Māfai ko Tupu se Fakalavelave o te Natula

“Ne seai eiloa se fakamoemoega o māua i te taimi muamua. A kope o māua ne fakamasei katoa ne one kolā ne ma‵toli ifo mo te lofiaga.”—Andrew, i Sierra Leone.

“I te otiga o te alikeni, ne ‵foki māua ki te mā fale. Seai eiloa se mea e ‵toe. Ne ‵poi masei eiloa māua. Ne siga ifo taku tama fafine ki ana tuli kae tagi.”—David, i Virgin Islands.

KAFAI koe ne sao i se fakalavelave o te natula, se taumate e malamalama koe i mea ne fakafesagai atu ki ei a nisi tino kolā ne ‵sao mai i ei: te poi, se talitonu, ‵numi, manavase, mo moemiti fakama‵taku. E tokouke a tino ne ‵sao mai fakalavelave konei ne loto vāi‵vai ‵ki kae fi‵ta, ko ala ei o galo atu i a latou te fakamoemoega ke tai faka‵lei aka olotou olaga.

Kafai ne ‵galo atu au mea katoa ona ko se fakalavelave o te natula, ka lagona ifo foki ne koe me ko se mafai ne koe o kufaki i te manavase. Ka mafaufau foki koe me seai se aoga o te olaga. Kae e ui i ei, e fai mai te Tusi Tapu me e aoga eiloa tou olaga kae e mafai eiloa o maua ne koe se fakavae ‵mautakitaki o se fakamoemoega mo se olaga lei i aso mai.

TE ILOAGA E UIGA KI MUNA‵TONU MAI TE TUSI TAPU KA FAI I EI KE AOGA TE OLAGA

I te Failauga 7:8, e fai mai: “E ‵lei atu a te fakaotiga o se mea i lō te kamataga.” Kafai ko gasolo aka o ‵lei ou fakalavelave mai tua o se fakalavelave o te natula, kāti ka foliga sē aoga ki a koe te olaga. Kae kafai e taumafai koe o faka ‵lei aka tou olaga mo te kufaki, ka gasolo aka ei o ‵lei a mea katoa.

E folafola mai te Tusi Tapu me ka oko mai te taimi “ka se toe lagona atu . . . te ‵tagi mautuutu io me ko te ‵tagi o te puapuaga.” (Isaia 65:19) E tonu eiloa te mea tenei māfai ko ‵fuli te lalolagi mo fai se palataiso mai lalo o te pulega a te Malo o te Atua. (Salamo 37:11, 29) Ka fai a fakalavelave o te natula e pelā me se tasi o mea mua i te taimi tenā. A logo‵maega faka-te-mafaufau, faka-te-foitino mo mea tau lagonaga ka fakaseai atu katoatoa ki te se-gata-mai, me ne tauto mai te Atua Malosi Katoatoa: “Kae ko mea mua ka se toe manatua i te mafaufau, kae ka se toe ‵sae aka i te loto.”—Isaia 65:17.

Ke mafaufau ki te mea tenei: Ko oti ne fakatoka ne te Mafuaga “ke tuku atu ki a koutou a aso mai mua mo se fakamoemoega”—se olaga filemu i lalo i te pulega ‵lei katoatoa a te Atua. (Ielemia 29:11) E mata, a te iloa atu o te munatonu tenei e fai ei ke aoga tou olaga? A Sally, telā ne sae mai i te kamataga, ne fai mai, “Mai te fakamasaua aka ne koe a mea ‵gali katoa kolā ka fai ne te Malo o te Atua mō tatou i aso mai mua, e mafai o fesoasoani atu ki a koe ke fakapuli a mea mua ne ‵tupu i tou olaga kae ke gasolo ki mua mo te kufaki.”

E a, e fia tauloto koe ki mea e uke atu ka fai ne te Malo o te Atua mō tino katoa? Kafai e fai koe penā faitalia a logo‵maega ne pokotia ei koe mai se fakalavelave o te natula, ka aoga eiloa tou olaga ke ola nei koe mo te fakatalitali ki aso mai mua kolā ka se toe ai ne fakalavelave penā. Kae mō te taimi nei, e tuku mai eiloa ne te Tusi Tapu a fakatakitakiga kolā e mafai o fakagalue ne tatou ke fesoasoani mai ke kufaki tatou i so se taimi e fe‵paki mo tulaga o fakalavelave ‵tupu o te natula. Ke onoono nei tatou ki ne nāi fakaakoakoga.

Tusi Fai‵tau Mai te Tusi Tapu Kolā e Mafai o Fesoasoani Atu ki a Koe

Ke lava te moe.

“E ‵lei atu ke ‵fonu te lima e tasi i te malōlō i lō te ‵fonu o te avā lima i te faiga o galuega ‵mafa mo te afuliga o te matagi.”—Failauga 4:6.

E fai mai se lipoti a tino ‵poto me kafai ne pokotia malosi se tino i se fakalavelave, “ka gasolo o masei tena tulaga māfai e se lava tena moe . . . E fai ei ke na masei atu kae fakafaigata foki ke kufaki i ana lagonaga fakafanoanoa konā.” Tela la, se mea poto eiloa ke lava a taimi ‵moe.

Fakaasi ou lagonaga.

“A te manavase i te loto o se tagata e fai ei ke vāivāi a ia, kae ko te pati ‵lei e fakamalosi i ei a te loto.”—Faataoto 12:25.

Ke fakaasi atu ou lagonaga ki se kāiga io me se taugasoa pili o koe. Kafai e fakalogologo mai a te tino tenā, se kāiga io me se taugasoa, ka mafai eiloa o tuku atu ne latou a pati fakamalosi loto mo auala fesoasoani kolā e mafai o fakagalue aka ne koe.a

Ke mafaufau ki taimi ‵gali i aso mai mua.

“Kae e isi se lagi fou mo se lalolagi fou kolā e fakatali‵tali tatou ki ei e ‵tusa mo tena folafolaga, kae e maua i ei te amiotonu.”—2 Petelu 3:13.

a E manakogina eiloa ke ‵sala ne se tino telā e nofo manavase faeloa mō se taimi leva a togafiti fakatokita.