E Ola te Muna a Ieova
Manatu Tāua Mai te Tusi ko Kenese—I
E FAKAUIGA a te pati “Kenese” ki te “kamataga” io me ko te “fanaumaiga.” E fetaui ‵tonu eiloa a te igoa tenei mo te tusi telā e fakamatala mai i ei te faitega o te lagi mo te lalolagi, te fakatokaga o te lalolagi ke ola ei a tino, mo te ‵nofoga a tino i ei. Ne tusi ne Mose a te tusi tenei i te koga lavaki o Sinai, kae kāti ne fakaoti ne ia i te 1513 T.L.M.
E fakamatala mai i te tusi ko Kenese a te lalolagi mai mua o te Lolo, mea ne ‵tupu mai tua o te Lolo, mo faifaiga a Ieova te Atua ki a Apelaamo, Isaako, Iakopo mo Iosefa. Ka faka‵mafa mai i te mataupu tenei a manatu tāua i te Kenese 1:1–11:9, ke oko ki te taimi ne kamata ei o saga atu a Ieova ki te toeaina ko Apelaamo.
TE LALOLAGI MAI MUA O TE LOLO
E fakasino atu a pati kamata “i te kamataga,” o te Kenese ki te fia piliona tausaga ko ‵teka. A mea kolā ne fai i “aso” e ono io me ko te vaitaimi ne fai ei a galuega fakapito konā, e fakamatala mai i te kilokiloga a se tino moi ne nofo a ia i te taimi tenā. I te fakaotiga o te ono o aso, ne faite ei ne te Atua te tagata. E ui eiloa ne galo fakavave atu te Palataiso ona ko te sē fakalogo o te tagata, e tuku mai ne Ieova se fakamoemoega. E faipati a te valoaga muamua i te Tusi Tapu ki te “fanau” telā ka fakaseai ne ia a ikuga ma‵sei o te agasala mo te fakaseaiga o Satani.
I senitenali e 16 mai tua ifo i ei, ne manumalo eiloa a Satani i te ‵fuliga keatea a tino katoa mai te Atua vaganā ko nāi tino fakamaoni fua e pelā mo Apelu, Enoka mo Noa. E pelā mo Kaino telā ne tamate ne ia a tena taina amiotonu ko Apelu. Ne “kamata ei a tino o fakaaogā te igoa tapu o te Aliki” i se auala sē āva. Ne fakaasi mai ne Lameko a te uke o amioga fakasauā i aso konā i te ‵fatuga ne ia o se fakalagi e uiga ki se tamataene ne tamate ne ia, kāti ke sao ei a ia. Ne gasolo aka o sinā masei atu te tulaga o te olaga i aso konā i te a‵vagāga a agelu sē faka‵logo a te Atua mo fāfine kae fa‵nau mai i ei a toa ‵mafi fakasauā kolā e fakaigoa ki Nefilimi. Kae ui ei, ne faite eiloa ne Noa a te vaka, ne fakailoa atu ne ia mo te loto toa a te Lolo telā ka oko mai, kae ne ‵sao ei latou mo tena kāiga.
Tali ki Fesili Faka-te-Tusi Tapu:
1:16—Ne fakamaina pefea ne te Atua a te lalolagi i te aso muamua māfai ne fatoā faite a mea fakamaina i te fa o aso? A te pati Epelu telā e ‵fuli ki te “faite” i te fuaiupu e 16 e ‵kese tena uiga mo te pati “faite” telā e fakaaogā i te Kenese mataupu 1, fuaiupu 1, 21 mo te 27. A “te lagi” telā e aofia i ei a mea fakamaina ko leva ‵ki ne faite a koi tuai o kamata te “aso muamua.” Kae ne seki oko atu te lotou mainaga ki te lalolagi. I te aso muamua, ne isi ei se “mainaga” me ko mafai o ulu atu a te mainaga tenā i loto i kaumana ke lavea atu i te lalolagi. Tenā ne mafai ei o isi se ao mo te po i te lalolagi telā e takamiomio faeloa. (Kenese 1:1-3, 5) Kae ne seki mafai eiloa o lavea atu a te māfuaga o te mainaga tenā mai te lalolagi. I te fa o aso ne faite ei a mea, ne fai ei se ‵fuliga tāua. Ne fai ei ke “maina ki luga i te lalolagi” a te la, te masina mo fetu. (Kenese 1:17) “Ne faite ne te Atua a mea konā” kae ne mafai o lavea atu latou mai te lalolagi.
