Ke Kau Katoatoa Atu Ki Te ‵Katigā Saito Faka-te-agaga Lasi

“Ke ga‵lue malosi koutou i te galuega a te Aliki.”​—1 KOLINITO 15:58.

1. Se a te ‵kamiga ne fai atu ne Iesu ki ana soko?

I TE taimi ne faimalaga atu ei i te kogā fa‵kai o Samalia i te fakaotiotiga o te 30 T.A., ne mānava malie a Iesu i se vaikeli telā e pili ki te fa‵kai o Sukala. Ne fai atu a ia i konā ki ana soko: “‵Kilo otou mata ki fatoaga, ko iloa ei ne koutou me ko ‵tau o ‵kati.” (Ioane 4:35) Ne seki fakasino atu a Iesu ki se ‵katigā saito tonu, kae ki se fakamaopoopoga faka-te-agaga o tino loto fakamaoni kolā e fai mo fai ana soko. Ne fai eiloa ana pati e pelā me se ‵kamiga ki ana soko ke aofia atu i te ‵katigā saito tenā. E uke ‵ki a galuega e ‵tau o fai kae e mu‵tana fua a te taimi e ‵tau o fakaoti i ei!

2, 3. (a) Se a te mea e fakaasi mai i ei me ko ‵nofo nei tatou i te taimi o te ‵katigā saito? (e) Se a te mea ka fakamatala mai i te mataupu tenei?

² E isi eiloa se uiga fakapito o pati a Iesu ki te ‵katigā saito mō ‵tou aso nei. E ola tatou i se taimi telā “ko ‵tau o ‵kati” i ei a te fatoaga i te lalolagi o tino. I tausaga katoa, e lau i miliona o tino e maua ne latou a te ‵kamiga ke tauloto ki muna‵tonu o te ola, kae e lau i afe o soko ‵fou ne papatiso. E maua eiloa ne tatou a te tauliaga ke ‵kau atu ki te ‵toe ‵katigā saito lasi eiloa i taimi katoa, mai lalo i te takitakiga a te Pule o te ‵katigā saito, ko Ieova te Atua. E mata, e “ga‵lue malosi” tatou i te galuega tenei ko te katiga o saito?​—1 Kolinito 15:58.

³ I te tolu mo te āfa tausaga o tena taviniga i te lalolagi, ne fakatoka ne Iesu ana soko mō olotou galuega e pelā me ne tino ‵kati saito. Ka fakamatala mai i te mataupu tenei a akoakoga e tolu mai i te fia o nisi akoakoga tāua kolā ne akoako atu ne Iesu ki ana soko. E faka‵mafa mai i akoakoga takitasi a uiga kolā e tāua ke taumafai tatou o fai te ‵toe mea e mafai o fai i te galuega ko te fakamaopoopoga o soko i ‵tou aso nei. Ke na mafau‵fau nei tatou ki uiga takitasi konei.

E Tāua te Loto Maulalo

4. Ne fakaasi mai pefea ne Iesu a te tāua o te loto maulalo?

⁴ Ke fakaataata i ‵tou mafaufau a te tala tenei: Ne fatoa oti ne kinau a soko me ko oi e sili i a latou. Kāti ne lavea faka‵lei atu a lagonaga sē fakatalitonugina mo te loto masei i olotou foliga. Tela la, ne kalaga atu a Iesu ki se tamā tamaliki ke tu atu i te kogāloto o latou. Mai i te fakasino atu ki te tamā tamaliki, ne fai atu a ia: “A te tino e sili i te Malo o te lagi, ko te tino telā e fakamalalo ne ia a ia eiloa, ke pelā mo te tamaliki tenei.” (Faitau te Mataio 18:1-4.) I lō te mafau‵fau e pelā mo tino o te lalolagi, telā e fakamasino ne latou te tino i tena malosi, tena maumea, mo tena tulaga, ne ‵tau o malamalama a soko me i te lotou sili e faka‵na ki te ‘fakamalalo ne latou a latou eiloa’ i mua o nisi tino. Ka fakamanuia kae fakaaoga latou ne Ieova māfai fua e fakaasi atu ne latou a te loto maulalo tonu.

