloa ne ia te tulaga o te kāiga kae tuku atu ne fesoasoani māfai e manakogina.

¹⁵ E mafai pefea ne mātua o ‘faka‵tonu aka a mea ‵se’ i se auala telā e fakamalosi atu ki olotou tama‵liki i te feitu faka-te-agaga? Mafaufau i a koe e fia fesoasoani atu ki tau tamaliki fafine talavou ke ‵kalo kea‵tea mai se taugasoa sē ‵lei. A te mea muamua, e ‵tau o iloa ne koe ne fakamatalaga ‵tonu e uiga ki ei. Kae kafai koi isi eiloa se manavase o koe ki tau tamaliki fafine, faipati atu ki a ia, kāti mai te fakaaogaga o manatu mai i te Questions Young People Ask​—Answers That Work, Tusi i te 2. Fakamuli ifo, e mafai o fakaavanoa ne koe ne taimi ke sau‵tala fakatasi koulua. E ‵tau foki o onoono koe ki ana uiga masani i te galuega talai io me ko mea fai a te kāiga. Kafai e fakaasi atu ne koe a te kufaki mo te mataalofa, ka iloa ne ia i a koe e alofa atu ki a ia. E se taumate ka fakamalosi atu ki tou fafine ke fakagalue aka ou manatu fesoasoani kae ‵teke atu ki te faiga o fakaikuga sē ‵lei i tena olaga.

¹⁶ I se auala tai ‵pau, e mafai foki o fakama‵losi atu tatou i te kufaki mo te mataalofa, ki a latou kolā e manava‵se ki te ola ‵lei o latou, e mafatia me ko seai ne olotou galuega ‵togi, io me ko ‵numi malosi e uiga ki nisi akoakoga mai Tusitusiga Tapu. A te fakaaogaga o te Muna a te Atua ke ‘faka‵tonu aka a mea ‵se’ e maua ei ne tino o Ieova a mea aoga.

“E AOGA . . . MO TE FAIGA O POLOPOLOKIGA I TE AMIOTONU”

17. Kaia e ‵tau ei o talia ne tatou a polopolokiga mo te loto fakafetai?

¹⁷ “E seai se polopolokiga e foliga mai me e fakafiafia i te vaitaimi tenei, kae e fakalogo‵mae mai fua.” Kae ui i ei, “fakamuli loa ka ‵fua mai i ei a fuataga o te filemu mo te amiotonu i a latou kolā ne akoakogina e auala i ei.” (Epe. 12:11) E lotoma‵lie a Kelisiano ma‵tua e tokouke me ne fesoasoani atu ki latou a polopolokiga kolā ne maua ne latou mai i olotou mātua. Kae ko te taliaga o polopolokiga mai i a Ieova, e auala i toeaina Kelisiano, e fai ei ke tumau tatou i te auala ki te ola.​— Faata. 4:13.

18, 19. (a) Kaia e tāua ‵ki ei a pati fakatonutonu kolā e maua i te Faataoto 18:13 ki te “polopolokiga i te amiotonu”? (e) Kafai e fakaasi atu ne toeaina a te atafai mo te alofa i olotou faifaiga ki tino fai mea ‵se, se a te ikuga e masani o maua mai i ei?

¹⁸ A te tuku atu o polopolokiga magoi se auala poto. Ne fai atu a Ieova ki Kelisiano ke tuku atu a polopolokiga “i te amiotonu.” (2 Timo. 3:16) Tela la, e ‵tau o fakaaoga ne tatou a fakatakitakiga i te Tusi Tapu ke takitaki ei tatou. E tasi te fakatakitakiga penā e maua i te Faataoto 18:13: “Fakalogologo muamua koi tuai o fai tau tali. Kafai e se fakalogo mua koe ko tena uiga koe e supa kae valea.” Tela la, kafai e ‵tau o fai‵pati a toeaina ki se tino telā ne fakailoa mai ne te suā tino me ne fai ne ia se agasala matagā, e ‵tau mo latou o fai se sukesukega māea ki te fakalavelave ke maua a fakamatalaga ‵tonu katoa. (Teu. 13:14) Mai konā, ko mafai ei ne latou o tuku atu a polopolokiga “i te amiotonu.”

¹⁹ E se gata i ei, ne akoako ne te Muna a te Atua a toeaina Kelisiano ke fakatonutonu a nisi tino “mo te atafai.” (Faitau te 2 Timoteo 2:24-26.) E tonu, kāti e fakamasiasi ne se tino a Ieova kae faka‵mae atu ki nisi tino. Kae kafai e kaitaua se toeaina i te taimi e tuku atu ei a pati fakatonutonu ki se tino, ka sē fesoasoani atu a te mea tenā ki te tino. Kae kafai e fakaakoako a toeaina ki te “alofa kaimalie” o te Atua, e mafai eiloa o fai ne latou ke salamō te tino agasala.​—Lo. 2:4.

20. Ne a fakatakitakiga fakavae e ‵tau o fakaaoga ne mātua i te polopolokiga o olotou tamaliki?

²⁰ E ‵tau mo mātua o fakaaoga a fakatakitakiga fakavae mai te Tusi Tapu i te putiakaga o olotou tamaliki “i polopolokiga mo fakatakitakiga a Ieova.” (Efe. 6:4) E se ‵tau o fakasala ne se tamana a tena tama tagata ona fua ko te li‵poti a se tino kae e se iloa tonu ne ia a te tonuga. Kae e se ‵tau foki o maua a te kaitaua kae fakasaua i loto i se kāiga Kelisiano. “E lasi ‵ki te alofa atafai mo te alofa fakamagalo o Ieova,” kae ko latou kolā i o latou te tiute ke polopoloki a tamaliki e ‵tau o taumafai ke fakaasi atu foki a uiga a‵lofa penā.​—Iako. 5:11.

TE MEAALOFA SĒ ‵TOGI A IEOVA KI A TATOU

21, 22. Ne a pati i te Salamo 119:97-104 e fakamatala faka‵lei mai i ei ou lagonaga e uiga ki te Muna a Ieova?

²¹ Ne fakaasi mai ne se tagata o te Atua te pogai ne fiafia ei a ia ki tulafono a Ieova. (Faitau te Salamo 119:97-104.) Mai te sukesuke ki ei, ne maua ei ne tou tagata a te poto mo te malamalama. A te tausi ki ei ne fesoasoani atu ki a ia ke ‵kalo kea‵tea mai i auala ‵se kolā e faka‵mae atu ki loto o nisi tino. A te sukesuke ki Tusitusiga Tapu se mea gali kae fakamalie loto ki tou tagata. Ne fakaiku aka ne ia ke fakalogo kae tautali i tulafono a te Atua i tena olaga kātoa.

²² E mata, e fakatāua ne koe a “Tusitusiga Tapu katoa”? Ka fesoasoani atu ki a koe ke ati aka tou fakatuanaki me ka fakataunu eiloa ne te Atua a tena fuafuaga. A pati fakatonutonu i ei e puipui ne ia koe mai te faiga o te agasala telā e iku atu ki te mate. Kae kafai e apo koe i te fakamatalaga o Tusitusiga Tapu, e mafai ne koe o fesoasoani atu ki nisi tino ke sa‵sale i te auala ki te ola kae tumau i ei. Ke na fakaaoga katoatoa ne tatou a “Tusitusiga Tapu katoa” i te ‵tou tavini atu ki te ‵tou Atua alofa kae katoatoa tena poto, ko Ieova.