Mataupu e 13

Ke Maua a Mea Aogā Mai Fakaosoosoga o Iesu

NE FATOĀ papatiso a Iesu, kae ne takitaki atu a ia ne te agaga o te Atua ki te vao i Iutaia. E uke ana mea e ‵tau o mafaufau ki ei, me i tena papatisoga “ne matala te lagi.” Tela la, e mafai o maina a ia i mea faka-te-lagi. A te tonuga loa, e uke ‵ki a mea e ‵tau o mafaufau a ia ki ei!

Ne fakamaumau ne Iesu a aso e 40 mo po e 40 i te koga lavaki kae seki kai a ia ki se mea i te taimi tenā. I te taimi ko likiliki malosi ei a Iesu, ne fanatu te Tiapolo o fakaosooso a ia, ana muna: “Kafai koe ko te Tama a te Atua, fakatonu aka ke liu falaoa a fatu konei.” E iloa ne Iesu me se mea ‵se ke fakaaogā ne ia tena ‵mana fakavavega ke fakama‵lie ei ana manakoga totino. Tela la, ne ita a ia ma talia te fakaosoosoga tenā.

Kae ne toe taumafai foki te Tiapolo. Ne tofotofo aka ne ia a te suā feitu. Ne fakaitaita atu a ia ki a Iesu ke eva ki lalo mai te ‵pui o te faletapu ko te mea ke fakasao a ia ne agelu a te Atua. Ne seki talia ne Iesu ke fai se mea fakamatamata penā. Ne siki atu ne Iesu a pati mai te Tusi Tapu ke fakaasi atu i ei me se mea ‵se ke tofotofo atu ki te Atua i se auala penā.

Kae ko te tolu o fakaosoosoga, ne fakaasi atu i ei ne te Tiapolo ki a Iesu a malo katoa o te lalolagi i se auala fakavavega, ana muna: “Ka avatu katoa ne au ki a koe a mea konei, manafai e totuli ifo koe o tapuaki mai ki a au.” Kae ne ita foki a Iesu ma takavale a ia i te fakaosoosoga ke fai se mea ‵se, kae ne fakaiku aka ne ia ke tumau eiloa a ia i te fakamaoni ki te Atua.

E mafai o maua ne tatou a mea aogā mai fakaosoosoga konā o Iesu. E fakaasi mai i ei me i te Tiapolo e se se uiga masei fua, e pelā mo pati a nisi tino, ako ia se tinā tino tonu eiloa telā e se matea ki mata. E fakaasi mai foki i te fakaosoosoga a Iesu me i a te Tiapolo a malo katoa i te lalolagi. Me e mafai pefea o fakaosooso tonu atu ki te Keliso i te ofoatuga ne te Tiapolo o mea konā ki a ia moifai e se i a ia a malo konā?

Kae mafaufau ki te mea tenei: Ne fai atu te Tiapolo me ne fiafia a ia ke tuku atu se taui ki a Iesu māfai e ifo fakatasi atu fua ki a ia, kae ka tuku atu ki a ia a malo katoa o te lalolagi. Kāti ka taumafai foki te Tiapolo o fakaosooso mai ki a tatou i se auala penā, kāti ka tuku mai ne ia a avanoaga ‵gali i mua o tatou ke maua ei ne tatou a maukoloa faka-te-lalolagi, pulega, io me ko tulaga ma‵luga. Kae e pefea te poto ke tau‵tali atu tatou ki te fakaakoakoga a Iesu kae ke tumau tatou i te fakamaoni ki te Atua faitalia me se a te fakaosoosoga! Mataio 3:16; 4:1-11; Maleko 1:12, 13; Luka 4:1-13.

▪ Ne a mea kāti ne mafaufau a Iesu ki ei i aso e 40 ne nofo ei a ia i te vao?

▪ Ne taumafai pefea te Tiapolo o fakaosooso ne ia a Iesu?

▪ Ne a mea aogā e maua ne tatou mai fakaosoosoga o Iesu?