5, 6. Kaia e ‵tau ei o loto maulalo koe ko te mea ke kau katoatoa atu ki te galuega ko te ‵katigā saito? Fakamatala mai.

⁵ Ke oko mai ki aso nei, e tuku katoatoa atu ne tino e tokouke i te lalolagi a olotou olaga mai te kausaki atu ki te malosi pule, fia maumea, mo te fia fai tulaga. Ne iku atu i ei ki te mu‵tana io me ko te seai eiloa o ne taimi mō mea faka-te-agaga. (Mataio 13:22) E ‵kese mai i ei, e fia‵fia eiloa a tino o Ieova o ‘fakamalalo ifo latou’ i mua o nisi tino ko te mea ke maua ne latou a fakamanuiaga mo te taliaga a te Pule o te fatoaga saito.​—Mataio 6:24; 2 Kolinito 11:7; Filipi 3:8.

⁶ Mafaufau ki te fakaakoakoga a Francisco, telā ne tavini atu e pelā me se toeaina i Amelika ki Saute. A koi talavou a ia, ne taofi aka ne ia tena fanatu ki te iunivesiti ko te mea ke fai a ia mo fai se paenia. “I te taimi ne avaga fakamuli ei au,” ne fai mai tou tagata, “ne mafai fua o ‵sala ne au se galuega telā ne mafai ei o maua ne māua mo taku avaga a tupe e uke. I lō te fai penā, ne fakaiku aka ne māua ke fakafaigofie te mā olaga kae ke tumau i te ga‵lue fakatasi i te taviniga tumau. Fakamuli ifo, ne isi ne mā tama‵liki kae ne momea aka foki a mea faiga‵ta. Kae ne fesoasoani mai a Ieova ke puke ‵mau māua ki te mā fakaikuga.” Ne fai mai a Francisco: “E ‵tusa mo te 30 tupu tausaga, ne maua ei ne au a te tauliaga ke tavini atu e pelā me se toeaina, i tafa o nisi tofiga fakapito e uke. E seai eiloa se taimi ne sala‵mo ei matou i te ola i se olaga faigofie.”

7. Ne taumafai pefea koe o fakagalue aka a pati fakatonutonu i te Loma 12:16?

⁷ Kafai e se talia ne koe a uiga “fakamatamata” o te lalolagi tenei kae talia ne koe a mea kolā e “se taulia,” e mafai foki o maua ne koe a nisi fakamanuiaga mo tauliaga e uke i te galuega ko te katigā saito.​—Loma 12:16; Mataio 4:19, 20; Luka 18:28-30.

E Maua a Ikuga ‵Lei Mai i te Loto Finafinau

8, 9. (a) Ke fakamatala fakatoetoe mai a te tala fakatusa a Iesu e uiga ki taleni. (e) Ko oi e aoga malosi ki ei a te tala fakatusa tenei?

⁸ A te suā uiga e ‵tau o maua ne tatou ko te mea ke ‵kau katoatoa atu ki te galuega ko te katigā saito ko te loto finafinau. Ne fakaasi mai ne Iesu a te mea tenei i te tala fakatusa e uiga ki taleni.a A te tala fakatusa tenā e uiga ki se tagata telā ne tuku atu ne ia ana kope ki ana pologa e tokotolu, a koi tuai o faimalaga atu ki te suā fenua. A te pologa muamua mo te lua ne maua ne lāua a te sefulu afe tālā mo te fa afe tālā; kae ko te tolu o pologa, se lua afe tālā. Mai tua o te fanatuga o te lotou pule, a te avā pologa muamua ne “fakagalue” ne lāua mo te loto finafinau a tupe konā. E ‵kese mai i ei, a te tolu o pologa ne “paie.” Ne tanu ne ia ana tupe i te laukele. I tena fokimaiga, ne tuku atu ne te tagata tenā a te taui ki te avā pologa muamua ke pule i “mea e uke.” Ne ave keatea ne ia a tupe mai i te tolu o pologa kae ne fakatea ne ia mai i tena kaukāiga.​—Mataio 25:14-30.

