Te Auala e Iloa ei te Lotu Tonu
E FAI mai te ukega o lotu me e māfua mai olotou akoakoga i te Atua. Tela la, se mea ‵lei ke tau‵tali tatou ki pati a te apositolo a Iesu ko Ioane, telā ne tusi mai: “Oku taugasoa pele: sa tali‵tonu ki a latou kolā e fai mai me e nofo i a latou a te Agaga, kae tofotofogina ke iloa tonu, me ko te Agaga e ‵nofo mo latou e vau mai i te Atua. Me e tokouke a pelofeta ‵loi ko oko atu ki koga valevale.” (1 Ioane 4:1) E iloa pefea ne tatou me ne māfua mai eiloa se mea i te Atua?
A mea katoa kolā e māfua mai i te Atua e fakaasi mai i ei ana uiga, maise ko tena toe uiga lauiloa, ko te alofa. E pelā mo te malosi ke ‵sogi ne tatou a mea ke fai i ei ke fia‵fia tatou ki te manogi o laulakau, pulalakau io me ko falaoa faka‵fete fatoā ‵paku, se fakaasiga tenā o te alofa o te Atua. A te mafai o lavea ne tatou te tōga o te la, se kaveau, io me ko te fakamisikata mai o se tamaliki e fakaasi mai i ei te alofa o te Atua mō tatou. E penā foki eiloa mo te mafai ne tatou o lagona a pese ‵gali, te logoā mai o se manu eva, io me ko te leo o se tino e pele ki a koe. Ke oko foki eiloa ki te auala ne faite ei tatou, faitalia te tulaga sē ‵lei katoatoa, se fakaasiga eiloa o te alofa o te Atua. Tenā eiloa te pogai e lavea ei ne tatou te ‵tonu o pati a Iesu: “E sili atu te manuia o te tino telā e tuku atu fua ana mea i lō o te tino telā e talia ne ia.” (Galuega 20:35) E fia‵fia tatou o fakaasi atu te alofa ona ko tatou ne faite ki ‘foliga o te Atua.’ (Kenese 1:27) E ui eiloa e uke aka foki a nisi uiga o Ieova, a te alofa ko tena toe uiga sili eiloa.
A tusitusiga kolā e aumai mai te Atua e ‵tau o fakaasi mai i ei tena alofa. E uke ‵ki a tusitusiga mua a lotu kese‵kese i te lalolagi. E fakaata mai pefea ne vaegā tusitusiga ‵gali penā a te uiga o te Atua ko te alofa?
A te tonuga loa, e se lasi te fakamatalaga i tusitusiga mua a lotu e uiga ki te alofa o te Atua mō tatou io me ko te auala e mafai ei o fakaasi atu ne tatou te ‵tou a‵lofa ki te Atua. Tela la, e seai se tali e maua ne te fia miliona o tino māfai e fesili atu latou, “Kaia e lavea ei ne tatou a fakamaoniga o te alofa o te Atua i ana mea ne faite kae e tumau eiloa a logo‵maega mo amioga ma‵sei?” I te suā feitu, a te Tusi Tapu ko te tusi fakalotu mua eiloa e tasi telā e fakamatala katoatoa mai i ei te alofa o te Atua. E akoako mai foki i ei a te auala e mafai o fakaasi atu ei ne tatou a te alofa.
Te Tusi e Uiga ki te Alofa
E fakaasi mai ne te Muna a te Atua, ko te Tusi Tapu, a Ieova me ko “te Atua o te alofa.” (2 Kolinito 13:11) E fakamatala mai i te Tusi Tapu a te auala ne fakamalosi aka ei ne te alofa ke tuku ne Ieova ki te tauavaga muamua a te ola telā e seai ne masaki mo te mate i ei. Kae ona ko te ‵teke atu ki te tulaga pule o te Atua ne maua i ei ne tino a logo‵maega. (Teutelonome 32:4, 5; Loma 5:12) Ne gasuesue a Ieova ke toe faka‵foki mai a mea kolā ne ‵galo. E fai mai te Muna a te Atua: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:16) E toe fakaasi manino mai foki i te Tusi Tapu a te tumau o te alofa o te Atua i ana fakamatalaga e uiga ki te malo ‵lei katoatoa telā ko oti ne tuku atu ne te Atua ki lima o Iesu ke toe fakafoki mai i ei te filemu ki tino katoa kolā e faka‵logo.—Tanielu 7:13, 14; 2 Petelu 3:13.
