Ke Fia‵fia a Tino Ga‵lue i te ‵Katiga o Saito!

“Ko oko eiloa i te lasi o te saito e fia kati, ka ko tino ga‵lue i te saito e se tokouke! Fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.”​—⁠MATAIO 9:​37, 38.

KAFAI e masaua ne tatou a te aso ne papatiso ei tatou e pelā me ne tavini a Ieova, faitalia me ne tupu te mea tenā i nāi tausaga io me ko te fia tausaga ko ‵teka atu, kae e mafai o foliga mai pelā me ne papatiso atu fua tatou i te aso anafi. A te tavae atu ki a Ieova e fai pelā me ko te pogai tāua o te ‵tou olaga tukugina atu. I te taimi ne fakaavanoa ei ne tatou ‵tou taimi ke fesoasoani atu ki nisi tino ke faka‵logo kae kāti ke talia foki te fekau o te Malo, a te tavini atu ki a Ieova mo te fiafia ko te ‵toe mea sili e ‵saga atu tatou ki ei. (Efeso 5:​15, 16) Ke oko mai ki te aso nei, ko lavea ne tatou te ‵vave o taimi māfai e fakalavelave tatou i te “ga‵lue malosi . . . i te galuega a te Aliki.” (1 Kolinito 15:58) Faitalia me e fe‵paki tatou mo fakalavelave, a te fiafia i te faiga o te loto o Ieova e fakamalosi ei tatou ke tumau faeloa i ei.​—⁠Neemia 8:​10.

² E pelā me ne Kelisiano, e aofia tatou i se galuega fakatusa ko te ‵katiga o saito. Ne fakatusa ne Iesu te fakamaopoopoga o tino taki tokotasi mō te ola-se-gata-mai ki te ‵katiga o saito. (Ioane 4:​35-​38) Ona ko te mea e ‵kau atu tatou ki te vaegā galuega tenei ko te ‵katiga o saito, ka fakamalosi aka ei a ‵tou loto ke iloilo aka te fiafia telā ne maua ne Kelisiano mua kolā ne ga‵lue i te ‵katiga o saito. Ka onoono ei tatou ki vaega e tolu kolā ka fesoasoani mai ke aumai ei te fiafia ki a tatou i te galuega ko te ‵katiga o saito i aso nei. E aofia i mea konei (1) ‵tou fekau mō te fakamoemoega, (2) te manuia o ‵tou salasalaga, mo te (3) ko ‵tou uiga filemu i te faiga pelā me ne tino ga‵lue i te ‵katiga o saito.

Ne Uga Atu e Pelā me ne Tino Ga‵lue i te ‵Katiga o Saito

³ Ne ‵fuli a olaga o tino ga‵lue i te ‵katiga o saito i aso mua​—⁠maise ko apositolo fakamaoni a Iesu e toko 11​—⁠ i te 33 T.A., i te taimi ne olo aka ei latou ki te mauga i Kalilaia ke fetaui mo Keliso telā ko oti ne toetu! (Mataio 28:16) Kāti ne mafai foki o ‵kau atu a “taina e silia atu i te limaselau” ki te maopoopoga tenā. (1 Kolinito 15:⁠6) Ne masaua faeloa ne latou a te fakatonuga a Iesu. Ne fai atu a ia ki a latou: “Olo atu . . . ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu. Akoako atu foki latou ke faka‵logo ki mea katoa kola ne fakatonu atu ne au ki a koutou.” (Mataio 28:​19, 20) Faitalia a fakasauāga fakama‵taku, ne maua eiloa ne latou te fiafia lasi i te galuega talai i te lavea atu a te uke o fakapotopotoga o soko o Keliso kolā e faka‵tu aka mai te suā koga ki te suā koga. Fakamuli ifo ‘ne folafolagina [a te tala ‵lei] ki tino katoa mai lalo o te lagi.’​—⁠Kolose 1:​23; Galuega 1:8; 16:⁠5.