⁹ E seai se fakalotolotolua me e fia fakaakoako koe ki pologa loto finafinau i te tala fakatusa a Iesu kae kau katoatoa atu ki te galuega ko te faiga o soko. Kae e a māfai ko se mafai ne koe o fai a mea kolā e fai nei ne koe ona ko ou fakanofonofoga? Kāti ko tulaga faiga‵ta i mea tau tupe ko faimālō ei koe ke galue i itula e uke ke tausi atu ki tou kāiga. Io me ko galo atu tou tulaga fakatalavou mo tou malosi ‵lei. Kafai e penā loa, a te tala fakatusa e uiga ki taleni e aofia i ei se fekau fakamalosi loto mō koe.

10. Ne fakaasi atu pefea ne te pule a te loto malamalama i te tala fakatusa e uiga ki taleni, kae kaia e fakamalosi loto ei a te mea tenei ki a koe?

¹⁰ Masaua la me i te pule i te tala fakatusa ne iloa ne ia me e kese‵kese a mea e mafai o fai ne pologa takitasi. Ne fakaasi mai ne ia te mea tenei i te taimi ne tuku atu ei ne ia a taleni “e faka‵tau ki te mea e mafai ne te tino o tausi.” (Mataio 25:15) E pelā eiloa mo te mea ne fakamoemoe ki ei, ne uke atu a mea ne maua ne te pologa muamua i lō te pologa i te lua. E ui ei, ne fakatāua eiloa ne te pule a taumafaiga loto finafinau a te avā pologa konei mai te fai atu i a lāua ne “tavini ‵lei kae fakamaoni” kae ‵pau eiloa a taui ne tuku atu ne ia ki a lāua. (Mataio 25:21, 23) E penā foki te Pule o te katigā saito, ko Ieova te Atua, e iloa ne ia a fakanofonofoga kolā e mafai o pokotia i ei a tau taviniga ki a ia. Ka se fakatamala eiloa a ia ke lavea ne ia au taumafaiga mo te loto kātoa ke tavini atu ki a ia kae ka taui atu ne ia ki a koe e ‵tusa mo au mea e fai.​—Maleko 14:3-9; faitau te Luka 21:1-4.

11. Fakamatala mai a te auala e mafai ei o maua a fakamanuiaga e uke mai i te loto finafinau i tulaga faiga‵ta.

¹¹ E fakaasi mai ne te fakaakoakoga a Selmira, se tuagane Kelisiano i Pasili, me e se fakalagolago a te loto finafinau i te taviniga ki te Atua ki tulaga ‵lei i te olaga. I te 20 tausaga ko ‵teka, ne mate te avaga a Selmira i se potukau kaisoa, kae ne ‵toe mai i ei tou fafine mo ana tamaliki fo‵liki e tokotolu ke tausi atu ki ei. A tena galuega ‵togi e pelā me se fafine fai galuega i te fale ne aofia i ei a te galue i se taimi leva ‵ki, kae fakafi‵ta foki ki a ia a te faimalaga atu i mea fakatele‵tele kolā e uke a tino i ei. Faitalia a mea faiga‵ta konei, ne fakatoka ne tou fafine ana galuega ko te mea ke mafai o tavini atu a ia e pelā me se paenia tumau. Ne ‵kau atu foki a ana tamaliki e tokolua mai i tamaliki e tokotolu ki te taviniga fakapaenia. “I te fia o tausaga, ne suke‵suke matou mo tino e sili atu i te toko 20 ki te Tusi Tapu, kae ne fai latou mo fai ne vaega o toku ‘kāiga,’ ” ne fai mai tou fafine. “Ke oko mai eiloa ki te aso tenei, ne a‵lofa mai latou kae gali foki te motou va fakataugasoa. Se koloa telā e se mafai o ‵togi ki tupe.” A te Pule o te katigā saito ne fakamanuia eiloa ne ia a taumafaiga loto finafinau a Selmira!