E fakatoetoe mai ne te Tusi Tapu a te tiute o te tagata e ‵tau o fai i pati konei: “ ‘E ‵tau mo koe o alofa ki te Aliki tou Atua mo tou loto kātoa, mo tou agaga kātoa, mo tou mafaufau kātoa.’ Tenā te tulafono tafa sili mo te aogā. Ko te lua o tulafono tafasili i te aogā tenei: ‘E ‵tau mo koe o alofa ki tou tuakoi e pelā eiloa mo koe ki a koe.’ A te katoatoaga o te Tulafono a Mose mo akoakoga a pelofeta, e fakavae i luga i tulafono konei e lua.” (Mataio 22:37-40) E fai mai me i te Tusi Tapu ko te tusi ne fakaosofia ne te Atua. Ona ko te mea e fakaasi manino mai i ei ana uiga, e mautinoa i a tatou me ne māfua mai eiloa i te “Atua o te alofa.”—2 Timoteo 3:16.
Mai te fakaaogāga o te tulaga tenei, ko mafai ei o iloa ne tatou a tusitusiga mua kolā ne māfua tonu mai eiloa i te Atua. E fai a te alofa e pelā me se fakailoga o tino tapuaki ‵tonu, me fakaakoako latou ki te Atua i te fakaasiatuga o te alofa.
Te Auala ke Iloa Aka ei a Tino Kolā e A‵lofa ki te Atua
E tu ‵kese eiloa a tino kolā e a‵lofa tonu ki te Atua, maise eiloa i te vaitaimi ko ola nei tatou i ei telā e fakaigoa ne te Tusi Tapu ki “aso fakaoti.” A tino ko gasolo aka eiloa o “ma‵natu fakapito, kaima‵nako, . . . ka sili te lotou fia‵fia ki manakoga o te foitino i lō te Atua.”—2 Timoteo 3:1-4.
E iloa pefea ne koe a tino kolā e a‵lofa ki te Atua? E fai mai te Tusi Tapu: “me e tenei te uiga o te alofa ki te Atua: ko te fakalogo ki ana fakatonuga.” (1 Ioane 5:3) E fakamalosi aka ne te alofa ki te Atua a tino ke āva ki tulaga ‵lei o te Tusi Tapu i mea tau amioga. E pelā mo te Muna a te Atua, e maua i ei a tulafono e uiga ki faifaiga fakatauavaga mo fakaipoipoga. E talia fua a faifaiga fakatauavaga i loto i te fakaipoipoga, kae e ‵tau eiloa o fakatumau a te fakaipoipoga. (Mataio 19:9; Epelu 13:4) I te taimi ne kau atu ei se fafine i Sepania telā ne sukesuke ki mea tau te Tusi Tapu ki se fakatasiga a Molimau a Ieova telā e suke‵suke mo te loto finafinau ki tulafono i mea tau amioga mai te Tusi Tapu, ne fai mai tou fafine: “Ne foki atu au ki te fale mo te loto malosi, ona ko te lauga fakamalosi loto telā e fakavae ki te Tusi Tapu kae penā foki loa mo te fealofani o tino konei, olotou tulaga ma‵luga i mea tau amioga, mo olotou amioga ‵lei.”
I tafa o te lotou a‵lofa ki te Atua, e laveagofie fua a Kelisiano ‵tonu i te auala e fakaasi atu ei te lotou a‵lofa ki olotou tuakoi. A te lotou toe galuega tāua ko te fai‵pati atu ki nisi tino e uiga ki te fakamoemoega eiloa e tasi mō tino, ko te Malo o te Atua. (Mataio 24:14) E seai eiloa se isi mea e mafai o tuku atu ne latou ki olotou tuakoi ke maua ei a mea aogā tumau i lō te fesoasoani atu ke maua ne latou te iloaga e uiga ki te Atua. (Ioane 17:3) E fakaasi mai foki ne Kelisiano ‵tonu a te lotou a‵lofa i nisi auala. E fesoasoani atu latou ki tino fakaa‵lofa. E pelā mo te taimi ne poko ei se mafuie i Italia, ne lipoti mai se nusipepa e tasi me ne ga‵lue a Molimau a Ieova “i se auala aogā, i te fesoasoani atu ki tino kolā ne pokotia i ei, e aunoa mo te ‵saga atu ki lotu kolā e ‵kau atu a tino konā ki ei.”
