Ke Tavini Atu Mo Te Alofa Fakamaoni Ki A Keliso Te Tupu

“Ne avatu ki a ia te pule, te fakaaloalo, mo te ‵malu fakatupu, ko te mea ke tavini atu ki a ia a tino katoa o malo katoa mo ‵gana kese‵kese.”​​—⁠TANIELU 7:​14.

1, 2. E iloa pefea ne tatou me ne seki pule katoatoa mai a Keliso i te Malo i te 33 T.A.?

E MATA, kai isi aka eiloa se pule ne mate mō ana tino kae toe ola mai ke pule atu e pelā me se tupu? Kai isi aka eiloa se tupu ne ola i te lalolagi, telā ne fakamalosi aka ne ia te loto tali‵tonu mo te fakamaoni o ana tino, kae oti aka, ko pule mai i te lagi? A te tino fua e tokotasi telā ne mafai ne ia o fai te mea tenei​​—⁠mo nisi mea aka foki e uke​​—⁠ko Iesu Keliso. (Luka 1:​32, 33) I te Penitekoso i te 33 T.A., mai tua o tena mate, tena toetuga, mo tena fanakaga ki te lagi, ne “fai ne te Atua a Keliso ke pule i mea katoa” i te fakapotopotoga. (Efeso 1:​20-​22; Galuega 2:​32-​36) Tela la, ne kamata o pule mai a Keliso kae i se auala foliki fua. A tino muamua kolā ne pule atu a ia ki ei ko Kelisiano fakaekegina ki te agaga, kolā e aofia i te Isalaelu faka-te-agaga, ko “te Isalaelu a te Atua.”​​—⁠Kalatia 6:​16; Kolose 1:​13.

² Ne fakamautinoa mai ne te apositolo ko Paulo, mai mua malie eiloa o kātoa a tausaga e 30 mai tua ifo o te Penitekoso i te 33 T.A., me ne seki maua katoatoa ne Keliso te pulega i te Malo, kae ne “nofo ei a ia i te koga tāua ko te feitu fakaatamai o te Atua,” kae ko “faka‵tali nei i konā ke oko ki te taimi e tuku ei ne te Atua ona fili ke fai mo mea e tuku ei ona vae.” (Epelu 10:​12, 13) Kae i te taimi ko pili atu ei ki te fakaotiga o te senitenali muamua T.A., ne lavea atu i se fakaasiga ne te apositolo ko Ioane, telā ko toeaina i te taimi tenā, a te Pule Sili o te lagi mo te lalolagi, ko Ieova, ko fakasopo aka ne ia a Keliso Iesu mo fai te Tupu i tena Malo faka-te-lagi telā ne fatoā fanau mai. (Fakaasiga 11:15; 12:​1-5) Mai ‵tou kilokiloga e ‵tusa mo tala fakasolopito, e mafai o mafau‵fau tatou ki fakamaoniga fakaofoofogia kolā e fakamautinoa mai i ei me ne kamata o pule mai Keliso e pelā me ko te Tupu faka-Mesia i te lagi i te 1914.a

3. (a) Se a te vaega fou o te tala ‵lei o te Malo ne kamata mai talu mai i te 1914? (e) Ne a fesili e mafai o ‵sili ifo ne tatou?

