Ke Gasue‵sue Malosi i te Galuega ko te ‵Katiga o Saito!
“A latou kolā ne ‵toki lakau kae tagi, ka tau ne latou te taukai mo te fiafia.”—SALAMO 126:5.
MAI TUA o te tolu o malaga talai a Iesu Keliso ki Kalilaia, ne fai atu a ia ki ana soko, penei: “Ko oko eiloa i te lasi o te saito e fia kati, ka ko tino ga‵lue i te saito e se tokouke.” (Mataio 9:37) E penā foki te tulaga i Iuta. (Luka 10:2) Ona ko te mea ne tupu tonu te mea tenā i te 2,000 tausaga ko ‵teka, se a te ‵tonuga o te mea tenā i aso nei? Ia, i te tausaga faka-te-taviniga ko teka, e silia atu i te 6,000,000 o Molimau a Ieova ne ga‵lue ma‵losi i te galuega fakatusa ko te ‵katiga o saito i va o tino e toko 6,000,000,000 i te lalolagi, kae ko te tokoukega o tino kolā e ‘seai se tino e fesoasoani atu, ko pela [latou] mo mamoe e seai se lotou tino tausi.’ Tela la, a te fakamalosiga a Iesu ke “fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito,” e ‵pau eiloa tena aogā i aso nei e pelā mo tena aogā i senitenali ko ‵teka.—Mataio 9:36, 38.
2 Ko oti ne tali mai ne Ieova te Atua, te Pule o te fatoaga, a te fakamolemole ke uga mai ne tino faigaluega e tokouke atu. Kae ko oko eiloa i te fakafiafia ke kau atu ki te galuega talai telā e takitakigina ne te Atua! E tiga eiloa e mu‵tana te aofaki o tatou māfai e fakatusa ki te aofaki o tino i atufenua katoa, a te ‵tou ‵kau atu mo te loto finafinau ki te galuega talai mo te faiga o soko ne fai ei ke ‵saga mai a tino o te lalolagi. E uke a fenua e takutaku atu ei ne latou a tatou i fale fakasalalau tala. A te fakatagiga o te pele o te mataloa i se koniseti i te televise e mafai o iku atu ki se fakamatalaga me ko Molimau a Ieova konā e ‵tu i te mataloa. E tonu, a te ‵tou galuega faka-Kelisiano fakatusa ko te ‵katiga o saito ko lauiloa i te 21 senitenali tenei.
3 Ne ‵saga atu foki a tino i te lalolagi ki te galuega talai o te Malo i te senitenali muamua kae ne fakasauā foki ne latou a tino kolā ne folafola atu te Malo tenā. Tela la, ne tusi mai penei a te apositolo ko Paulo: “I toku manatu me i te Atua ne fai ne ia matou ko toe apositolo se taulia eiloa, e pela me ne tino ko tuku atu ke tamate i mua o tino, ke fai mo kilokiloga a te lalolagi o agelu mo tino.” (1 Kolinito 4:9) E penā foki te tumau o tatou e pelā me ne tino folafola o te Malo faitalia a fakasauāga, e fai ei ke ‵saga mai a tino o te lalolagi kae e tāua ‵ki foki te galuega tenā i te kilokiloga a agelu. E fai mai penei te Fakaasiga 14:6: “Ne matea ne au [te apositolo ko Ioane] te sua agelu e lele i luga loa i te lagi, o folafola atu te talaiga se gata mai tela ko te Tala ‵Lei ki tino o te lalolagi, ki fenua katoa mo matakaiga, ki ‵gana katoa mo tino.” Ao, e ‵lago mai a agelu ki te ‵tou taviniga—te ‵tou galuega talai!—Epelu 1:13, 14.