⁴ I te kamataga o tena galuega i Kalilaia, ne fakatonu ne Iesu ana apositolo e toko 12 kae uga ne ia a latou ke folafola atu, penei: “I te Malo o te lagi ko pili mai!” (Mataio 10:​1-7) Ne “tamilo atu ei a Iesu i te fa‵kai ‵lasi mo fa‵kai fo‵liki [o Kalilaia] o asiasi ki ei. Ne akoako atu i loto i olotou fale tapuaki; kae folafola atu te Tala ‵Lei o te Malo, kae fai ke ‵lei a masaki o tino.” Ne alofa a Iesu ki te vaitino “me ko se toka olotou loto i te seai o se tino e fesoasoani atu, ko pela mo mamoe e seai se lotou tino tausi.” (Mataio 9:​35, 36) Ona ko tena alofa, telā ne fai atu ei a ia ki ana soko: “Ko oko eiloa i te lasi o te saito e fia kati, ka ko tino ga‵lue i te saito e se tokouke! Fakatagi atu ki te tino e a ia [Ieova te Atua] te fatoaga, ke uga mai se kau faigaluega e tai tokouke atu o fakaputu te saito.” (Mataio 9:​37, 38) Ne fuafua aka a Iesu me e ‵pau te manakogina o tino talai mo te manakoga i Iutaia i te taimi ne toe ono fua a masina ke fai ei tena galuega i te lalolagi. (Luka 10:⁠2) Tela la, ne uga atu ei ne Iesu ana soko e pelā me ne tino talai.​—⁠Mataio 10:5; Luka 10:⁠3.

Te ‵Tou Fekau o te Fakamoemoega

⁵ E pelā me ne tavini a Ieova i aso nei, e ‵saga tonu atu tatou mo te fia‵fia ki te manakoga mō tino talai. E tasi te feitu e maua ei ne tatou te fiafia ko te avatuga o se fekau o te fakamoemoega ki tino loto vāi‵vāi kae māfatia. E pelā mo soko o Iesu i te senitenali muamua, e maua ne tatou se tauliaga gali ‵ki ke folafola atu te ‵tala ‵lei​—⁠se fekau tonu o te fakamoemoega​—⁠ki a latou kolā ko ‘se toka olotou loto i te seai o se tino e fesoasoani atu, ko pelā mo mamoe e seai se lotou tino tausi’!

⁶ Ne fakalavelave malosi te apositolo ko Paulo i te kogāloto o te senitenali muamua i te talaiatuga o te ‵tala ‵lei. Ne magoi ‵ki tena galuega, me i te taimi ne tusi atu ei a ia ki Kelisiano i Kolinito i te tausaga kāti ko te 55 T.A., ne fai atu a ia penei: “Taina, au e manako o fakamasaua atu ki a koutou e uiga mō te Tala ‵Lei tela ne folafola atu ne au ki a koutou, tela ne talia ne koutou kae tenei foki e tumau koutou i ei i te fakatuanaki.” (1 Kolinito 15:⁠1) Ne fakaoti ne Kelisiano i aso mua olotou mafi i te faiga pelā me ne tino ‵kati saito. E ui eiloa e se fakaasi mai i te Tusi Tapu te aofaki o apositolo kolā ne ola mai tua ifo o te ‵toe fakalavelave lasi telā ne tupu i te fakamaofaga o Ielusalema i te 70 T.A., kae iloa ‵lei ne tatou me ne tumau eiloa te apositolo ko Ioane i te faiga o te galuega talai i te 25 tausaga mai tua ifo i ei.​—⁠Fakaasiga 1:⁠9.

⁷ I senitenali fakamuli ifo ne ‵sae aka a pulega a takitaki o lotu Kelisiano ‵Se, ko te aposetate telā ko “[te] tino Amio Masei.” (2 Tesalonia 2:⁠3) Kae i te fakaotiotiga o te 19 senitenali, ne puke ‵mau eiloa ne tino kolā ne ola e ‵tusa mo akoakoga mua faka-Kelisiano a te fekau o te fakamoemoega, mai te fakasalalauatuga o te Malo. A te ‵tonuga loa, talu mai tena lomiga muamua (i a Iulai 1879), ne aofia i te ulutala o te mekesini tenei a pati konei: “Ke Fakasalalau Atu te Fakatasi Mai o Keliso,” “Ke Fakasalalau Atu te Malo o Keliso” io me “E Folafola Atu ei te Malo o Ieova.”