³ E tonu, talu mai te 1914 ne aofia i te tala ‵lei o te Malo se vaega fakafiafia fou. Ne pule mai i ei a Keliso e pelā me ko te Tupu i te Malo faka-te-lagi o te Atua, faitalia eiloa me e pule mai a ia ‘i vā o ana fili.’ (Salamo 110:​1, 2; Mataio 24:14; Fakaasiga 12:​7-​12) E sili atu i ei, ko ‵saga atu eiloa mo te loto finafinau ana tino fakamaoni, i te lalolagi kātoa, ki tena pulega mai te ‵kau atu ki te polokalame ko te faiga o akoga faka-te-Tusi Tapu i te lalolagi kātoa telā e se mafai o fakanafagina i tala mua o tino. (Tanielu 7:​13, 14; Mataio 28:18) E tavini atu a Kelisiano fakaekegina ki te agaga, “ko tino o te Malo,” e pelā me ne “sui o Keliso.” E ‵lago atu mo te a‵lofa fakamaoni ki a latou a te potukau o ‘nisi mamoe’ a Keliso kolā ko ua‵lolo mai, kae ga‵lue e pelā me ne avefekau o te Malo o te Atua. (Mataio 13:38; 2 Kolinito 5:​20; Ioane 10:16) E ‵tau foki eiloa mo tatou taki tokotasi o iloilo faka‵lei aka me e talia tonu ne tatou te pulega a Keliso io me ikai. E mata, e ‵mautakitaki te ‵tou fakamaoni ki a ia? E mafai pefea o fakaasi atu ne tatou te ‵tou fakamaoni ki se Tupu telā e pule mai i te lagi? Ke na sau‵tala nei tatou ki pogai e ‵tau ei mo tatou o fakamaoni ki a Keliso.

Se Tupu Telā e Fakamalosi Aka ne ia te Alofa Fakamaoni o Ana Tino

4. Se a te mea ne fakataunu mai ne Iesu e pelā me ko te Tupu Filifilia i tena taviniga i te lalolagi nei?

⁴ E fakavae eiloa te ‵tou a‵lofa fakamaoni ki a Keliso ki te fakatāua ne tatou o mea kolā ko oti ne fai ne ia, penā foki loa mo ana uiga tafasili i te ‵gali. (1 Petelu 1:⁠8) I te taimi ne nofo mai ei i te lalolagi nei, ne fakaasi mai ne Iesu e pelā me ko te Tupu Filifilia, i se auala foliki a mea kolā ka fai ne ia e pelā me ko te Tupu i te lalolagi kātoa i te taimi tonu o te Atua. Ne fagai ne ia a tino fia‵kai. Ne faka‵lei ne ia a tino ma‵saki, tino ‵kivi, tino sē katoatoa foitino, tino taliga ‵tuli, mo tino gūgū. Ne faka‵tu aka foki ne ia a nisi tino mai te mate. (Mataio 15:​30, 31; Luka 7:​11-​16; Ioane 6:​5-​13) E se gata i ei, a te mauaga o te iloaga e uiga ki te olaga o Iesu i te lalolagi nei, e mafai o fesoasoani mai ke iloa ne tatou ana uiga e pelā me ko te Pule o te lalolagi i aso mai mua​​—⁠maise eiloa tena alofa faivasaga. (Maleko 1:​40-​45) E ‵tusa mo te mea tenei, ne fai mai a Napoleona Ponapati, se tupu takutakua o Falani, penei: “Ne faka‵tu ne Alesana, Kaisala, Charlemagne, mo au ei a emupaea, kae se a te fakavae ne fai ei ne matou a galuega ‵lasi konei? Ne fakavae eiloa ki te motou ma‵losi. Ne fakavae eiloa ne Iesu Keliso tena malo ki te alofa, kae e lau i miliona o tāgata e ‵mate mō ia i aso nei.”

5. Kaia ne gali ‵ki ei a uiga o Iesu ki nisi tino?

⁵ Ona ko uiga faigofie mo te loto maulalo o Iesu, ne fakamalosi aka ei a latou kolā ko fi‵ta i te ‵mafa olotou fakalavelave mo amoga ne ana akoakoga fakamalosi loto mo ana uiga atafai. (Mataio 11:​28-​30) Ne seki ma‵taku a tama‵liki i a ia. E loto finafinau eiloa a tino loto maulalo kae loto malamalama ke fai latou mo ana soko. (Mataio 4:​18-​22; Maleko 10:​13-​16) Ko ana uiga a‵lofa kae āva ne mafai ei o fakaasi atu ne fāfine amio atua te lotou a‵lofa fakamaoni ki a ia, telā ne fesoasoani atu a fāfine tokouke ki a ia mai te fakaaogāga o olotou taimi, olotou taumafaiga, mo olotou kope ke tausi atu ki a ia i te taimi ne fai ei tena galuega.​​—⁠Luka 8:​1-3.