“Ka Inosia Koutou”
4 I te taimi ne uga atu ei a apositolo a Iesu e pelā me ne tino talai ne faka‵logo latou ki tena fakatonuga ke “mata‵poto e pela mo ne gata, kae ke filemu e pela mo ne lupe.” Ne toe fakaopoopo atu a Iesu, penei: “Ke matapula‵pula koutou, me e isi ne tino ka puke ne latou koutou o ‵moli ki fono; kae kini foki koutou i loto i olotou fale tapuaki. Ka aumai koutou o fakamasino i mua o kovana mo tupu ona ko au, ko te mea ke taku atu ki a latou mo fenua fakaatea a te Tala ‵Lei. . . . Ka inosia koutou ne tino katoa ona ko au. Ka ko te tino tela e loto mau ke oko eiloa ki te ikuga, e ola a ia.”—Mataio 10:16-22.
5 E “inosia” tatou i aso nei ona ko te “lalolagi katoa ko i lalo i te pule a te Tino Masei.” (1 Ioane 5:19) E lavea ne ‵tou fili te ‵tou maumea faka-te-agaga kae e ita fitifiti māfai e fai atu me ne māfua mai te mea tenā i a Ieova. E lavea ne tino ‵teke te ‵tou mata fia‵fia mo te mata kata‵kata i te taimi e ‵kau atu ei tatou ki te galuega talai. E ofo latou i te ‵tou loto ‵kau fakatasi! A te ‵tonuga loa, e mafai o talia ne latou mo te loto muimui te manatu tenā māfai e faima‵laga atu latou ki te suā fenua kae maua atu me e fai ne Molimau a Ieova i konā a te galuega foki telā e lavea atu ne latou e fai i te lotou fenua eiloa. E tonu, e iloa ne tatou me e oko mai te taimi tonu, ka iloa foki ei ne ‵tou fili me i a Ieova ko te ‵tou fesoasoani mo te māfuaga foki o ‵tou ‵kau fakatasi.—Esekielu 38:10-12, 23.
6 Ko oti ne tuku atu ne te Pule o te fatoaga ki tena Tama, ko Iesu Keliso, a “te pule katoa i te lagi mo te lalolagi.” (Mataio 28:18) Tela la, e fakaaogā ne Ieova a Iesu ke takitaki ne ia a te galuega talai e auala i agelu mo te “tavini fakamaoni kae poto” telā ne fakaekegina i te lalolagi nei. (Mataio 24:45-47; Fakaasiga 14:6, 7) Kae e mafai pefea o fakafesagai atu tatou ki ‵tekemaiga mai ‵tou fili kae ke tumau te ‵tou fia‵fia i te taimi e ga‵lue malosi ei tatou i te galuega talai?
7 Kafai e fe‵paki tatou mo ‵tekemaiga io me ko fakasauāga, ke na ‵sala atu tatou ki te fesoasoani o te Atua ko te mea ke mafai o tumau tatou i se olaga tokagamalie e pelā mo Paulo. Ne tusi mai a ia penei: “Kafai ko fetugina matou, e fakamanuia atu matou ki ei; kae kafai foki ko fakasauagina matou, e kufaki matou.” (1 Kolinito 4:12, 13) A te fakaasiatuga o se vaegā uiga penā, fakatasi mo te ‵tou atamai i te galuega talai, e ‵fuli ei a kilokiloga o ‵tou fili ki a tatou i nisi taimi.
8 Ke oko foki eiloa ki te fakamataku o te mate, e se mafai eiloa o fakavāivāi i ei ‵tou loto finafinau e pelā me ne tino talai. E folafola atu ne tatou mo te sē ma‵taku a te fekau o te Malo i mua o tino katoa. Kae e maua ne tatou a te fakatalitonuga fakamalosi loto mai i pati a Iesu, konei: “Sa ma‵taku ki a latou kola e tamate ne latou te foitino, me se mafai ne latou o tamate te agaga; ka ke ma‵taku koutou ki te Atua, me ko ia e mafai ne ia o tamate te foitino mo te agaga i Kena.” (Mataio 10:28) E iloa ne tatou me i te ‵tou Tamana faka-te-lagi ko te Tino telā e tuku mai ne ia te ola. E taui atu ne ia a tino kolā e tumau i te fakamaoni ki a ia kae ga‵lue foki mo te fakamaoni i te galuega talai.
