Mea ne Iku Mai i te Galuega Talai​—“Fatoaga . . . ko ‵Kena Aka Eiloa i Fuataga e ‵Tau o Tau”

1, 2. (a) Kaia ne ‵segi masei ei a soko? (e) Ne a fuataga e ‵tau o tau kolā ne faipati a Iesu e uiga ki ei?

NE ‵SEGI masei eiloa a soko. Ne fai atu a Iesu ki a latou: “‵Kilo aka ki luga kae onoono atu ki fatoaga, me ko ‵kena aka eiloa i fuataga e ‵tau o tau.” Ne ‵kilo atu latou ki te koga telā ne fakasino atu ki ei a Iesu, kae ne lavea atu fua ne latou a fatoaga, e se ‵kena, kae lanu launiu​—ko te ‵kala eiloa o saito kolā ko fatoa ‵somo aka. ‘Ne a fuataga e ‵tau o tau?’ kāti ne fai mai latou. ‘E ‵tau o tau a fuataga i nai masina mai mua nei.’​—Ioa. 4:35.

² Kae ne seki faipati eiloa a Iesu ki fuataga ‵tonu kolā e ‵tau o tau. I lō te fai penā, ne fakaaoga ne ia te vaitaimi tenei ke fakaasi atu ei ki ana soko a akoakoga tāua e lua e uiga ki fuataga e ‵tau o tau i te feitu faka-te-agaga​—telā e fakauiga ki tino. Ne a akoakoga tāua konā? Ke na mafau‵fau tatou ki te tala kātoa ko te mea ke maua aka ei a te tali.

Se Kalagaga mō Galuega mo se Folafolaga e Uiga ki te Fiafia

3. (a) Se a te mea ne fakamalosi aka ei a Iesu ke fai atu: “Fatoaga . . . ko ‵kena aka eiloa i fuataga e ‵tau o tau”? (Ke onoono ki te fakamatalaga mai lalo.) (e) Ne fakamaina faka‵lei atu pefea ne Iesu ana pati konā?

³ Ne sau‵tala eiloa a Iesu mo ana soko i te fakaotiga o te 30 T.A., i tafa o te fa‵kai o Samalia ko Sukala. I te taimi ne olo atu ei ana soko ki te fa‵kai, ne faka‵tali a Iesu i se vaikeli telā ne fakaasi atu ei ne ia a muna‵tonu faka-te-agaga ki se fafine telā ne maina fakavave i te tāua o ana akoakoga. I te taimi ne ‵foki atu ei a soko ki a Iesu, ne fanatu fakavave a te fafine ki Sukala o fai atu ki ana tuakoi e uiga ki mea ‵gali ne lagona ne ia. Ne fakamalosi aka ne tena tala a te fia‵fia malosi o tino, kae ne ‵tele fakavave atu ana tuakoi e tokouke ki te vaikeli o fakafetaui ki a Iesu. Kāti ko te taimi foki eiloa tenā​—i te taimi ne kilo atu ei a Iesu ki fatoaga i se koga ‵mao kae ne lavea atu ne ia se vaitino o tino Samalia ko olo atu​—telā ne fai atu ei a ia: “Onoono atu ki fatoaga, me ko ‵kena aka eiloa i fuataga e ‵tau o tau.”a Kae ne toe fakamaina atu ne Iesu a te mea telā ne fakauiga a ia ki ei, e se ko fuataga ‵tonu kolā e ‵tau o tau, kae se mea faka-te-agaga, ana muna: “Te tino tau fuataga . . . ko ‵luku mai a fuataga mō te olaga se-gata-mai.”​—Ioane 4:5-30, 36.

4. (a) Ne a akoakoga tāua e lua ne fakaasi mai ne Iesu e uiga ki fuataga e ‵tau o tau? (e) Ne a fesili ka mafau‵fau tatou ki ei?