6. Ne a lagonaga ‵loto ne fakaasi atu ne Iesu i te taimi ne mate ei a Lasalo?

⁶ Ne lavea atu foki a lagonaga ‵loto o Keliso i te taimi ne mate ei tena taugasoa pele ko Lasalo. Ne otia tena loto i te fanoanoa o Malia mo Maleta telā ne seki mafai ei ne ia o ‵funa aka te ‵mae o tena loto, kae ne ‘tagi ei Iesu.’ Ne ‘fi‵ta tona mafaufau’​​—⁠ona ko te ‵mae o tena loto mo te fanoanoa, faitalia foki eiloa me e iloa ne ia me ka toe fakaola aka ne ia a Lasalo. Ona ko tena alofa mo te atafai, ne fakaaogā ei ne Iesu tena ‵mana mai te Atua kae fakatu aka ne ia Lasalo mai te mate.​​—⁠Ioane 11:​11-​15, 33-​35, 38-​44.

7. Kaia e ‵tau ei o a‵lofa fakamaoni tatou ki a Iesu? (Ke onoono foki ki te pokisi i te itulau e 31.)

⁷ E ofo tatou i te malosi o te alofa o Iesu ki te mea ‵lei mo tena takalialia malosi ki faifaiga ‵loi mo amioga ma‵sei. E lua taimi ne gasuesue ei a ia mo te loto toa ke ‵tuli keatea mai te faletapu a tino faipisinisi kaima‵nako. (Mataio 21:​12, 13; Ioane 2:​14-​17) E se gata i ei, e pelā me se tino i te lalolagi nei, ne tuku faka‵sau atu a ia ki vaegā puapuagā, telā ne mafai ei o iloa ‵lei ne ia a mea faiga‵ta mo fakalavelave kolā e fe‵paki mo tatou. (Epelu 5:​7-9) Ne iloa foki ne Iesu a lagonaga o se tino telā e pokotia malosi i faifaiga sē fakamaoni mo uiga takalia‵lia o tino ki a ia. (Ioane 5:​15-​18; 11:​53, 54; 18:⁠38–​19:16) Fakamuli ifo i ei, ne tuku atu mo te loto toa ne ia a ia eiloa ki se mate fakamasiasi ke fakataunu ei te loto o tena Tamana kae ke tuku atu foki ki ana tino a te ola se-gata-mai. (Ioane 3:​16) E mata, e se fakamalosi atu a vaegā uiga penā o Keliso ke tumau eiloa koe i te tavini atu mo te fakamaoni ki a ia? (Epelu 13:8; Fakaasiga 5:​6-​10) Kae ne a mea e manakogina ke mafai ei ne koe o ola mai lalo i te pulega a Keliso, te Tupu?

Mea Kolā e Manakogina ke Ola Mai Lalo i te Pulega a Keliso

8. Ne a mea e ‵tau o fai ne tino kolā e fia ola mai lalo i te pulega a Keliso?

⁸ Mafaufau la ki te fakatusa tenei: A te fai mo fai se tino nofo tumau i te suā fenua, e aofia sāle i ei a te fetaui ‵lei ki nisi mea mautinoa. Kāti e manakogina ke ‵lei a uiga o tino kolā e mafai o talia ke fai mo tino ‵nofo tumau o te fenua kae ke malosi ‵lei foki. E penā foki loa, a tino mai lalo i te pulega a Keliso e ‵tau o fakatumau ne latou a tulaga ma‵luga i mea tau amioga mo te malosi ‵lei i te feitu faka-te-agaga.​​—⁠1 Kolinito 6:​9-​11; Kalatia 5:​19-​23.

