Ne Maua ne Au te Tokagamalie Tonu Ona ko te Talitonu ki a Ieova

KO KAMATA TOKU OLAGA TALITONU KI A IEOVA

Au ne fanau i te 1948 i se fakai foliki i te feitu ki saute-togala o Nigeria. I te taimi tenā, ne papatiso i ei a te taina foliki o toku tamana, ko Moustapha, mo toku taina matua, ko Wahabi, e pelā me ne Molimau a Ieova. I te taimi ko iva ei oku tausaga, ne mate toku tamana. Ne mafatia malosi au. Ne fai mai a Wahabi me mafai o toe fetaui māua mo toku Tamana i te taimi o te toetuga. Ne fai ne te manatu fakamafanafana tenā ke fia sukesuke au ki te Tusi Tapu. Ne papatiso au i te 1963. Ne papatiso foki i ei oku taina e tokotolu.

I te 1965, ne fano au ki toku taina matua ko Wilson i Lagos kae ne fiafia au o ‵kau fakatasi mo nisi paenia tumau i te Fakapotopotoga i Igbobi. Ne fakamalosi mai eiloa ki a au a te lotou fia‵fia mo te lotou loto finafinau, kae i a Ianuali 1968, ne fai foki ei au pelā me se paenia.

Ne fakatoka ne te taina mai te Peteli ko Albert Olugbebi, se fono fakapito mo matou talavou e uiga ki te lasi o te manakoga mō paenia fakapito i te feitu ki mātū o Nigeria. Koi masaua eiloa ne au a pati fakamalosi a te taina ko Olugbebi: “Koutou koi fo‵liki, kae e mafai o fakaaoga ne koutou a otou taimi mo malosi mō Ieova. E uke a galuega e manakogina ke fai!” Ne manako malosi au o fakaakoako ki te loto fiafia o Isaia, tenā ne faka‵fonu i ei taku pepa fakamolemole.—Isa. 6:8.

I a Me 1968, ne ‵tofi au ke tavini pelā me se paenia fakapito i te fakai ko Kano, i te feitu ki mātū o Nigeria. A te taimi tenei ko te taimi o te Biafran War (1967-1970), telā ne fakamasei valevale i ei te fakai mai mua o ga‵sue ki te feitu ki saegala o Nigeria. Ne fakamalosi mai se taina ke se fano au. Kae ne fai atu au ki ei: “Fakafetai mo te manavase mai ki a au. Kae kafai e manako a Ieova ke tavini au i konā, e mautinoa me ka ‵kau fakatasi mai eiloa a ia ki a au.”

TE TALITONU KI A IEOVA I TAIMI O TE TAUA

Ne fakafanoanoa ‵ki te tulaga i Kano. Ne fakamasei valevale te fakai lasi tenei i te taua. I nisi taimi i te galuega talai, e lavea sāle ne matou a foitino o tino ‵mate kolā ne tamate i te taimi o te taua. E tiga loa e uke a fakapotopotoga i Kano, kae ko te tokoukega o taina ko oti ne ‵sola kea‵tea. Kāti se toko 15 fua a tino talai ne ‵toe mai, kae ne ma‵taku malosi latou kae loto vāi‵vai. Ne fia‵fia malosi a taina mo tuagane konā i te okoatuga o te toko ono o matou paenia fakapito. Ne ‵saga faka‵lei mai a tino talai ki omotou fakamalosiga. Ne fesoasoani atu matou ke toe faka‵soko olotou polokalame faka-te-agaga kae kamata o toe lafo atu olotou lipoti o te galuega talai ki te ofisa lagolago kae tuku atu olotou ōta ke maua ne olotou tusi.