12. E mafai pefea o fakaasi atu ne tatou a te loto finafinau i te galuega talai?

¹² Kafai ko se uke a taimi e fakaavanoa ne koe mō te galuega talai ona ko ou fakanofonofoga i te olaga, e mafai ne koe o taumafai ke uke ou tusaga e fai i te galuega ko te ‵katigā saito mai i te faiga ke momea aka te magoi o tau galuega talai. Kafai e fakaaoga faka‵lei ne koe a manatu fesoasoani kolā e tuku mai i te Fakatasiga mō te Galuega Talai i vaiaso katoa, ka momea aka te ‵lei o tou atamai i te talai kae maua foki ne koe a avanoaga ‵fou ke talai atu i ei. (2 Timoteo 2:15) Kafai e ‵lei, e mafai foki o toe fakatoka io me e taofi aka ne koe a nisi mea sē aoga ko te mea ke ‵lago atu faeloa koe ki fakatokaga a te fakapotopotoga mō te galuega talai.​—Kolose 4:5.

13. Se a te kī ki te atiakaga mo te fakatumauga o te loto finafinau?

¹³ Ke masaua faeloa me e māfua mai te loto finafinau mai i te ‵tou a‵lofa mo te loto fakafetai ki te Atua. (Salamo 40:8) A te tolu o pologa telā ne taku mai i te tala fakatusa a Iesu ne mataku i tena pule, mai i te kilo atu ki a ia e pelā me se tino uiga faigata. Ona ko te mea tenā, ne tanu ei ne te tagata ana tupe i lō te fakagalue ne ia ke momea aka te uke o tupe a tena pule. Ke ‵kalo keatea mai i se uiga penā, e ‵tau o ati aka kae fakatumau foki se va fakataugasoa pili mo te Pule o te katigā saito, ko Ieova. Ke fakaavanoa ne taimi ke sukesuke kae mafaufau ‵loto ki ana uiga ‵gali​—tena alofa, tena kufaki, mo te alofa fakamagalo. I te auala tenā, ka fakamalosi aka ei tou loto ke fai te ‵toe mea e mafai ne koe o fai i tena taviniga.​—Luka 6:45; Filipi 1:9-11.

“E ‵Tau mo Koutou o Tapu”

14. Se a te fakatonuga tāua e ‵tau o fakagalue aka ne tino kolā e ma‵nako o fai e pelā me ne tino ‵kati saito?

¹⁴ Mai pati kolā ne siki mai i te Tusi Tapu faka-Epelu, e taku mai ne te apositolo ko Petelu a te loto o te Atua mō ana tavini i te lalolagi nei, i ana pati: “Ke tapu otou olaga i mea katoa e fai ne koutou, e pelā eiloa mo te Atua telā ne ana kalagagina koutou, e tapu. Me e penei a muna a te Tusi Tapu, ‘E ‵tau mo koutou o tapu, i te mea i au e tapu’” (1 Petelu 1:15, 16; Levitiko 19:2; Teutelonome 18:13) E faka‵mafa mai i te fakamatalaga tenei me e ‵tau mo tino ‵kati saito o ‵ma i mea tau amioga mo te feitu faka-te-agaga. E mafai o tau‵tali tatou ki te fakatonuga tāua tenā mai te gasuesue ke faka‵ma tatou i se auala fakatusa. E mafai pefea o fai a te mea tenā? E auala i te fesoasoani o muna‵tonu a te Atua.