Se Fekau Fakaola Tino
9 I te taimi ne folafola atu ei ne te pelofeta ko Esekielu a fekau a Ieova ki te ‘atufenua ‵teke’—te malo o Isalaelu mo Iuta—ne fia‵fia a nisi tino ke lagona atu a mea kolā ne fai atu ne ia. (Esekielu 2:3) Ne fai mai penei a Ieova: “A koe ki a latou, e pela fua me se tino usuusu, tela e usu ne ia a pese fakafamau io me tata te kitala.” (Esekielu 33:32) E tiga eiloa ne fia‵fia latou ki pati a Esekielu, ne fakata‵mala latou o gasue‵sue e ‵tusa mo mea konā. Se a te mea ko tupu i aso nei? I te taimi ne folafola atu ei ne te ‵toega fakaekegina mo olotou taugasoa a te fekau a Ieova mo te loto ‵toa, e isi ne tino e fia‵fia o fakalogo‵logo e uiga ki fakamanuiaga mai te Malo, kae e se fakaasi atu ne latou te loto fakafetai, ke fai latou mo fai ne soko, kae ‵kau atu foki ki te galuega talai.
10 I te suā feitu, ko oti ne ‵saga atu mo te fia‵fia a tino e tokouke ki te galuega talai kae fai olotou tusaga i te folafolaatuga o te fekau a te Atua. E pelā mo taimi o te fakasologa o fono faka-Kelisiano mai te 1922 ki te 1928, ne momea aka te manino o te fakasalalauatuga faeloa o fekau o fakamasinoga ki luga i te fakanofonofoga masei o mea a Satani. Ne fakasalalau atu ne fale fakasalalau tala a taku fakamaseiga kolā ne fakamatala atu i fono konei. Mai tua ifo i ei, ne tufa atu ne tino o te Atua a te fia miliona o kopi o fakamasinoga kolā ne ‵lomi aka.
11 I tausaga talu mai te 1930, ne toe ‵tala mai a te suā vaega o te galuega talai—ke fakasalalau atu ei a fakamatalaga i te faiga o māti. Muamua la, ne safe i ua o tino o Ieova a faka‵pulaga kolā ne faka‵pula atu ei a lauga mō tino katoa. Fakamuli ifo, ne tauave ne latou a faka‵pulaga mo vaegā tugāpati pelā mo te “A te lotu se malei kae se mea faka‵numi tino foki” mo te “Ke tavini atu ki te Atua mo Keliso te Tupu.” I te taimi ne māti atu ei latou i auala, e fai ei ne latou a tino ke ‵kilo atu ki a latou. ‘Ne fai ne te mea tenei ke lauiloa a Molimau a Ieova kae ke loto ‵toa foki,’ ko fakamatalaga a se taina telā ne kau atu faeloa ki te galuega tenei i auala fakalavelave o Lonitona, i Egelani.
12 I te taimi e folafola atu ei a te fekau o fakamasinoga a te Atua, e faka‵mafa foki ne tatou a mea tāua e uiga ki te fekau o te Malo. E fesoasoani mai te ‵tou molimau atu mo te loto ‵toa i mua o tino katoa i te lalolagi nei, ke ‵sala atu ki tino loto ‵lei. (Mataio 10:11) A te tokoukega o tino koi ‵toe mai te potukau fakaekegina ne ‵saga atu ki te ‵kamiga manino ki te galuega talai i tausaga talu mai te 1920 mo te 1930. Kae i se fono i te 1935, ne oko mai ei se tala fakaofoofogia e uiga ki se taimi gali i aso mai mua mō te “vaitino tokouke” o ‘nisi mamoe’ i se lalolagi palataiso. (Fakaasiga 7:9; Ioane 10:16) Ko oti ne faka‵logo latou ki fekau o fakamasinoga a te Atua kae ko ‵kau fakatasi mo tino fakaekegina i te talaiatuga o te tala ‵lei telā e fakaola ei a tino.