Ne kamata matou paenia fakapito o tauloto ki te ‵gana Hausa. E tokouke a tino ne fia fakalogo‵logo mai i te lagonaga ne latou te fekau o te Malo i te lotou ‵gana eiloa. Kae ne seki fia‵fia a tino o te lotu lasi ki te motou galuega talai, tela la, ne ‵tau o fakaeteete malosi matou. I se taimi e tasi, ne afuli māua mo toku ‵pea ne se tagata ki se naifi. Kae fakafetai me ne ma‵kini māua i te kamataga tenā ne ‵sao ei māua! Faitalia mea fakama‵taku, ne fai ne Ieova a matou ke “‵nofo i te saogalemu” kae ne kamata o tokouke a tino talai. (Sala. 4:8) Ke oko mai nei, ko silia atu mo te 500 tino talai i fakapotopotoga e 11 i Kano.

‵TEKEMAIGA I NIGER

Fakamuli ifo i a Aokuso 1968, mai tua o nai masina i Kano, ne uga au ke fano ki Niamey, te laumua o te Republic of Niger, fakatasi mo nisi paenia fakapito e tokolua. Ne fatoa iloa ne matou me i Niger, telā e tu i Afelika ki Togala, se tasi o toe koga ‵vela o te lalolagi. I tafa o te taumafai ke fakamasani ki te ‵vela, ne ‵tau foki o tauloto matou ki te ‵gana o te fenua, ko te ‵gana Falani. Faitalia tulaga faiga‵ta konei, ne tali‵tonu matou ki a Ieova kae kamata o talai atu i te laumua fakatasi mo nai tino talai i konā. E seki leva, kae toeitiiti ko tino katoa i Niamey kolā e iloa o fai‵tau ne maua olotou ‵kopi o te tusi ko te The Truth That Leads to Eternal Life. Ne ‵sala mai foki a tino ki a matou ke maua ne olotou ‵kopi!

E seki leva kae iloa fakamuli ne matou me e se fia‵fia a tino o te malo ki Molimau a Ieova. I a Iulai 1969, ne maopoopo matou o fai te motou fono o te seketi muamua eiloa i te fenua, kae nofo ki se toko 20 a tino ne ‵kau ki ei. Ne olioli matou ki te papatisoga o tino talai ‵fou e tokolua. Kae i te aso muamua o te fono, ne oko atu a pulisimani o taofi te polokalame. Ne puke ne latou a paenia fakapito mo te ovasia o te seketi ki te ofisa o pulisimani. I te otiga ne fakafesilisili ne latou a matou, ne fakatonu mai ke toe ‵foki atu matou i te suā aso. Ne iloa ne matou me ka isi se fakalavelave ka tupu, tenā ne fai ei a fakatokaga ke fai te lāuga o te papatisoga i se fale o se tino kae fai mo te fakaeteete a te papatisoga i se vaitafe.

I nai vaiaso mai tua ifo, ne ‵tuli kea‵tea au mo nisi paenia fakapito e tokolima ne te Ministry of the Interior. Ne fakaavanoa mai ne latou se 48 itula ke tiakina te lotou fenua kae ‵tau o ‵sala ne matou a mea mo omotou olo. Ne faka‵logo matou kae olo ‵tonu atu ki te ofisa lagolago i Nigeria, telā ne tuku mai ne latou a koga ‵fou ke tavini i ei.

Ne ‵tofi au ki te fa‵kai o Nigeria ko Orisunbare, kae ne fiafia au o ga‵lue tasi mo se potukau foliki o tino talai i konā. Kae mai tua o se ono masina, ne ‵kami au ne te ofisa lagolago ke foki tokotasi atu ki Niger. Ne poi au i te taimi muamua kae oti aka ko olioli foki ke toe fetaui mo taina i Niger!

Ne foki au ki Niamey. I te aso mai tua o taku okoatuga, ne iloa ne se tino fai pisinisi mai Nigeria me i a au se Molimau, kamata ei o fai mai ana fesili e uiga ki te Tusi Tapu. Ne fai ne au tena akoga, kae mai tua o te ‵katiga o tena ‵pusi mo te inu malosi, ne papatiso a ia. Mai tua ifo, ne fiafia au ke aofia i te faiga ke gasolo ki mua te galuega i nisi kogā koga o Niger. I te taimi muamua ne oko atu au, e ‵tusa mo te toko 31 Molimau i te fenua; kae i te taimi ne tiakina ne au, kae ko toko 69 a latou.

