Ko ‵Tau Eiloa o ‵Kati te Fatoaga

1. Se a te galuega tāua ko fai nei?

¹ Mai tua o tena talaiatuga ki se fafine Samalia, ne fai atu a Iesu ki ana soko: “‵Kilo otou mata ki fatoaga, ko iloa ei ne koutou me ko ‵tau o ‵kati.” (Ioane 4:35, 36) Ko fai eiloa te ‵katiga o te fatoaga i te feitu faka-te-agaga, kae ne mafai o lavea ne Iesu a te lasi o te galuega tenā e ‵tau o fai i te lalolagi kātoa. Mai i tena tulaga i te lagi, e tumau eiloa a Iesu i te aofia malosi i te ‵katiga o te fatoaga. (Mata. 28:19, 20) Ne a fakamaoniga e fakaasi mai i ei me e tumau eiloa te gasolo aka o te galuega tenei i te taimi ko pilipili atu ei ki tena fakaotiga?

2. Ne a mea ‵tupu e fakaasi mai i ei me ko gasolo aka eiloa o lasi a te galuega ko te ‵katiga o te fatoaga i te lalolagi kātoa?

² Se ‵Katiga o te Fatoaga i te Lalolagi Kātoa: I te tausaga faka-te-taviniga ko te 2009, ne fanaka ei i se 3.2 pasene a te aofaki o tino talai i te lalolagi kātoa. A fenua kolā e fakatapu i ei te faiga o te galuega talai e 14 pasene te fanakaga. A te aofaki o a‵koga faka-te-Tusi Tapu ne lipoti mai i masina katoa ko silia atu i te 7,619,000​—se aofaki telā e lasi fakafia atu i te aofaki o tino talai kae kāti toeitiiti ko kātoa te āfa miliona te uke atu i lō te aofaki o a‵koga faka-te-Tusi Tapu ne lipoti mai i te tausaga ko teka. E ‵tusa eiloa mo te gasolo vave aka o te galuega i nisi koga, ko uke atu a fakamolemole ne maua mō misionale kolā ne a‵koga i Kiliata. Ko gasolo aka eiloa o uke a fakapotopotoga i nisi ‵gana e faka‵tu aka i fenua e uke. E lavea ‵lei atu me ko fakava‵vave eiloa ne Ieova te faiga o te galuega i te fakaotiotiga o te ‵katigā o te fatoaga. (Isa. 60:22) E mata, e maua ne koe se kilokiloga aoga ki tau “fatoaga” fakatusa?

3. Ne a mea ko oti ne fakaiku aka ne nisi tino e uiga ki koga talai a olotou fakapotopotoga?

³ Te Fatoaga o Tau Fakapotopotoga: Kāti e fai mai a nisi tino: “E se uke a tino fia‵fia i taku koga talai.” Se mea tonu me e se uke a tino fia‵fia i nisi koga talai e pelā mo nisi koga io me ko uke atu a tino fia‵fia i ei i lō aso mua. Tela la, e fakaiku aka ne nisi Molimau me i te tokoukega o tino ko oti ne lagona ne latou te tala ‵lei i olotou koga talai, kae ko ‵tau fua nei o ‵saga tonu atu latou ki nai tino. E mata, e tonu a te manatu tenā?

4. Se a te kilokiloga ‵lei ki te ‵tou galuega e ‵tau o fakamalosi aka ne tatou, kae kaia?

⁴ Mai i te kamataga ki te fakaotiga, a te ‵katiga o te fatoaga se taimi ke ga‵lue malosi i ei. Mafaufau la ki te tāua ke fai fakavave te galuega i pati konei a Iesu: “Ko oko eiloa i te lasi o te saito e fia ‵kati, ka ko tino ga‵lue i te saito e se tokouke! Fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.” (Mata. 9:37, 38) A Ieova, te Tino e a ia te fatoaga, e panaki eiloa mo ia a te taimi mo te koga e ‵sae aka ei a saito. (Ioane 6:44; 1 Koli. 3:6-8) Se a te ‵tou tofiga? E tali mai te Tusi Tapu: “Ke ‵toki ou lakau i te taeao pelā foki i te afiafi. E se mafai o iloa ne koe me e ola ‵lei katoa io me ka ola ‵lei nisi kae se ola ‵lei nisi.” (Fai. 11:4-6) E tonu, kafai ko oko atu te ‵katiga o te fatoaga ki tena fakaotiotiga, e se tenei eiloa te taimi ke ma‵nava aka ei ‵tou lima!