13 E fakamafanafana malosi atu a pati konei i te Salamo 126:5, 6, ki tino ga‵lue i te galuega talai, kae maise eiloa ki tino kolā e logo‵mae i fakasauāga: “A latou kola ne ‵toki lakau kae tagi, ka tau ne latou te taukai mo te fiafia! A latou kola ne tagi i te lotou ologa o ‵toki a fuataga, ka ‵foki mai mo te pese fiafia i te laku maiga o fuaga o te taukai.” A pati a te faisalamo e uiga ki te ‵tokiga mo te ‵tauga o fuaga, e fakaasi mai i ei a te tausiga atafai mo te fakamanuiaga a Ieova ki luga i te ‵toega kolā ne ‵foki atu mai te ‵nofo pologa i Papelonia mua. Ko oko eiloa i te fia‵fia o latou i te lotou fakasaolotoga, kae kāti ne ‵tagi latou i te taimi ne ‵toki ei a fuagālakau i te laukele sē aogā telā ne seki galue aka loa i ei i tausaga e 70 ne ave fakapagota ei latou. Kae ko tino kolā ne tumau eiloa i te ‵tokiga mo te faiga o galuega fakatūtū, ne maua ne latou a fuataga mo te lotomalie mai i olotou galuega ‵mafa.
14 Kāti e mafai o ‵tagi tatou māfai ko tofotofogina tatou io me e logo‵mae tatou io me ko ‵tou taina tali‵tonu mō te amiotonu. (1 Petelu 3:14) I te ‵tou galuega ko te ‵katiga o saito, kāti e faigata ki a tatou i te taimi muamua ona ko te mea e foliga mai me e seai ne mea aogā e maua mai i ‵tou taumafaiga i te galuega talai. Kae kafai e tumau tatou i te ‵tokiga mo te fakasiusiuga, ka fai ne te Atua ke ola aka, ke silia atu i te mea telā e fakamoe‵moe tatou ki ei. (1 Kolinito 3:6) E fakaasi faka‵lei mai te mea tenei e auala i ikuga o te ‵tufaatuga ne tatou o Tusi Tapu mo tusi faka-te-Tusi Tapu.
15 Mafaufau ki te fakaakoakoga a se tagata e igoa ki a Timu. I te taimi ne mate ei tena mātua, ne maua ne ia i kope o tena matua se kopi o te tusi ko te Life—How Did It Get Here? By Evolution or by Creation? a Ne faitau a ia ki ei mo te fiafia. I se sau‵talaga mo se Molimau telā ne fanatu ki a ia i te auala, ne lotomalie a Timu ke toe asi atu te Molimau tenā ki a ia, kae ne iku atu te mea tenei ki se akoga faka-te-Tusi Tapu. Ne gasolo fakavave atu a Timu ki mua i te feitu faka-te-agaga, ne tuku atu eiloa a ia ki a Ieova, kae ne papatiso foki. Ne fai atu a ia ki nisi tino o tena kāiga e uiga ki mea kolā ne tauloto ne ia. Ne iku atu i ei ki te fai o tena tuagane mo tena taina mo fai ne Molimau a Ieova, kae ne maua fakamuli ne ia a te tauliaga ke tavini atu e pelā me se volenitia galue tumau i te Peteli i Lonitona.