⁴ Ne a akoakoga tāua e lua ne fakaasi mai ne Iesu e uiga ki fuataga kolā e ‵tau o tau i te feitu faka-te-agaga? A te mea muamua, e tāua ‵ki eiloa te galuega. A tena folafolaga me i “fatoaga . . . ko ‵kena aka eiloa i fuataga e ‵tau o tau” se ‵kamiga mō ana soko ke ga‵lue malosi. Ke faka‵mafa atu ki ana soko a te tāua ke fai fakavave te galuega, ne toe fai atu a Iesu: “Ko oti ne maua ne te tino tau fuataga a tena ‵togi.” Ao, ko oti eiloa ne kamata te ‵tauga o fuataga​—ko se toe ‵tau o fakatalave! A te lua, e fia‵fia eiloa a tino ga‵lue. A tino ‵toki mo tino tau fuataga ka “fia‵fia fakatasi,” ko muna a Iesu. (Ioa. 4:35e, 36) E pelā eiloa mo te lasi o te fiafia o Iesu ke lavea atu me “e tokouke a tino Samalia . . . ne fakatuanaki ki a ia,” e penā foki te fiafia lasi ka maua ne ana soko, i te taimi e ga‵lue ei latou mo te loto kātoa i te ‵tauga o fuataga. (Ioa. 4:39-42) E isi eiloa se uiga fakapito o te tala tenei i te senitenali muamua mō tatou, ona ko te mea e fakaasi mai i ei a mea kolā e ‵tupu i aso nei i te ‵toe taimi sili e fai ei te ‵tauga lasi o fuataga i te feitu faka-te-agaga. Ne kamata anafea a te ‵tauga tenei o fuataga i aso nei? Ko oi e aofia i ei? Kae ne a mea ne iku mai i ei?

Ko Fai ne te ‵Tou Tupu a te Takitakiga i te ‵Toe Tauga Lasi Eiloa o Fuataga

5. Ko oi e fai ne ia te takitakiga i te ‵tauga o fuataga i te lalolagi kātoa, kae e fakaasi mai pefea ne te fakaasiga a Ioane a te tāua o te galuega?

⁵ I se fakaasiga telā ne tuku atu ki te apositolo ko Ioane, ne fakaasi atu ne Ieova me ne fakasopo aka ne Ia a Iesu ke takitaki ne ia te ‵tauga o fuataga i te lalolagi kātoa, telā e fakauiga ki tino. (Faitau te Fakaasiga 14:14-16.) I te fakaasiga tenei, e fakamatala mai i ei a Iesu e pelā me e maua ne ia se foualiki mo se naifi mata ‵kai. E fakamaoni mai ne te “foualiki aulo i tena ulu [o Iesu]” a tena tulaga e pelā me ko te Tupu telā ko pule mai nei. A te “naifi mata ‵kai i tena lima” e fakamautinoa mai i ei tena tulaga e pelā me ko te Tino tau fuataga. I te fai atu e auala i se agelu “me ko ma‵tua ‵lei a fuataga o te lalolagi,” ne faka‵mafa atu ei ne Ieova me ko oko eiloa te tāua o te galuega. A te ‵tonuga loa, “ko oko mai te itula ke ‵kati ei a lakau”​—ko se toe ‵tau o fakatalave! I te saga atu ki te fakatonuga a te Atua ke “tuku ifo te naifi,” ne ‵kapa atu a Iesu ki tena naifi, kae tau ne ia a fuataga i te lalolagi​—telā e fakauiga ki tino o te lalolagi. E toe fakamasaua mai ne te fakaasiga gali tenei me i “fatoaga. . . ko ‵kena aka eiloa i fuataga kolā e ‵tau o tau.” E mata, e fesoasoani mai te fakaasiga tenei ke iloa aka ne tatou a te taimi e kamata ei te ‵tauga o fuataga i te lalolagi kātoa? Ao!

6. (a) Ne kamata anafea ‘te taimi ne ‵kati ei a saito’? (e) Ne kamata anafea te “‵katiga o fuataga i te lalolagi”? Fakamatala mai.