⁸ Ne fakatu aka te Malo faka-te-lagi o te Atua i lima o Iesu Keliso i te 1914, kae tenei ko momea aka te fakasalalauatuga fakavave ne tatou a te fekau o te fakamoemoega i lō aso mua. Kaia? Me e aofia i fakamanuiaga o te Malo ko te fakaseaiga o te fakanofonofoga tenei o mea masei telā ko pili mai. (Tanielu 2:​44) E mata, e isi aka foki se isi fekau telā e ‵lei atu? Kae e seai se fiafia e pelā mo te fiafia e maua ne tatou māfai e ‵kau atu tatou ki te fakasalalauatuga o te Malo a koi tuai o oko mai te “fakalavelave lasi,” i ne?​—⁠Mataio 24:21; Maleko 13:⁠10.

Se Salasalaga Manuia

⁹ A te suā feitu e mafai ei o maua ne tatou te fiafia e pelā me ne tino talai ko te manuia o te ‵tou ‵sala atu ki tino kolā e fai fakamuli pelā me ne soko kae ‵kau mai ki a tatou i te galuega talai. I te tausaga ko te 31-32 T.A., ne fakatonu atu ne Iesu ana soko: “Kafai e oko koutou ki se fa‵kai lasi io me se fa‵kai foliki, fesili atu me isi se tino e loto malie o talia koutou.” (Mataio 10:11) E se ko tino katoa e ‵lei olotou loto, e pelā mo te mea e lavea atu i olotou faifaiga ki te fekau o te Malo. Kae ui i ei, ne loto finafinau eiloa a soko o Iesu i te talaiatuga o te tala ‵lei i so se koga e maua atu i ei a tino.

¹⁰ Mai tua o te matega mo te toetuga o Iesu, ne tumau eiloa a te ‵salaga ki tino loto ‵lei mo te loto finafinau. Ne sau‵tala kae fakasakosako a Paulo mo te kau Iutaia i olotou fale tapuaki fakatasi mo tino kolā e ‵nofo atu i te maketi i Atenai. I te taimi ne molimau atu ei a ia i Aleopako i te fa‵kai tenā o Eleni, “e isi ne tino ne olo tasi mo ia ko talitonu; e iai i a latou kona ko Taionusio, se tino o te Fono o Aleopako, mo te fafine e igoa ki a Tamali, mo nisi tino ake foki.” Ne fai foki a Paulo mo fai se fakaakoakoga ‵lei i te talaiatuga ki tino ‘i lukuga pelā foki mai fale ki fale’ i koga katoa e fano a ia ki ei.​—⁠Galuega 17:​17, 34; 20:⁠20.

¹¹ I tausaga fakaotioti o te 19 senitenali, ne aofia malosi a Kelisiano fakaekegina i te ‵salaatuga ki tino loto ‵lei. I se mataupu telā ne fakaulutala penei, “Ne Fakaekegina ke Talai Atu (Anointed to Preach),” ne fai mai a te Zion’s Watch Tower i a Iulai/Aokuso i te 1881, penei: “A te talaiatuga o te tala ‵lei . . . e fai atu ki ‘tino loto maulalo’​—⁠ko latou kolā e fia‵fia kae e mafai foki o fakalogo‵logo ko te mea ke maua mai i a latou te foitino o Keliso, ko ana soko fakaekegina.” E fakafetaui sāle atu a tino talai a te Atua ki tino māfai ko oti olotou lotu kae tuku atu ne latou a tamā pepa kolā e ‵lago atu ki te fekau mai te Tusi Tapu kae ko oti ne fakatoka faka‵lei ke fakamalosi aka i ei a te fia‵fia o tino loto ‵lei. Mai tua o te iloiloga faka‵lei o te magoi o te auala tenei e talai atu i ei, ne fakamalosi mai te Watch Tower i a Me 15, 1903 ki tino talai ke tufa atu a tamā pepa “mai fale ki fale, i fakatutonu o te Aso Sa.”