3:8—E mata, ne faipati tonu atu a Ieova ki a Atamu? E fakaasi mai i te Tusi Tapu me ne masani o faipati atu te Atua ki tino e auala i agelu. (Kenese 16:7-11; 18:1-3, 22-26; 19:1; Famasino 2:1-4; 6:11-16, 22; 13:15-22) A te fakaokomuna sili a te Atua ko tena Fuatasi, e fakaigoa foki ki “te Muna.” (Ioane 1:1) E se taumate ne faipati atu te Atua ki a Atamu mo Eva e auala i “te Muna.”—Kenese 1:26-28; 2:16; 3:8-13.
3:17—I te auala fea ne fakamalaia ei te laukele, kae pefea foki te leva? A te fakamalaiaga telā ne oko ki te laukele e fakauiga ki te faigata ke ‵toki kae ōla ‵lei a lakau i ei. Ne oko atu a ikuga o te laukele telā ne fakamalaiagina, fakatasi mo ana lakau tala‵tala ki tino mai te gafa o Atamu telā ne faipati ei te tamana o Noa ko Lameko e uiga ki te ‘‵tou galuega ‵mafa e fai i te laukele telā ne fakamalaia ne Ieova.’ (Kenese 5:29) Ne fakamanuia ne Ieova a Noa mo tena kāiga mai tua o te Lolo, mai te faiatuga o tena fuafuaga ke faka‵fonu te lalolagi. (Kenese 9:1) Ne tapale i ei i konā te fakamalaiaga o te laukele ne te Atua.—Kenese 13:10.
4:15—Ne fai pefea ne Ieova se ‘fakailoga mō Kaino?’ E se fai mai i te Tusi Tapu me ne fakamailoga ne Ieova a Kaino i tena foitino. Kāti ne aofia i te fakailoga tenā se fakatonuga a te Atua telā ne lauiloa ke puipui ei a ia mai tino taui ma sui.
4:17—Ne maua i fea te avaga a Kaino? “E isi aka foki ne tama‵liki a Atamu.” (Kenese 5:4) Tela la, ne puke ne Kaino sena tuagane io me sena fakatama mo fai tena avaga. Fakamuli ifo, ne seki talia i te tulafono a te Atua ne tuku ki te kau Isalaelu ke avaga se tautuagane ‵tonu.—Levitiko 18:9.
5:24—I te auala fea ne ‘ave ei ne te Atua a Enoka’? Ne oko te ola o Enoka ki se tulaga fakamataku, kae ne seki talia ne te Atua ke tamate a ia ne ana fili. “Ne ave a Enoka ki se koga fakaatea ke sē oko ki ei te mate,” ko pati a Paulo. (Epelu 11:5, NW) E se fakauiga i ei me ne ave ne te Atua a ia ki te lagi ke ola tumau i ei. A Iesu ko te tino muamua ke fanaka ki te lagi. (Ioane 3:13; Epelu 6:19, 20) E mafai o fakauiga a te ‘ave o Enoka ki se koga ke sē oko ki ei te mate’ ki tena fakamoe fakavavega ne te Atua, fakaoti atu ei tena ola. Mai te faiga penā, ne seki logo‵mae ei a Enoka io me ne “mate” a ia i lima o ana fili.
6:6—I te auala fea ne “salamo” ei a Ieova me ne faite ne ia te tagata? E fakauiga a te pati Epelu telā ne ‵fuli ki te “salamo” ki te ‵fuliga o te kilokiloga io me se manakoga. E ‵lei katoatoa a Ieova kae seai foki sena mea ‵se ne fai i te faitega o te tagata. Kae ne ‵fuli tena kilokiloga ki te kautama matagā mai mua o te Lolo. Ne ‵fuli i konā te manakoga o te Atua mai te fia faite tino ki te fia tamate tino ona ko tena sē fiafia ki olotou amioga matagā. A te faka‵saoga o nāi tino e fakaasi mai ei me ne salamo fua a ia e uiga ki tino matagā.—2 Petelu 2:5, 9.
7:2—Se a te mea ne fakavae ki ei a te ‵vaega o manu ‵ma mo manu sē ‵ma?