Ne Fakasauāgina Kae e Fia‵fia Eiloa
16 Kaia ne iku manuia ei te galuega talai? Ona ko te mea ne faka‵logo a Kelisiano fakaekegina mo olotou taugasoa ki te fakatonuga a Iesu, penei: “So se mea e taku atu ne au ki a koutou i te pouliga, e ‵tau mo koutou o toe taku atu i te mainaga, a mea foki ne lagona ne koutou i a koutou eiloa, e ‵tau o taku atu ki tino i luga o tuafale.” (Mataio 10:27) Kae e iloa ne tatou me ka fetaui tatou mo mea faiga‵ta, me ne fakailoa mai penei a Iesu: “Ka tuku atu ne tagata olotou taina tonu ke tamate, e pena foki a tamana ki olotou fanau; ko fanau foki ka ‵teke ki olotou matua kae tamate foki.” Ne toe fai mai foki penei a Iesu: “Sa manatu ake koutou i a au ne vau o aumai te filemu ki te lalolagi; ikai, au ne seki vau o aumai te filemu ka ko te pelu, tela ko te ‵nofo mavaevae.” (Mataio 10:21, 34) Ne seki manako a Iesu ke ‵nofo mavae‵vae a kāiga. Kae e maua eiloa te ikuga tenā i nisi taimi ona ko te tala ‵lei. E penā foki eiloa te ‵tonu o te mea tenei i tavini a te Atua i aso nei. Kafai e āsi atu tatou ki kāiga, e se ma‵nako tatou ke fakamalosi aka se tulaga mavaevae. E ma‵nako eiloa tatou ke puke ‵mau a tino katoa ki te tala ‵lei. Tela la, e taumafai eiloa tatou ke fakapili‵pili atu ki tino katoa o se kāiga i se auala atafai kae alofa telā e fai ei ‵tou fekau ke talia ne tino kolā “ko oti ne filifilia mō te ola se gata mai.”—Galuega 13:48.
17 Ko oti ne fai ne te fekau o te Malo a tino kolā e fakamaluga ne latou te pulega a te Atua ke ‵tu kese. E pelā mo te auala e tasi telā e ‵kese ei ‵tou taina tapuaki ona ko te mea e ‘ ‵togi atu ne latou a mea a Kaisala ki a Kaisala mo mea a te Atua ki te Atua’ i aso o te National Socialism i Siamani. (Luka 20:25) E ‵kese mai i takitaki lotu mo tino kolā e fai mai i a latou ne Kelisiano kae ‵kau atu ki lotu i Lotu Kelisiano ‵Se, e ‵tu ‵mautakitaki a tavini a Ieova, me e ita fitifiti latou ma soli a akoakoga fakavae i te Tusi Tapu. (Isaia 2:4; Mataio 4:10; Ioane 17:16) A te polofesa ko Christine King, te tino telā ne tusi ne ia a te tusi ko The Nazi State and the New Religions, ne fai mai penei: “Ko te malo fua o te kau [Nasi] ne seki manumalo i te lotou ‵tekeatuga ki Molimau, me e tiga eiloa ne tamate ne latou a te fia afe o latou, ne fanofano ‵lei eiloa te lotou galuega kae ne tumau eiloa i te olaola ‵lei a gasue‵suega a Molimau a Ieova i a Me i te 1945, kae ne palele atu a te National Socialism.”
18 E fakaofoofogia eiloa a te uiga telā e fakaasi atu ne tino o Ieova māfai ko fe‵paki latou mo fakasauāga. E tiga eiloa e ofo a tino ma‵luga i te ‵tou fakatuanaki, e fakaasi mai ne latou a te lotou ofo i te seai o se loto fai fili i a tatou. E pelā mo tino kolā ne ‵sao atu i mea fakama‵taku (Holocaust), ne fakaasi atu faeloa ne latou te lotou fia‵fia mo te loto ma‵lie māfai ko mafau‵fau latou ki mea kolā ne ‵tupu i aso mua. E iloa ne latou me ko Ieova telā ne tuku atu ne ia te ‘mana e sili atu i te malosi masani.’ (2 Kolinito 4:7) E maua ne te kau fakaekegina i ‵tou tafa a te fakatalitonuga me “ko tusi [olotou] igoa i te lagi.” (Luka 10:20) E tuku atu ne te lotou kufaki se fakamoemoega telā e se iku atu ki te māvale, kae e maua ne tino ga‵lue fakamaoni i te galuega talai kolā e fakamoemoe ke ola i te lalolagi a fakatalitonuga tai ‵pau.—Loma 5:4, 5.