¹² I tausaga fakamuli nei, ko oti ne fakalasi aka ne tatou te ‵tou galuega mai te fesokotaki atu ki tino i nisi koga i tafa atu o olotou fale. Ko oti ne lavea atu te magoi o te galuega tenei i fenua kolā e ‵galo sāle i ei a tino mai olotou fale i taimi masani e āsi atu ei tatou ona ko fakalavelave i mea tau tupe mo te kausaki atu ki mea e fia‵fia latou ki ei i taimi e malō‵lō ei latou. I te taimi ne lavea atu i ei ne se Molimau i Egelani mo tena taugasoa a tino mata‵mata kolā e ‵foki sāle atu i pasi mai te ta‵faoga i te tafātai i te aso kātoa, ne loto ma‵losi laua ke olo atu ki luga i pasi kae tufa atu i ei a kopi o te Watchtower mo te Awake! ki pasese. I te masina e tasi, ne tufa atu ne laua a kopi e 229. Ne lipoti mai laua, penei: “E se toe ma‵taku nei maua ma talai atu i te tafātai, koga faipisinisi, io me ko so se koga telā e fe‵paki ei maua mo mea faiga‵ta me e tali‵tonu maua i a Ieova e fakatasi mai faeloa ki a maua.” Ne kamata o fakatoka ne laua se fakasologa o tino ke tufa atu ki ei a mekesini, ne kamata se akoga faka-te-Tusi Tapu kae ne ‵kau atu laua ki te taviniga e pelā me ne paenia lagolago.

¹³ A koi tumau te ‵sala atu ki tino loto ‵lei, e mafai o toe fai se iloiloga ki te ‵tou galuega i nisi kogā koga. E tiga eiloa ko masani a nisi tino talai i te ga‵lue mai fale ki fale i tafataeao o Aso Sa, i nisi kogā koga e se magoi malosi ke āsi atu ki fale o tino i tafataeao me kāti koi ‵moe a tino. Mai te ‵fuliga o te fakasologa o olotou mea e fai, ko oti nei ne taumafai a Molimau e tokouke ke ‵sala atu ki tino loto ‵lei i se taimi mai tua ifo o te tafataeao, kāti māfai ko oti te fakatasiga faka-Kelisiano. Kae ko oti ne lavea atu te aogā o te salasalaga tenei. Ne fakaopoopo atu te 2.3 pasene ki te aofaki o tino talai i te tausaga ko teka. E avatu ne te mea tenei a vikiga ki te Pule o te galuega kae e fiafia ei ‵tou loto.

Ke Fakatumau te Filemu i te Galuega Talai

¹⁴ A te suā pogai e maua ei ne tatou te fiafia ko te uiga filemu telā e fakaasi atu ne tatou i te galuega talai. Ne fai mai a Iesu, penei: “Kafai e ulu atu koutou ki se fale, fai atu ki tino i ei: ‘Ke manuia koutou.’ Kafai e talia koutou ne tino i te fale tena, fakamanuia atu ki a latou; kae kafai e se talia koutou ne latou, fakafoki mai te otou fakamanuiaga.” (Mataio 10:​12, 13) A te pati fakatalofa i te ‵gana Epelu mo te tugāpati telā e fetaui ‵lei i te Tusi Tapu Eleni e fakaasi kātoa mai i ei a te manatu tenei ‘Ke fanofano ‵lei faeloa au mea.’ A te manatu tenā e pule ki te auala e fesokotaki sāle ei tatou ki tino māfai e talai atu ne tatou te ‵tala ‵lei ki a latou. E fakamoe‵moe tatou me ka ‵saga tonu mai latou ki te fekau o te Malo. Mō tino kolā e fai penā, e maua ne latou se avanoaga ke faka‵lei aka latou mo te Atua i te taimi e sala‵mo ei latou ki olotou agasala, ‵fuli mai kae fai tena loto. Kafai e fai penā, ka iku atu te filemu mo te Atua ki te ola se-gata-mai.​—⁠Ioane 17:3; Galuega 3:​19; 13:​38, 48; 2 Kolinito 5:​18-​20.