9. E mafai pefea o fakaasi atu ne tatou me e a‵lofa fakamaoni tatou ki a Keliso?

⁹ Se mea ‵lei foki me e manako a Iesu Keliso ke a‵lofa fakamaoni ana tino ki a ia mo tena Malo. E fakaasi atu ne latou te vaegā alofa fakamaoni tenā, mai i te ola e ‵tusa mo mea kolā ne akoako mai ne ia i te taimi koi nofo mai ei a ia i te lalolagi nei, e pelā me ko te Tupu Filifilia. E pelā mo te fakamuamua ne latou a manakoga o te Malo mo te loto o te Atua i lō mea faka-te-foitino. (Mataio 6:​31-​34) E taumafai foki latou ke fakaakoako atu ki uiga o Keliso, ke oko foki loa ki taimi kolā e fe‵paki ei latou mo toe tulaga faiga‵ta. (1 Petelu 2:​21-​23) E se gata i ei, e tau‵tali atu foki a tino mai lalo i te pulega a Keliso ki tena fakaakoakoga mai te taumafai o fai a mea ‵lei ki nisi tino.​​—⁠Mataio 7:​12; Ioane 13:​3-​17.

10. E mafai pefea o fakaasi atu te alofa fakamaoni ki a Keliso i (a) te kāiga mo (e) te fakapotopotoga?

¹⁰ Ne fakaasi atu foki ne soko o Iesu te lotou a‵lofa fakamaoni ki a ia mai te fakaakoako atu ki ana uiga i loto i te kāiga. E pelā mo tāgata a‵vaga, e fakaasi atu ne latou te lotou a‵lofa fakamaoni ki te lotou Tupu i te lagi mai te fakaakoako atu ki a Keliso i olotou faifaiga ki olotou avaga mo tama‵liki. (Efeso 5:​25, 28-​30; 6:4; 1 Petelu 3:⁠7) E fakaasi atu ne fāfine a‵vaga te lotou a‵lofa fakamaoni ki a Keliso mai olotou amioga ‵lei mo te fakaasi atu foki o te “loto malalo mo te agaga filemu.” (1 Petelu 3:​1-4; Efeso 5:​22-​24) E fakamaoni eiloa a tama‵liki ki a Keliso māfai e fakaakoako atu ki a ia i te fakalogo. E pelā me se talavou, ne tumau eiloa Iesu i te fakalogo ki ana mātua, faitalia eiloa me e se ‵lei katoatoa laua. (Luka 2:​51, 52; Efeso 6:⁠1) E taumafai eiloa mo te fakamaoni a tino mai lalo i te pulega a Keliso o fakaakoako atu ki a ia mai te ‘fakatau a‵lofa e pelā mo ne tautaina,’ mo te “fakatau atafai” foki. E taumafai latou ke fai pelā mo Keliso, i te fakaasi atu o te ‘loto malalo,’ mo te sē “taui te masei ki te masei, io me taui atu te muna fetū ki te muna fetū.”​​—⁠1 Petelu 3:​8, 9; 1 Kolinito 11:⁠1.

E Faka‵logo Eiloa a Tino o Keliso ki Ana Tulafono

11. Ne a tulafono e faka‵logo ki ei a tino mai lalo i te pulega a Keliso?

¹¹ E pelā eiloa mo te faka‵logo o tino kolā e fia fai mo tino ‵nofo tumau o se fenua ki tulafono o te lotou fenua fou tenā, e faka‵logo eiloa a tino o Keliso ki “te tulafono a Keliso” mai te fakafetaui aka olotou olaga ki mea katoa kolā ne akoako kae fakatonu mai ne Iesu. (Kalatia 6:⁠2) E ola eiloa latou mo te a‵lofa fakamaoni e ‵tusa mo te “Tulafono a te Malo o te Atua,” telā e fakavae ki te alofa. (Iakopo 2:⁠8) Ne a mea e aofia i tulafono konei?