15. Se a te mea e mafai o fai ne te malosi o te munatonu a te Atua ki a tatou?

¹⁵ A te munatonu a te Atua e fakatusa ki te vai telā e faka‵ma. E pelā me se fakaakoakoga, ne tusi mai a te apositolo ko Paulo me i te fakapotopotoga o Kelisiano fakaekegina e ‵ma i te kilokiloga a te Atua, e pelā me se avaga ‵ma a Keliso, telā “ne faka‵ma ne ia ki te vai” e auala i “ana muna . . . , e se lailai io me pakiakia.” (Efeso 5:25-27) Mai mua atu, ne faipati foki a Iesu ki te malosi o te vai ‵ma o te muna a te Atua, telā ne folafola mai ne ia. I ana pati ki ana soko, ne fai atu a Iesu: “Ko oti ne faka‵ma koutou ne te muna telā ne faipati atu ne au ki a koutou.” (Ioane 15:3) Tela la, e isi se malosi o te munatonu a te Atua ke faka‵ma ei tatou i mea tau amioga mo te feitu faka-te-agaga. E mafai o talia ne te Atua a ‵tou tapuakiga ki a ia māfai e talia fua ke faka‵ma tatou ne te munatonu a te Atua i te auala tenei.

16. E mafai pefea o fakatumau te ‵tou ‵ma i te feitu faka-te-agaga mo mea tau amioga?

¹⁶ Tela la, ke fai tatou e pelā me ne tino ‵kati saito, e ‵tau o tiakina muamua ne tatou a faifaiga lai‵lai katoa i ‵tou olaga i mea tau amioga mo te feitu faka-te-agaga. Ao, ko te mea ke tumau tatou i te fetaui ‵lei mo te tauliaga ke fai e pelā me se tino ‵kati saito, e ‵tau o fai tatou mo fakaakoakoga ‵lei i te fakamalugaga o tulaga ‵ma o Ieova i mea tau amioga mo te feitu faka-te-agaga. (Faitau te 1 Petelu 1:14-16.) E pelā mo te ‵tou ‵saga tonu atu ki te ‵ma i te feitu faka-te-foitino, e ‵tau foki o faka‵logo faeloa tatou ki te malosi o te munatonu a te Atua ke faka‵ma ei a tino. E aofia i te mea tenei a te faitau ki te Tusi Tapu mo te kau atu faeloa ki fakatasiga Kelisiano. E fakauiga foki ki te taumafai mo te loto fakamaoni ke fakagalue aka a fakamasauaga a te Atua i ‵tou olaga. A te faiga penā ka fai ei tatou ke taua atu ki ‵tou manakoga agasala kae ‵teke atu ki fakamalosiga ma‵sei o te lalolagi tenei. (Salamo 119:9; Iakopo 1:21-25) E tonu, ko oko eiloa i te fakamafanafana a te iloa atu me e auala i te fesoasoani o te munatonu, e mafai eiloa o “faka‵ma” tatou mai agasala matagā!​—1 Kolinito 6:9-11.

17. Ko te mea ke tumau i te ‵ma, ne a pati fakatonutonu i te Tusi Tapu e ‵tau o faka‵logo tatou ki ei?

¹⁷ E mata, e talia ne koe a te malosi o muna‵tonu a te Atua ke faka‵ma ei tou olaga? E saga atu pefea koe māfai ko iloa ne koe a te fakama‵taku o fakafiafiaga matagā o te lalolagi? (Salamo 101:3) E mata, e ‵kalo keatea koe mai i te kau atu ki ou taugasoa kolā e se ‵pau mo ou talitonuga i te akoga mo te galuega? (1 Kolinito 15:33) E mata, e fakamaoni koe i au taumafaiga ke manumalo i ou vāivāiga kolā e mafai o fai ei koe ke se ‵ma i te kilokiloga a Ieova? (Kolose 3:5) E mata, e tumau eiloa tou ‵vae keatea mai i kinauga fakapolitiki a te lalolagi tenei mo te uiga ko te loto fenua telā e pokotia i ei a tafaoga fakatau‵fai katoa?​—Iakopo 4:4.

