Mataupu e 57

Te Alofa ki Tino Fakaa‵lofa

KO OTI ne taku fakamasei ne Iesu te kau Falesaio ona ko olotou tū kolā ne fakama‵lie aka ei olotou manakoga, kae ne tiakina ne Iesu te koga tenā fakatasi mo ana soko. Kāti e masaua ne koe, me ne fatoā taumafai a ia ke olo fakatasi latou mo ana soko o malōlō malie aka, kae ne fakamakosu te mea tenā i te taimi ne maua ei latou ne te vaitino. I konā loa, ne olo fakatasi atu latou mo ana soko ki kogā fenua i tafa o Tulo mo Saitonu, i te fia o maila ki mātū. Kāti tenā fua te malaga e tasi ne olo atu ei a Iesu mo ana soko ki koga i tua atu o tuakoi o Isalaelu.

Ko oti ne maua aka ne Iesu se fale mō olotou ‵nofo, kae ne fakailoa atu ne ia me e se manako a ia ke iloa aka ne tino a te koga telā e ‵nofo latou i ei. Kae ke oko eiloa ki te fenua telā ne seki aofia i fenua o te kau Isalaelu, ne seki mafai o fai ne ia ke se fakalavelave mai a tino ki a ia. Ne maua aka a ia ne se fafine Eleni, telā ne fanau mai i Foinikia i Sulia, kae ne akai atu tou fafine penei: “Te Aliki, te Tama a Tavita, alofa mai ki a au! A taku tama fafine ko pukea masei ne temoni.” Kae e seai eiloa se pati a Iesu ne tali atu ki a ia.

Oti aka, ne fai atu penei a soko o Iesu ki a ia: “Uga atu ke na fano, me e logoā mai i ‵tou tua.” Kae ne fakamatala atu penei ne Iesu te pogai ne seki saga atu ei a ia ki te fafine tenā: “Au ne uga mai fua ki mamoe ‵galo o te kāiga o Isalaelu.”

Kae ne seki fano keatea te fafine. Ne fanatu a ia ki a Iesu, kae ne totuli ifo i ana mua. Ne akai atu tou fafine penei: “Te Aliki, fesoasoani mai ki a au.”

Ne pefea te fakaosofia o te loto o Iesu ona ko te ‵nau o te fakamolemole tenā a te fafine! Kae ne toe fakasino atu a ia ki tena tiute muamua, ko te tavini atu ki tino o te Atua i Isalaelu. Kae kāti ne fia tofotofo aka ne ia te fakatuanaki o te fafine tenā, telā ne fakaaogā ei ne ia te manatu fakailoga tino o te kau Iutaia e uiga ki tino mai nisi fenua, ana muna: “E se ‵tau o tuku atu a meakai a tama‵liki ki tamā kuli.”

Mai tena leo fakaalofalofa mo ana mata alofa, ne fakaasi tonu atu ei ne Iesu tena loto alofa ki tino kolā e se ne tino Iutaia. Ne fakamāmā foki ne ia te fakatusaga o tino mai Fenua Fakaa‵tea ki kuli, mai te fai atu me i a latou ne “tamā kuli,” io me ne punuā kuli. Ne seki ita i ei te fafine, kae ne fakaaogā foki ne ia a pati fakailoga tino a tino Iutaia kolā ne fakasino atu a Iesu ki ei, kae ne fai atu tou fafine penei mo te loto maulalo: “Te Aliki, e tonu koe, kae ko tamā kuli e ‵kai foki ki matutuga o mea kolā e ta­‵tela mai i te laulau a olotou pule.”

“A koe se fafine e lasi tou fakatuanaki!” ko te tali a Iesu. “Ko te mea e manako koe ki ei, e fai eiloa penā.” Kae tenā loa te mea ne tupu! I tena fokiatuga ki tena fale, ne maua ei ne tou fafine a tena tamaliki e nofo mai i tena moega, kae ko ‵lei katoa tena masaki.

Ne tiakina ne Iesu mo ana soko a fenua o Saitonu kolā e ‵tu i tafātai, kae ne olo atu latou ki uta, ki te koga telā e kamata o tafe mai ei te vaitafe ko te Iolitana. Kāti ne olo atu latou ki te suā feitu o te Iolitana i koga ki mātū o te Namo o Kalilaia kae ne olo atu ei latou ki Tekapoli i te feitu ki saegāla o te namo. I konā loa ne ‵kake ei latou ki luga, i se mauga. Kae ne maua latou ne te vaitino kae ne aumai ne latou ki a Iesu olotou tino ‵pili, tino ‵kivi, mo tino gūgū, penā foki loa mo nisi tino aka kolā ne ma‵saki io me ne pa‵kia. Ne fai pelā me ne tiaki fua ne latou a tino konā i mua o Iesu, kae ne faka‵lei aka ne ia a latou. Ne ofo malosi i ei te vaitino, me ne matea atu ne latou i tino gūgū ko fai‵pati, ko sa‵sale atu a tino ‵pili, kae ko ‵kite a mata o tino ‵kivi; kae ne ‵viki atu i ei latou ki te Atua o Isalaelu.

Ne saga malosi atu a Iesu ki te tagata ‵tuli e tokotasi telā ko se maua o faipati faka‵lei. E mā sāle a tino taliga ‵tuli, kae maise eiloa māfai ko ‵nofo atu latou i tino e tokouke. Kāti ne matea atu ne Iesu a te manavase o te tagata tenā. Tela la, ona ko te alofa ne ave keatea ei ne Iesu a ia mai te vaitino, kae na ko laua ake eiloa. Kae ne fakaasi atu i ei ne Iesu me ne a ana mea ka fai mō te tagata tenā. Ne tuku ne ia ana maikao ki loto i taliga o te tagata, ne puaki atu, kae ne fakapatele atu ki tena alelo. Oti aka, ne kilo atu a Iesu ki te lagi, ne mānava fi‵ta kae ne fai atu penei: “Ke ‵logo ou taliga.” I konā loa, ne toe ‵logo ei a taliga o te tagata tenā, kae ne mafai foki ne ia o faipati faka‵lei.

Ko oti ne faka‵lei aka ne Iesu a tino e tokouke, kae ne loto fakafetai i ei te vaitino. Olotou muna: “Ko oko eiloa i te ‵lei ana galuega ne fai. Ko fai ne ia a tino ‵tuli ke ‵logo olotou taliga, mo tino gūgū ke fai‵pati!” Mataio 15:21-31; Maleko 7:24-37.

▪ Kaia ne seki faka‵lei fakavave ei ne Iesu te tamaliki a te fafine Eleni?

▪ Oti aka loa, ne ave ki fea ne Iesu ana soko?

▪ Ne a faiga alofa ne fai ne Iesu ki te tagata taliga ‵tuli telā e se ‵lei tena faipati?