Ke Tumau i te Galuega Talai
19 E se iloa ne tatou me pefea te leva ka talia ei ne Ieova ke tumau tatou i te ‵kau atu ki te galuega fakatusa, ko te ‵katiga o saito. I te vaitaimi tenei, e ‵tau o masaua ne tatou me e isi ne auala fakapito e fai ei ne tino ‵kati saito olotou galuega. E penā foki loa, e mafai ne tatou o fakatalitonu aka me ka ma‵goi eiloa a auala kolā ne taumafai kae tofotofo tatou ki ei mo te fakamaoni i te faiga o te galuega talai. Ne fai atu a Paulo ki taina Kelisiano: “Au e fakamolemole atu ki a koutou, ke tau‵tali mai koutou i oku auala.” (1 Kolinito 4:16) I te taimi ne fetaui ei a Paulo mo toeaina mai i Efeso i Mileto, ne fakamasaua atu a ia ki a latou me ne seki gata eiloa tena akoako atu ki a latou i ana ‘lauga mo akoakoga ne fai atu i olotou lukuga, pela foki mo olotou fale.’ (Galuega 20:20, 21) Ko oti ne tauloto a te taugasoa o Paulo ko Timoteo ki faifaiga a te apositolo tenā, telā, ko mafai ei ne ia o fakamasani aka a te kau Kolinito ki mea konei. (1 Kolinito 4:17) Ne fakamanuia ne te Atua a auala ne akoako atu ei a Paulo, e pelā eiloa mo te fakamanuiaga ne ia ‵tou tumau i te talaiatuga o te tala ‵lei ki tino katoa mai fale ki fale, toe āsiga, mo akoga faka-te-Tusi Tapu i fale, mo so se koga e mafai o maua atu i ei a tino.—Galuega 17:17.
20 Mai tua o tena talaiatuga ki se fafine Samalia i tafa o Sula i te 30 T.A., ne faipati a Iesu e uiga ki te ‵katigā saito faka-te-agaga. Ne fai atu a ia ki ana soko, penei: “‵Kilo otou mata ki fatoaga, ko iloa ei ne koutou me ko ‵tau o kati. A ia tela e kati saito e maua ne ia tona ‵togi, kae fakaputu foki ne ia ana fuagalakau mo te ola se gata mai, ko te mea la tena ka fiafia fakatasi ei te tino toki saito mo te tino kati saito.” (Ioane 4:34-36) Kāti ko oti ne lavea atu ne Iesu a te ikuga o tena fetauiga mo te fafine Samalia, me e tokouke a tino ne fakatuanaki ki a ia ona ko te molimau o tou fafine. (Ioane 4:39) I tausaga fakamuli nei, ko oti ne ave keatea ne fenua kese‵kese a fakataputapuga o Molimau a Ieova io me ko oti ne taliagina latou mai lalo i te tulafono, tela la, ne ‵tala mai i ei a fatoaga ‵fou mō te ‵katigā saito. Ne iku atu i ei ki te ‵katigā saito faka-te-agaga lasi telā e gasolosolo atu ki mua. A te ‵tonuga loa, ko maua nei i te lalolagi kātoa a fakamanuiaga e uke i te taimi e tumau ei tatou i te ‵kau atu mo te fia‵fia ki te ‵katigā saito faka-te-agaga.
21 Kafai ko ‵pala a fuataga kae ko ‵lei foki ke tau, e ‵tau o gasue‵sue fakavave a tino ga‵lue. E ‵tau o ga‵lue malosi latou e aunoa mo se fakatalave. I aso nei, e ‵tau o ga‵lue kae fakatāua malosi te galuega ona ko te mea ko ola tatou i te taimi o “te gataga.” (Tanielu 12:4) E tonu, e fetaui tatou mo fakalavelave, kae e fai nei a te ‵katigā saito a tino tapuaki a Ieova telā ko silia atu nei i lō aso mua. Tela la, tenei eiloa te aso o te fiafia. (Isaia 9:3) E pelā me ne tino ga‵lue fia‵fia, ke na ga‵lue malosi nei tatou i te galuega talai!
[Fakamatalaga mai lalo]
a Ne ‵lomi kae tufa atu ne Molimau a Ieova.
Ka Tali Mai Pefea ne Koe?
• Ko oti ne tali mai pefea ne te Pule o te fatoaga a te fakamolemole mō tino ga‵lue e tokouke atu?