18. Ka fesoasoani mai pefea a te ‵ma i mea tau amioga mo te feitu faka-te-agaga ko te mea ke fai tatou mo tino ‵kati saito ma‵goi?

¹⁸ A tou fakalogo mo te fakamaoni i vaegā mea penā ka maua mai i ei a toe ikuga ‵lei. I te fakatusaga ne ia o ana soko fakaekegina ki kaula o se vine, ne fai atu a Iesu: “A kaula katoa kolā e i a au kae e se ‵fua, e ‵kati ne [toku Tamana] keatea, ka ko kaula takitasi kolā e ‵fua, e velevele faka‵lei ne ia, ko te mea ke gasolo o ‵fua malosi.” (Ioane 15:2) Kafai e fakalogo koe ki te vai ‵ma o te munatonu i te Tusi Tapu, ka uke atu a fuaga e ‵fua mai ne koe.

Fakamanuiaga Nei mo Aso Mai Mua

19. Ne fakamanuiagina pefea a soko o Iesu i olotou taumafaiga e pelā me ne tino ‵kati saito?

¹⁹ A soko fakamaoni kolā ne ‵saga tonu atu ki akoakoga a Iesu ne faka‵fonugina fakamuli ki te agaga tapu i te Penitekoso i te 33 T.A. ke molimau atu “ki kapakapalagi o te lalolagi.” (Galuega 1:8) Ne tavini atu latou e pelā me ne sui o te potukau pule, e pelā me ne misionale, mo toeaina faima‵laga, kae ne tāua ‵ki te lotou tusaga ne fai i te talaiatuga o te tala ‵lei “ki tino katoa mai lalo o te lagi.” (Kolose 1:23) Ko oko eiloa i te uke o fakamanuiaga ne maua ne latou, mo te fiafia ne tuku atu ne latou ki nisi tino!

20. (a) Ne a fakamanuiaga ne maua ne koe mai i te kau katoatoa atu ki te ‵katigā saito faka-te-agaga? (e) Se a te mea e fakaiku aka ne koe ke fai?

²⁰ E tonu, mai i te fakaasiatuga o te loto maulalo, te loto finafinau, mo te fakamalugaga o tulaga ma‵luga o te Muna a te Atua, ka fai ei ke ‵kau atu faeloa tatou ki te ‵toe ‵katigā saito sili telā e fai nei kae fai foki ‵tou tusaga aoga i ei. E tiga eiloa e fe‵paki a tino e tokouke mo logo‵maega mo mea fakafanoa‵noa kolā e tuku mai i te lalolagi fia maumea kae fai fakafiafiaga, e maua eiloa ne tatou a te fiafia mo te lotomalie tonu. (Salamo 126:6) E sili atu i te tāua i mea katoa, e “se mafai o māumāu [‵tou] galuega i te Aliki.” (1 Kolinito 15:58) A te Pule o te ‵katigā saito, ko Ieova te Atua, ka taui mai ne ia tatou ki te se-gata-mai mō ‘‵tou galuega ne fai mo te alofa ne fakaasi ne tatou mō Ia.’​—Epelu 6:10-12.

[Fakamatalaga fakaopoopo]

E Masaua ne Koe?

I te taimi e kau katoatoa atu ei koe ki te galuega ko te ‵katigā saito . . .

• kaia e tāua ei ke fakaasi atu te loto maulalo?

• e mafai pefea ne koe o ati aka kae fakatumau te loto finafinau?

• kaia e tāua ei ke tumau i te ‵ma i mea tau amioga mo te feitu faka-te-agaga?

[Ata i te itulau e 25]

E mafai o fesoasoani mai a te loto maulalo ke ola tatou i se olaga faigofie telā e fakavae ki manakoga o te Malo