¹⁵ E mafai pefea o tumau te ‵tou filemu māfai ko fetaui tatou mo tino sē fia‵fia? Ne fakatonu atu a Iesu: “Kafai e se talia koutou ne latou [te kaufale], fakafoki mai te otou fakamanuiaga.” (Mataio 10:13) E aofia i te tala a Luka e uiga ki te ugaatuga o soko e toko 70 a pati a Iesu, konei: “Kafai e nofo i kona te tama o te filemu, ko te fakamanuiaga a koutou ka tumau i luga i a ia; kae kafai e seai, ka toe fakafoki mai ki a koutou.” (Luka 10:⁠6) Kafai e fai‵pati atu tatou ki tino e uiga ki te tala lei, e tau o fai penā i se auala ‵lei kae filemu. A te tali sē fiafia, te fāmeo, io me ne pati sē alofa a se tino i te fale e tuku mai fua i ei te avanoaga ke ‘toe fakafoki” mai te fekau o te filemu ‘ki a tatou.’ Kae e seai eiloa se mea i mea konei e ave keatea ei te filemu mai i a tatou, telā se fuataga o te agaga tapu o Ieova.​—⁠Kalatia 5:​22, 23.

Fai se Fakamoemoega ‵Lei mō te Galuega Talai

¹⁶ E pelā me ne tino talai, e fia‵fia tatou ke fai se tusaga i te fakamaopoopoga o tino mō te ola se-gata-mai. Mā‵faga o mea fakafiafia māfai ko saga tonu mai se tino ne talai tatou ki ei kae ko manako foki ke tauloto a ia ki mea e uke atu, kae fia fai foki e pelā me se ‘tama o te filemu’! Kāti e uke ‵ki ana fesili faka-te-Tusi Tapu kae ko se mafai foki ne tatou o tali i te āsiga muamua. Ona ko te mea kāti e se ‵lei māfai ko tō leva ‵tou ‵nofoga i te āsiga muamua, ne a mea e mafai o fai? E mafai o fai se ‵tou fakamoemoega e pelā mo te manatu fesoasoani telā ne tuku mai i te 60 tausaga ko ‵teka.

¹⁷ “E ‵tau mo Molimau a Ieova katoa o toka ke fai faka‵lei ne olotou a‵koga faka-te-Tusi Tapu.” Ne sae mai te fakamatalaga tenā i te tolu o mataupu i te tamā tusi fakatonutonu ko te Model Study telā ne ‵lomi i te 1937 ki te 1941. Ne toe fai mai penei: “E ‵tau mo tino talai katoa [o te Malo] o loto fia‵fia i te fesoasoani atu i so se auala telā e mafai ki tino loto ‵lei kae fia‵fia ki te fekau o te Malo. E ‵tau o toe asi atu [fai a toe āsiga] ki tino konei, ke tali aka i ei a vaegā fesili valevale . . . , kae oti ko kamata faka‵lei aka ei se akoga . . . māfai e mafai o fai fakavave penā.” Ao, a te ‵tou fakamoemoega i te faiga o toe āsiga ko te faiga ke kamata se akoga faka-te-Tusi Tapu kae ke tumau faeloa i te faiga tenā.a A te kilokiloga mautinoa mo te alofa ki te tino fiafia e fakamalosi ei tatou ke fakatoka faka‵lei kae ke fai foki te akoga i se auala magoi.