⁶ Ona ko te mea ne lavea atu i te fakaasiga a Ioane i te Fakaasiga mataupu e 14, me e isi se foualiki i te ulu o Iesu (fuaiupu e 14), e fakamaoni mai i ei me ko oti eiloa ne taunu tena fakasopoga mo fai te Tupu i te 1914. (Tanielu 7:13, 14) I se taimi mai tua ifo i ei, ne fakatonu atu ki a Iesu ke kamata te ‵katiga o saito (fuaiupu e 15.) E lavea atu foki te fakasologa tenā o mea ‵tupu i te tala fakatusa a Iesu e uiga ki te ‵katiga o saito, telā ne fai mai a ia: “A te ‵katiga o saito ko te vaitaimi o te gataga o te olaga tenei.” Tela la, a te vaitaimi o te ‵katiga o saito mo te gataga o te olaga tenei ne kamata eiloa i te taimi e tasi​—i te 1914. Fakamuli loa ne kamata ei te ‵katiga tenā i “te taimi e ‵kati ei a saito.” (Mata. 13:30, 39) Mai i mea ne iloa ne tatou i aso ko ‵teka, e mafai o lavea atu ne tatou me ne kamata eiloa a te ‵katiga o saito mai tua o te taimi ne kamata ei o pule mai a Iesu e pelā me ko te Tupu. Muamua la, mai te 1914 ke oko ki te kamataga o te 1919, ne fai ei ne Iesu a te galuega ko te faka‵maga o ana soko fakaekegina. (Mal 3:1-3; 1 Pe. 4:17) Kae i te 1919, ne kamata ei te “‵katiga o fuataga i te lalolagi.” E aunoa mo se fakatalave, ne fakaaoga ne Iesu tena tavini fakamaoni telā ne fatoa fakasopo aka, ke fesoasoani atu ki ‵tou taina ke lavea ne latou te tāua o te galuega talai. Mafaufau la ki mea ne ‵tupu.

7. (a) Se a te sukesukega ne fesoasoani atu ki ‵tou taina ke iloa ne latou a te tāua o te galuega talai? (e) Se a te mea ne fakamalosi atu ki ‵tou taina ke fai ne latou?

⁷ Ne fai mai The Watch Tower i a Iulai 1920: “Mai te sukesukega ki te Tusi Tapu, e foliga mai me ne tuku atu se tauliaga lasi ki te lotu ke fakaoko atu te fekau e uiga ki te malo.” E pelā mo te muna fakavaloaga a Isaia, ne fesoasoani atu ki taina ke lavea ne latou me e ‵tau o folafola atu ki te lalolagi kātoa a te tala e uiga ki te Malo. (Isa. 49:6; 52:7; 61:1-3) E se iloa ne latou te auala ka fai ei se vaegā galuega penā, kae ne tali‵tonu latou me ka ‵tala mai eiloa ne Ieova a te auala mō latou. (Faitau te Isaia 59:1.) Ona ko te mainaga manino tenei i te tāua o te galuega talai, ne fakamalosi aka ei ‵tou taina ke momea aka te faiga o te lotou galuega talai. Ne ‵saga atu pefea a taina ki ei?

8. I te 1921, ne a manatu ‵tonu tāua e lua kolā ne maina i ei ‵tou taina e uiga ki te galuega talai?

⁸ Ne faka‵pula mai penei i The Watch Tower i a Tesema 1921: “Ko te ‵toe tausaga ‵lei eiloa tenei; me ko oti ne lagona ne se aofaki lasi o tino a te fekau e uiga ki te munatonu i te 1921 i lō so se tausaga mai mua atu i ei.” Ne toe fai mai te mekesini: “Koi uke eiloa a mea e ‵tau o fai. . . . Ke na fai eiloa ne tatou mo te loto fiafia.” Onoono aka la me ne maina pefea a taina i manatu ‵tonu tāua e lua e uiga ki te galuega talai kolā ne fakaasi atu ne Iesu ki ana apositolo: E tāua ‵ki te galuega, kae ka fia‵fia eiloa a tino ga‵lue.

9. (a) I te 1954, ne a muna i The Watchtower e uiga ki te galuega ko te ‵tauga o fuataga, kae kaia? (e) Ne fanaka pefea ki luga te aofaki o tino talai i te lalolagi kātoa i loto i se 50 tausaga ko ‵teka? (Ke onoono ki te fakasologa ko “Te Fanakaga o te Galuega i te Lalolagi Kātoa.”)

