Ke Tauloto ki te Auala ne Fakafesagai Atu ei a Iesu ki Fakaosoosoga

Mai tua eiloa o te papatisoga a Iesu ne Ioane, ne takitaki atu ne te agaga o te Atua a Iesu ki te koga lavaki i Iuta. E uke ‵ki a mea ne ‵tau o mafaufau a ia ki ei. I tena papatisoga “ne matala te lagi.” (Mataio 3:16) Tela la, ne mafai o toe masaua ne ia ana mea ne tauloto kae fai i te lagi. A te ‵tonuga loa, e uke ‵ki a mea ne ‵tau o mafaufau ‵loto a ia ki ei!

Ne fakamāumāu ne Iesu a aso e 40 mo po e 40 i te koga lavaki. I te taimi tenā, e seki kai eiloa a ia. I te taimi ko likiliki malosi ei a Iesu, ne fanatu a Satani te Tiapolo o fakaosooso a ia, ana muna: “Kafai koe ko te tama a te Atua, fai atu ki fatu konei ke liu falaoa.” (Mataio 4:3) Ona ko te mea e iloa ne ia me se mea ‵se ke fakaaoga ne ia tena ‵mana fakavavega ke fakama‵lie aka ei ana manakoga totino, ne ‵teke ne Iesu a te fakaosoosoga tenā.

Ne seki gata atu i konā a taumafaiga a te Tiapolo. Ne tofotofo aka ne ia a te suā auala. Ne fakaitaita atu a ia ki a Iesu ke eva ki lalo mai te ‵pui o te faletapu. Ne seki talia ne Iesu ke fai ne ia se vaegā mea fakamatamata penā. Ne siki atu ne Iesu a pati mai te Tusi Tapu ke fakaasi atu i ei me se mea ‵se ke tofotofo a te Atua i se auala penā.

Kae ko te tolu o fakaosoosoga, ne fakaasi atu i ei ne te Tiapolo ki a Iesu a “malo katoa o te lalolagi mo olotou ‵malu,” ana muna: “Ka avatu ne au a mea katoa konei ki a koe māfai e ifo kae tapuaki fakatasi mai fua koe ki a au.” Kae ne ‵teke tonu atu a Iesu, ana muna: “Fano keatea e Satani!” (Mataio 4:8-10) Ne ita fitifiti tou tagata ma takavale a ia i te fakaosoosoga ke fai se mea ‵se, ona ko te mea ne iloa ne ia me ko Ieova fua e ‵tau o tapuaki atu ki ei. E tonu, ne fakaiku aka ne ia ke tumau eiloa a ia i te fakamaoni ki te Atua.

E mafai o maua ne tatou a mea aoga mai fakaosoosoga konei mo te auala ne saga atu ei a Iesu. A fakaosoosoga konā ne mea ‵tonu eiloa, telā e fakaasi mai i ei me i te Tiapolo e sē se uiga masei fua, e pelā mo pati a nisi tino. A ia se tino tonu eiloa telā e se matea ki mata. E fakaasi mai foki ne te tala tenei me i a malo katoa o te lalolagi e a te Tiapolo; e pule atu a ia ki ei. E mafai pefea o fakaosooso tonu atu ki te Keliso a te ofoatuga ne ia o malo konā?

Ne toe fai atu te Tiapolo me ne fiafia a ia ke tuku atu se taui ki a Iesu māfai e ifo fakatasi atu fua ki a ia, kae ka tuku atu ki a ia a malo katoa o te lalolagi. Kāti ka taumafai foki te Tiapolo o fakaosooso tatou i se auala penā, kāti ka tuku mai ne ia a avanoaga ‵gali ki a tatou ke maua a koloa faka-te-lalolagi, pulega, io me ko tulaga ma‵luga. Ka ‵poto eiloa tatou ke tau‵tali atu ki te fakaakoakoga a Iesu mai te tumau o tatou i te fakamaoni ki te Atua faitalia me se a te fakaosoosoga! Kae masaua la me ne tiakina fua ne te Tiapolo a Iesu “ke oko ki se isi taimi ‵lei.” (Luka 4:13) E mafai foki o fai a ia penā ki a tatou, tela la, e ‵tau eiloa o matapula‵pula faeloa tatou.