Ne fakavae tonu te ‵vaega tenā ki te faiga o taulaga i tapuakiga kae sē ki manu e ‵tau o kai io me sē ‵tau o kai. Mai mua o te lolo ne seki ‵kai a tino ki ‵kano o manu. A te faka‵kesega o meakai “‵ma” mo meakai “sē ‵ma” ne kamata fua i te Tulafono telā ne tuku ki a Mose, kae ne fakagata foki i te taimi ne fakaseai ei a tulafono konā. (Galuega 10:9-16; Efeso 2:15) Ne iloa ‵lei ne Noa a manu kolā e ‵tau o ofo atu e pelā me ne taulaga i te tapuakiga ki a Ieova. I te taimi eiloa ne tiakina ei ne ia te vaka ne “faite ne Noa se fatafaitaulaga mo fai tena taulaga ki te Aliki. Ne puke aka ne ia e tasi te manu mai vaega kese‵kese o manu kolā e ‵ma i faiga o tapuakiga, manu vaefa mo manu eva, kae ‵sunu katoa i luga i te fatafaitaulaga mo fai tena taulaga ki te Aliki.”—Kenese 8:20.
7:11—Ne aumai i fea a vai kolā ne fakaaogā i te Lolo i te lalolagi kātoa? I te lua o “aso” ne faite ei a mea, i te taimi ne faite ei te “vanimonimo” ne isi ne vai “i tena feitu ki lalo” mo vai i “tena feitu ki luga.” (Kenese 1:6, 7) A vai i “lalo” ko vai kolā ko leva ne iai i te lalolagi. A vai mai “luga” ko te aofaki lasi ‵ki eiloa o te vai telā ko liu afusaga mai luga o te lalolagi. Konā eiloa a vai ne ‵to ifo ki te lalolagi i aso o Noa.
Akoakoga mō Tatou:
1:26. Ona ko te mea ne faite tatou ki foliga o te Atua, e mafai ne tino o fakaakoako atu ki uiga o te Atua. E tonu, e ‵tau eiloa o taumafai ke maua ne tatou a uiga e pelā mo te alofa, alofa fakamagalo, te atafai, te aga‵lei, mo te kufaki ke fakaasi atu ei te vaegā Tino telā ne faite ne ia tatou.
2:22-24. A te fakaipoipoga ko te fakatokaga a te Atua. A te feagaiga o te fakaipoipoiga se mea e tumau kae ‵malu, kae ko te avaga tagata ko te ulu o te kāiga.
3:1-5, 16-23. E fakalagolago te ‵tou fia‵fia ki te matea ne tatou a te tāua o te pulega a Ieova i ‵tou olaga totino.
3:18, 19; 5:5; 6:7; 7:23. E taunu faeloa a pati a Ieova.
4:3-7. Ne fiafia a Ieova ki te taulaga a Apelu me i a ia se tagata amiotonu kae fakatuanaki. (Epelu 11:4) I te suā feitu, e pelā mo te mea e fakaasi mai i ana faiga, ne seki fakatuanaki a Kaino. Ne ma‵sei ana galuega, ne kaisanosano, loto ita kae tatino. (1 Ioane 3:12) E se gata i ei, kāti ne manatu māmā a ia ki tena taulaga kae ne fai fua ne ia e pelā me se masani. E mata, e se ‵tau o fai ‵tou taulaga ki a Ieova mo te loto kātoa kae ke fetaui mo ‵tou uiga mo faifaiga?
6:22. E ui eiloa e uke a tausaga ne manakogina ke faite ei te vaka, ne fai eiloa ne Noa te fakatonuga a te Atua. Tela la, ne ‵sao ei a Noa mo tena kāiga i te Lolo. E faipati mai a Ieova ki a tatou e auala i tena Muna tusia kae tuku mai ana fakatonuga e auala i tena fakapotopotoga. Ka maua eiloa ne tatou a mea aogā mai te faka‵logo ki ei.
7:21-24. E se fakaseai ne Ieova a tino amio‵tonu fakatasi mo tino amio ma‵sei.
KO OKO A TINO KI SE OLAGA FOU
Ona ko te fakaseaiga o te lalolagi mai mua o te Lolo, ne ulu atu ei a tino ki se olaga fou. Ne maua ne tino i konā a te saolotoga ke ‵kai ki ‵kano o manu mo te fakatonuga ke sē ‵kai ki te toto. Ne tuku atu ne Ieova a te tulafono ko te fakasalaga ki te mate mō te tino tatino kae ne fakamau‵tu foki ne ia tena feagaiga ke sē toe ai se Lolo e auala i te nuanua. Ne fai a tama‵liki e tokotolu a Noa mo fai a tupuga o tino katoa, kae ne fai tena mokopū ko Nimalota mo fai se “tagata atuli manu” telā ne ‵teke ki a Ieova. I lō te salalau atu ki nisi koga ke faka‵fonu ei te lalolagi, ne fakaiku aka ne tāgata ke faite ne latou se fa‵kai e igoa ki a Papelu mo se taoa maluga ke takutakua ei latou. Ne iku vale olotou taumafaiga i te taimi ne faka‵numi ei ne Ieova te lotou ‵gana kae fakasalalau atu latou ki te lalolagi kātoa.