I tafa o te lotou a‵lofa ki te Atua mo tuakoi, e fakatau a‵lofa eiloa a Kelisiano ‵tonu i a latou eiloa. Ne fai mai a Iesu: “E avatu ne au ki a koutou te poloakiga fou: ke fakatau a‵lofa koutou. E pelā mo au e alofa ki a koutou; tela la, e ‵tau mo koutou o fakatau a‵lofa. Tenā te mea e iloa ei ne tino katoa ko oku soko koutou, manafai e fakatau a‵lofa koutou!”—Ioane 13:34, 35.
E mata, e laveagofie a te ‵kese o te fakatau a‵lofa telā e maua ne Kelisiano ‵tonu? Tenā eiloa te manatu o Ema. E galue tou fafine i La Paz, Bolivia, se koga telā e ‵nofo mavae‵vae i ei a tino mau‵mea mai i tino ma‵tiva ona ko te tokouke o tino mai itukāiga kese‵kese i ei. Ne fai mai tou fafine: “I te taimi muamua ne fanatu ei au ki se fakatasiga o Molimau a Ieova, ne lavea ne au se tagata maumea e sagasaga kae sau‵tala mo se fafine Initia. E seki lavea aka eiloa ne au te mea tenā muamua. I te taimi eiloa tenā ne iloa ei ne au me i tino konei ko tino eiloa o te Atua.” E penā foki a lagonaga o se tamafine Pasili ko Miliama, i ana pati penei: “Ne seki iloa ne au o fai a au ke fiafia, ke oko foki loa i loto i toku kāiga. A te taimi muamua ne lavea ei ne au a fua o te alofa, ko te fakatau a‵lofa i vā o Molimau a Ieova.” I te Iunaite Sitete, ne tusi mai se pule o te kamupane fai televise: “Kafai e ola a tino e tokouke i te auala e ola ei a tino o te otou lotu, kāti e se oko te fenua tenei ki te tulaga ko oko nei ki ei. Au se tino tusitala telā e iloa ne au me e fakavae eiloa te otou fakapotopotoga ki te alofa mo te talitonu katoatoa ki te Māfuaga.”
‵Sala Atu ki te Lotu Tonu
A te alofa se fakailoga telā e mailoga ei a te lotu tonu. Ne fakatusa ne Iesu a te ‵sala atu ki te lotu tonu ki te ‵salaga o te auala tonu mo te faiga o te fakaikuga ke sasale i ei. Ko te auala fua e tasi telā e tau atu ki te ola se-gata-mai. Ne fai mai Iesu: “Ulu atu koutou ki te mataloa mataliki; me i te mataloa mataefa e faigofie ei te auala e tau atu ki te malaia, e tokouke foki latou kolā e olo atu i ei. Ka ko te mataloa mataliki e faigata te auala e tau atu ki te ola, e timomo foki a tino e maua ne latou.” (Mataio 7:13, 14) E tasi fua te fakapotopotoga o Kelisiano ‵tonu e sa‵sale fakatasi mo te Atua i te auala o te lotu tonu. Tela la, se mea tāua ‵ki te lotu telā e filifili ne koe. Kafai ko maua ne koe te auala tenā kae filifili ke sasale atu i ei, ko maua eiloa ne koe te ‵toe auala ‵lei ki te ola me ko te auala eiloa tenā o te alofa.—Efeso 4:1-4.
Ke mafaufau ki te fiafia telā e mafai o maua ne koe māfai e sasale koe i te auala o te lotu tonu! E fai eiloa pelā me e sa‵sale fakatasi koe mo te Atua. E mafai o tauloto ne koe te poto mo te alofa mai te Atua ko te mea ke maua ne koe se vā fealofani ‵lei mo nisi tino. E mafai foki o tauloto ne koe mai i a ia a te pogai o te ola, kae e mafai foki o malamalama koe i fuafuaga a te Atua kae maua se fakamoemoega gali mō aso mai mua. Ka se salamo eiloa koe i tou ‵sala atu ki te lotu tonu.
[Fakamatalaga o te Ata i te itulau e 5]
Mai tusitusiga fakalotu katoa i aso mua, ko te Tusi Tapu fua e fakaasi mai i ei te alofa o te Atua
[Fakamatalaga o te Ata i te itulau e 7]
E mateagofie a Kelisiano ‵tonu me e fakatau fakaasi atu ne latou te alofa