5. Kaia e ‵tau ei o tumau tatou i te talai atu mo te loto finafinau i koga talai kolā e foliga mai me e se fia‵fia a tino i ei?

⁵ Ke Tumau Eiloa i te ‵Katiga o te Fatoaga: Kafai foki loa ko oti ne soko fakafia te ‵tou koga talai kae e foliga mai me e se fia‵fia a tino i ei, e isi eiloa ne pogai ‵lei e ‵tau ei o ga‵lue tatou mo te loto finafinau kae fakava‵vave. (2 Timo. 4:2) A te uke o fakalavelave fakama‵taku i te lalolagi e fai ei a tino ke ‵fuli olotou kilokiloga kae mafaufau malosi ki olotou olaga i aso mai mua. I te taimi e gasolo aka ei o ma‵tua a talavou, kāti e ma‵nako latou ke maua te tokagamalie mo te filemu o te mafaufau. A te ‵tou tumau i te faiga o te galuega e mafai o ofo i ei a nisi tino. E tonu, a tino kolā ne seki fia faka‵logo mai i aso mua kāti e mafai o ‵saga mai i aso mai mua. Ke oko foki eiloa ki tino kolā e ‵teke mai mo te iloa tonu ki te ‵tou fekau e ‵tau o fakailoa atu foki ki a latou.​—Eseki. 2:4, 5; 3:19.

6. Kafai e faigata te ‵tou koga talai, ne a mea ka fesoasoani mai ke fakatumau te loto finafinau?

⁶ Kafai e faigata te ‵tou koga talai, ne a mea ka fesoasoani mai ke fakatumau ei a te loto finafinau? Kāti e mafai o fai ne tatou a nisi vaega o te ‵tou galuega talai, i tafa o te galuega mai fale ki fale, e pelā mo te talai atu i koga ga‵lue io me ko telefoni. Io me e mafai o fakakese‵kese ‵tou pati fakatomua ko te mea ke fakaaoga faeloa a pati fakatomua ‵fou. E mafai o ‵fuli a mea e fai ne tatou kae ‵kau atu ki te galuega talai i te fakaafiafi io me ko nisi taimi kolā ko ‵nofo atu ei a tino i fale. Kāti e mafai o taumafai tatou ke tauloto ki se ‵gana fou ko te mea ke fakaoko atu a te tala ‵lei ki tino e tokouke. E mafai o momea aka ‵tou mea e fai i te galuega talai mai i te paenia tumau. Io me e mafai o olo atu tatou ki se koga telā e se uke i ei a tino ga‵lue i te fatoaga. Kafai e maua ne tatou se kilokiloga tonu ki te ‵katiga o te fatoaga, ka taumafai eiloa tatou ke ‵kau katoatoa atu ki te faiga o te galuega tāua tenei.

7. E pefea te leva e ‵tau ei o tumau tatou i te galuega ko te fakamaopoopoga o fuaga i te feitu faka-te-agaga?

⁷ E mu‵tana fua te taimi e maua ne tino fai fatoaga ke fakamaopoopo ei a fuaga, telā e se mafai ne latou o mānava io me e ga‵lue malie fua ke oko ki te taimi e oti ei te galuega. E penā foki te ‵katiga o te fatoaga i te feitu faka-te-agaga. E pefea te leva e ‵tau ei o tumau tatou i te galuega ko te fakamaopoopoga o fuaga? Ke oko eiloa ki te taimi e “oko mai ei te gataga” mo te “gataga o te lalolagi.” (Mata. 24:14; 28:20) E pelā mo te Faifeau Sili a Ieova, e ma‵nako tatou ke fakaoti a te galuega telā ne tuku mai ke fai ne tatou. (Ioane 4:34; 17:4) Tela la, ke na tumau tatou i te faiga o te ‵tou galuega mo te loto finafinau, te fiafia, mo se kilokiloga aoga ke oko eiloa ki te gataga. (Mata. 24:13) E seki oti te ‵katiga o te fatoaga i te feitu faka-te-agaga!

[Fakamatalaga o te Ata i te itulau e 2]

Mai i te kamataga ki te fakaotiga, a te ‵katiga o te fatoaga se taimi e ‵tau o ga‵lue malosi i ei