12, 13. E faka‵logo pefea tatou mo te a‵lofa fakamaoni ki “te tulafono a Keliso”?

¹² E se ‵sao a tino o Keliso mai te tulaga sē ‵lei katoatoa mo vāivāiga. (Loma 3:​23) Tela la, e ‵tau o fakamalosi aka faeloa ne latou te lotou ‘a‵lofa fakamaoni ki olotou taina’ ko te mea ke “fakatau a‵lofa fakamaoni [latou] mo [olotou] loto kātoa.” (1 Petelu 1:​22) Kafai “e isi se mea e se malie ei te suā tino ki te suā tino,” e fakagalue aka eiloa mo te fakamaoni ne Kelisiano a te tulafono a Keliso mai te “fakatau fesoasoani” mo te “fakatau fakamagalo foki.” A te fakalogo ki te tulafono tenei e fesoasoani mai ke se ‵kilo atu ki vāivāiga o tino kae ke ‵sala atu ki pogai ke fakatau a‵lofa ei tatou. E mata, e se loto fakafetai koe me ‵kau fakatasi koe mo tino kolā e ‵lago atu mo te a‵lofa fakamaoni ki te ‵tou Tupu alofa kae taofi ‵mau foki ki te alofa, “telā e fusi fakatasi ei ne ia a mea katoa ke ‵lei”?​​—⁠Kolose 3:​13, 14.

¹³ E se gata i ei, ne fakamatala mai ne Iesu me i te alofa telā ne fakaasi mai ne ia, e sili fakafia atu i te alofa telā e masani o fakatau fakaasi atu ne tino. (Ioane 13:​34, 35) Kafai e a‵lofa tatou ki tino fua kolā e a‵lofa mai ki a tatou, e seai eiloa se “mea e sili atu ne fai” ne tatou. I te feitu tenā, ka se katoatoa kae se lava foki te ‵tou a‵lofa. Ne fakamalosi mai Iesu ke fakaakoako atu tatou ki te alofa o tena Tamana mai te fakaasi atu o te alofa fakavae ki ‵tou fili mo tino foki kolā e fakasauā mai ki a tatou. (Mataio 5:​46-​48) Ko te alofa foki tenei e fakamalosi aka ei a tino o te Malo ke tumau i te fakamaoni ki te lotou toe galuega tāua. Se a te galuega tenā?

Ne Tofotofo Aka te Lotou A‵lofa Fakamaoni

14. Kaia e tāua ‵ki ei a te galuega talai?

¹⁴ Ko fai nei ne tino kolā e ‵nofo mai lalo i te Malo o te Atua te ‵toe galuega tāua ko te ‘fakamatala atu faeloa a te tala ‵lei e uiga ki te Malo o te Atua.’ (Galuega 28:23) E tāua ‵ki eiloa te mea tenā me ka fakamaluga aka ne te Malo faka-Mesia te pulega sili a Ieova i te lagi mo te lalolagi. (1 Kolinito 15:​24-​28) Kafai e talai atu ne tatou te tala ‵lei, e maua ei ne tino fakalogo‵logo a te avanoaga ke fai mo fai ne tino kolā e ‵nofo mai lalo i te Malo o te Atua. E se gata i ei, a te auala e ‵saga atu ei a tino ki te fekau tenā e tuku atu i ei se fakavae telā e mafai o fakaaogā ne Keliso te Tupu ke fakamasino aka ei a tino. (Mataio 24:14; 2 Tesalonia 1:​6-​10) Tela la, a te ‵toe auala tāua e fakaasi atu ei ‵tou fakamaoni ki a Keliso ko te faka‵logo ki tena fakatonuga ke fakaasi atu ki nisi tino a mea e uiga ki te Malo.​​—⁠Mataio 28:​18-​20.