¹⁸ Fakatasi mo te fesoasoani o te tusi ko Te Iloaga Telā e Takitaki Atu i ei ki te Ola Se-Gata-Mai mo nisi polosiua pelā mo te Ne a Mea e Manako ki ei te Atua ke Fai ne Tatou?, e mafai ei ne tatou o fai a akoga faka-te-Tusi Tapu ma‵goi i fale kae e mafai foki o fesoasoani atu ki tino ‵fou kae fia‵fia ke fai mo fai ne soko. I ‵tou taumafaiga ke fakaakoako atu ki te Faiakoga Sili, ko Iesu Keliso, kāti ka mafai foki o tau‵loto a vaegā tino a‵koga penā ki ‵tou uiga filemu, mata fiafia, fakamaoni mo te ‵tou āva ki tulaga mo fakatakitakiga a Ieova. Kafai e fesoasoani atu tatou ki tino ‵fou ke tali aka olotou fesili, ke na fai foki ne tatou a te mea e mafai ne tatou o fai ke fesoasoani atu ke iloa ne latou o tali atu ki tino kolā e fesili atu ki a latou. (2 Timoteo 2:​1, 2; 1 Petelu 2:​21) E pelā me ne tino ga‵lue fakatusa i te ‵katiga o saito, e mafai o fia‵fia tatou me e ‵tusa mo te 4,766,631 a a‵koga faka-te-Tusi Tapu kolā ne fai i te lalolagi kātoa i te tausaga faka-te-taviniga tenei ko teka. E sili atu la te ‵tou fiafia māfai e aofia tatou takitokotasi i tino talai kolā ne fesoasoani atu i te faiga o akoga faka-te-Tusi Tapu i fale o tino.

Ke Tumau i te Fiafia i te Galuega Talai

¹⁹ E uke ‵ki a pogai tāua ke fia‵fia ei i te galuega talai i te vaitaimi ne fai ei te galuega a Iesu mo taimi mai tua ifo i ei. E tokouke a tino i te vaitaimi tenā ne talia mo te fiafia ne latou te tala ‵lei. Ne lasi ‵ki te fia‵fia maise eiloa i te Penitekoso i te 33 T.A., me ne talia ei ne tino kāti e toko 3,000 a te takitakiga a Petelu, kae maua i ei ne latou te agaga tapu o Ieova, kae ne fai mo fai ne vaega o te atufenua o te Atua ko te Isalaelu faka-te-agaga. A te ‵tonuga loa, ne gasolo aka eiloa ki luga te aofaki o latou, kae ne lasi foki te lotou fia‵fia i te taimi ne “fakaopoopo faeloa ne te Aliki [ko Ieova] ki te lotou potukau ne tino fou kola ko fakaolagina.”​—⁠Galuega 2:​37-​41, 46, 47; Kalatia 6:​16; 1 Petelu 2:⁠9.

²⁰ Ne tonu eiloa a te valoaga a Isaia i te taimi tenā: “Te Aliki [ko Ieova], ne fakafiafia ne koe latou; ne fai ne koe latou ke fiafia. Ko oko eiloa i te fiafia o latou ona ko mea ne fai ne koe, e pela eiloa mo te fiafia o tino kola e kati te taukai saito a latou, io me ko tino kola ko vaevae a koloa ne fao ne latou mai i fenua ne fakatakavale ne latou.” (Isaia 9:⁠3) E ui eiloa e lavea atu ne tatou te “fiafia o latou,” ko te kau fakaekegina kolā ko tai kātoa nei te lotou aofaki, e lasi foki te fia‵fia o tatou māfai e lavea atu a te fanaka ki luga o te aofaki o nisi tino ga‵lue i te ‵katiga o saito i tausaga takitasi.​—⁠Salamo 4:⁠7; Sakalia 8:​23; Ioane 10:⁠16.