“E SE UKE MOTOU MEA E ILOA E UIGA KI TE GALUEGA TALAI I GUINEA”

Fakamuli ifo i te 1977, ne toe foki au ki Nigeria ke kau ki se akoga. Mai tua o vaiaso e tolu o te akoga, ne tuku mai ne te kouotineita o te Komiti o te Ofisa Lagolago, ko Malcolm Vigo, ke faitau ne au se tusi mai te ofisa lagolago i Sierra Leone. A taina i konā e ‵sala ki se taina paenia seki avaga, e tupu malosilosi kae faipati fakapalagi mo te ‵gana Falani ke tavini pelā me se ovasia o te seketi i Guinea. Ne fai mai te taina ko Vigo me ne fakaakoga au mō te galuega tenā. Ne faka‵mafa mai ne ia me e se faigofie te taviniga i ei. “Mafaufau muamua faka‵lei ki ei koi tuai o talia ne koe,” ko ana pati. Ne tali fakavave atu au, “Ona ko Ieova tenei e uga ne ia au, ka fano eiloa au.”

Ne eva au ki Sierra Leone kae fetaui mo taina i te ofisa lagolago. Ne fai mai se tokotasi o taina i te Komiti o te Ofisa Lagolago, “E se uke motou mea e iloa e uiga ki te galuega talai i Guinea.” E tiga loa e tausi ne te ofisa lagolago a te galuega talai i Guinea, kae ne seki mafai o fesokotaki atu ki tino talai i konā ona ko te fakamataku o fakalavelave i mea fakapolitiki i te fenua. Kae faitalia taumafaiga e uke ne fai, ne seki mafai ne te ofisa lagolago o avatu se sui o latou ki ei. Tenā ne fakamolemole mai ke fanatu au ki te laumua o Guinea, ko Conakry, kae taumafai ke nofo tumau i ei.

I taku okoatuga ki Conakry, ne fanatu au ki te ofisa o Nigeria i konā kae fetaui mo te sui o te malo ki konā. Ne fakaasi atu ne au toku manakoga ke talai i Guinea. Ne fakamalosi mai a ia ke se nofo au me mafai au o ‵loka io me ma‵sei atu a mea e ‵tupu ki a au. “Foki ki Nigeria o talai i ei,” ko ana pati, kae ne tali atu au, “Ko oti ne fakaiku aka ne au ko au ke nofo.” Tenā ne tusi ei ne ia se tusi ki te Minister of the Interior o Guinea ke fesoasoani mai, kae ne tali fiafia au ne te minisita tenā.

E seki leva, kae ne toe foki au ki te ofisa lagolago i Sierra Leone kae fakailoa atu ki taina e uiga ki te fakaikuga a te minisita. Ne paka‵laga a taina mo te fia‵fia i te ‵logoga i te tala tenā mo te auala ne fakamanuia ne Ieova taku malaga. Ko oti ne talia ke nofo tumau au i Guinea!

Ne tavini au pelā me se ovasia o te seketi mai te 1978 ki te 1989, i Guinea, Sierra Leone, kae pelā me se ovasia o te seketi fesoasoani i Liberia. I te kamataga, ne masaki sāle au. Ne tupu sāle te mea tenei i fakai fo‵liki. Kae ne fai ne taina te ‵toe mea e mafai ke ave au ki te fakaimasaki.

I se taimi e tasi, ne poko malosi au i te malalia, kae isi foki ne ilo i toku tinae. I taku ‵leiga, ne iloa aka ne au me ko oti ne fai‵pati a taina ki te koga ke tanu ei au! Faitalia a tulaga faiga‵ta konei ki toku ola, ne seki mafaufau eiloa au ke tiakina taku taviniga. Ne tumau eiloa toku talitonu me i te tokagamalie tonu e maua mai i te Atua telā e mafai o faka‵tu aka ne ia tatou mai te mate.