15. Kaia e tofotofo aka ei te a‵lofa fakamaoni o Kelisiano?

¹⁵ E tonu, e ‵teke atu a Satani ki te galuega talai i so se auala e mafai ne ia, kae e se talia foki ne tino pule a te pulega telā ko oti ne tuku atu ne te Atua ki a Keliso. (Salamo 2:​1-3, 6-8) Tela la, ne fakailoa atu penei a Iesu ki ana soko: “E seai se tavini e sili atu i tona pule. Kafai ne fakasauā mai latou ki a au, ka fakasauā foki ki a koutou.” (Ioane 15:20) Tela la, e aofia a soko o Keliso i se taua faka-te-agaga telā e tofotofo aka ei te lotou a‵lofa fakamaoni.​​—⁠2 Kolinito 10:​3-5; Efeso 6:​10-​12.

16. E “fai” pefea ne tino kolā e ‵nofo mai lalo i te Malo olotou “tiute ki te Atua”?

¹⁶ E se gata i ei, e tumau eiloa te a‵lofa fakamaoni o tino kolā e ‵nofo mai lalo i te Malo o te Atua ki te lotou Tupu kae fakaasi atu foki ne latou te āva ki pulega a tino. (Tito 3:​1, 2) Ne fai mai Iesu: “E ‵tau mo koutou o fai te otou tiute ki te Malo, pelā foki mo otou tiute ki te Atua.” (Maleko 12:​13-​17) Tela la, e faka‵logo eiloa a tino mai lalo i te pulega a Keliso ki tulafono a te malo kolā e se fe‵paki mo tulafono a te Atua. (Loma 13:​1-7) Kae i te taimi ne ‵teke atu ei te fono maluga a te kau Iutaia ki te tulafono a te Atua mai te fakatonu atu ki soko o Iesu ke fakagata te lotou galuega talai, ne taku ‵tonu atu latou mo te āva me e ‵tau mo latou o “faka‵logo ki te Atua i lō te faka‵logo ki tino.”​​—⁠Galuega 1:8; 5:​27-​32.

17. Kaia e mafai ei o fakafesagai atu ki tofotofoga o te alofa fakamaoni mo te loto toa?

¹⁷ E tonu, e ‵tau faeloa o maua ne tino mai lalo i te pulega a Keliso a te loto toa ke tumau i te a‵lofa fakamaoni ki te lotou Tupu māfai ko fe‵paki mo fakasauāga. E tiga eiloa te feitu tenā, ne fai atu Iesu: “Amutia a koutou kolā e muna maseigina kae fakasauāgina ne tino, kae ‵ti atu a mea ma‵sei katoa ki a koutou ona ko au. Ke ‵lifu kae fia‵fia foki koutou: me i te otou taui lasi e i te lagi.” (Mataio 5:​11, 12) Ne iloa ‵lei ne soko mua o Keliso a te ‵tonu o pati konei. E tiga eiloa ne ‵kini latou mō te lotou tumau i te talai atu e uiga ki te Malo, ne fia‵fia latou “me ko taku‵leia latou ne te Atua ona ko te fakamaseigina mō te igoa o Iesu. Kae i aso katoa, e se mafai eiloa o gata te lotou akoako atu kae lauga atu ki tino e uiga ki a Iesu te Keliso.” (Galuega 5:​41, 42) E ‵tau eiloa o fakamālō atu māfai e fakaasi atu ne koe te lagonaga tai ‵pau o te alofa fakamaoni māfai ko fe‵paki koe mo fakalavelave, masaki, te fanoanoa, io me ko ‵tekemaiga.​​—⁠Loma 5:​3-5; Epelu 13:⁠6.