• E tiga eiloa e “inosia” tatou ne tino, se a te uiga e fakaasi faeloa ne tatou?
• Kaia e fia‵fia ei tatou i te galuega talai faitalia me e fakasauāgina tatou?
• Kaia e ‵tau ei o tumau tatou i te galuega talai kae saga fakavave atu foki ki ei?
[Fesili mo te Sukesukega]
1. Kaia e “fakatagi atu ki te Tino e a ia te fatoaga, ke uga mai se kau faigaluega e tai tokouke atu o fakaputu te saito”?
2. Se a te mea e lauiloa ei tatou i mua o tino?
3. (a) E iloa pefea ne tatou me ne lauiloa a te galuega talai o te Malo i te senitenali muamua? (e) Kaia e mafai ei ne tatou o fai atu me e ‵lago mai a te kau agelu ki te ‵tou galuega?
4, 5. (a) Se a te fakailoaga telā ne tuku atu ne Iesu ki ana soko? (e) Kaia e “inosia” ei a tavini a te Atua i aso nei?
6. Se a te fakatalitonuga telā e maua ne tatou i te taimi e ‵kau atu ei tatou ki te galuega talai, kae se a te fesili telā e sae aka i ei?
7. Se a te kilokiloga e ‵tau o taumafai tatou ke fakatumau māfai ko ‵teke io me e fakasauāgina tatou?
8. Se a te fakatalitonuga telā e maua ne tatou mai i pati a Iesu kolā ne fakamau i te Mataio 10:28?
9. Ne ‵saga atu pefea a nisi tino ki pati a Esekielu, kae e tupu pefea se mea tai ‵pau penā i aso nei?
10, 11. I te vaega muamua o te 20 senitenali, ne a mea ne fai ke fakasalalau atu ei te ‵tou fekau fakaola tino, kae ne a ikuga ne maua mai i ei?
12. E se gata fua i fekau o fakamasinoga a te Atua, ne a mea ko oti ne faka‵mafa ne tatou i te ‵tou galuega talai, kae ko oi ko ‵kau fakatasi nei i te talaiatuga o te tala ‵lei?
13, 14. (a) Se a te fakamafanafanaga e mafai o maua mai te Salamo 126:5, 6? (e) Kafai e tumau tatou i te ‵tokiga mo te fakasiusiuga, ne a mea ka ‵tupu i ei?
15. Ke tuku mai se fakaakoakoga o te aogā o tusi faka-Kelisiano i te galuega talai.
16. (a) Kaia e manuia ei a te faiga o te galuega talai? (e) Se a te fakailoaga telā e tuku mai ne Iesu e uiga ki te ikuga o te tala ‵lei, kae se a te kilokiloga e ‵tau o fakaasi atu ne tatou ki tino?
17. E ‵tu kese pefea a tino kolā e fakama‵luga ne latou a te pulega a te Atua, kae se a te fakaakoakoga e tasi o te mea tenei?
18. Se a te uiga e fakaasi atu ne tino o Ieova faitalia a fakasauāga?
19. Ne a auala ma‵goi kolā ko oti ne fakaaogā i te galuega faka-Kelisiano?
20. Ne fakaasi mai pefea ne Iesu me ko fai nei se ‵katigā saito faka-te-agaga telā e lava kae ‵toe, kae e fakamaoni aka pefea te ‵tonu o te mea tenei i tausaga fakamuli nei?
21. Kaia e maua ei ne tatou a pogai ke ga‵lue malosi mo te fiafia i te ‵katiga o saito?
[Ata i te itulau e 15]
E ‵lago atu a agelu ki tino kolā e ‵kau atu ki te ‵katigā saito faka-te-agaga
[Ata i te itulau e 16]
A te fakasalalau atu o fakamatalaga i te faiga o mati ne fai ei a tino e tokouke ke ‵saga atu ki te fekau o te Malo
[Ata i te itulau e 16]
E ‵toki kae fakasiusiu ne tatou, kae e fai ne te Atua ke ola aka