⁹ I tausaga talu mai te 1930, mai tua o te taimi ne malamalama ei a taina me ka talia ne se vaitino tokouke o nisi mamoe a te fekau o te Malo, ne momea aka ei te uke o mea ne fai i te galuega talai. (Isa. 55:5; Ioa. 10:16; Faka. 7:9) Se a te ikuga? Ne gasolo aka eiloa te aofaki o tino kolā e talai atu te fekau o te Malo mai te 41,000 i te 1934 ki te 500,000 i te 1953! Ne mafai eiloa o fai ‵tonu mai te lōmiga o The Watchtower i a Tesema 1, 1954: “Ko te agaga eiloa o Ieova mo te ‵mana o tena Muna ne mafai ei o fai a te ‵tauga lasi tenei o fuataga i te lalolagi kātoa!”b​—Saka. 4:6.

Mea ne Iku Mai i te ‵Tauga o Fuataga​—Ne ‵Valo Mai i Tugapati Fakauiga

10, 11. I te tala fakatusa e uiga ki te fuaga o te sinapi, ne a vaega o te olaakaga o te fuaga ne fakaasi mai i ei?

¹⁰ I ana tala fakatusa e uiga ki te Malo, ne ‵valo mai ne Iesu i tugapati fakauiga a te ikuga o te galuega ko te ‵tauga o fuataga. Ke mafau‵fau tatou ki te tala fakatusa e uiga ki te fuaga o te sinapi mo te mea faka‵fete. Ka ‵saga fakapito atu eiloa tatou ki te auala ne fakataunu ei a mea konā i te taimi o te gataga.

¹¹ Te tala fakatusa o te fuaga o te sinapi. Ne ‵toki ne se tagata a te fuaga o te sinapi. Ne ola aka ei mo fai se lakau telā ne fai ne manu olotou ofaga i ei. (Faitau te Mataio 13:31, 32.) Ne a vaega o te olaakaga o te fuaga ne fakaasi mai i te tala fakatusa? (1) Ne fakaofoofogia te lasi o te olaakaga. A “te ‵toe fuaga foliki eiloa” ne fai mo fai se lakau telā e “‵lasi foki ana kaula.” (Male. 4:31, 32) (2) E mautinoa eiloa tena olaakaga. “Kafai ko oti ne ‵toki [te fuaga], ko ola aka” ei. Ne seki fai mai a Iesu, “Kāti e mafai o ola aka.” Ikai, ne fai mai a ia: “Ko ola aka.” Ne seki mafai o taofi tena olaakaga. (3) A te ola aka o te lakau e fai ei ke fia olo atu ki ei a manu kae e ‵nofo foki i ei. “Ko mafai ei o fai ne manu eva o te lagi olotou ofaga i malumaluga o ana kaula.” E fakasino atu pefea a vaega e tolu konei ki te ‵tauga o fuataga i te feitu faka-te-agaga i aso nei?

12. E fakasino atu pefea a te tala fakatusa e uiga ki te fuaga o te sinapi ki te ‵tauga o fuataga i aso nei? (Ke onoono ki te fakasologa ko “Te Fanakaga o te Aofaki o A‵koga Faka-te-Tusi Tapu.”)

¹² (1) Te Lasi o te Olaakaga: E fakaasi mai i te tala fakatusa a te olaakaga o te fekau o te Malo mo te fakapotopotoga Kelisiano. Talu mai te 1919, ne fakamaopoopo aka ei a tino ga‵lue loto finafinau ki loto i te fakapotopotoga Kelisiano telā ko oti ne toe fakatu aka. I te taimi tenā, ne mu‵tana fua te aofaki o tino ga‵lue, kae ne gasolo aka eiloa fakavave ki luga. A te ‵tonuga loa, tena olaakaga i tausaga kamata mai te 1900 ke oko mai aso nei ne fakaofoofogia eiloa. (Isa. 60:22) (2) Fakamautinoaga: Ne seki mafai eiloa o taofi aka te olaakaga o te fakapotopotoga Kelisiano. Faitalia te uke o ‵tekemaiga mai fili o te Atua, kolā e fai pelā me ne kaupapa, ki luga i te fuaga foliki, ne tumau eiloa tena olaakaga​—ne fakaseaoga ne ia a mea faiga‵ta katoa. (Isa. 54:17) (3) Koga nofo: A “manu eva o te lagi” kolā e fai olotou ofaga i te lakau e fakaata mai i ei a te fia miliona o tino loto ‵lei, mai fenua kāti e 240, kolā ne talia ne latou te fekau o te Malo mai te fai mo fai ne vaega o te fakapotopotoga Kelisiano. (Eseki. 17:23) E maua ei ne latou i konā a mea‵kai faka-te-agaga, fakamalosiga, mo te puipuiga.​—Isa. 32:1, 2; 54:13.