TALI‵TONU KI A IEOVA E PELĀ ME SE TAUAVAGA

I te 1988, ne fetaui māua mo Dorcas, se tuagane loto maulalo kae se paenia matua faka-te-agaga. Ne avaga māua kae ne kau mai ki taku galuega e pelā me se ovasia o te seketi. Ne fai a Dorcas pelā me se avaga alofa kae toka o talia so se mea faigata. Ne sa‵sale tasi māua i se 25 kilomita (15 mai) mai fakapotopotoga ki nisi fakapotopotoga, kae sau mā kope. Kae ki fakapotopotoga tai ‵mao atu, e fakaaoga ne māua so se mea fakateletele ke olo i ei i auala pelapelā kae uke a poko‵pokoga i auala.

Dorcas se fafine loto malosi. I nisi taimi e olo atu māua i loto i vaitafe kolā e isi ne kolokolotaila i ei. I se malaga e tasi a māua telā e lima aso te leva, ne ‵fati a piliti lakau mai luga o se vaitafe kae ne ‵tau o olo atu māua i paopao. I te taimi ne tu aka a Dorcas ke sopo ki lalo mo te paopao, kae tō a ia ki te koga ‵poko. E seai se tino i a māua e iloa ne ia o ‵kau, kae e isi ne kolokolotaila i te vaitafe. Kae fakafetai me isi ne tamataene ne eva ki lalo o fakasao tou fafine. Ne seki mafai o ‵to mā ‵moe i po e uke ona ko te mea tenā ne tupu, kae ne olo eiloa māua i te mā malaga.

I te kamatamataga o te 1992, ne ‵poi māua i te iloatuga me ko faitama a Dorcas. E mata, tenei loa te gataga o te mā olaga i te taviniga tumau? Ne fai ifo māua, “Ko tuku mai ne Ieova ki a tāua se meaalofa!” Tenā ne fakaigoa ei ne māua te mā tamaliki fafine ki a Jahgift, kae ne ‵tao mai tua ko tena tuagane ko Eric. Fakamuli loa, ne fai a mā tama katoa e pelā me ne meaalofa faka-te-agaga ki a māua. Ne tavini atu a Jahgift mō se vaitaimi i te ofisa fulitusi i Conakry, kae ko Eric se tavini fesoasoani.

E ui eiloa ne seki toe fai a Dorcas pelā me se paenia fakapito fakamuli, kae ne tumau eiloa a ia i te tavini atu pelā me se paenia tumau, kae puti aka mā tama‵liki. Mai te fesoasoani o Ieova, ne tumau au i te taviniga tumau. I te taimi ko ma‵tua mā tama‵liki ne mafai o toe tavini atu a Dorcas pelā me se paenia fakapito. Nei la, ko tavini atu katoa māua e pelā me ne misionale i Conakry.

TE POGAI O TE TOKAGAMALIE TONU

Ne fano faeloa au ki koga kolā ne uga ne Ieova au ke fano ki ei. Kae lagona faeloa ne māua mo taku avaga tena puipuiga mo tena fakamanuiaga. A te talitonu ki a Ieova ne fai ei ke se manava‵se malosi māua e pelā mo tino kolā e tali‵tonu katoatoa ki olotou kope faka-te-foitino. Ne tauloto ne māua mo Dorcas mai mea ne ‵tupu, me i te Pogai o te tokagamalie tonu ko “te Atua o te motou fakaolataga,” ko Ieova. (1 Nofo. 16:35) Au e talitonu me i ola o tino kolā e tali‵tonu ki a ia “ka puipui faka‵lei eiloa ne Ieova tou Atua i te taga o te ola.”—1 Samu. 25:29.