²¹ E lava kae ‵toe a pogai ke tumau tatou i te fia‵fia i te galuega talai. A te ‵tou fekau o te fakamoemoega, te ‵tou ‵sala atu ki tino loto ‵lei, mo ‵tou uiga filemu​—⁠e fai katoa ne mea konei ke fia‵fia tatou e pelā me ne tino talai. Kae ui i ei, e gasue‵sue fakavave a tino e tokouke ke ‵teke mai. Ne oko atu ki te apositolo ko Ioane a te mea tenei. Ne ‵pei a ia ki te falepuipui i te motu o Patamo “i te mea ne folafola ne [ia] a te muna a te Atua mo mea tonu ne fakaasi ne Iesu.” (Fakaasiga 1:⁠9) E mafai la pefea ne tatou o fakatumau te ‵tou fiafia māfai ko fe‵paki tatou mo fakasauāga mo ‵tekemaiga? Ne a mea ka fesoasoani mai ke mafai ne tatou o fakafesagai atu ki tino loto ma‵keke kolā e talai atu nei tatou ki ei? E tuku mai ne te suā mataupu a te fesoasoani mai te Tusi Tapu ke tali aka a fesili konā.

[Fakamatalaga mai lalo]

Ka Tali Mai Pefea ne Koe?

• Se a te galuega fakatusa ko te ‵katiga o te saito?

• Se a te vaegā fekau e folafola atu ne tatou?

• Kaia e manuia ei te ‵tou sala atu ki soko?

• E mafai pefea o fakatumau ne tatou te filemu i te galuega talai?

• Kaia e tumau ei tatou i te fia‵fia i te galuega talai?

[Fesili mo te Sukesukega]

1. Se a te mea e fesoasoani mai ke tumau tatou i te faiga o te loto o te Atua?

2. Se te mea e fesoasoani mai ke fia‵fia faeloa tatou i te galuega fakatusa ko te ‵katiga o saito?

3. I te auala fea ne maua ei ne soko mua o Iesu a te fiafia?

4. Kaia ne uga atu ei a soko o Keliso?

5. Se a te vaegā fekau telā e folafola atu ne tatou?

6. Se a te galuega telā ne ‵kau atu ki ei a te kau apositolo i te senitenali muamua?

7, 8. Se a te fekau o te fakamoemoega telā ne momea aka tena fakasalalauatuga fakavave ne tavini a Ieova i lō aso mua?

9. Se a te fakatonuga ne tuku atu ne Iesu ki ana soko, kae ne ‵saga atu pefea a tino ki te fekau o te Malo?

10. Ne kausaki atu pefea a Paulo i te ‵salaga ki tino loto ‵lei?

11. Ne a auala ne fakaaogā i te faiga o te galuega talai i aso mua?

12. Ne fai pefea ne tatou ke momea aka te magoi o te ‵tou galuega talai? Fakamatala mai.

13. Ne a fakamafulifuliga i te ‵tou galuega talai ko fai nei i nisi koga?

14. Se a te uiga e fakaasi atu faeloa ne tatou i te fakamatalaatuga o ‵tou fekau, kae kaia?

15. E mafai pefea o tumau tatou i se uiga filemu māfai e fe‵paki tatou mo tino sē fia‵fia i te ‵tou galuega talai?

16, 17. Se a te ‵tou fakamoemoega i te faiga o toe āsiga? (e) E mafai pefea o fesoasoani atu tatou ki tino kolā e isi ne olotou fesili faka-te-Tusi Tapu?

18. E mafai pefea o fesoasoani atu tatou ki tino ‵fou ke fai mo fai ne soko o Iesu Keliso?

19. Kaia e isi ei ne pogai ‵lei ke maua te fiafia i te galuega talai i te vaitaimi o te taviniga a Iesu mo aso mai tua ifo i ei?

20. Se a te mea e aumai ei te fiafia lasi i te ‵tou galuega talai?

21. Se a te mea ka sau‵tala tatou ki ei i te suā mataupu?

[Ata i te itulau e 8]

Te galuega talai i te senitenali muamua mo te 20 senitenali

[Ata i te itulau e 9]

E pelā mo Paulo, e taumafai malosi a tino talai i aso nei ke oko atu ki tino i koga katoa

[Ata i te itulau e 9]

Ke folafola atu te tala ‵lei mō te mata fiafia