13. Ne a vaega o te ‵fetega kolā e fakaasi mai i te tala fakatusa e uiga ki te mea faka‵fete?

¹³ Te tala fakatusa ki te mea faka‵fete. Mai tua o te fakaopoopo atu ne se fafine a mū mea faka‵fete ki se palugā falaoa lasi, ne ‵fete ei a te paluga kātoa. (Faitau te Mataio 13:33.) Ne a feitu o te ‵fetega e fakaasi mai i te tala fakatusa tenei? Ke na mafau‵fau tatou ki mea e lua. (1) A te ‵fetega e māfua mai i ei te ‵fuliga. E salalau atu te mea faka‵fete “ke oko ki te taimi ne ‵fete ei a te paluga kātoa.” (2) Ne tumau eiloa te ‵fetega. E faka‵fete ne te mea faka‵fete a “palugā falaoa ‵lasi e tolu”​—te paluga kātoa. E fakasino atu pefea a feitu e lua konei ki te ‵tauga o fuataga i te feitu faka-te-agaga i aso nei?

14. E fakasino atu pefea te tala fakatusa e uiga ki te mea faka‵fete ki te ‵tauga o fuataga i aso nei?

¹⁴ (1) Te ‵fuliga: E fakauiga a te mea faka‵fete ki te fekau o te Malo, kae ko palugā falaoa ‵lasi e fakaata mai i ei a tino. E pelā eiloa mo te ‵fuliga ne te mea faka‵fete a te falaoa mai tua o te paluga fakatasi o mea konā e lua, e penā foki te ‵fuliga ne te fekau o te Malo a loto o tino mai tua o te taliaga ne latou o te fekau tenā. (Loma 12:2) (2) Tumau: A te salalau atu o te mea faka‵fete e fakauiga ki te fakasalalauatuga o te fekau o te Malo. E galue eiloa te mea faka‵fete i loto i te falaoa ke oko ki te taimi e salalau atu ei i te paluga kātoa. E penā foki loa, e salalau atu te fekau o te Malo “ki toe koga ‵mao i te lalolagi.” (Galu. 1:8) E fakaasi mai foki i te vaega tenei o te tala fakatusa me ke oko foki eiloa ki fenua kolā e tapu te ‵tou galuega i ei, ka salalau atu eiloa te fekau o te Malo ki ei, faitalia me e se iloa ne te tokoukega o tino a te ‵tou galuega i kogā koga konā o te lalolagi.

15. Ne fakataunu pefea a pati i te Isaia 60:5, 22? (Ke onoono foki ki pokisi “Ne Fai Eiloa ne Ieova,” te itulau e 93, mo te “Te Auala ne Fai ei se ‘Kāiga Tafasili i te Foliki’ mo Fai se ‘Fenua Takutakua,’” te itulau e 96-97.)