18. Se a te mea e fakaasi mai i pati a Iesu ki a Ponitio Pilato?

¹⁸ A koi fai a ia mo fai te Tupu Filifilia, ne fakamatala atu Iesu ki te Kovana Loma ko Ponitio Pilato: “E se mai te lalolagi nei a toku malo; moi fai pelā ne maua mai te lalolagi nei, penei ko taua atu aku tavini i a au mana tuku atu ki tino Iutaia; tela la, a toku malo e se mai te lalolagi nei.” (Ioane 18:36) Tela la, e se fakaaogā ne tino o te Malo faka-te-lagi a meatau ke tamate ei se tino io me e ‵kau atu ki se feitu i so se kinauga a tino. Ona ko te lotou a‵lofa fakamaoni ki te “Pelenise o te Filemu,” e tumau katoatoa latou i te sē ‵kau atu ki se feitu i faifaiga a te lalolagi.​​—⁠Isaia 2:​2-4; 9:​6, 7.

Taui Se-Gata-Mai mō Tino A‵lofa Fakamaoni

19. Kaia e mafai ei o ‵kilo atu a tino mai lalo i te pulega a Keliso ki aso mai mua mo te mautinoa?

¹⁹ A tino a‵lofa fakamaoni mai lalo i te pulega a Keliso, te “Tupu o tupu,” e ‵kilo atu ki aso mai mua mo te mautinoa. E olioli eiloa latou mo te loto finafinau ki te fakaasiga fakavave mai o te malosi fakatupu o te malo faka-te-lagi ki te lalolagi nei. (Fakaasiga 19:⁠11–​20:3; Mataio 24:30) E ‵kilo atu eiloa mo te fakamoe‵moe a te ‵toega o “tino” fakaekegina a‵lofa fakamaoni ki te lotou taui tafasili i te tāua ke pule fakatasi mo Keliso i te lagi e pelā me ne tupu. (Mataio 13:38; Luka 12:32) E fakatali‵tali eiloa mo te loto finafinau a ‘nisi mamoe’ a‵lofa fakamaoni a Keliso ki te taliaga a te Tupu māfai ko fai mai a ia: “O‵mai, i a koutou ko oti ne fakamanuiagina ne toku Tamana, ke fai mō koutou a te [lalolagi Palataiso mai lalo i te] malo ne fakatoka mō koutou mai te kamataga o te lalolagi.” (Ioane 10:16; Mataio 25:34) E ‵tusa eiloa mo te mea tenā, ke na fakaiku aka ne tino katoa mai lalo i te Malo ke tumau eiloa te lotou tavini atu mo te a‵lofa fakamaoni ki a Keliso te Tupu.

[Fakamatalaga mai lalo]

E Mafai o Fakamatala Mai ne Koe?

• Kaia e ‵tau ei o fakaasi atu ne tatou ‵tou a‵lofa fakamaoni ki a Keliso?

• E mafai pefea o fakaasi atu ne tino mai lalo i te pulega a Keliso te lotou a‵lofa fakamaoni ki a ia?

• Kaia e ma‵nako ei tatou ke fakaasi atu te alofa fakamaoni ki a Keliso te Tupu?

[Pokisi i te itulau e 31]

NISI UIGA ‵GALI O KELISO

Sē fakailoga tino​​—⁠Ioane 4:​7-​30.

Alofa atafai​​—⁠Mataio 9:​35-​38; 12:​18-​21; Maleko 6:​30-​34.

Alofa faivasaga​​—⁠Ioane 13:1; 15:​12-​15.

Alofa fakamaoni​​—⁠Mataio 4:​1-​11; 28:20; Maleko 11:​15-​18.

Loto Alofa​​—⁠Maleko 7:​32-​35; Luka 7:​11-​15; Epelu 4:​15, 16.

Uiga Faigofie​​—⁠Mataio 15:​21-​28.

[Ata i te itulau e 29]

Mai te fakatau fakaasi atu o te alofa, e faka‵logo eiloa tatou mo te a‵lofa fakamaoni ki “te tulafono a Keliso”

[Ata i te itulau e 31]

E mata, e fakamalosi aka koe ne uiga o Keliso ke tavini atu ki a ia mo te alofa fakamaoni?