Tali ki Fesili Faka-te-Tusi Tapu:
8:11—Kafai ne ‵mate katoa a lakau i te Lolo, ne mai i fea ne te lupe a te lau o te olive?
E mafai o lua a tali ki ei. Ona ko te lakau ko te olive se lakau e fui mate, e se taumate ne ola eiloa i loto i te vai i nāi masina ne poko ei te Lolo. I te taimi ne ‵masa ei te vai, ne mafai o toe ola aka a lau o te olive telā ne galo i lalo i te vai. Ne mafai foki o maua a te lau olive telā ne tuku atu ki a Noa mai i se lakau telā ne fatoa ola aka i te laukele mai tua o te ‵masaga o te vai.
9:20-25—Kaia ne fakamalaia ei ne Noa a Kanana?
E se taumate ne fai ne Kanana se amioga matagā ki tena tupuna ko Noa. E ui eiloa ne lavea ne te tamana o Kanana, ko Hamo, a te mea tenei ne seki fia saga atu a ia ki ei kae kāti ne fakasalalau ne ia te tala tenā. Kae ne gasue‵sue a nisi tama‵liki a Noa ko Semu mo Iafeta o pulou te lā tamana. Ne maua ne laua a fakamanuiaga ona ko te mea tenei kae ne maua ne Kanana se fakamalaiaga kae ne logo‵mae a Hamo ona ko tena masiasi i te mea a tena tama ne fai.
10:25—Ne “mavaevae” pefea a te lalolagi i aso o Peleka?
Ne ola a Peleka mai te 2269 ki te 2030 T.L.M. Ko aso eiloa konā ne fakamavae‵vae ei ne Ieova a tino mai te faka‵numiga o te lotou ‵gana i Papelu kae fakasalalau atu ki te lalolagi kātoa. (Kenese 11:9) Tela la, a “tino o te lalolagi ne mavaevae” i aso o Peleka.
Akoakoga mō Tatou:
9:1; 11:9. E seai se tino io me se aofaga a tāgata e mafai o taofi ne ia a fuafuaga a Ieova.
10:1-32. A fakasologa o gafa e lua mai tua o te tala o te Lolo—mataupu 5 mo te 10—e lavea i ei me e tau atu a gafa o tino katoa ki te tagata muamua ko Atamu e auala i tama tāgata e tokotolu a Noa. A tino Asulia, Papelonia, Epelu, Sulia mo nisi itukāiga Alapi ne o‵mai katoa i te gafa o Semu. A tino Aitiope, Aikupito, Kanana mo nisi itukāiga Afelika mo Alapi ne o‵mai i te gafa o Hamo. Kae ko Iafeta ne fai mo tupuga o tino Initia mo palagi i Eulopa. E kāiga a tino katoa kae ‵pau katoa latou i mua o te Atua. (Galuega 17:26) E ‵tau o pokotia a ‵tou kilokiloga mo ‵tou faifaiga ki nisi tino ona ko te mea tenei.
E ‵Mana a te Muna a te Atua
Ko te vaega muamua fua o te tusi ko Kenese e maua ei a tala ‵tonu e uiga ki tino i aso mua. E maua ne tatou i te tusi tenei a te fuafuaga a te Atua ke ‵nofo a tino i te lalolagi. Ko oko loa i te fakamalosi loto ke lavea atu me se mafai ne tāgata e pelā mo Nimalota o taofi te fakataunuga o ana fuafuaga.
Kafai e faitau koe ki te Tusi Tapu i te Akoga mō Tino Talai i te vaiaso, kae mafaufau ki mea kolā e fakaasi mai i “Tali ki Fesili Faka-te-Tusi Tapu” ka fesoasoani atu ei ke malamalama koe i nisi fakamatalaga ‵mafa i te Tusi Tapu. A manatu mai lalo i “Akoakoga mō Tatou” ka fakaasi atu ei a te aogā o mea e faitau ki ei i te Tusi Tapu mō te vaiaso tenā. Kafai e fetaui ‵lei, e mafai foki o fakavae ki ei a manakoga o te fakapotopotoga i te Fakatasiga mō te Galuega Talai. E tonu, e ola eiloa mo te ‵mana a te Muna a Ieova i ‵tou olaga.—Epelu 4:12.