¹⁵ Kāti i se 800 tausaga ko ‵teka a koi tuai o fai mai ne Iesu a tala fakatusa konā, ne ‵valo mai eiloa ne Ieova e auala i a Isaia, i tugapati faigofie, a te lasi o te ‵tauga o fuataga faka-te-agaga i aso nei mo te fiafia telā ka iku mai i ei.c E fakamatala mai ne Ieova a te ua‵lolo atu o tino “mai i koga ‵mao” ki tena fakapotopotoga. A te saga atu o tou tagata ki se ‘fafine,’ telā e fakaata mai i aso nei i te ‵toega o te kau fakaekegina i te lalolagi, e fai mai a ia: “Ka lavea ne koe a te mea tenā ka ‵fonu koe i te fiafia; ka ‵pole tou foitino i te fiafia. A te maumea o malo ka aumai ki a koe; a olotou koloa ka aumai mai i te vasa ki a koe.” (Isa. 60:1, 4, 5, 9) Ko oko eiloa i te ‵tonu o pati konā! I aso nei, ko ‵fonu eiloa a tavini a Ieova kolā ko leva ne tavini atu ki a ia i te fiafia, i te taimi e onoono atu ei latou ki te gasoloakaga o te aofaki o tino talai o te Malo i olotou fenua, mai i nai tino ki te fia o afe.

Pogai e ‵Tau ei o Fia‵fia a Tavini Katoa a Ieova

16, 17. Se a te pogai e tasi e ‘fia‵fia fakatasi ei a te tino ‵toki mo te tino tau fuaga’? (Ke onoono foki ki te pokisi “Te Auala ne Otia ei a Loto o Tino e Tokolua i te Amazon i Tamā Pepa e Lua.”)

¹⁶ Ne masaua ne koe a pati ne fai atu ne Iesu ki ana apositolo: “Te tino tau fuataga . . . ko ‵luku mai a fuataga mō te ola se-gata-mai, ko te mea ke fia‵fia fakatasi a te tino ‵toki mo te tino tau fuataga.” (Ioa. 4:36) E mafai pefea o “fia‵fia fakatasi” tatou i te ‵tauga o fuataga i te lalolagi kātoa? I nai auala. Ke onoono aka tatou ki auala e tolu.

¹⁷ Muamua la, e fia‵fia ‵tatou ke lavea atu a te tulaga o Ieova i te galuega. I te taimi e talai atu ei ne tatou a te fekau o te Malo, e ‵toki ne tatou a fuaga. (Mata. 13:​18, 19) Kafai e fesoasoani atu tatou ki se tino ke fai mo fai se soko o Keliso, ko tau ne tatou a fuaga. Kae e maua ne tatou katoa a te fiafia lasi i te taimi e onoono atu ei tatou ki te auala e fai ei ne Ieova ke “‵somo aka a fuaga [o te Malo] kae ko maluga.” (Male. 4:27, 28) E ‵somo aka fakamuli a nisi fuaga kolā e laku tatela atu ne tatou kae tau ne nisi tino. Kāti e tai ‵pau tou tala mo te mea ne tupu ki a Joan, se tuagane Kelisiano i Peletania telā ne papatiso i te 60 tausaga ko ‵teka. Ne fai mai tou fafine: “Ne fetaui au mo tino kolā ne fai mai me ne ‵toki ne au se fuaga i olotou loto i te taimi ne talai atu ei au ki a latou i te fia o tausaga ko ‵teka. E aunoa mo te iloa ne au, ne suke‵suke fakamuli latou mo nisi Molimau ki te Tusi Tapu kae ne fesoasoani atu ke fai mo fai ne tavini a Ieova. E fiafia eiloa au me ne ola aka kae ne tau foki a te fuaga telā ne ‵toki ne au.”​—Faitau te 1 Kolinito 3:6, 7.

18. Se a te pogai o te fiafia telā ne taku mai i te 1 Kolinito 3:8?

¹⁸ A te lua o mea, e tumau eiloa tatou i te fia‵fia māfai e masaua ne tatou me ne fai mai a Paulo: “Ka maua eiloa ne lāua taki tokotasi te taui e ‵tusa mo lā galuega ne fai.” (1 Koli. 3:8) E tuku atu eiloa te taui e ‵tusa mo te faiga o te galuega, kae e se ko ikuga o te galuega tenā. Ko oko eiloa i te fakamalosi loto a te fakatalitonuga tenā ki tino kolā e talai atu i koga kolā e se tokouke a tino e fia‵fia! I te kilokiloga a te Atua, a Molimau katoa kolā e ‵kau atu mo olotou loto kātoa ki te galuega ko te ‵tokiga e “‵fua malosi mai faeloa” tela la, e ‵tau eiloa mo latou o fia‵fia.​—Ioa. 15:8; Mata. 13:23.

19. (a) E fakasino atu pefea te valoaga a Iesu i te Mataio 24:14 ki te ‵tou fia‵fia? (e) Se a te mea e ‵tau o masaua ne tatou māfai e se manuia ‵tou taumafaiga i te faiga o soko?

¹⁹ A ko te tolu, e fia‵fia tatou me e fakataunu ne te ‵tou galuega a te valoaga. Mafaufau ki te tali a Iesu ki ana apositolo i te taimi ne fesili atu ei latou: “Se a foki te fakailoga o tou fakatasi mai mo te taimi o te gataga o te olaga tenei?” Ne fai atu a ia ki a latou me i te vaega e tasi o te fakailoga ko te galuega talai i te lalolagi kātoa. E mata, e faipati a ia e uiga ki te galuega ko te faiga o soko? Ikai. Ne fai mai tou tagata: “A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa.” (Mata. 24:3, 14) Tela la, a te talaiatuga o te Malo​—ko te ‵tokiga o te fuaga​—se vaega o te fakailoga. Tela la, i te taimi e talai atu ne tatou a te tala ‵lei o te Malo, e masaua faeloa ne tatou me kafai e se iku manuia ‵tou taumafaiga i te faiga o soko, e manuia eiloa tatou i te tukuatuga o “se molimau.”d Ao, faitalia me se a te auala e ‵saga mai ei a tino, e ‵kau atu eiloa tatou ki te fakataunuga o te valoaga a Iesu kae maua ei ne tatou se tulaga fakaaloalo ke tavini atu e pelā me ne tino “e ga‵lue fakatasi mo te Atua.” (1 Koli. 3:9) Se mea ‵tau eiloa ke maua te fiafia!

“Mai te Feitu o te Lalolagi ki te Suā Feitu”

20, 21. (a) Ne fakataunu pefea a pati i te Malaki 1:11? (e) E pelā mo te galuega ko te ‵tauga o fuaga, se a te mea e fakaiku aka ke fai ne koe, kae kaia?

²⁰ I te senitenali muamua, ne fesoasoani atu a Iesu ki ana apositolo ke lavea ne latou me e tāua a te galuega ko te ‵tauga o fuataga. Mai te 1919 o vau ki mua, ne fesoasoani atu a Iesu ki ana soko i aso nei, ke malamalama i te munatonu tenā. Ona ko te mea tenā ne momea aka eiloa te uke o mea ne fai ne tino o te Atua. A te ‵tonuga loa, ne seki mafai lele eiloa o taofi aka te galuega ko te ‵tauga o fuaga. E pelā mo te mea ne ‵valo mai ne te pelofeta ko Malaki, ko fai eiloa te galuega talai i aso nei “mai te feitu o te lalolagi ki te suā feitu.” (Mala. 1:11) Mai te feitu o te lalolagi ki te suā feitu​—mai te saegala ki te togala, faitalia me e ‵nofo atu latou i fea​—e ga‵lue kae fia‵fia fakatasi a tino ‵toki mo tino tau fuaga. Kae mai te saegala ki te togala​—mai te taeao ki te afiafi, io me ko te aso kātoa​—e ga‵lue eiloa tatou mo te iloa me e tāua ‵ki eiloa te galuega.

²¹ I te taimi e toe ‵kilo atu ei tatou ki te 100 tupu tausaga ko ‵teka kae lavea atu a te tamā potukau o tavini a te Atua ko gasolo aka ki ‘se fenua takutakua,’ e ‘‵fonu kae ‵pole’ eiloa ‵tou loto i te fia‵fia. (Isa. 60:5, 22) Ke na fai eiloa te fiafia tenā mo ‵tou a‵lofa ki a Ieova, “te Matai o te galuega,” mo fakamalosiga ki a tatou taki tokotasi ke tumau i te ‵kau atu ki te fakaotiga o te ‵tauga sili tenei o fuaga mō taimi katoa!​—Luka 10:2.